أحــــــــلام أختــــــــي ..

السلام عليكم و رحمة الله و بركاته


أنا أرسلت الأحلام على الخاص لأني لم أقرأ أي شرط يمنع تفسير الأحلام إذا أرسلت على الخاص ..


وها أنا أعيد وضعها هنا في الموضوع .. أرجو تفسيرها جزاك الله خير


هذه الأحلام على لسان أختي تقول فيها :


الحلم الأول


رأيت منام بأن أنا و أختي الكبيرة و أمي في غرفة أمي و كانت ستارات الغرفة مسكرة و النوافذ مفتوحة و كانت أختي الكبيرة ماسكة كاس زجاج كبير لونه أخضر و كانت تتكلم عن نورة السعد ما أدري وش تقول بعدين أنا خذت الكاس و قمت أطالع فيه بدقة و شفت وحدة منبطحة على سرير أمي و لابسة كله أبيض و حزينه و مو واضحة كثير سمعت أحد يقول إنها نورة السعد و بعدين رحت عند النافذة و كنت حزينة و شميت ريحة عود صنفي حلوة قلت الله ريحة حلوة و توقعت إن ريحة العود هبت من نورة السعد و استانست و بعدين سمعت أحد يقول إن هي عندها فلوس واجد ما أحد يدري عنها حتى عيالها ما يدرون عنها و لا أحد يدري وين حاطتهم .


نورة السعد إمرأة طيبة أعرفها و هي لا تقرب لي كنت أذهب لها و أنا صغيرة و هي جارة بيت عمي سابقا و كانت تعيش وحيدة في منزلها و يزورها أبناؤها من حين لآخر و هي الآن متوفاة .


الحلم الثاني

حلمت إن أنا و أمي و خالتي قاعدين ندور طريق سوق القيصرية و الوقت ليل و بعدين جات سيارة تبغى تصدمنا و دخلنا عند حارة بيوت قديمة نركض و قلت أنا : غريبة الطريق ما فيه لمبات , و إحنا ماسكين بعض و نركض بعدين وصلنا لمكان فيه سور قصير من حديد مشغول و فوقه قطعة رخام أخضر مع بيج و مع كرة رخامية يطلع منها الماء لكن بدون نبع و الماء ما يصب لتحت السور بس من فوق قالت خالتي : شلون مسكرينه نبغى ندخل ! قلت أنا : كيف مسكرينه .. و كنت بحط يدي على شي لونه أسود و وخرت عنه و بعدين مسكت الكرة و تسلقت السور و دخلنا و صار الوقت نهار و هذا المكان جميل جدا كله فيه من هذي الأسوار اللي فيها ماء و نوافير و ورود كثيرة و أوراق خضراء متدلية على الأسوار و زراعة كثيرة و أصوات عصافير و موسيقى جميلة أول مرة أسمعها و الشمس مو حارة و الجو معتدل و أحنا نمشي كأننا محجوزين في هذا المكان و كان فيه ممر و على كل جانب باب الباب اللي من جهتنا مسكر بـسلك حديدي و الثاني مسكر بقفل و شفنا عبدالمحسن و قلنا له تعرف تفتح هذا الباب ؟ اللي جنبنا .. قال : لا .. و فتح الباب المقفل بقفل بسرعة .. قلت أنا و أنا فرحانه : و الله إنت مو سهل .., و رحنا نتمشى في هالمكان و أنا فرحانه حيل و شفت رمل خذت منه في يدي و نثرته عند أشعة الشمس صار يلمع تماما مثل الذهب و سويت كذا مرات عدة و رحت أرقى على الأسوار قلت في خاطري : يمكن هذي الجنة .. بعدين قلت لا الجنة أحلى من كذا و غريبة الأحساء شمسها حارة و هذي مو حارة ! , و شفت ورقة بيضاء مكتوب فيها باللون الوردي الفاتح مثل الوصية لنورة السعد و قريتها في بدايتها تقول : أنا عندي ذهب واجد بس ما أحد يدري عنه و قالت كلام بس ما أذكره بعدين قالت و هي فرحانة : حياكم الله تعالوا معايا بعدين رديت عليها بشي ما أذكره و قالت لي بمعنى إنها مو معلمتني و أنا أقرى الورقة كأن هي تكلمني أسمعها , و نزلت ما بين الورود و شفت أوراق نبات خضراء مطبوع على بعضها قبضة يد باللون الأحمر و جاء أبوي و هو معصب يقول : كله يتخانقون .. كله يتخانقون .. هذا دم دم , قلت و أنا أشير لأوراق النبات اللي مطبوع فيها اليد : لأ لأ هذا مو دم هذي ورود , قال أبوي : إيه دم دم , بعدين خذت معي من الرمل و ورحنا للبيت ما أدري كيف و قلت لأختي شوفي الرمل يلمع مثل الذهب , و نثرته على أضواء لمبة صفراء لكنه ما لمع مثل ما كان من قبل و صار في البيت غبار منه , بعدين كأني جلست من النوم و قلت لأختي عن وصية نورة السعد و إنها تقول حياكم الله معايا ! قالت لي أختي : يمكن يعني نجي معها في قبرها يمكن الجنة , و قلت لأختي عن إني رديت عليها بشي ( ما أذكره ) .. قالت أختي : أكيد ما علمتك , قلت أنا إيه ما علمتني .


خالتي عمرها تقريبا 60 سنة و لديها ثلاثة أبناء .

عبد المحسن شخص لا يقرب لي و من جيران بيت عمي سابقا و مريض نفسيا و عمره 60 سنة تقريبا .

أختي عمرها 27 سنة - تدرس بمعهد خاص - عزباء .

أمي و أبوي على قيد الحياة .


الحلم الثالث

رأيت منام بأني كنت أمشي في درج و كان في فتحة على جدار الدرج و شفت شخص يغني و يقول : أنا مو مسلم أنا ما أصلي وقفت أشوفه و أنا مستغربة , بعدين سكت و جاء يطالع فيني و قلت له : إنت وش إسمك ؟ ( و كأن أحد يقول إسمه صالح ) , قال لي و هو يبتسم : ليش تبغين تعرفين إسمي ؟ , قلت : بس أبغى أعرف , و لا قال لي وش إسمه , بعدين قمنا نسولف مع بعض بعد كذا تم يطالع فيني مدة و قال : بيضاء حلوة شقراء ( يقصدني أنا ) , أنا خفت شوي و قلت و أنا معصبة : وش تقول , و رد الجملة اللي مرة ثانية و قمت أضحك بإستهزاء , بعدين قال لي : يلا خلينا نروح الكورنيش نتمشى شوي ( و كان خايف أحد يشوفه ) , قلت و أنا خايفة : لا لا .. ماني رايحة , و رحت أركض نازلة من الدرج و رحت قلت لأختي الكبيرة عنه و إني خايفة يجيني و يوم قلت لأختي عبست و قلت لها لا تقولين لأمي , و بعدين أنا أروح و أجي مو عارفة وش أسوي و بعدين سمعت أمي تصرخ و تصيح لأنها عرفت , و قلت أنا : أنا كنت أكلمه مثل أخوي ما أدري وش فيه صار كذا , و رحت أركض لأختي و أقول لها ليه قلتي لأمي و لا ردت علي كأنه بالها مو معاي , بعدين أنا قمت أبكي و مو عارفة وش أسوي و سمعت أحد يقول إن هذا اللي شفته أخو سويرة العويشير , بعدين رحت أصعد بالدرج و شفت الفتحة اللي على جدار الدرج مسكرة بزجاج و كان الشخص هذا يرجف عليها و يطق بقوة بيدينه كأنه يبغى يقول شي , و أنا خفت منه إنه يلحقني و رحت أركض في الدرج أنحاش منه و أنا أبكي .


أمي و أبوي على قيد الحياة .

أختي عمرها 31 سنة - معلمة - عزباء .

( سويرة العويشير ) إسمها سارة و كانت معي في الصف السادس الإبتدائي و كانت تغار مني و تتبلى علي إني مزقت دفترها .

أنا عمري 19 سنة - طالبة متوقفة عن الدراسة من خمس سنوات - عزباء .

إنتهت رواية أختي ..


وشكرا .

طرحك بهذه الطريقه مخالفه لما طرح

ولذلك نعتذر عن تفسير احلامك

ياشيخ أحب أقول لك أولا السلام سنة ورده واجب

( وإذا حييتم بتحية فحيوا بأحسن منها أو ردوها ) شكلك مانتبهت

ثانيا ياشيخ ممكن توضح ؟؟ كيف مخالف ؟؟

( فمن عفا وأصلح فأجره على الله )

ياشيخ أرجو تفسير المنامات جزاك الله خير أنا سألتك التفسير والله أنعم عليك به فلا تردني

جزاك الله الجنة يارب

مووووون:
ياشيخ أحب أقول لك أولا السلام سنة ورده واجب

( وإذا حييتم بتحية فحيوا بأحسن منها أو ردوها ) شكلك مانتبهت

اعتذر منك لتقصيري فهذا وجزاك الله خير لتنبيهك لي

وعليكم السلام ورحمة الله وبركاته

مووووون:

ثانيا ياشيخ ممكن توضح ؟؟ كيف مخالف ؟؟

حاضر
أولاً طرحتى اكثر من حلمين وهذا مخالف

وبما ان احلامك بهذه الطول فيجب عليك ان تطرحين كل حلم بموضوع مستقل

وعليك اختصار الحلم بقدر استطاعتك حتى يسهل تفسيره

وعليك طرح حلم يخصك انتى فهذا الذي نحرص على تفسيره

مووووون:

( فمن عفا وأصلح فأجره على الله )

انا لم اظلمك انتى خالفتى وقد طرحنا النقاط في الشروط عليك وعلى غيرك الإلتزام بها

مووووون:

ياشيخ أرجو تفسير المنامات جزاك الله خير أنا سألتك التفسير والله أنعم عليك به فلا تردني

جزاك الله الجنة يارب

اختى الكريمه انتى من يحتاج لهذا وعليك ان تطبقين الشروط قبل طلبك هذا والمشكله انتى لاتعرفين كم من الوقت قد يضيع في قراءة مثل حلمك بهذا الطول والمشكله انه ليس حلمك

وللمعلمويه إذا كان الحلم طويل يكون تفسيره ضعيف ولا يفسر فيعد من اضغاث الأحلام

وحتى يفسر حلمك اطرحي كل حلم في موضوع مستقل واعتقد عليك طرح حلمين في كل مره يسمح لك فيه

اختى الفاضله ليس بهذه الطريقة تورد الأبل