مكالمه هاتفيه خلتني ما انام الليل .. نوروني شاسوي

السلام عليكم ورحمة الله وبركاته


مساء الخير خواتي


اشلونكم؟؟ عساكم طيبين



راح اقول لكم اللي صارلي من يومين وابيكم تنوروني وتعطوني حل يخليني اقدر انام



من فتره مو طويله وايد يمكن شهر تقريبا .. دخلت غرفتي وحصلت مس كول ( مكالمة فائته )
بموبايلي من رقم غريب واول مره اشوفه .. طنشته وما رديت عليه وانا بطبيعتي انطوائيه شوي
يعني مب اجتماعيه وولا جريئه .. ولمن يجيني اي اتصال من رقم غريب ومن حافظته عندي
بالموبايل ما ارد عليه الا نادراً ولمن ارد اتم ساكته وما اتكلم الا لمن الطرف الثاني ( المتصل )
يتكلم بالبداية .. المهم .. انا طنشت الرقم وما اتصلت مره ثانيه فيه وما ياني اي مس كول منه

من 3 أيام تقريباً او يومين ياني اتصال من نفس الرقم بس بالليل وبساعه متأخره
ولأن الوقت كان بالليل ومتأخر ما رديت على المكالمه وبثاني يوم لمن قعدت الصبح وشفت
الرقم تذكرت ان هالرقم اتصل فيني من قبل .. لأن الرقم كان سهل وللحين اذكره

المهم .. بثاني يوم الصبح وانا بالشغل دزيت مسج من موبايلي على هالرقم وكتب فيه
Who are you? وبعدها بكم دقيقه نفس الرقم الغريب لقيته متصل فيني !!!
انا هني تفاجأت وما عرفت شنو اسوي .. بعدين قلت يمكن وحده من رفيجاتي ومغيره رقمها
وحبت تسوي فيني هالمغلب .. المهم رديت على المكالمه بس ما تكلمت وكنت انتظر الطرف
الثاني يتكلم علشان اعرف هل اهو بنت او ولد .. اللي رد علي ريال وكانت المكالمه كالتالي:-


الرقم الغريب: ألو
أنا: ....... << ساكته ومنصدمه وما رديت بأي حرف
الرقم الغريب: ألو
أنا: .....
الرقم الغريب: ألو
أنا: نعم ؟؟
الرقم الغريب: السلام عليكم
أنا: وعليكم السلام .. ممكن اعرف منو معاي ؟؟
الرقم الغريب: امم انتي ... ( ذكر اسمي ) وهذا رقمج ( وذكر رقم الموبايل مالي )
أنا: ..... << طبعاً كنت متفاجئه ولساني منربط ومو قادره اتكلم .. ريال غريب ويعرف اسمي !!
الرقم الغريب: ألو
أنا : .... بعدها بفتره قلت له: ممكن اعرف منو معاي ؟؟
الرقم الغريب: مو مهم تعرفين الحين .. راح اقولج بعدين .. تبين تعرفين اشلون اعرفج !!!
أنا: ...... << لا حياة لمن تنادي وصلت لأعلى درجات الصدمه وما كنت قادره استوعب حرف من اللي
قاعد يقوله هالشخص .. كان صوته واسلوبه بالكلام يخرع والصوت ما كان واضح او يمكن لأني
كنت خايفه ومنصدمه ومو قادره استوعب اللي قاعد يصير لي ما كنت قادره اسمع كلامه بوضوح
المهم اني سكت وما رديت عليه بعدها بفتره قالي
الرقم الغريب: انا واصلني بلوتوث من زماااان !!!
أنا: ....... طبعاً لحد الحين مو قادره استوعب شنو اهو البلوتوث وهل اهو بلوتوث بأسمي ورقمي
والا سالفه من عنده ويبي يخرعني فيها لأن والله فوقي واثقه من نفسي ومو مسويه شي غلط
فمن وين بيب لي بلوتوث وباسمي ورقمي !!!
أنا: ممكن اعرف منو معاي ؟؟
الرقم الغريب : قلت لج بعدين باقول لج / بصراحه ما اذكر بالضبط شنو قال
أنا : أوكي .. مع السلامه

وسكرت المكالمه فويهه :confused:
بعدها بدقيقه رجع اتصل من نفس الرقم بس ما رديت عليه وحقرته

الحين مرت على هالمكالمه يومين تقريبا والحمدالله اهو ما رجع اتصل وولا دز لي مسج

بس انا مو قادره انام الليل :confused: لحد الحين صوته واسلوبه بالكلام مو قادره انساه
وشنو قصة البلوتوث اللي يتكلم عنه !!!!!!!!! صدقوني بعد مكالمته مباشره تميت ارجف بالشغل
وما كنت قادره حتى اتنفس من الصدمه


معقوله في ناس ممكن تتبلى على بنات لهالدرجه !!!
معقوله توصل بالشباب انهم يلعبون بهالشكل ؟؟؟؟؟؟؟


قولو لي شاسوي والله العظيم اني خايفه ومو قادره افكر
انا عطيت بنت خالتي رقم الموبايل على ان صاحب هالرقم مقربل رفيجتي ولأن زوج بنت خالتي
يشتغل بشركة اتصالات علشان يطلع لي الرقم هذا باسم منو

بس المشكله ان بنت خالتي نسايه وانا اخاف احن عليها وتشك فالسالفه
وهم المشكله الثاني ان هالرقم رصيد مو خط يعني ممكن يكون مسجل باسم دكان او براده
ومو باسم الشخص نفسه


انا ظايعه وخايفه ومو عارفه اشلون اتصرف
ارجوكم ساعدوني .. :confused: