العمه (ام الزوج)التطورات ص4

ما عليج يا بجعه ... لا اتحطين في خاطرج ولا اتضايجين وتمي عامليها بالطيب مثل قبل واحسن عن قبل .....ولا تخربين عليج فرحة مريومه

وربي ايخليلج محمد ومريم ...وماعليه مع الوقت بتعرف غلطها ....انتى مول لا تنبشين معاها السالفه خليها على راحتها ... اسالت عنهم خير وبركه ...ما سالت عنهم مب ناقصهم شي ...صح


خذي الامور ببساطه ...ولا اضايجين ابعمرج...

احسن خليها تلهى عنهم...

عشان ماتدخل في تربيتهم....

موب انا الي كل شخص يتدخل بتريبيه بنتي ....

زوجة راشد:
ما عليج يا بجعه ... لا اتحطين في خاطرج ولا اتضايجين وتمي عامليها بالطيب مثل قبل واحسن عن قبل .....ولا تخربين عليج فرحة مريومه

وربي ايخليلج محمد ومريم ...وماعليه مع الوقت بتعرف غلطها ....انتى مول لا تنبشين معاها السالفه خليها على راحتها ... اسالت عنهم خير وبركه ...ما سالت عنهم مب ناقصهم شي ...صح


خذي الامور ببساطه ...ولا اضايجين ابعمرج...

انا مع الأخت ((زوجة راشد))

خايها على راحتها لا تزعلين و لاتتضايجين و هم يحزنون .....زسبحان الله ناس يتمنون الذريه وناس يتشرطون
واهم شييا الغاليه اهتمي في عيالج و زوجج وخليهم محور اهتمامج الوحيد والله يسعدكم ان شاء و يهديها

حبوبه رضا العات غاية لا تدرك..
لا عاجبهن العجب..
كله واحد..
جدامنا بويه وورانا بويه..
يحمدن ربهن علينا :mad2:

يالغاليه ليش رابطه راسج بلا ويع..........

يعني انتي تترين شي منها........... قومي بواجبج......... صوبها

وريلج ماعتقد مقصر وياج.....................

الغاليه دوم سوي إلي عليج ... بعدين لا تنسين هاي حرمه كبيره وتفكيرها جيه ... لا اتفكرين ولا شي المهم انج ما اتحسسينها انج متضايقه ...وبعدين شو موقف زوجج من الموضوع؟؟؟

الحمد لله إن الله رزقك بالأطفال

الله يخليهم لك ويتربون في عزك ويحفظهم من كل شر ومكروه


هي تعرف إنك أنجبت لاتنتظرين منها إتصال


أنت قومي بواجبك إسألي عنها قولي لزوجك كيف حال عمتي


وليه مازارتني وقولي أبي أشوفها ودي أزورها

طيب بتقولين كيف أزورها وهي مازارتني ولا باركتلي


أقولك أنت روحي يوم من الأيام معاك الأطفال وزوجك وأجلسي معهم

ولاتقولين لها ليه مازرتيني قولي أنا مشتاقه لك حيل

كان ودي أشوفك يوم كنت بيت أهلي ولكن تعرفين الولاده والنفاس

تحتاج راحه .........


وشوفي وش راح تقولك .......


أنت لاتزعلين نفسك ولاتحاتين قومي بكل واجباتك تجاهها


وإذا كان ودها البنت قولي لها هذا ليس بيدي .

شوفوا حبيباتي ..

انا النسبه لي حتى لو متضايقه منها ما ابين لحد واهم شي اهلي .. مع انهم يسالون عمتج ما يت وما اتصلت اقولهم لا اتصلت تسال بس ما قدرت تيي ..

وبالنسبه للي قالولي انتي سيري وودي اليهال انا من ربيت الين اليوم سرت 3 مرات وفي كل مرة اتيي شوي تشيلهم وما تكمل 5 دقايق تشيل البنت الي تبنتها وتسير فوق ..

وعن زوجي برد على سوالج يا شيخة البيت في ولادتي الاولى وايد تضايقت ويوم قلت حق زوجي قالي هي مشغوله ويا البنت الي تبنتها ... قلتله هذا اول حفيد لهم يعني المفروض شالين المستشفى على راسهم .. لكن هاي الولاده خلاص تعودت ..

ولا فالنهاية ايي زوجي ويلومني انتي ما تسالين عن امي .. شوفيها اذا تبا شي ..( مع ان مب ناقصنها شي هي تاشر والي تباه اييها من صوب الكل ) مع اني والله يشهد على انها احيانا تزعل من دون سبب وانا اسير اكلمها ..

تخيلوا انا وعيالي من اسبوع مرضى وكل يوم مستشفيات .. وهي تعرف ولا اتصلت تسال عن اليهال على الاقل انا مب لازم تسال عني ...

على فكرة الي قالوا انها حرمة عوده .. هي مب كبيرة وايد من النوع الي تتعدل وتتكشخ وتمشي ورا الموضه ...

لكن فالنهاية ما اقدر اقول شي .. احرق نفسي من الداخل وما ابين للاحد ..

اليوم بنت خالتي بتولد وما شاء الله اهل ريلها كلهم عندها ... حتى بنات بنات عم الولد عندها ... الله يخليهم وان شاء الله اهل زوجي يصيرون مثلهم ...

اختي لا تنكدين على عمرج ولا تشلين في خاطرج من عمتج
مسكينه مبين جاستها عقده نفسيه عشان ما يتها بنت وعلى
هالأساس تصرفاتها كانت قاسية وياج..وأكبر دليل على عقدتها
انها يتج فرحانه يوم يبتي البنت، حطي في بالج هي مب شريه
عشانها تحب بنتج اكثر من الولد،،،هي مب صاحيه شويه...انا كنت اتحسب ان
الرياييل هم اللي يتخبلون يوم ما ايييهم الولد،،،الظاهر ان
الحريم نفس الشي...ونادر يوم نشوف وحده تتبنى,,
اذكر حرمه عيووووووووووووووز عندها 3 اولاد وكانت
كل ما تشوف كندورة بنت، تصيييييييييح عشان ما عندها
بنت،،،،

انتي احسني معاملتها ولا تتغيرين عليها وخلي معاملتج
أحسن بعد ويا الصغيرونه عشان تتأكد ان قلبج بيتم نظيف
مهما سوت فيج وفي عيالج،،،،،وهي أولا وأخيرا أم ريلج
وعشان خاطره هو على الأقل تحملي،،،،،والحمدلله عيالج
مما بيقصرهم شي يوم هي ما بتهتم بهم او بتفرق بينهم،،
الله يخلي لهم أمهم وأبوهم ولا يحتايون في يوم من الايام
عطف الغير حتى..


ولا تنسين، عمتج واااااااااااااااااااايد متعقده عشان ما يتها
بنت,,,,,,,,,وفي يوم من الايام بتعرف جيمة عيال عيالها

غريبه حماتك

بصراحه عجيب انها تحب الغريبه اكثر من حفيدتها

حبيبتي انتي سوي الي يريح ضميرج

زوريها وسئلي عنها مو عشانها ...لا عشان زوجج وعشان تعيشين مرتاحة

واذا هي ماتبي تسأل عنج وتشوف عيالج ،،،خلي امرج لله

ادعي ان الله يهديها واذا هي تمت على عنادها انتي موخسرانة شي

خلي اعصابج هادية ولاتخلينها تسبب مشاكل بينج وبين زوجج

خلج عادية وطيبة ومردها تستحي من عمرها وسكتي عنها ولا عمرج تردين عليها بشي مو زين

عشان اذا قهرتيها وهي اساسا ماتحبج اكيد بتخبر زوجج وبتسوي لج مشاكل انتي في غنى عنها

اهم شي الله يكون راضي عنج مو مهم رضاها بس مع ذلك حاولي تكونين زينة بس عشان ترتاحين

و الله يهديها

#رومانسية#

المشكله تنقهرين يوم تشوفينها تكلم البنت بكل دلع وتكلم ولدي بعصبيه..
هذيك المرة ولدي ضرب البنت .. تخيلي شو قالتله ؟؟؟

حمود سبال .. كلب .. طبعا انا تضايقت لانه احنا ما نتلفظ بهاي الالفاظ فالبيت اهلي يعصبون ...

يوم دخلنا الغرفه قلت لزوجي سمعت امك شو قالت ..؟؟

قالي عادي .. قلتله لا مب عادي ...ترضى باجر يقول حق ابوك هالكلام .. هذا ياهل هو في سن يتعلم الكلام ..

قتله اباك انت تكلم امك لاني ما ابا اسوي حساسيات .. لكن اذا قالتها مرة ثانيه ما بسكت .. قالي اوكي

بعدنى اقولج ماعليه ... طولي بالج ووسعي صدرج ... ومول لا تكدرين ريلج ولا اتزعلينه ....وبخبرج بشغله .. انتى دوم اسالي عنه امه وزوريها حتى لو انتى ساكنه وياها في نفس البيت .. زوريها ايلسي وياها واضغطي على اعصابج ....استحملي اشوى بس ... والله يا بجعه بتكبرين في عين ريلج .. وبيقول في خاطره مع تقصير امي ورمستها بس حرمتى مب امقصره وبيشلج فوق راسه .

بعدين حبيبتى بجعه .....عمتج ولو انها على قولتج حرمه مب عوده واتماشي الموضه بعد فيها سن ... وتفكيرها غير تفكيرنا ... انتى استحميلها ودايما قولى فخاطرج عشان ريلي ......

وشي ثاني ادري رمست وايد بس استحملينى :) انتى اعطفي على البنيه اللى متبنيتنها عمتج ... ويوم بتشترين شي حق اليهال اشتريلها ....يمكن هالشي ايحنن قلب عمتج على عيالج .....ولا تنسين انها يدتهم وماعليج من اليدات تراهم ولو يقسون مرات بس يحبون عيال عيالهم ... انا عمتى مول ما ادانى حشرة اليهال ويوم ايوون عيال عيالها والله يا بجعه مرات اتروغهم واتقولهم سيروا العبوا فالحوش ... بس خل شي يستويلهم بتشوفينها اول وحده تنقز وتسمي عليه واتسكتهم ......



الله يهديكم ويسعدكم

السلام عليكم ورحمة الله وبركاته
اختي بجعه
انتي خذي الامور من زاويه ثانيه
يمكن ام زوجك كانت عن جد من زماان نفسها في بنت ومحرومه من البنات لأن خلفتها كلها اولاد ماشاء الله تبارك الله
فطبيعي جدا أنها لما تبنت البنت حتحبها وتموووت فيها لأنها عوضتها من الحرمان وكمان والله جزاها الله ألف خير أم زوجك لأنها تبنت البنت لأنها تعتبر يتيمه البنت يعني والله حرام المفروض ماتقارني معاملة البنت بأولادك الله يخليكي لهم أولادك لو جدتهم ما اهتمت فيهم الحمد لله عنهم امهم وابوهم وان شاء الله يتربوا في عزكم وحتى قصتك يوم ما ولدك ضرب البنت يعني لو أهي تكره أولادك وما بتحبهم كان التصرف الطبيعي أنها تضرب ابنك لكن اهي سبته وشتمته وفي ناس عندهم مثلا كلمة (كلب) شيء عادي الناس يختلفوا مو كلهم عندهم نفس الطباع
وحتى لو ام زوجك مابتهتم فيكم والله المفروض تفرحي لانو مابتتدخل في أموركم وانتي عامليها بإحترام وعيشي حياتك وماتنكدي وتعصبي هو العمر كم فيه عشان الواحد يعصب على كل شي

تحياتي
سالي

الله يعينج الغاليه

والحمدلله انتي مب محتاجه لها

اهم شي اها ما تضرج

وسوالف اليهااال هذي تصير.. حتى لو ولدج احتك في اي حد من بره

حتى لو زرتيهم .. حاولي ولدج ما يتقرب من البنت عشان لاسمح الله ما يتضاربون وعمتج تعق عليكم كلام

حتى لو مازرتيها اتصلي فيها سلمي وكلمتين حلوات وخلاص سويتي اللي عليج

ولا ادخلين ريلج في الموضوع ولا شي.. وجذي صدقيني بتكبرين بعيونه ان شاءالله

والله يوفقج يارب

والله هذا يسمونه تخلف واسمحيلي هذيلا زينة الحيا الدنيا واهم شئ امهم وابوهم وخلاص واذا هيه تباهم بروحي بتي عندهم بس انتي طلعي عيالج عندها يمكن تحس فيهم

انا والحمدلله مب اني اكره البنت ولا شاله عليها ..

والله الشاهد اني كل ما شريت لعبه ولا ملابس حق ولدي اخذلها مب عشان ارضي عمتي لا والله لانها طفله .. ومالها ذنب .. بس تخيلوا شريت مريحانه من بيبي شوب وحده لولدي ووحده للبنت .. تخيلوا شو سوت يات وحطت المريحانه جدام باب حجرتي الحين كملنا 3 شهور والمريحانه طايحه مثل ما هي .. وفالنهاية قررت اني اشيلها واييبها بيت قوم امي احطها فالحديقه .. واذا زعلت هذاك الدرب الجدران وايد فالبيت ..

وبالنسبه للخوات الي قالوا شي طبيعي بتخاف عليها .. مب لدرجه انها تفرق والله يوم اشوف ولدي واقف من الصدمه انها تعصب عليه وهو فيه صيحه الود ودي اذبحها .. انا والله يوم اشوف اي ياهل في هالموقف قلبي يعورني عليه .. حتى لو مب عيالي ..

وما اظن اي وحده جربت الامومه قلبها يطاوعها تشوف ياهل على هالحاله وتسكت .. خاصتا ان في سن ما يفهم فيه ...

يهال يلعبون ويتضاربون ..سو وات .. ياما البنت ضربت ولدي يوم صغير .. كنت اطنش وما كنت اقول شي مع انها كانت في سن ولدي الحين ...(للعلم ان هي اكبر عنه ب 5 شهور )

اولا الحمد لله على السلامه وتتربى مريومه واخوها بعزكم انشاء الله
بالنسبه لام زوجك اتتوددي لها وصدقيني مع الايام راح تفهم بعدين حاولي تقربين اليهال لها مثلا تشترين لها هديه وتكتبين عليها ان عيالج اهما اللي شروها حق يدتهم ولاتعبين نفسج وديري بالج على روحج يالغاليه ومثل ماقال الرسول عليه الصلاة والسلام تهادوا تحابوا










ولاتنسين ان اهي ام الانسان اللي حبيتيه فهذا بحد ذاته يحتسب حسنه بحد ذاتها
والله يألف بين قلوبكم
لجل عين تكرم ألف عين

والله غريب امر اهل الزوج يبنا صبي موعاجبهم يبنا بنوتة بعد موبعاجبهم احسن شي مانيب ولاشي
ونهتم بعمرنا ونريح ونرتاح