ابني والطفل القادم

هلا ماما حسون ، اخيرا رجعتي لنا في ركن الطفل على العموم ويلكم باك.

أنا للحين مو متهيأة نفسيا لاستقبال طفل جديد، وما عندي الا نور الله يحفظها يعني اللي عندهم خبرة في الموضوع بيفيونج اكثر, بس انا اللي اشوفه انه مثلي الاهتمام على الطفل الاول لانه يفهم وبيتحسس لو ركزتي اهتمامج على الطفل الجديد.

الله يعينج خيو وتردين بالسلامة يا رب.

أهلا ماما حسون وينك عنا من زمان... يله هانت مابقى شي..

آنه لحد الحين ماجربت وضعك أن عندي طفل وبيشرف طفل ثاني بس من تجارب الأخوات اللي أعرفهم ومروا بهالتجربة ماعليك الا أنك تشترين هدية كبيرة وتغلفينها وتاخذينها معاك المستشفى، ولما يشرف حسوني قولي له شوف أخوك يهديك هذه الهدية يعني يكون يحبه ، وطبعا لما يكون بالمستشفى معاك خليك مهتمه فيه ولا تحطين كل إهتمامك بالنونو الجديد..

طول ماأنت في بيت أهلك خل أحد يساعدك بالنونو وأنت أعطي إهتمام لولدك يكون مايتأثر ويغير..

في شقتك دائما كرري أمامه، لما يكبر أخوك بيلعب معاك الكرة،، بنشتري لكم ملابس مثل بعض والناس بيقولون عنكم حلوين ومن هالكلام....

الله يقومك بالسلامة ولا تنسين تبشرينا بالولادة....

السلام عليكم اختي ام حسون
انا بعد ام لطفين انا يوم ولدت في طفلي الثاني ولدي كان عمره سنة و5 شهور انتي حسون ماشاء الله عليه بيكمل ال3 سنين يعني حسون ريال عاقل بس اذا انتي عرفتي تتصرفين صح من البداية

اختي الحبيبة انا ولدي يوم كنت حامل باخته كان عمره 9 اشهر بس مع ذلك كنت اهيئة كنت اقوله هني نونو عطه بوسه واخليه يبوس بطني واقوله سويله حبيبي ويحضن بطني

وعقب يوم ولدت يابوه عندي المستشفى ولانه كان صغير وماستوعب ومانتبه على اخته او مادخل الغرفة

عقب سمع صياح ياهل وقعدت عيونه ادور المصدر عقب شاف شي يرافس فوق السرير وكنت منومتنها حذالي حسيت نظرات غريبة ارتسمت في ويهه

عقب عى طول اداركت الموقف وخليت ابوه يرفعه عندي وحضنته وبسته وهو بعده يطالع النونو وقلتله هذي اختك وين حبيبي النونو عطها بوسه وخليته ايحبها ونيمتها على حضنه

اول ماطلعت من المستشفى سرت بيت ريل اهلي عسب اخذ ولدي ولانه كان مشغول مع اليهال ما انتبه عليها وايد بس كان وايد مشتاقلي وكل شوي يحظني ويبوسني
بس لما طلعنا من بيت العم وسايرين بيت اهلي لاني بقعد هناك فترة الاربعين كانت البنت في حظني وكنت جالسة في المقعد الامامي وهو كان في الكار سيت وره وسمع صونها هي وتصيح وانتبه انه هذي المخلوقة لحقتنا لين هني وقاعدة في حظن امي وانا ورة بروحي والله انه نظراته كانت تتكلم وانفجر من الصياح عقب تميت اسكته واقوله بس حبيبي شوف النونو وسويله حركات ارفع اخته صوبه لين تم يضحك وسكت

ولازم حبيبتي لما اتشوفينه جاء صوب اخوه ماتصرخين بصوت عالي او اتهاوشينه لانه بيكرهه بالعكس اذا دخلتي الغرفة ولقيتيه صوب اخوه على طول قليله حسون يالله بوسه حق النونو

حتى لو ابدى نوع من الكرهه على الياهل او رفع ايده بيضربه على طول قوليله وين البوسة يالله عطهيه بوسة

وانا ولدي الحمدلله والشكر مابينتله اني وايد مهتمة في اخته واهملته لاهالمولود اليديد مايفهم ولا يغار كثره

والحين بنتي عمرها 4 اشهر وحمود يزقرها لاواخ <يعني شواخ اسمها شيخة >
واذاكنت بالمطبخ او بالحمام تكرمين يدق علي الباب ويقولي ماما لاواخ دييييح

يعني شواخ اتصييح

ودوم خليه في حضنه وصدقيني مابتتعبين وبيستون سمن على عسل

والله يسهل ولادتج واتيييبين اخ حلووو حق حسون

اول شي الله يعينج ويسر امورج الغاليه..

اهم شي حبيبتي تحطينه ف بالج انه ماتفرقين بين المعامله وحسسيه انج مهتمه فيه مثل الياهل الثاني عشان لا يحس باي غيره..
وماعليج الامور بتمشي عكس ماانتي مجهزتنها لانه بتتاقلمون ع الواقع..

الله يعطيج العافيه

مشكوريييييييين يا بنات .. والله انكم هونتوا علي الموضوع وااااايد ..

وفعلا احس نفسي استفدت من تجربة اختي عروس للابد ، ومن نصايحكم وان شا الله تتيسر الامور كلها ..

وعن فكرة الهدية انا حطيتها في بالي بس من الاصل محتارة اذا كنت اخليهم يجيبون لي ولدي المستشفى او لا .. بس دام ان رايكم يقول اجيبه المستشفى فراح اوديه وبجهز له الهدية هاليومين ان شا الله ..


وشكرا :shy:

اممم ياماما حسون... جبتيها على الجرح مثل ما يقولون..

دائماً احاتي ولدي وشلون لازم يكون التصرف الصحيح من جانبي عشان ما يغار من اخوه.. بس تعرفين شيء... احس ان مسألة الغيرة لازم لازم تصير...
يمكن فيه اشياء او طرق تخفف منها .. بس ما بتقدرين تمحينها مولية..

سالفة انج ما تبين ييبون حسين المستشفى لج احسها مو صائبة .. تدرين ليش؟ لأن الولد الحين متعلق فيج بشكل رهيب.. وانتي على الاقل بتقعدين في المستشفى يومين اذا كانت ولادتج طبيعية ( ان شاء الله ) فهل راح يتحمل انه ما يشوفج يومين كاملين؟ عن نفسي تدمع عيوني كل ماافكر ان ولدي بيقعد وبيدورني من غرفة لغرفة .. ماما ماما.. وانا مو موجودة...
وبعدين مرة وحدة.. ما يشوفني الا جدامه ... لا وفي يديني ياهل ما يعرفه و لا قط شافه.. !

على الاقل احسه تمهيد لو زارج في المستشفى ساعة وشاف هناك البيبي. على الاقل تكون عنده فكرة انج ما راح تيينه خالية بدون شيء مثل اول...

هذي شغلة .. والشغلة الثانية..
بما ان الطفل الجديد في اول ايامه كثير النوم.. راح استغل هالفرصة في الكلام واللعب مع ولدي.. اكلمه عن النونو الجديد.. واعلمه شنو راح يسوي معاه اذا كبر.. اسولف وجذي.. عشان ما يحس ان الطفل اليديد سرقني منه.. واذا قعد النونو.. اخليه يشوف شنو يسوي.. واوراويه اعضاء جسمه .. اقوله شوف عنده ايد مثل حسوني.. عنده جذي وجذي.. عشان يتقبل وجوده شوي معانا..

واهم حركة لازم تسوينها.. هي انج تطلبين مساعدة الطفل الكبير لما تسبحين الصغير مثلا.. او تبدلين الحفاضات... ييب الفوطة.. عطني الكيس .. كذا كذا... راح يحس انه مسؤول عنه..

ولدي من النوع اللي يحب اني اتكلم وانا اسوي الغرض.. مثل الشيف هههههههه يعني لو بنظف الكبت.. اقعد اسولف معاه.. اول نطلع الثياب.. ونخليهم بعيد... ليش ماما؟ يرد علي ليش؟ اقوله عن الغبار ... الخ ... وعلى هالمنوال راح اطبق هالشيء مع الطفل الجديد... اي شيء اسويه له اكلم ولدي عنه وشلون اسويه وليش...


بعد فكرة حلوة... نبهوني عليها اخصائيين... وهي لا تطلبين من الطفل الكبير السكوت عشان ينام البيبي.. هذا الشيء راح يحسسه بالغيرة اكثر واكثر... غير انه راح يغربلج مع الطفل الصغير اللي راح يتعود على الهدوء واقل صوت راح يقعده من النوم...
هالنصيحة حطيتها في بالي لأني تأذيت مع ولدي الاولي علمته على الهدوء وقت النوم .. ووقت الرضاعة وبالاخير شيب شعري .. :)

تكلمت وايد مو :) .. في بالي بعد اشياء بس راح اكتفي بهالقدر...

الله يقومج ويقومني بالسلامة يارب ونفرح بشوفة عيالنا...

مشكوووورة جمانة على نصايحج الحلوة .. والله يتمم لنا خير يااا رب(f)

بالنسبة عن المسشتفى انا خلاص اقتنعت ان اجيب حسون المستشفى واليوم ان شا الله بروح اشتري له هدية كبيرة وبقوله انها من عند اخوه ..

انا الشي اللي احاتيه بعد هو ان حسون فوضوي وبيعفس المستشفى .. انا لما اروح لاحد المستشفى ما يقصر شلون اذا جابوه عندي وتم معاي فترة طويلة :sad: اخاف يطردوني :sad:


بنات بسألكم ::
حسون ولدي هو الطفل المدلل عند اهلي واهل زوجي .. بس بعد ولادتي اذا انتقل اهتمامهم للطفل الجديد هل راح يأثر على ولدي ؟؟ اخاف اصلح شي من صوب ويعتفس لي شي من صوب ويكره اخوه لان العايلة مهتمة فيه اكثر منه :confused:


مللتكم من الاستفسارات :shy:

انا متفقه ويه عروس للابد بس نصيحتي انج ما تيبينه المستشفى انا عمر بنتي سنه وشهر وربيت وعمر النونو احين عشر ايام ومن دش البيت لين اليوم مسكين مايسمع غير :نونو تح نونو ككا!
بنتي كانت حمل وديع احين مستويه اسد مفترس احاول اخليها تحبه ماشي فايده ما خليت العاب ما خليت شي والله اترياها ترقد ولا تسير الصاله ويه البشكاره عشان ابوسه !!!!!!!!!!!

مشكورة اختي "امي كل دنيتي " ..

ما باقي شي كلها اياااااااااااام .. الله يتمم على خير ان شا الله :sad:

امس قالولي المجربات من الاهل لين ابتدا عليج الطلق وبتولدين بيكسر خاطرج حسون وااااااااايد وبعضهم قالوا انهم وهم رايحين المستشفى عشان يولدون قعدوا يصيحون على عيالهم وخاطرهم ياخذونهم معاهم المستشفى .. احسها فعلا اصعب لحظة :confused:

الله يقومك ان شاء الله بالسلامه
والحمد لله حسون ماشاء الله عليه مو صغير على انه يفهم
بس يبغى لك تحاذرين في تعاملك معاه لانه احتمال يصير شيطون بهالفتره الجايه
ولد خالتي لما جابت خالتي ولدها الثاني كان الاول بعمر حسون
صار يضرب الاطفال اللي حواليه ومن يشوف امه ترضع اخوه راح تسند على رجل امه
والله يعينك ويصبرك على ذي الفتره


تحياتي

مشكورة اختي foo6a على المشاركة ..

لازم في البداية راح تكون في شوية صعوبات في الموضوع وفي تقبل ولدي لاخوه .. بس ان شا الله تعدي على خير

ادعوا لي بتيسير كل اموري :shy:

بنات .. باقي لي 3 ايام على موعد ولادتي ( 3 \ 12 ) يعني ما باقي شي ..

ادعوا لي بتسهيل الولادة ان شا الله .. وبالهداية لحسون :shy:



وان شا الله بعد الولادة راح ادخل واخبركم عن مغامرات حسون مع اخوه في الايام الاولى والايام اللاحقه ، ويا رب تكون ايام حلوة :gum:

شوفي حبيبتي انا حالتي من حالت عروس للابد حملت على ولدي من كان عمرة 9 شهور ويوم شرفت الاخت طايح فيها تبويس .. حصلت كمن فلعه بس عمري ما ضربته ولا صرخت عليه .. خليج حنونه معاه بزياده .. وانا كان يلعب ومندمج وانا مارة صوبه وشاله اخته وهو مب منتبه احطها عند حلجه ويبوسها بس والله يستانس .. احيانا اغفل عنهم شوي وارجع اشوف البنت ويها مغسول بروان حمود ...

وكذا مرة اختي عصبت عليه لانه فلع مريوم .. فهمتها ان اذا عصبت عليه عشان البنت بينقهر منها وكل ما شافها بروحها بيضربها ... وبيكهرهه

واذا كنا بالسيارة يبا ايي جدام وانا شاله مريومه اردها ورا عند الخدلمه واخذ حمود ..

حاولي ما تكسرين بخاطره عشان الصغيرووني .. ومثل ما قالوا الخوات كلميه وايد عن اخوه خاصتا عقب ما ينولد ..

والله يهون الولاده عليج وتشوفينهم يلعبون ويركضون ويا بعض زي العسل

هلا الغالية ماما حسون
أنا مثلج بعد يعني في اواخر التاسع واتريى اربي على خير ان شاء اللة

وعندي ولد وعمره سنة وشهر يعني انا قاعدة اجهزه علشان ما ينصدم بالمولو اللي بياخذ مكانه ونصيحتي لج وباختصار انج تشوقينه حق اخوه كل يوم يعني لازم اتقولين له وين دادا او كاكا حسب ما تنادينه وبعدين بتلاحظين انه كل يوم يسال عنه ولو تبينه ما يغار خليه يقرب من البيبي ويبوسه عشان تتقوى العلاقة بينهم وما يغار وهذي سهلة ما دام هو حنون ولا تنسين تخصصين له وقت في اليوم تهتمين فيه حتى ما تستوي اي حساسية تجاه المولود اليديد يعني يبيلج ترتبين وقتج مع عائلتج الصغيرة والله يوفقج........

اهلين خواتي بجعة - وردة جورية " الله يسهل علينا ان شا الله " ..

ان شا الله هذا اللي انا نواية اسويه واعدل بينهم <<< ازواج مو عيال :qaq: ههههههههههههه


الله يخليهم لي ان شا الله ويخليلكم عيالكم يا رب :shy:

مرحبا بنات ..

الحين بعد تجربة شهر ونص قاعده احاول قد ما اقدر ان اعدل بينهم واحيانا اميز حسون عن اخوه لكن لا يخلو الامر من وجود مشاكل :sad:

حسون يحب اخوه وايد لكن يغار بعض الاحيان خصوصا اذا شافنا انا او ابوه نلاعب حمود ويبتدي يسوي حركات عشان يلفت انتباهنا حتى لو كانت ضرب حمود :sad: وفي مرات اذا انشغل شوي عنهم وابوهم في الشغل ارجع الاقي حسون شايل اخوه وزين ما يطيح به مثل اليوم :sad:

المشكله اللي للحين مستمرة ان حسون للحين ما يرضى ينام الا بوسطنا على السريرواحنا ننطره لما ينام ونوديه سريره :confused: وللحين يقعد معاي قدام في السيارة ما يرضى يقعد ورا :sad:

بالنسبة عن الالعاب فرحت في البداية لان اذا نقول هذي العاب حسون وحمود كان يستانس وعنده عادي لكن يوم صار عنده اخوه العاب " هدايا " صار ياخذ هالالعاب ويقول انها العابه وما يرضى نقول انها حق حمود بس لانها جديده وفتح معظم العاب اخوه للحين :sad: حتى العاب الاطفال الرضع صار خاطره فيها وياخذها ..

هذا غير انه كل شوي يجي يبوس اخوه بدفاشه واذا كان نايم يقعده من هالحركة :sad:

هلا حبيبتي

اولا الف مبروك على البيبي الجديد

ثاني شي عادي حبيبتي .... لازم تتحملين الطفل لازم يغار

احنا الكبار نغار شلون الاطفال

وان شاء الله يكبرون ويصيرون اصدقاء وتفرحين فيهم

وتشوفينهم معاريس يارب

صادقة bent^cute

الله يعيننا على تربيتهم وتحمل مشاكلهم :sad: