من يكون هذا الإنسان ؟ والى أي فئه ينتمي ؟

السلام عليكم

انا إنسانه مايمر علي يوم الا وأحاسب نفسي على ماأنا عليه

من صح أو خطأ ودائما تكون أفعالي كلها خطأ بخطأ ..

ولكن انا أنسانه راجيه رحمة ربي وأدعوه بالهدايه والصلاح على كل

وقت وحين .. ولكن مع خوفي منه سبحانه الا أني بعيده عنه ..

يعني مفرطه بواجباتي معاه من ناحية الصلاة وصيام القضاء وصيام

السنوات اللي كنت فيها صغيره وماكانو الأهل عندهم اهميه في إني

أصوم اولا الا بالعكس كانو يقولولي أفطري انتي لسى صغيره

وكبرت ومرت السنوات ونا ما أصوم ثم بعدها بديت أصوم كل الشهر

عدى أيام الدوره طبعا ولكن الى هاليوم ولا عمري قضيت شي

من الأيام اللي علي ومع كذا خايفه من ربي ودائما أدعوه بالهدايه

وانه يرحمني برحمته ويقربني منه ..

انا فعلا عايشه في بيت الأمور الدينيه معدومه فيها والحس الديني معدوم فيه

هذا غير الأسلوب والمعامله اللي منفرتني من كل شئ ومبعدتني

عن كل شئ فيه خير وصلاح لي ...

وفعشان كذا انا دائما ادعو ربي بالزوج الصالح لسبب اني حاطه براسي

انه هو المنقذ لي من هالأشياء اللي أنا أسويها ومن هالبيت

اللي انا عايشه فيه وتصدقون يابنات من شوي قمت توضيت

وصليت الفجر ودعيت ربي انه يهديني ويرزقني بالزوج الصالح

ومن كل قلبي بكيت مثل كل لحظه اتذكر فيها ربي وعقابه وأبكي

بحسره على نفسي الأماره بالسوء ومع كذا بمجرد ما أصحى من النوم

كأن شيئاً لم يكن بس بنات انا خايفه من رب العالمين من شوي جلست اقارن

مابين العذاب والنعيم وكيف اني ان طعت ربي وأديت واجباته وفروضه

وأوامره كيف بتكون الجنه مصير كل انسان يكون صالح ومابين النار وعذابها

ولهيبها وجا على بالي على طول البراكين والحمم البركانيه ولهيبها وقلت هذا

البراكين تعتبر ولاشيئ ولا حتى ذره من لهيب نار جهنم كيف ا ذا استمريت بعصياني

وببتعادي عن ربي وين بكون مصيري للنار طيب ليه دام انا الان جالسه افكر

بعقلي ليه ما أتوب وأرجع لربي وش أنتظر ..

يعني انا الله خلق فيني طيبه وحنان وعاطفه وأدب وإحترام وأخلاق بشهادة كل

من يعرفني طيب ليه ماأكمل هالأشياء بطاعة ربي خاصة واني إنسانه والله

العظيم قلبي مايحمل لاحقد ولا كراهيه على أحد حتى لو كان يحمل الأول

فالآن لا والله لأني قدرت اغير من تصرفاتي ونفسيتي خاصة من بعد ماصرت

أفكر برب العالمين وصرت اقول ليه احقد وأكره وأدعو بالضرر على من يضرني

ماله داعي في رب موجود سبحانه مايرضى ان احد من عباده ينظلم او يهان

او يستهان فيه فربي يمهل ولا يهمل من بديت امشي على هالقاعده

ونا مصفيه قلبي تجاه كل الناس طيب معناها حاجه حلوه زين بس هالأمور

مو أهم من الأمر الأكبر اللي هو ربي .. رب العالمين هو اللي بحاسبني

طيب الصلاة اول مالأنسان يموت يحاسبه ربه عن الصلاة وان صلحت فاصلح سائر

عمله وان فسدة فسد سائر عمله يعني لاطيبه ولا اخلاق ولاأسلوب معامله

مع الناس راح يفيدني طيب دام اني عارفه هذا كله ليه ماأتوب لربي وأرجعله

الى متى ماأرجعله الى ان يفوت العمر ساعتها ماينفعني ابتعادي عنه سبحانه

ويكون مقري للنار .. شفتو وش جالسه أقول ترى كل هالكلام اللي أكتبه الان

وتأثري النفسي ببتعادي عن ربي وببعدي عنه فابمجرد ماأصحى من النوم

ولا كأني قلت ولا تأثرت ولا بكيت ليه طيب هل نفسي لهدرجه عاصيه ومصممه على

ابتعادها عن رب العالمين طيب اذا انا نفسي كذا فنا ما ابي ادخل للنار ابي ربي

يرضى عني ياجماعه انا تعبت مع نفسي مليون موضوع اكتبه لما أحس اني مخنوقه

بسبب بعدي عن ريي وتعطوني ردودكم وبالأخير ولا كأن أحد نصحني ولا قالي

كلمه ..

ليه انا دائما ادعو ربي انه يرزقني بالزوج ...اولا ستر وعفاف لي .. ثانيا اني

اتمناه يكون عون لي في أمر ديني ودنياي من أجل آخرتي .. وثالثا ببتعادي عن

أهل بيتنا ومحيطي وانه بإذن الله كونه رجل صالح فمعناها راح أتأثر بصلاحه

لأن هذا اللي ناقصني لأن انا اصلا اعيش في وحده ماعندي أصدقاء قريبين مني

ولا صله بأحد من العائله يكون بجنبي وأتأثر فيه فعايشه في هالدنيا بروحي

عشان كذا منحرفه ومو عارفه اكون مستقيمه مع علمي بخطأي ..

طيب بعد هذا كله انا من أي فئه من الناس أنا هل انا انسانه فيني صلاح

ولا أنا أنسانه سيئه ...

بنات أرجوكم بالله العظيم انكم تدعون لي بالهدايه والستر مع زوج صالح

يكون في زواجي منه صلاح لنفسي واخلاقي وديني وقرب من ربي

عاجلا غير آجل يارب العالمين .. بنات الله يجزاكم خير انا صحيح ماعندي

احد قريب مني اطلب منه الدعاء لي بس انتو اخوات لي في الله ماشفتكم

ولكن تكاتفكم وتعاونكم مع اي وحده بهالمنتدى هو اللي خلاني أكون بهالصراحه

معاكم فلاتخذلوني انا أستغفر الله العظيم اخاف لأني مبتعده عن ربي

انه سبحانه مايقبل دعائي وهذا اللي مخوفني مع علمي ويقيني بقدرته

ورحمته سبحانه فسبحان الله ممكن دعوه صالحه منكم تصادف ساعة اجابه

فيارب ربي برحمته وبمغفرته يستجيب دعائكم لي يارب برحمتك أستغيث

أعني على نفسي يارب ..