عطوني حل ؟؟؟؟؟؟

الجوري4_8:
السلام عليكم
بنات ابيكم تساعدوني بصراحه
انه من تزوجت وانه احب اهل زوجي وزوجي
1. بس مشكلتي ام زوجي اولا اهي هنديه وفيها طبع البخل كثييييييير
وفوق هاي ماعندها صداقات انطوائيه
2. وفوق هاي اي كلمه تقولها فالبيت لاازم تمشي مهم يكون
انه كنت وايد اوكي معاها
بس من ولدت تغيرت علي فقلت حق 3. زوجي يروح لها البيت وياخذ بخاطرها وانه كنت بالمستشفى والده
قال لها يما ليش زعلانه على زوجتي
قالت لان الدعاء مستجاب وقت الولاده وهي مادعت حق اختك بالزواج في هالوقت
المهم اخذ بخاطرها ونهينا الموضوه وتمت تكلمني بنفسيه خايسه بس انه عادي اروح واقعد عندها شوي واطلع
4. وعند اخت متزوجه كل ماتجي البيت تغل علي كلام وكأني ماعرف شي ومو عاجبها شي فيني وكثير تفرق بين بنتي وبنتها وتم تعيب على بنتي عينها ماعرف شلون وخشمها مادري شلون ؟؟؟؟
من هالكلام
المهم اهل زوجي قبل ماتزوج ولدهم ماكان عندهم خدامه
بس اول ماتزوجنا جاب لي خدامه من نفسه
5. المهم صارت هاي الخدامه مثل دنيا اسعد سعيد اللي فالمسلسل
اي حد من اخوانه يبيها تروح البيت وتشتغل له وحق زوجته وعيالها
واخو العود برع البيت مو عايش معانا
بس كل يومين جا خذ الخدامه من غير كلام
او جاب لها ملابس تغسلهم طبعا ملابس اعياله ومرته وملابسه
ومع العلم انها خدامتنا وزوجي يعطيها الراتب المهم تحملت سنه على هالحال وكل يوم اتهاوش مع زوجي على سالفة خدامه وزوجي مايقدر يقول ولا كلمه حق امه ليش انها بتزعل عليه وبتزعل البيت كله عليه المهم يوم القرنقعوه برزت نفسي عساس اروح بيت اهلي وقلت للخدامه روحي بدلي وتعالي
راحت وجاها اخوه وقالها تعالي ودي العيال يقرقعون
من غير مايستأذن ولا يقول تبونها ولا شي
المهم طلعت ادورها الا امه تقول راحت قلت حق زوجي شلون احين من بيشيل اغراضي من بيجي معاي
6. المهم دق حق اخوه عشان يرجع الخدامه رجعها وطلعنا دقت عليه امه وقالت له انت ماتستحي انت مب ريال انت مرتك تقودك .....................الخ واكثر واكثر
7. المهم طردته من البيت وقالت له مابي اشوفك ولا ابي اشوف مرتك ولا بنتك
بس انه رحت يوم العيد وسلمت عليها وطبعا سلمت علي من غير نفس
ولين اليوم ماتكلمني
8. وصرت احس اني ماحب ريلي مثل اول حتى ماخاف عليه ولا مهتمه فيه
ماحس فيه شي يجذبني له
سااااااااااعدونيييي تكفون والله بدعيلها في صلاة الليل اللي بتساعدني واسمحولي طولت عليكم

حبوبتي اتمنى ماتفهمين ردي غلط وتتقبلينه برحابة صدر لأني باتكلم بصراحه مطلقه>اوكي حياتي
رقمت لج بعض النقاط من موضوعج عشان ابسط وارتب الرد...
1. اختلاف الجنسيات وارد بس حظج انج طحتي في إشكال مع الجنسيه الهنديه وبناءً على طبيعة حياتهم ومجتمعاتهم فشي طبيعي ان البخل يكون من سماتهم فالله يعينج ويصبرج اكثر ويقوييج وهالمشكله حلها انج تتجاهلينها لأنج مستحيل تغيرين هالشي فيها بعد هالعمر -اتوقع انها طبيعياً تكون مره كبيره في السن-
2. هالنقطه تندرج بعد تحت النقطه 1 لأنها جايه من مجتمعهم وطريقة التربيه
3. في رأيي ان روحة زوجك لها بدالك انتي هي اللي ولدت عندها رد الفعل بعد انهاء الخلاف والنفسيه الخايسه...وكان من الافضل لو انك رحتي لها بعد ماطلعتي من المستشفى شخصياً وكلمتيها كلام مرأة لمرأة وام لأم
4. هذا تصرف شخصي نابع من اختج اللي ممكن يكون السبب فيه غيره او نقص شخصي-انا ما اقصد تحريضج ضد اختج او الطعن فيها وفي شخصها ولكن احاول افسر تصرفها من خلال خبرتي وتجربتي-واذا كان وجودها وشوفتها لبنتج تأثر عليج وعلى بنتج سلباً فتجنبي تخلين بنتج لمده طويله مع خالتها حتى مايتولد عندها شعور بالبغض او الكراهيه اتجاه خالتها مع مرور الوقت. وبالنسبه لعلاقتج مع اختج: حاولي توطدين العلاقه واخذي اللي في خاطرها وانشالله بتعرفين اللي فيها والسبب ورا هالتصرف
5. كل المشاكل مع الخدامه وروحتها وجيتها محتاجه الى موقف قوي وصارم ولكن في نفس الوقت ودي ودبلوماسي من زوجك وانشالله تنحل المشكله
6. الكلام اللي صار بين زوجك وامه كلام يصير بين الام وولدها وهاذي اشياء طبيعيه تصير في بعض المواقف وانا اشوفها تصير بين امي واخواني وتنحل بمجرد مايضمونها ويحبونها على راسها
7. طردتها له من البيت هي ردة فعل عكسي على تصرف زوجك-مع العلم ان تصرف زوجك مافيه اي شي غلط-الا انها حست انج انتي المسيطره مب هي وهذا احساس يتطور عند بعض الامهات بعد زواج عيالهم والظاهر والعلم عند الله انها تعز زوجك من بين اخوانه اكثر
8. لاتظلمين زوجك معاج بسبب تصرفات امه وحاولي تخلقين له الجو المناسب عشان تتكلمون في الموضوع وتلاقون الحل المناسب اللي ينهي الخلاف
انا طبعاً ماعطيتج حل قاطع لأن الحل لازم يكون نابع منج انتي وبقناعه لأن هاذي حياتج وكل قرار بيكون له اثر عليها وفي حال لو-الله لايقول والله يبعد عنكم كل سوء-تفاقمت المشكله بسبب حل مقترح ما احب اكون الشخص اللي ينلام عليه وينحط في ذمتي
والسموحه على الاطاله والله يفرج عنج ضيقتج انشالله