موضوع للمناقشة والافادة.. ماهي الاساليب والطرق التي كنت تتبعينها ثم اكتشفت خطأها؟؟؟؟

قبل الولادة ومن ضمن احتياجات الطفل، اشتريت له بودرة التلك، او بودرة الاطفال.. كان باعتقادي انها شيء رئيسي... ومهم لجلد الطفل،

لكن اكتشفت انها فقط مجرد رائحة عطرية :)
وللاسف فقد سخرت مني الطبيبة عندما رأت طفلي، وقالت انظري، الى مفاصله خصوصاً باطن الكوعين والركبتين ، وثنايا الرقبة... لقد كانت البودرة متكتلة بفعل تعرقه، رغم اني لم اعرضه للحر الا من باب السيارة الى باب المركز الصحي، وقد كان لديه اكزيما خفيفة، فزودت عليه البودرة من آلامه.. وانا انظر اليه ولا اعرف السبب لما هو متضايق و يبكي؟! كان هذا بعمر الشهرين

بالطفل القادم ما راح استعمل بودرة، كفاية الشامبو واللوشن كلها روائح عطرية وجميلة.. تكفي برأيي..
[line]


استعملت لطفلي حليباً صناعياً لأني كنت ادرس بالجامعة، ولم احرمه من الطبيعي..
وبالطبع هناك مشكلة الامساك لدى من يستخدم الحليب...
تعسرت المسألة حتى وصلت الى حد انه 5 ايام كاملة حتى يتبرز مرة واحدة..
اشارت علينا احدى القريبات بخلط كمية من السكر في نص كأس ماء او كمية قليلة يعني من الماء... وهذا كفيل بأن ( يهّد ) بطنه ويكفيه شر الامساك !


عرفت بعد ذلك ان السكر والملح ممنوعان على الرضع حتى عمر 9 شهور على اقل تقدير...
وطبعاً لما اعرف الا بعد ما رايت من نتيجة فعلي، فقد اصاب الولد اسهااااال شديد من فعلتي به !
وعندما راجعت المستشفى واخبرته بما فعلت.. اخبرني الطبيب وهو مبتسم ان هناك اختراعاً يسمونه تحاميل الجلسرين.. ولا داعي للعذاب الذي عيشت طفلي فيه بدون ذنب :o


[line]

وقت الشتاء.. معظم الاطفال يمرضون وترتفع حرارتهم لأقل نسمة هواء يتعرضون لها..
احيانا كانت هذه الحرارة او الصخونة .. من الشدة بحيث اني اعطي طفلي خافض الحرارة كل 3 ساعات ولا تؤثر فيه ...
فكنت اعطيه الخافض السائل + التحميلة الخافضة للحرارة بنفس الوقت.. وتنخفض بعدها الحرارة..



اكتشفت بعد ذلك ان كل من السائل والتحميلة لها ذات التركيب... يعني يعطون نفس المفعول.. وما قمت به كان خطأ ... لأنه يعتبر جرعة زائدة على احتمال طفلي :(
الحل كان في الكمادات اضافة الى خافض الحرارة



اكتفي بهذه الاساليب الثلاثة... واتمنى من الاخوات ذكر تجاربهن المماثلة مع اطفالهن حتى نستفيد كلنا ان شاء الله...

ماشاء الله تبارك الله تبارك الله بقولها لاختي علشان تستفيد منها لبنتها

فكرة روعة اختي جمانة وانتي ما شاء اللما قصرتي
أكيد كل تجربة امومة يكون فيها الصح والخطأ .. مابين اتباع نصائح الام او نصائح الصديقات وكبار السن
ونصائح الاطباء
ومجال الخطأ مفتوح للجميع حتى الأطباء

حلوة تجاربكم عشان نتعلم منكم .. مسكين حسون كله على راسه
حاله من حالي الطفل الأول يكون حقل تجارب للأم خاصة لو كانت صغيرة في السن

بس اهم شي ان الطفل ما ينضر وينفع اخوانه بعدين لأن الام بتتفادى هالأخطاء اكيد مع المولود القادم

للحين ما جربت الامومة .. بس ان شاء الله يوم اجربها ماراح اسمع نصايح احد .. لا في اكل ولا في علاج لاني من قبل ما احب اتبع تجارب الناس .. خاصة في اعطاء علاج للطفل سواء كان اعشاب او اكل
هذا ما يعني ان بعض العلاجات ما تكون فعالة ومتبعة من سنين طويلة .. بس سبحان الله ما أحب
ولا بعتمد على الادوية بعد اعتماد كلي .. لأن بعض الأطباء الله يهديهم يحبون يصرفون الدوا حتى لو كان الطفل عمره يومين وعنده زكام
أشوف صديقتي هالكة بنتها بالمضاد الحيوي على الطالعة والنازلة والبنت مافيها شي .. برد خفيف عطتها مضاد .. زكام عطتها مضاد
ما تدري ان المضاد قوي على الكبار فكيف بالأطفال !!

راح اعتمد على حدسي .. وبحاول اختار الصح لطفلي

مشكورة جمانة على الموضوع الرائع ويالله بنات ننتظر تجاربكم

موضوع رائع بصراحة........

بالنسبة لي بكتب الأشياء اللي أذكرها.....

كنت دايما أخلي ولدي ينام على ظهره، ومره رجع بكميه كبيييييييييييييييرة، ورجع الحليب في خشمه وفمه وكان بيروح فيها فديته ، بس الحمد لله الله ستر....الدكتورة نصحتني بعدها أن دايما أنومه علي جنب أفضل.......

أول ما يصيح شوي على طوووووول أشيله،أو أقعد أهزه على ريلي، بعدها تعود دايما يبي يكون في إيدي أو على ريلي......

وإذا ذكرت أشياء ثانيه بخبركم...

السلام عليكم ورحمة الله وبركاته

ما شاء الله موضوعك حلو يا جمانة...(f)..

أول شيء بقول ل Ro0o0omy...إن شاء الله تجربي إحساس الأمومة قريب...و تستفيدي من كل خبراتنا فيه...اللهم آمين..تبشرينا قريب...:)


عن نفسي الأشياء اللي كنت غلط أعملها :

1. أول ما مريم تقول آآآ...أركض علطول...و الله مرة أذكر كنت أتحمم و طلعت ركض و كلي صابون...و هذا خلاها دلوعة...طالما هي آكلة كويس و مغيرة البامبرز...يبقى البكاء دلع...او تناديني...بس مش لازم أحضر في التو و اللحظة !


2. عوّدتها تنام جنبي ( بيني و بين أبوها ) على السرير...و قعدت فترة طويلة لحد ما عرفت أفصلها على سرير لوحده...


3. ساعات كنت أظل أرضعها بزيادة...فقط علشان أثبت لنفسي إني أأكلها كويس...و كانت النتيجة إنها ترجع كل الأكل...


4. كان الدكتور يعطيني المضاد الحيوي و يقول لي مدة 5 أيام...و أنا مثلا من ثالث يوم ألاقيها تحسنت...أقوم أوقف المضاد...و بعد اسبوع ألاقي الحالة رجعت أسوأ...لذلك...لما الدكتور يقول المضاد 10 أيام يعني 10 أيام...


5. كنت أخاف أي أحد يشيلها أو يمسكها من أهلي أو أهل زوجي...لذلك بنيت بينهم و بينها حاجز وهمي...لكن الحمد لله إنتبهت لهذه النقطة بعدين...و خليتها تختلط معاهم من غير خوف...لحد ما صارت ما تستغنى عنهم...



و إذا تذكرت شيء ثاني بقوله لكم...:)

ما شاء الله عليك يا جمانة موضوعك حلو ، لا ومحضرة له عدل :clap:

أنا ما نحضرني حاليا بس اهم الشي واللي للحين قاهرني من حالي اني قعدت اسمع كلام كل من ، وكل من جات سوت حالها فيلسوفة علي لين ما صرت في خلط للامور . وفعلا صرت ما اعرف اتصرف ولا في شي.:sad:

فنصيحتي للامهات الجدد ان يحددون لهم طبيبة اطفال من البداية ويرجعون لها في كل شاردة وواردة ولا يسمعوا كلام الناس لان كل طفل يختلف تماما عن الاخر:ok:
مثال تجيني وحدة تقول لي البنية صغيرة كلش ، ليش ما تعطيها حليب صناعي ، تطلع تجي الثانية تقول لي ليش تعطيها حليب صناعي وانت في البيت؟:mad2:

يالله رفعوا ضغطي والشره علي لاني عطيت الكل المجال ان يتدخل في تربيتي الى بنيتي لكن خلاص فهمنا وتعلمنا.

وحرمنا ما نعودها بس ه>ا مو كل اللي قلبي لي عودة معاكم اخواتي .

موضوع رائع ياجمانة،، يعطيك العافية والله يسهل لك ولادتك..

مثل ماقلتوا الطفل الأول مسكين حقل تجارب وهذا اللي صار في عبودي..

البداية يوم كنت نفاس عند أهلي ماكنت آبيه يسمع صوت وهو نايم وأنومه في هدوء مبالغ فيه وماخلي حد من أهلي يدخل الغرفة ،، فتعود على الهدوء وصار أقل صوت يخوفه،، طلعت أفكاري غلط..

ماكنت آحب آخذه مكان جدام الناس لأن كله أحس أن الناس اللي بنروح لهم مايحبون العيال،، فالحين صار صعب انه يتأقلم بسرعة لو آخذه بيت أحد. مادري صح تفكيري او غلط..

مثل ماقالت جمانة،، كنت فاكرة البودرة مهمة،، بس وأنا كنت أحضر دروس الولادة، نصحتنا القابلة أن مانحط للطفل لأنه يضر بصدره،، والحمد لله ماستخدمت البودرة له الا بعد السنة يمكن،، مافيني شدة يمرض ولدي..

هذا اللي يخطر في بالي الحين وأكيد لي عودة....

محتاجه لك.. شكراً عيني على المرور وان شاء الله اختك تيجي تشاركنا وتفيدنا هم بعد

RoOoOmy
الله يرزقك الذريةا لصالحةيارب ما راح انساك من الدعاء في هذا الشهر الكريم.. لكن قولي لي... بما انك الطفل الاول.. عسى بس ما تعورتي من التجارب على راسج؟ :)

Aryam
مشكورة عيوني ع المشاركة... وفعلاً النقطتين اللي ذكرتيهم وااااااايد مهمتين.. ووايد امهات بما فيهم انا وقعنا فيهم... ولا عاد الدلاعة اللي دلعنا فيها عيالنا من يصيحون شلناهم... انا متحلفة ومتوعدة في البيبي الياي ما اشيله مني والطريج ... الا اذا فيه سبب..

بانتظار عودتج اذا تذكرتي شيء اضافي تفيدينا به..

مرموم..
نورتي الصفحة حبيبتي...
ما شاء الله فعلا الاشياء اللي ذكرتيها نقوم بها ودافعنا الخوف عليهم.. ان شاء الله نخفف الجرعة ويصير حرصنا عليهم طبيعي..
ولا تنسينا في حال تذكرتي اي اضافة .. :)

أكبر قلب..
لا تحرجيني.. :o . شسوي لازم انتظر الفكرة تتخمر وتنتفخ اول بعدين افتقها خخخخخ شدراج ..
وعلى فكرة صدق اللي قال : رضى الناس غاية لا تدرك..
صورة سارة مو واضحة.. لو تعدلينها و تقصين صورةالدبدوب بتطلع اوضح :)

مشرفتنا رانيا البحرينية..
شكراً على الاضافات الرائعة.. واكيد احنا بانتظارج حبيبتي..

يعطيك العافية حبيبتي جمانة على هالموضوع المفيد

انا كان ولدي الاول حقل تجارب عن جد خخخ

اول خطا كنت انومه معنا في السرير بيني وبين ابوه وبعدين بالغصب تعود انام في سريره وتخيلي الى يومنا هذا بعض الاحيان يصيح يبي ينام معانا بس طبعا مستحيل اخليه لانه كبير ماشالله(اربع سنوات)

ثاني خطأ كنت اسمح الى اي احد ياخذه وحتى الاطفال لان كنت استحي واخاف ان الامهات يزعلون مني لو رفضت وكان اكبر خطأ لكن تداركت هالخطأمن جذي بنتي مستحيل تشيلها طفلة لاني خلاص تركت الخجل عني خخ

ثالث خطأ اني كنت اضربه طبعا ضرب خفيف على اليد لما يخرب او يسوي شي بس بعدين حسيت انه كان يتأثر وايد وكان يصيح صياح يقطع قلبي فالحمدلله تغلبت على هالعادة السيئة لان التفاهم مع الطفل بالكلام افضل والله يستجيب اكثر
والحين صلحت اخطائي في بنتي الثانية والحمدلله

وهذا اللي يحضرني الحين ولي عودة اذا تذكرت شي ثاني

ما شاء الله تبارك الرحمن عيني عليج باردة حبيبتي ...................:)
انا بعدني للحين 18 سنة بس مشكورة على كل النصائح الحلوة يا حلوة :)

الله يسلمج ويحفظج يارب ويرزقج الذرية الصالحة اللي تقري بها عينج................
سلاااامي وتحياااااااتي :):):):)

موضوع رائع جمانه انشالله بس اولد وتصير عندي خبرة بشارك فيه

ماشاء الله يا جمانة موضوع جدا رائع وأكثر من رائع

للأسف أنا لسه ما عندي أطفال عشان أجرب فيهم

بس صراحة استفدت من كلامكم

الله يخلي لكم أولادكم ويرزق اللي ما عندهم

بنات الخطأ الوحيد اللي لين الحين موقادره اصلحه هو ان بنتي الكبيره 4 سنين تنام بيني وبين زوجي لما كانت صغيره كنت اخليها تنام اقول حرام مسكينه خايفه ولما ظهرتها بغرفه لوحدها انومها في سريرها ولازم تقوم بالليل وتجي عندي على السرير وماقدر اقول لها لا لانها تبكي واختها الصغيره تستيقظ من النوم متخرعه ومب عارفه ايش الحل معاها

وبعد بنتي الكبيره تغار مني على ابوها ماتحب اجلس احذاه ولا اطلع معاه بالسياره لو اقول لها انا رايحه السوق تقولي مع ابوي اقول لا مع السايق تقول اشوه واذا قلت لها مع ابوج بروح تروح له ركض بابا لاتودي ماما خل السايق يوديها واذا طلعنا عنها اتم تصيح لين مانرجع ولحد الحين مب عارفه احل هالمشكله

جمانه مشكوره على هالموضوع وصدقتي بسالفة البودره لاني انا بعد كنت استخدم لهم البودره مكان البامبرز ولما يبولون وانتي بكرامه المنطقه تلتهب عندهم لين ماقالي الطبيب ان ماستخدم في هالمنطقه بودره وبالفعل من بعد ماقطعت البودره ماقامت تلتهب المنطقه عندهم

وكل ماتذكرت شي انشالله برجع اخبركم فيه

حبيبتي جمانة بنتي اسمها نور مو سارة.

الحمد لله اني عرفت بموضوع البودرة قبل لا اولد وما استخدمتها.

صدقتوا بموضوع الدلع انا بعد كنت من تفكر تصيح يعني للحين ما صاحت اروح ركض لا وعلى طول ارضعها، لين تعودت انها تبغى ترضع 24 ساعة والله هلكت. يعني ما كان عندي نظام للرضاعة ولا فترات محددة ولا حتى بريك بين الرضعة والاخرى.

ما ادري ه>ي النقطة لها علاقة بالموضوع ولا لا. بس الي بقوله ان كان خطأ مني اني نسيت حالي وصرت ملكها الخاص اروح السوق علشان اشتري لحالي، اشتري لها وارجع. يعني صدق

ادا دكرت شي ثاني برجع لكم.

بااااااااااااااي