عندما يبدي زوجك رغبته في تسمية طفلتك بأسم والدته .. ويش يكون ردة فعك ؟؟

السلام عليكم ورحمة الله وبركاته ..

أخواتي .. عزيزاتي ..

انا بصراحه .. عندي موضوع واحب اعرف .. ردة فعل كل ووحده فيكم

وودي ألقى مساعده أو مسانده لي من الجميع ...

أنا حامل في أول بيبي .. ( يارب يتمم لي بالسلامه ويجعله سليم معافى وهذا المهم )

ولكن من قبل أن أحمل وكان زوجي يلمح لي لي بأنه اذا الله كتب لي الحمل

هو حاجز اسم للولد والبنت .. وانا ماااااعندي اي مشكله في تسمية الولد

مع اني كان نفسي بأسم معين ..لكن لمح لي كمان انه يريد تسمية البنت بأسم والدته ..

والبنت اللي بعدها بأسم والدتي اذا حبيت أنا ... وابديت اني ماافكر اسمي بأمي .. وهي

على عيني وراسي .. ومافي أغلى منها .. لكن اسمي بنتي لألأ على الرغم من انه اسم امي حلو..

المهم...

بعد كشفي عند الطبيبه اتضح اني حامل ببنت .... وزوجي معلق على موضوع التسميه بأمه ويقول

انها من المعزه لأمه بيسمي فيها ..

على الرغم اني والله أحب امه واعزها مثل امي وهي طيبه معي .. لكن انتو عارفين

اسماء الحريم حق زمان .. ماتناسب هاليومين .. وتلقى كل وحده تدور لبنتها اسم لا صار ولا كان

وانا اسمي بنتي بأسم قديم ومعتق .. والله كل مااتذكر هالسالفه ابكي من القهر

وماني قادره افتح الموضوع مع زوجي .. وكل مالمح لي بالموضوع حسيت العبره تخنقني

وخرجت .. كان نفسي بأسم من هالأسماء الدلع اللي طالعه هاليومين .. لكنه صعقني بكلامه

انا عارفه انه موضوع الأسم جايز يكون شي مجرد قشور وشي عادي بالنسبه للبعض

وانه أهم شي يطلع الطفل سليم ومعافى ورضي لوالدينه .. ودايما احاول اقول مو مشكله

اسمي .. لكن كل مااتذكر اسماء بنات اختي والبنات اللي عندنا بالعيله

حتى أخوات زوجي ولا وحده مسميه بأمها ولا ام زوجها كلهم اسماءهم دلع ...

وفي نفس الوقت ماابغى اعمل مع زوجي عناد ومشكله بسبب هالأسم ..

وأنا حبيت اعمل حركه وحسيت انه انقهر منها .. مره ناديته بأبو .... ( اسم والدي )

وبصراااااحه اسم والدي مو حلو بالمرررره ومرررره قديم

ومره انقهر قالي لأ انا حاجز اسم لولدي قلتله مو مشكله اللي بعده .. اسم ابوي

وراك وراك .. ومامنه مفر مثل مانت حاجز اسم للبنت والولد انا بعد بأسمي بوالدي

فيها شي ولا اسم ابوي مو حلو ومو عاجبك ..؟؟ انقهر مني وقلب وجهه ألوان الطيف

تكفون يابنات لو كل وحده منك بمكاني ويش راح تسوي ؟؟؟