مرت اخوي

مشكلتي يا بنات غريبة شوي ...

السالفه ومافيها ان اختي تهاوشت مع مرت اخوي هواش عادي ...عقب الهوشة راحت مرت اخوي وحرضت اخوي على اختي وعلي وعلى اختي الثانية رغم اني ماسويت لها شيء خير شر ...ما وعينا الا اخوي يهاوشنا ويبي يطقنا ويشهد الله يا بنات اني ما سويت لها شيء لا انا ولا اختي الثانية ,,,وقالنا اخوي ...مرتي تقولكم لا تكلمونها خير شر ...ماتبيكم ...قلنا ابرك الساعات لان احنا ما سوينا لها اي شي (انا واختي الاثنية )...ومرت سنة واحنا متخاصمين ..والحين اهلي يبون يراضون بينا على اساس انها تبي تصالحنا ...

يا بنات انا رفضت هالشيء لاسباب وهي
1- انا ما سويت لها شيء ولا ضريتها وهي حرضت اخوي علي
2- قالت ما تبي تكلمني خير شر لا انا ولا اختي الثانية
3- يوصلني كلام انها تعيب على عيالي وتقعد تتطنز عليهم وتهينهم
4- كل شوي تقطط حجي يسم البدن
والحين تبي وبكل سهولة ترد لنا ,,,انا قلت لاهلي احنا مب لعبه عندها متى ما بغت تخاصم خاصمت ومتى ما بغت تصالح لازم نصالح ...

امي تقولي ان الله ما يتقبل اعمالنا ...وانا الصراحة عندي مبدأ (المرء لا يلدغ من الجحر مرتين )) وهي ضرتني وايد وانا في بعدي عنها اقصر الشر

شرايكم هل انا صح في اللي اسويه ولا لازم نتصالح ...والله يا بنات طول هالسنه اللي احنا متخاصمين ماصارت اي مشكلة ..

انا خاطري اعرف راي الدين في هالشيء شنو


انتظركم وانتظر ارائكم