أكيد تحبن المحاشي مثلي صح؟؟
اليوم يايبه محاشي مشكله والطريقه سهله وما تاخذ وقت في التحضير والطبخ
يالله نبدأ
المقادير:
كوسا، فلفل أخضر، بيليان (باذنجان بأي لون تحبينه)
عيش مصري مغسول ومنقوع في الماي
بصله مفرومه
بقدونس، يليلان (كزبرة) ، شبت مفرومين
طماطه مفرومه
صلصة طماط
فلفل أسود ، كمون
ملح
زيت زيتون أو سمن
ماي ماجي أو ماي سلق الدياي او اللحم لو عندج
الطريقة:
جهزي الحشوة: اخلطي العيش ويا باقي المقادير ماعدا الماجي....
ممكن تضيفين الليمون ودبس الرمان وما تضيفين الصلصه وممكن
بعد تضيفين اللحم المفروم.. يعني الحشوة راجعه لذوقج انتي
نظفي الخضره (احسن شي تكون الأحجام متقاربه )وخرميها مثل الصوره
الحين ابتدي احشي بس بدون ما تضغطين عليها للداخل.. ولا تحشين بالكامل.. لازم تودرين مسافه عشان تعطين المجال للحشوة تنطبخ....
حطي الخضرة عقب ما حشيتيها في جدر مناسب (يعني حجمه مناسب للكمية اللي بتطبخينها)
أنا أحب أوقف الخضره في الجدر عشان ما تطلع الحشوه اثناء الطبخ.. وأحط بينها بطاط
مقطعتنه بالطول أو بصل عشان ما تميل الخضره او تطيح وتطلع الحشوه...
صبي الماجي او ماي سلق الدياي لين النص بس، وأول ما يبتدي يفور وطي الناروغطي الجدر (البخار بيساعد على طبخ العيش)
عقب عشر دقايق تقريبا شلي الغطا وزيدي كمية الماي وممكن تضيفي صلصة طماط وفلفل لو تحبين وخليه يفور لين ما تنطبخ الحشوه نهائيا....
قدمي المحشي بالطريقه اللي تحبينها ولا تنسين تقدمين وياها البطاط او البصل لو كنت حطيتيه وطبعا ويا الصلصه اللي بقت .. لذييييييييييذه
والعااااااااااااااااااااااااااااااااااافيه
وهنيه كبرت الصور عشان أعذبكن خخخخخخخخخخخخخ:dd:
