:₪: شــوربـــة الدجـــاج والمعكــرونة == بالصـــور :₪:

:₪: السلام عليكم ورحمة الله وبركااااته :₪:
اشحالكن غالياتي شخباركن . .. (f) (f)

اليوم يبتلكن طريقة عمل شوربة الدجاج والمعكرونة .. أمي الله يحفظها
علمتني اياها وقلت خلني أجربها ورب طبخة من غير طباخ :dd: :dd:
جربنهاا وان شاء الله تعيبكن .. :shy:



:₪: المقــادير :₪:



نص كيس معكرونة
3 قطع دجاج مسلوقة
ماء سلق الدجاج
شوفان كويكر
1 كيس شوربة ماجي
بصلة صغير + فصين ثوم مفرومين
زبدة
مشروم
ملح+فلفل أسود
2 فلفل أخضر حار
خضروات مشكلة
ليمون + بقدونس للزينة والنكهه
ماء عادي



:₪: طريقــة التحضــير :₪:



1- أولا بنسلق المعكرونة نص سلق وبعدها بنسلق الدجاج بدون اي تتبيله
يعني بس ماء ودجاج بدون ملح او بهارات ..




ملاحظة في جميع المراحل القادمة النار بتكون متوسطة أو أقل بشوي ..

2- نذوب الزبدة في جدر عميق بمقدار نص ملعقة شاي



3- بنضيف البصل المفروم والثوم للزبدة ونحركهم لمدة دقيقة لين يذبلون
ما نبقي نحمرهم ..




4- بناخذ 5 ملاعق كبيرة من ماء سلق الدجاج وبنضفيها فوق الثوم والبصل ..




5- بنضيف المشروم المقطع بشكل تدريجي وبعدها بنضيف ماء عادي حسب كمية
الشوربة اللي تبينها ..




6- بنضيف الفلفل الأسود وبتلاحظون ان الشوربة استوت غامجه من المشروم
والفلفل بس لا تخافون كملوا عادي ..



7- بنضيف أي نوع من الخضروات المشكلة ( اذا الخضروات طازجة ضيفوها آخر شيء
قبل ما ترفعون الشوربة من على النار ب 5 دقايق ) ..




8- الحين بنضيف كيس كامل من شوربة ماجي وبعدها بنضيف قرنين فلفل حار
للنكهه .. وبنغطي الشوربة لمدة 5 دقايق لين تنضج شوربة ماجي بشكل كامل ..





9- بعد خمس دقايق بنضيف المعكرونة والدجاج اللي سلقناهم أول شيء وبنضيفهم
بشكل تدريجي مع التحريك المستمر للشوربة ..





10- مهم::: بنضيف الشوفان كويكر بملاعق أكل كبيرة وبنضيفه تدريجيا
ونتأكد ان قوام الشوربة يكون ما بين السائل والغليظ .. لأن الشوفان كويكر يغلظ
الشوربة ونحن ما نبقيها غليظة وايد .. وبعد ما نضيف الشوفان بنلاحظ ان الشوربة
فتح لونها ..



بنغطي الشوربة مرة ثانية لمدة 3 دقايق وبعدها بنضيف الملح وباقي الخضروات
الطازجة ..




11- بنغرف الشوربة في صحن التقديم وبنزينها بالقدونس المفروم او الليمون
وممكن تضيفون قطرات من الليمون عالشوربة عشان تعطيها طعم خطيييير
بس ملاحظة اذا بتضيفين قطرات الليمون لا تكثرين من الملح في الشوربة ..



هنـــي وعــــافيـــة على قلوبـــكم :flower:



هذا الطبق برعاية مطبخنا

تأليف : أمي الله يحفظها
تنفيذ وتصوير واخراج : ملاك الورد
تنظيف الصحون : عالخدامه