معقولة أكون أسأت تربيته بها الطريقة؟؟؟؟؟

السلام عليكم......
الظاهر مشاكلنا مع التربية والطفل ما بتخلص!!! 
خصوصا مسكين الطفل الأول، التجارب كلها عليه....
بقولكم مشكلتي، وأتمنى أنكم ما تطنشوني لأنها مأزمتني نفسيا......
ولدي فديته عمره سنتين... أحاول دايما أعلمه الأشياء الصح، وأمنعه من التصرفات الخاطئة، من ها الأشياء الضرب.. الحمد لله أقدر أقول أني أبدا ما أضربه..وأعلمه أنه ما يضرب الناس والأطفال، وإذا ضرب دايما أخليه يعتذر وأبين له أن ها الشي وااايد عيب وغلط.....
المهم، أمس كانوا عندي صديقاتي مع أطفالهم، أعمارهم تقارب عمره، سنه و9 شهور وثلاث وأربع سنوات... وهم يلعبون قام واحد منهم (اللي عمره سنه و9 شهور) وضرب ولدي، ولدي أول مرة رد عليه بس ضرب خفيييف، قام هذاك وتم يضربه زياده وبطريقه متواصله، ولدي انصدم وقعد يصاااااااارخ وخاطره مكسوور :sad: ، أول مرة ينضرب جذي وما عرف كيف يتصرف، والولد الصغير يضرب بدون ما يصيح وكأنه واثق من اللي يسويه، بعدها تم متحسس، إذا لعبوا في ألعابه أو حاولوا يشاركونه يصارخ بطريقة تكسر الخاطر..كأنه حاس بالظلم......
وبعدين تكرر الموقف مع الولد الكبير (3 سنين) :confused: يبغي ياخذ لعبة ولدي وولدي مب راظي، قام الكبير ظربه ، أحس ولدي ساعتها انفجر، رد ظربه بس وهو يصااارخ أكثر من المرات الأولى، كأن طفح فيه الكيل :sad: ، ونفس الشي الولد الثاني يبي يكمل ضرب ومب خايف،،
فديييييته كسر خااااااطري وكرهت نفسي، حسيت أني أم فااااااااااشلة، وندمت لأني حبيت أطلعه مؤدب ومثالي..
أحسه يحاول يضرب بس خايف في نفس الوقت لأن يحس أنه ها الشي غلط... حتى لو ضرب يمد إيده مرة وحدة ويتم يصارخ، مو يصيح بس لا مع صرااااخ يعور القلب.....:cry:
معقولة يكون ولدي ضعيف الشخصية وينكسر بسهولة؟؟؟؟؟
وهل غلطت بتربيتي له بها الطريقة؟؟؟؟؟
والله يخليييييييييييكم شو الحل؟؟؟؟؟؟ فيدوني بخبرتكم....
يمكن في منكم يحسون أنها مشكله تافهه، بس والله ما تدرون كيف نفسيتي تعبانة من أمس لليوم