تبين تنحفين 20 كيلو في أسبوع وبطريقة صحية .... حياج الله

السلام عليكم ورحمة الله وبركاااته ....
اشحالكن غالياتي شخبااركن وشخبار الرجيم وياكن ؟؟

تبين تنحفين 20 كيلو في أسبوع وبطريقة صحية

^
^
^

غالياتي قريتوا العنوان حلو صح ويجذب ... ولكن عندي سؤال

شو هالرجيم السحري اللي ينزل الوحدة عشرين كيلو في أسبوع وبطريقة صحية وبدون
أي أضرار وآثار جانبية .. ؟؟!!!

أحب اوجه كلامي للتاجرات وبائعات الاعشاب واللي يستغلون رغبة البنات في النحافة
ويعطونهم سموم مغشوشه ... واللي يشترون منهم ويصدقون هالأكاذيب اللي باينه
وواضحه مثل وضوح الشمس ..

رجاءا خواتي اتقوا الله في انفسكم .. اذا الرجيم الصحي والمثالي يتطلب منا ننزل كيلو
واحد بس كل اسبوع وان كثر اثنين وهذا هو الحل الأمثل لكن عشرين كيلو حتى لو بشهر والله حرام
عليكم .. لا تستغلون البنات عشان كمن ريال او درهم او دينار .. التجارة والبيع امانة
رسولنا صلى الله عليه وسلم أوصانا بالصدق والامانة والعدل في البيع والشراء
ومن ضمن هالشروط توصيل المعلومة الصحيحه عن المنتج ..

والله العظيم أزعل على بنت تبقي تنزل كل هذا الكيلوات باسبوع اشدعوة .. صحتج مب مهمه
حياتج مالها اهمية تبيعينها باقل الاسعار مقابل اعشاب او ادوية الله العالم شو محتوياتها
ومكوناتها وشو اضرارها .. اجسامكم أمانة راح تسئلون عنها يوم القيامه ..

المشكلة ان كل وحده تعرف شو الصح والخطأ ولكن ما ادري ليش هالمغريات توجهكم
للخطأ .. وكل وحده تعرف نتيجة انقاص الوزن بهالفترة القصيرة شو تسبب من تساقط للشعر
ونقص في المناعه ونقص في المعادن وضعف عام في الجسم وصفائح الدم واضراب الهرمونات
شحوب الجلد والاصفرار ومشاكل بالجهاز الهضمي في حالات اكيد قريتوا عنها وصلت للمستشفى وللعنايه المركزة
عافانا الله واياكم ..

رجاءا بنات كلكم متعلمات ومثقفات استخدموا عقلكم وفرقوا بين الصح والخطأ
في الحمية وصدقوني كل وحدة تقدر تحطلها جدول او نظام غذائي واذا ما تعرف
تروح لطبيبة تغذية بتسويلها احلى جدول صحي بلا خرابيط الاعشاب والادوية والخلطات
.. وانا ما بعمم كلامي على جميع التاجرات
لان بعضهن الحمد الله عندهن ضمير ويخافن الله .. ولكن البعض كل هدفهن الكسب المادي
مب مهم البنت شو يصيرلها او انها تعرض حياتها للخطر ..

اتمنى من غالياتي الينا وعذبة الاحساس يعطوني رايهم بهالموضوع لان صدق قمنا نشوف
مواضيع فيها استخفاف واضح ولا مبالاة ويكون في توعية وتنبيه اكثر ..
واتمنى من اللي عندها تجربة مع رجيم خاطئ او اعشاب او ادوية تفيدنا
وتفيد الاخوات وتنبهن يزاها الله خير ..