أحلى ابل باي....
السلام عليكم و رحمه الله و بركاته
اليوم جبت لكم حلا يجنن إن شاء الله يكون جديد عليكم أو على الاقل اتوقع انكم من زمان تبون طريقه سهله و لذيذه له ..
و صدقوني سويته بعزيمه و خللللص علطول و الاشياء الثانيه قعدت و طلبوا مني ضيوفي اعلم شغالاتهم طريقته.. و الحلو إن بامكانك بعد الخبز تحطين الفطائر في الفريزر في علبه بلاستيكيه مقفله جيدا و تخلينها لوقت الازمات لما يجونك ضيوف على غفله.. كذا تسوي ام عبد الله اللي علمتني اياه ادعولها قبلي ههههههه..
و ترا مو بس شكله حلو حتى طعمه يممممممممم اول مره زوجي يدور على صحن و ياكل منه أكثر من حبه
(مو راعي حلا)
المهم اكيد تقولون خلصينا طيب و الله خلاص
بالنسبه للي يعرفونه من قبل اتوقع تستفيدون من الصور و الشكل الحلو .. (واثقه الاخت خخخخ)
و اللي ما يعرفونه بالعافيه إن شاء الله تنبسطون و تشخصون فيه عند اهل ازواجكم خخخ و ضيوفكم
قبل لا اعطيكم الطريقه...
انا ما أحلل أي وحده تنقل أو تسرق موضوعي مثل ما حصل لي بحلا الشطرنج لقيته مسروووق بمنتدى ثاني
و اللي سرقته ما كلفت نفسها تقول منقول نسخت حتى كلامي و سواليفي و صوري اللي تعبت عليها
و كل من دخل دعا لها و مدح ((اخراجها)) و اسلوبها الشيق بالكلام !!
عشان كذا ما احلل أي وحده تنقل موضوعي لاي منتدى الا بالاستئذان منــــــــــــــــــي فقط...
و لا تنسون تدعون لي الله يهون علي و يسهل علي دراستي يا رب و يوفقني لانها صعبه جدا ...
-----------------
مقادير العجينه لمقدار واحد:
كاس و نصف طحين
ملعقه صغيره باكنج باودر
اصبع زبده
6 كيري
ملعقه قشطه
----------------------
مقادير الحشوة:
3 تفاحات
نصف كاس سكر
قرفه
-----------------
فيه شي مهم جدا و هو إن كل مقدار من الحشوة اعملي له مقدارين من العجينه لاني يوم سويتها
مقدارين متساويين بقى نصف الحشوة و زاد و قعد خساره.. واذا جيتي تحشينها جيبي صينيتك قدام التلفزيون و لا سولفي بالتلفون عشان تتسلين..:)
الطريقه:
اعجني العجينه اخلطي المقادير كلها و لا تنسين اخر شي تضعينه دائما عند عجن أي عجينه هو الباكنج باودر
جهزي الحشوة كالتالي:
قشري التفاح و ابشريه و حطيه في قدر و اضيفي عليه السكر و اخلطيهم على نار هادئه حتى يذوب السكر و
اخر شي بعد ما تطفين النار تضعين حوالي ملعقه قرفه (حسب رغبتك) و تخلطينها جيدا.
و لعمل الفطائر
افردي العجينه و احشيها بالشكل اللي تحبينه
ممكن اشكال مختلفه مثلي بواسطه قطاعات معدنيه و تضعين قطعتين على بعض و بوسطهم الحشوة
(لا تكثرين الحشوة عشان ما تطلع برا)
أو انصاف دوائر
أو أي شكل تحبين بس سكريها كويس بالضغط باصبعك على اطرافها عشان ما تنفتح بالفرن....
و رصيها في صينيه للفرن بدون زيت لان الزبده اللي فيها تكفي و بعد ما تنضج من تحت خليها تتشقر على خفيف من فوق...
و بالعافيه على قلوبكم الحلوة ....و باذن الله تعجبكم زي ما اعجبتني حبه وحده ما تكفي حشا ادمان خخخخخ...
ردووووا لي عاد وش رايكم ....عشان اكتب لكم كل جديد ...
