تجهيز عش الزوجية ...ساعدوني

انا خذت كل الاشياء اللي قلتي عليها قبل العرس (يعني في ايام الخطووبه)

بس لاني كنت حاطه في البيت كامل سيراميك
اشتريت قطع سجاد rug لما رجعت من شهر العسل...
وجاتني هديه ثلاجة الماي ...بعد وايد مستفيده منها...

اذا بتسكنين في بيت مستقل
خلصي امورج مالت المطبخ
يعني مثلا خلاط عصير (مكينه و يدوي) \ خلاط الكيك \يعني هالسوالف ,,,


واي شي يطري علي انشالله بارجع وابقولج عنه

الله يهنيج إن شاء الله ..

بس أنتي بتسكنين في ملحق مع أهل ريلج ولا في بيت لحالج ..

عشان نساعدج أكثر ..

والله يوفقج ..

مجنونة...البيت اصلا كله سيراميك ..مفتكه من هالموضوع :)

وادوات المطبخ حسيت اني مب مستعجله عليها ..اول مارجع من شهر العسل بنزل السوق وباخذها واصلا بنرجع على رمضان واكيد افطار الايام الاولى ببيت اهله واهلي يعني بالمره مب شايلة هم ادوات المطبخ الحين كلش

وصح ..السجاد اللي ينحط بالنص لازم اخذ للصالة على الاقل الحين...بضيفه عندي ...تسلمين :)


عندج فكره عن محلات الستائر؟ وين اروح؟؟ يعني محل شغله حلو وافكاره حلوه؟؟

الكحل :) لا بيت مستقل بروحي فديتج ...3 غرف وصالة ومطبخ و 3 حمامات "الله يعزكم"

حبيبتي تقدرين تكنسلين خزانة التلفزيون .... لان الحين التلفزيونات كلها بدون خزانه يعني ياتكون معلقه مثل اللوحه ولا يكون معاها شي مثل الطاوله اللي اسمه مسرح منزلي
انا خذت اللي يتعلق عالطوفه واايد اوكي ووفرت مساحه فالصاله .... انصحج فيه

حلو .. نقدر نساعدج أكثر ألحين ..

ماأدري بيتج كله سيراميك ولا ؟؟؟

لو في زل طبعاً ضروري توفرين لج المكنسه ..

وبخصوص أدوات المطبخ .. على الأقل وفري بعض الأشياء ألحين مثل كوبين حق الريوق طقم صحون صغير ، القلايه الكهربائية ..

ولو تذكرت شي بعد برد على موضوعج مره ثانية ..

الكحل...ايه كله سيراميك فديتج

اهو شاري التلفزيون بس يدور كبت له الحين عشان ينحط بالصاله...استحي اقوله جيب اللي يتعلق :) بس فكرتج وايد حلوه بعد

عندي طقم حلو وكشخه من ذا ون ...متكون من 4 قطع...قلت اوديه معاي...4 اكواب..و4 صحون من حجمين تقريبا

الادوات الكهربائية يابنات ..كتبوها لي...بس مب شاريتها الحين...لاني ابي اخذ كل شىء مره وحده عقب مارجع واهو يقولي جذية بعد...يعني مب مستعجلين عليها ...مثل ماقلت لكم بكون راده في رمضان ومب داشه المطبخ الفطور والسحور عند اهله واهلي

:) بس بسجل كل شىء تعطوني اياه الحين بينفعني بعدين

هلا اختي..


المايكرويف مب محتااايته الحين..


يبيلج طقم ملاعق وشووك من _مركز العالم الجديد-او هوم سنتر

اكواب عصير

طقم سفره من ذي ون..

وترامس للجاي والقهوه

-اعتقد الفرن والثلاجه والفريز-اذا ماياتكم هديه اشتريهم ووواخذي الفريزر الطووولي مب اللي بالعرض يعني نفس الثلاجه..

وصواني..ولاتنسين المناديل والدانتلات مالت التقديم


والصاله: يبي لها طقم كراسي-طاولات تقديم-وسجاده وثرووو ومخدات
ولتنظيف عده النظافه مالت السيراميك

يبيلج طاولة الاووتي+الاووتي..

يبيلج طاولة الطعام..

يبليلج جم اباااجوره..

عشان ان ردتي من شهر العسل على الاقل الصاله اللي تستقبلين فيها الناااس كااامله..


والغساله انصحج بانوسووونيك فل اتومتك..

صح الغساله مهمه ..

أخذي الاوتوماتيك وفي البدايه أخذي اللي أصغر شي اللي بس حق 5 كيلو ..

كل شي تسوي لج وتفتكين .. بس أخر شي أنتي تنشرينهم ..

المياسه :) تسلمين اختي ماقصرتي ...حطيت كلامج عندي بستفيد منه وايد

الكحل :) اهو شايف غساله اوتوماتيك بياخذها بس مدري شنهي ماركتها .... ماتخيل نفسي بانشر غسيل خخخخخخخخ زين مني اذا بفر الثياب فيها خخخخخخخ بل احس من زمان ماغسلت شىء

شكلي بعذبه وياي :) الله يعينه ويعيني على مسؤولية البيت

بغيت أسالج عن التلفزيون هو جابه البيت ولا لين ألحين عندهم ؟؟

لان لو عندهم يزيد عليه ويأخذ لكم المعلق .. صج شي .. وترى في منه الغالي وفي منه اللي سعره حلو ..

الكحل ...لا فديتج خلاص في البيت :)

الغساله بانسونيك 7 كيلو اتوماتيك..تتبطل من فووق اسهل نوووع اختي

لاتاخذين نوع ثاااني

مرحبا الحلم الهادي بيت عامر ان شاء الله

بخصوص الستاير عندج في طريق سلوى محل اسمه فرساي

وبخصوص الزل اخذي من دوحه ستي قول له زل على حرير وايد حلوين وراقين .. وبعد شوفي المير يجوج الزل ناعمين :)

وانا خذت من ذا ون بخصوص الصحون والاشياء البسيطه وبعد خذت من هوم سنتر

وخطيبي شرا الاشياء الكبيره مثل الثلاجه والغساله والفرن يعني هالاشياء لازم تكون موجوده
الميكرويف , الخلاطه

اخذي لج من ذا ون الاشياء اللي تزين السفره عشان تفتحين شهيته على الاكل يعني المناديل ,
شموع , ورد صناعي

انا خلصت كل البيت من الحين بس باقي لنا المكتب بنجهزه عقب

التلفزيونات الحين كلها تجيج كبيره او معلقه او مع طاولتها احس الخزانه موضه قديمه :) وانتي تشاوري

امممممممممممممممم بعد اذا تذكرت برجع لج

شوفي باقولج
ترى تفكيرج نفس تفكيري ايام الخطوووبه


بس ترى الريال ماطلع في بيت بروحه الا عشان يستقل بنفسه
ولا تقولين الفطور والسحور في بيت هلي وهله ترى الرجال يتملل بسررعه ...
غير عنا يالحريم ترى نحب الاتكاليه وايد ... وخاصه احنا يابنات هاليومين ....
واسألي مجرب ...

شوفي انا تساهت وايد
لكن طلع الزواج اكبر من توقعاتي


مثال على خطأ من اخطائي :

شريت فريزر صغيروووني ...
والحين متوهقه من صغره و من الايدام وووين احطه ومن ومن ومن مع اني ما اتقضى كل شهر ؟ ثلاجه صغيره وو مانقدر نشتري الا اقل من كيلو من كل شي عشان ماتنترس الثلاجه !!




صدقيني ترى هالاشياء ماتطرى عليج الحين لانج ماتكونين عارفه شلون هي الحياه الزوجيه ولا حجمها ..



بالنسبه للمكرويف بالعكس اشوفه وايد مهم ... خصوصا ان ع الاقل بيكون حق تسخين الخبز .. طبعا مب كل ريوقكم بيكون من برا يوميا َ!!! بعد هالشي لازم تحطينه في بالج ...
وتوقعي في اي يوم ريلج بيقولج ابي ريووووق ...


اما بالنسبه للاغراض الباقيه ... خلصي امورج من الحين نصيحه
عقب الزواج وخاصه فترة ما بعد سفرة شهر العسل
مابيكون لج خلق حق هالسوالف يالله تباررين ريلج ..حلو تخلين هالايام له ..خاصة انج اكيد ياماا انشغلتي في السوق ايام الخطوبه

انا خليت امي تخلص لي هالسوالف لانها ادرى بالاحسن من الماركات ... شرت لي ( خلاط عصير\خلاط كيك\عصاره حق عصير البرتقال والليمون \عجانه حق لبيتزا ( حق المعجنات بشكل عام)
وطبعا غير المقالي و الجدور و الصحون مالت التقديم وصحون الاستهلاك اليومي ( الميلانين)
ودلة شاي و قهوه ( طقم) استكانات وفناجين ... معالق سكاكين شوك ... فوط للتنظيف ... صواني بايركس باحجام مختلفه ... صواني الكيك ...اكواب الشاي والحليب ... كاسات الماي والعصير ( للتقديم والاستهلاك اليومي ) صواني التقديم ... صواني الغدا والعشا بع باحجام ...





يعني الحمدلله لين اليوم مارحت اتشرى حق شي في المطبخ ... وانا انشالله عالشهر الجاي باكمل سنتين و احس مب ناقصني شي ...الحمدلله ...


وحتى يوم سافرت شهر العسل بعد اترست البيت من كل شي ( اجبان -ملح- عيش-سكر-طحين -كورن فليكس :) - لحم مفروم-شعيريه-)والله لو اقولج تموين البيت كامل الله يخليها لي يارب ويطول في عمرها ..
>>>هالاشيا بس اللي للحين اشتريها بس مب شهري طبعا ...
اما الاغراض الثانيه ما باشتريها الا اذا احجتها ...




وبعد لو تذكرت شي بارجع انشالله :)

وعلى طاري الستاير ألحين موضة الستاير الأورجنزا والشمواه ..

عندج المحلات اللي بشارع الاصمخ مري عليهم وشوفي ..

أسعارهم وايد حلوة وينزلونج بعد ..

اييه صح وفي محل ورا سوق النجاده

بس والله مب متذكره اسمه المهم انه من طخة اللي يسوون الجلسات

ستايره خيااال


خرافيه والله وايد حلوييين


حت انا استغربت من وجودهم هناك
وكان مدخل اورجانزا و شمواااه و حتى فصوص فيها ...!!! بس بشكل راقي و حلو ...

انشالله يارب تحطين في بيت العمر ... :) >>>>اللي فيه عيالج وعيال عيالج

اي اللي فشارع الاصمخ ودي له اي تصميم يعجبج واهو بيسوي لج :)

شغلهم نظيف :)

وعدل كلام مجنونه قطر خلصي امور البيت من الحين :)

المياسه :) انشاء الله بحاول اخليه ياخذها لي

مجنونه قطر :) الله يعين ...بس تراني مب خيخه اعرف اطبخ واعجبج بس المزاج كلش لج عليه هالايام...الله ييسرها انشاء الله

بوصية ياخذ الحجم الكبير :) من الثلاجه والفريزر...تموين البيت ماقدر اخذه الحين احس تو الناس ....انا بسافر شهر فمابغي اخذ اشياء وانا مب مستهلكتها الحين حتى لو هي فترتها طويلة اخذها عقب قريش وجديدة احسن

صح :)؟

بنكي قطر :) صح انا معاج موضتها قديمه...بس استحي اقوله جذية ...خاصة انه اشتط وخذا التلفزيون وبياخذ خزنته قريب فمابغي افشله