اشمعنا ولدي انا ...؟؟

ان شاءالله البنات اللي عندهم اولاد بعمر ولدج بيفيدنج انا بنتي بعدها عمرها عشر شهور..

الله يخليه لج..

وينكم يا جماعه ولا وحده ردت عليه ... .؟؟؟؟

أختي أنتي حاولي تكلميه .. أنا أخوي الصغير
لما كان صغير كنا كلمه كانه ولد أربع سنين وما شاء الله يفهم
حاولي تجلسي معاه وتكلميه وقوليله قول بابا ماما .. تعال ... روح ...
نام... سكر الباب .. افتح الباب .. بتشوفبه راح يتعلم..

الحين ما شاء الله أخوي عمره 3 سنوات ... وكلامه 100% كأنه ولد خمس أو ست سنين
ما شاء الله عليه...

عندي بنت خالتي ولدها أكبر من أخوي بسنتين ... بس ولدها لحد الحين ما يعرف يتكلم
الا بس ماما ... بابا ... سيارة.... رحنا .. جيبا ... لعبة بس
اما اذا جيتي تسولفي معاه بيكلمك فرنسي ما تفهميه....

لما تكوني فاضية كلمي ولدك بكلمات كبيرة علشان بعدين يكبر ويفهم...


أتمنى أكون أفدتك.... ولو بشي بسيط...

هلا اختي لالالا لالالالا تخافي ابدا هذا شي طبيعي جدا جدا وكل طفل سبحان الله يختلف عن التاني
انا ابني تكلم كلشي تقريبا بعمر سنة وشوي

وبنتي هلا عمرها سنة وشهرين تقريبا ولا تتكلم الا كلمات ابدا مو مفهومة وكلمات قليلة

والموضوع عادي جدا بس اصبري شوي وشوفي بكرا كيف من قلهم اسكتو بس ههههه

حبيت اطمنك ولا تخافي شي عادي جدا

حبيبتي لاتخافين ولاتحاتين

انا بنتي عمرها سنه ونص ولين الحين تنطق كلمات بسيطه كلش ماما وبابا ووانا يعني كم شي بس

انا دايما اكلمها وماشاءالله تفهم يعني حاولي تقولين له جيب هذا الشي او وين هذا الشي

وعوديه وراح يجيب لج الاشياء لكن النطق وايد اطفال كملوا السنتين وبعدين تكلموا

الطفل يخزن الكلمات وبعدين فجأه يطلعها لج مرة وحده .. لاتحاتين

بس دايما كلميه ووريه صور الحيوانات وقوليله اسماءهم واصواتهم راح تشوفينه بعد كم يوم

يفتح الكتاب ويقلد الاصوات بنفسه .. وشوي شوي ..

الغلا


انا اخويه عمره 3 سنوات وشهرين توه بدا يتكلم يخربط وااايد ونص الكلام مب مفهوم


المفروض من اتحسين ان الولد ينتبه لج وانتي تتكلمين انج انتي وابوه واللي في البيت يكلمه حتى لو ما يرد

عندي ولد بنت خالتي ما شاء الله عليه عمره سنتين حتى الاغاني يعرف يغنيهن واذا حد قال له قول جذه يقول حتى لو ما يتقن الكلمه


فأنصحج انكم تكونون قريب منه

والله اني احاول وياه انا واختي وامي حتى الخدامه نقوله قول خالي .. عمي .. هات ( يسوي بيدينه بس ما يقول )

للعلم اني يوم اكلمه يفهم وينفذ الي اقوله .. مثلا

يوم اقله لا ما يسوي ..

ويوم ماسك شي فيديه اقوله هات اييب ..

ويوم اقوله يالله برع الحمام يطلع .. ولا يوم اقوله سير الحمام بتسبح يسير ..

وما شاء الله عليه يفتح البيبان (يمسك المقابض ويفتح الباب )

يفتح ويصكر بيبان الكبت مع ان سحابي

ماي الفلتر حاطين على ماي الحار حماية بحيث انج ترفعين القطعه وتهوسين على الفص يصب ماي حار يعرف كيف يستخدمه ..

يفتح باب الثلاجه ..

يفتح ويبند التلفزيون ويغير القنوات .. وفيه فص فالتلفزيون يوم يضغط عليه يوشوش وهو يعرف هالشي وبس يضغط عليه ويشرد ...

يركب وينزل من عالدرج والكراسي ...

بس ما يتكلم.. الا بلغته الخاصه...

باختصار يسوي كل شي سكاتي

لا تحاتين أختى إن شاء الله ماعليه الا العافية،، درجة الكلام تختلف بين طفل وآخر والعادة البنت أسرع من الولد..

أخوي أذكر كان بيكمل السنتين ويادوب يتكلم ، والله كنه خايفيين عليه، وبعدين أنطلق طلقة ، الحين عمره 12 سنه ياكلنه بلسانه..

انت دوم كلميه وأشري على الأشياء ، حطي له البرامج الي فيها صور وينطقون باسم الصورة،، بتشوفيه بيتعلم....

يالله اتريا هاليوم ...

عادي اختي انا ولدي الحين بيكمل سنتين ويقول كلمات بسيطه والباقي كله خرابيط...يعني عادي ..لا تحاتين لانه كل طفل يختلف عن الثاني...

يا عزيوتي لا داعي للقلق

هناكاختلافات فرديه يجب مراعاتها

وبعدين البنت تتكلم قبل الولد

ولمزيد من االمعلومات عن كلام الطفل اتفضلي موضوعي هذا فيه كل شئ

http://www.3roos.com/forums/showthread.php?p=2467724#post2467724

أختي لا تحاتين..أنا ولد أختي عمره 3سنوات وماكان عارف يقول كلمة وحدة..أختي خافت عليه مثلج وسارت تسأل الدكتورة..
الدكتورة طمنتها وقالت لها معظم اليهال يرمسون متأخرين وإذا تميتي توديه المستشفى يمكن الولد يتعقد..خليه براحته وانتي دوم دوم ارمسي وياه..بتشوفيه مع الايام بدأ يرمس عادي..
لا تحاتي ولا تخافي..الحين عمرة 4 وداش بالخامسة والحمدلله كل شي تمام..

عادي اختي لا تخافين الاطفال يختلفون

بس لازم تتكلمين معاه مثل ماتتكلمين مع الكبار

نحن دووم جيه مع اعيال خالتنا واللحين بنت اختي

ماشاء الله عليهم كلامهم حلووو واحسن عن اليهال الباقين

هالشي طبيييييييييييييعي كل على حسب قدرته

لا تحاتين أبد وحاولي تقرين له قصص يشوف الصورة وتقولين له الاسم ترا تنمي ذكاءه بشكل عجيب .. خصوصا القصص اللي فيها صور حيوانات الله يعزكم وكبيره ( معروفه هالقصص اللي تكون من الكرتون) والله يحفظه ان شا الله

عادي يا ختية
ان ولدية نفس الشي و ما خليت دكتور ما وديته سوله فحوصات كاملة وو الحمد لله ما فيه شي بس قالولي مع الايام روحة بيتكلم

و اتريا هاليوم على احر من الجمر

فديتج هذا طبيعي

انا بنتي ما شاء الله عليها رماسه بس ولد اختي اكبر منها ب 3 شهور بس ما يرمس شراتها

يعني يختلف على حسب نمو الياهل و دمته

لا تشغلين بالج

الله يبارك لج فيه يا رب

انه بنتي بتكمل السنه والشهرين بعد كم يوم وللحين ما تتكلم عدل بس كم كلمه بس ما شاء الله عليها تعرف الكلام الي ينقال لها وتعرف الاشياء باسمائها وحتى الاشخاص تعرف اسمائهم بس ما تعرف تقول .

انه احسن ان الشي عادي ومو محاتيه بالمره مع ام بنت صديقتي اصغر منها بشهر وما شاء الله تقول كلمات اكثر منها بواايد بس طول ما السمع عندها اوكي واحسها تفهم فما احاتي

لا تحاتين
باجر بيرمس و بيعور راسج من الرمسه
و بتصارخين
ماماه اسكت شوي و هو اسئلة و صراخ و سوالف عن كل شئ شافه