حلم

فضيلة الشيخ أنا حلمانه هالشهر أني طلعت الحوش الي في بيتنا وكانوا اهلي واقفين في الحوش ولقيت الجو كان متغير وكان مغيم والغيوم تتحرك وكانت نازله شوي عن مستواها و كنت خايفه و حاسه ان الشمس بتطلع من المغرب وبس كنت ساكته واطالع فوق ولا احد فينا كان يتكلم بس شفت القمر كان بدر وعقب فجأه طلعت الشمس من الغرب عقب قلت لهم خلاص قامت القيامة


وبعد اسبوع حلمت اني طلعت الحوش وكنت ابا اثبت لهم شئ عن موضوع اعتقد انه القيامة وفجأه طاح طير من فوق وواحد من اخواني اخذه وركض داخل البيت بس ما شفته بس كان في بالي هالشي ولا اعرف اي واحد من اخواني الي اخذ الطير، وعقب شوي طاح طير ثاني ع الارض ركضت صوبه ومسكته وشفت ان الطير ميت بس لونه مثل لون السما يوم تكون مغيمه يعني رمادي غامج وكان جناحه ع فوق ومتيبس وقلت لهم شفتوا تاكدتوا وعقب قلت باخذه وبحتفظ فيه



وفي اليوم الي عقبه حلمت اني اخوي قال في اجتماع في غرفته وزقر اهل البيت كلهم بس امي كانت في المطبخ ما رضت تحضر الاجتماع لانها كانت حاسه ان اخوي عرس من وراها وجاي يصارحنا وعقب انا قبل لندخل الغرفه شفت في ايد اخوي ورقه مكتوبه عليها كلمة زواج بخط كبير وبلون احمر وعقب اخوي حط هالورقه في جدر وطبخها في ماي قليل وحط عليها معكرونه وانا كنت خايفه يروح الكلام منها وعقب دخل اخوي الغرفه وياب هالورقه معاه وقال الصراحه انا معرس وماخذ وحده يابانيه وهي حرمتي الحين وبتعيش ويانا بس احنا احتجينا وعقب صحيت من النوم



فشو تفسير حلمي يا فضيلة الشيخ بشرني الله يبشرك بالجنه

انا يا فضيلة الشيخ اشتغل وادرس وعزباء وابوي متوفي واخوي هو الوصي علينا وعمري 25 وعددنا ثمانيه ثلاث بنات وخمسة اولاد وتوجد بنت واحد فقط متزوجه والباقين لم يتزوجوا بعد وكلهم يشتغلون والحمد لله وامي ربة بيت