لو عرفت بغيابــك كيــف يصبح زمــانـي ........

يلا بليز


كمليها اليوم ما راح انام الا بالجزء الثاني

بنستناها

والله حرااااام
يعني لازم هالتعذيب؟:sad:

يااااااااااااااربي شكثر أعاني ههههههههههه


بليييييييييز كمليييييي

هههههههههههههههههههههههههههه


لا ياقلبي لاتعاني

راح انزلهاااا الحين

صبري شوي

يالله هذا الجزء الاخيرر

في الطيارة
\
/
فتحت شما يديها بعد ما ماتت من الخوف يااكرها للطيارة
لفت للدريشة وفتحتها شافت كيف الامارات الجو روعـة وخصوصا انه الصبح
شافت الخليج العربي و الارض تحتها كيف خضرا وشوي صفرا
واستانست على الجو
وبعدها ما شافت غير السحب تحتها وهيه بينهن
اضحكت وتمنت لو تقدر تطلع يدها وتمسك السحاب
\
/
ترتيبهم في الطيارة كـ التالي
شما عدالها اخوها حمد
ووراهم ع اليمب الثاني بو شما , سبرة وحميد جدامها , حمدة ,حامد
..
شما كانت تبى حمدة ولا حامد عدالها بس سبرة قالت ماتبى تخليها بروحها
وقالت ان حمد يقعد عدالها..اما هيه ما تستغني على بو شما
وخلته يقعد عدالها
..
لف حمد لها
حمد:شما
شما:هلا
حمد:تبين شي بارد؟
شما:مثل شو؟!
حمد:عطشان وقلت بروح اشوف بيبسي ولا سفن اب
شما:لا هات اليه بيبسي
حمد:ان شاء الله
..
قام حمد من عدالها وراح يشوف شو عندهم
اما هيه استانست عليه مادام انه فكر فيها فـ أكيد يعني بيكون غير عن امه
لكن شو ضمني انا يوم امه مربيتنه اكيد يكرهنيه
خله يولي الحين بس باين عليه انه طيب
يعني اسلوبة وكلامة معايه حتى يوم كنا في المطار كان يسولف عليه
كأنه يعرفنيه من سنين ..
ياربي ليش ما اقربه مني واخليه صدق يحبنيه ويكون اخو اليه؟!
ههه فديته خلاص من الحين بنكون اخوان عن جد
..
تقرب منها حمد وهو يبتسم وشال كوب فيه بيبسي وثاني فيه سفن اب
حمد:يغربله
شما:منو؟!
حمد:المضيف عصب عليه اونه توها طايرة الطيارة مسرع وماعطشنا
شما وهيه تشل كوبها:هو شو خصة؟ يوم يدفعون له فلوس
حمد:هيه والله حمار يابله هزبة بس ماقدرت عليه
شما:شو رايك اروح اواقعه؟
حمد:لا حااالف انا ماتسيرين
شما وهيه تضربه بيدها:علناااتك يالدب
حمد:بعد دب انا؟"ويضحك ويبان تقويمة"
شما:الله مركب تقويم؟
حمد:هيه
شما:انا احتشرت على حمدانووة اني احط ماطاع اونه ضروسي حلوات
حمد:منو حمدانوة؟
شما وهيه فاطسة من الضحك:حمدان
حمد:عمي حمدان؟
شما:هيه ليش مستغرب؟! عادي انا رابيه معاه وهو مثل اخوية
حمد:انا لو قلت له جيه هزبني
شما:هذا انته بس انا غير
حمد:هههه زين بس صدق ضروسج حلوات انا شوفي"ويفتح ثمه"يبالهن يردن شوي ورى
شما وهيه تقرب منه وتشوف:صح بس هن مرتبات وحافظ عليهن
حمد:هه انا ياويلي من امي لو ماغسلت ضروسي ياخي 24 ساعة مراقبة؟
لا في بيت ولافي حجرة ولا في ميلس؟!
شما:كيف مافهمت؟
حمد:الحين انا كبرت وغديت ريال وهيه للحين ماتباني لا احط لاتلفون ولاتلفزيون في حجرتيه
حتى اني اطلع مع ربعي لمكان ماتخليني الا عقب مايتوسط اليه ابوية
شما:يعني ماتروح تتحوط مع الشباب من مول لمول؟
حمد:ههه عشان تقصبنيه اميه؟
شما:ول ماتوقعت امك جيه
حمد:لا بتعرفين شي وايد عنها بس هيه طيبة وماتحب تبين طيبتها
شما في بالها"باااين"
سكتت شما عنه ولفت للدريشة وهيه تفكر
مستغربة من سبرة يعني عيالها بعد الله يعينهم مادام انها تتصرف مع حمد جيه
عيل وين حمدة وحامد وحميد؟!
الله يعينهم عليها عيل شو تسوي بأبويه؟!
..
خذها تفكيرها لبعيد وتمت تفكر في اشياء وايدة لين ماوصل تفكيرها
عند يدتها وبنات عمها
دمعت عينها وهيه تفكر فيهم وبعد شوي رجعها تفكيرها لولد عمها
خالد اللي ماشافته بعد ما عصبت عليه شو يسوي الحين؟!
اكيد قام وتريق وراح للشباب؟!
ولا راح يحوط له في مول ولاكوفي
آآآآه شو اسوي الحين ليش افكر فيه يوم فرقايه عيييد عنده؟!
لفت لحمد اللي كان مشغل الأف أم وحاط السماعات ويقرى مجله..شافت ختها حمدة يايه صوبها
حمدة:شماني بقعد عندكم
شما:روحي عند امج
حمدة:ماريد اريد اقعد عندكم حامد ضربني
شما:زين تعالي قعدي جدامي
قعدت حمدة جدام شما وكان المكان شوي وسيع ويكفيهم وقعدت حمدة تسولف على شما
شما مستغربة من خوانها كيف يكلمونها طبيعي وكنهم يعرفونها من سنين
يمكن لأنهم صغار وعقلهم صغير؟!
بس حمد كلمها وعادي عنده مع انه كبير يعني ثاني اعدادي اكيد كبير
قعدت تسمع سوالف حمدة اللي كان عن المدرسة وربيعاتها وشو سون البنات يوم راحوا
لرحله لدبي وشو سون في القرية العالميه
وشما تضحك على السالفه واشياء صارت لحمدة وربيعاتها
واندمجت معاها وقعدت تسولف عليها
\\
كان يدندن مع الاغنيه ويقرى المجله لف بعيونه للأخته شما وهو يشوفها
كان يحس انها طيبه للأبعد الحدود
اول ماشافها حس بالحنان بالشوق لها مايعرف ليش مع انه ما قد عاش معاها الا قبل سنين
يوم سافروا لسنغافورة
بس عقب تمت شما تتضايق من السفرات وماقامت تسافر وهالشي بعدها عنهم
شافها كيف تضحك وتسولف مع حمدة حس بالامان مادام انها تعاملهم جيه
اكيد بتحبهم وتعامل امهم وكرها لشما مابيبعد بينهم
ابتسم حمد وهو يشوفها تضحك حمدة استااانس وتم يفكر فيها
يعني الحين هالسفرة بتقربنا من بعض وبكون اخو لها واقول لها كل اللي في خاطرية
فديت ختيه انا ههه آآه يالله متى نوصل ونروح ونتكشت؟!
يوم بنروح هناك بوديها للحديقة اللي سرنا لها قبل اتذكر يوم حمدوة طاحت من ع الدرفانة
وصاحت..هههه هاذيج الحديقة وايد حلوة
بنروح لها وبنقعد نلعب معاها
يالله متى نوصل؟! بس يارب بتحبنيه هيه ولا بتكرهنيه مثل اميه؟!
اريد اعرف اميه ليش تكرهها؟!
والله ماعرف بس شموة غير طيبة وتسولف معانا وتعاملها وايد حلو
لكن اتذكر البارحة يوم عصبت وقالت لأميه جب..
ول صدق اميه عصبت من الخاطر
والله ان البارحة شفت الشر والكرة في عيون شموة لأميه
يارب يارب انك تقربنا من بعض
والله مليت من العيشة بروحي اميه ماتعطيني ويه وكل ماقلت لها بطلع تعصب عليه
وماتخليني اروح لحد من الشباب
ولا يوم اروح لحمدوة دخييلكم اف تغلس عليه برمستها البايخه وتتفلسف عليه
ولا هالحامد هههه عليه حركات بهلوانيه عجيبة
كله يتنطط ويسوي حركات مهرج
ومايفكر بعقل ريال..يمكن لأنه صغير؟! المهم الحمدالله ان شموة معايه
وبقدر اسولف عليها..
..
\
/
في البلاد
\
/
خولة:اماااااااااااااااااااااايه
ام خالد:ويع
خولة:حراام عليج والله ملانة
ام خالد:قعدي تحت التلفزيون
خولة:سلووم تكلم ربيعاتها اريد ارووح فديييتج؟!
ام خالد وهيه تلبس دفتها:يالله طالعي اخوج زايد وين وصكي في البيت انا بروح العزيمة
خولة:زين فديتج انتي بس نزليني عن عفروة وعقب روحي العزيمة وانتي راده خطفي عليه
ام خالد:لا قلت لج لا
خولة:يوووووووووة خلاص ماريد اروح
"وطلعت من الصاله وهيه معصبه وراحت لحجرتها ومن القهر صاحت"
ام خالد وصت سلمى على البيت وراحت مع الدريول ويدت شما"حمدة" للعزيمة في بيت عرب
في السيارة
\\
حمدة:فديتها ياربي
ام خالد:ماعليه كلها اسبوع وترد ان شاء الله
حمدة:فديتها ماروم على فرقاها
ام خالد:يتنا اليوم الصبح وسلمت على البنات وردت
حمدة:آه يابنتيه وين دارها الحين؟
ام خالد:ماظني وصلوا لأن الدار اللي بيروحون لها بعيدة
حمدة:يالله يارب توصلهم بالسلامة
ام خالد:آمين
//
لفت حمدة للدريشة والعبرة خانقتنها خلاص هاذي الا ساعات رايحه عنها
عيل لو كملت اسبوع شو بتسوي؟
ولا تنسون المخطط اللي رسمته سبرة في عقل احمد"بو شما"
؟!

في بيت حمدة
\\
كان حمدان توة قايم من الرقاد لف للساعة وانها 11 وربع
تمتح ورد بينسدح على الشبرية
شاف الورقه على الكومودينو استغرب وشلها يقراها وانسدح على ظهرة
اول ماشاف الخط وقرا المكتوب قام بسرعة
شموووة اليوم طياااارتها؟!
ياربي يوووة رااحت عليه نوومـــة؟!
اففففف شو اسوي؟ قلت بروح اودعها يالله ليش ليش؟
شاف عمرة في المنظرة وهو معصب وقف جدام المنظرة ومن الغيض اللي فيه
دز العطورات اللي على التواليت وطاحن على الارض
اللي منهن انكسر واللي سلم
تنهد من غيضة
شو سويت انا هاذي شمووة معقووولة انسى انها اليوم بتساافر؟!
فديتها آآآه فديييتها ساامحيني شمووة
والله كنت اريد اوديج للمطار واودعج بس اف من الشيطان
استغفر الله وراح الحمام وبعدها طلع وبدل ثيابه
تكشخ وطلع يشوف امه ومالقاها
اتصل عليها وكلمها
وعرف منها ان شما تسلم عليه وكانت تبى تودعه بس لقته راقد
عصب وقال لأمه ليش ماوعيتوني
وماعرفت شو بتقول له وهو اصلا ماقال لها وعيني اودع شما؟!
سكر عنها وشاف الريوق في الصاله وما اشتهاه
راح لحجرة شما ولقاها مفتوحة
والكمبيوتر مب كعادته يوم يدخل يلقاه شغال ومشغله الاغنيه وشاله البيت شل؟!
شما كانت تحب تطول على الاغنيه وترتبش معاها وتخلي الكمبيوتر شغال
ابتسم ولف للتواليت اللي يضم العديييد من العطورات مرتبات بشكل جذاااب جدا وفيه برواز
محطوطة فيها صورة حمدان كان متصور في الاستيديو
ومتكشخ وطالعه جنااااان
وكل مايشوف ربيعات شما في البيت يقول لها خلي ربيعاتج يشوفن صورتيه
وهيه تضحك عليه
لف للشبرية اللي كانت مرتبه وشاف البرواز اللي على الكومودينو وشاف صورة شما
مع ربيعتها مريم يوم كانن في الاعداديه
قرب منها وقعد يشوفهن كااان جنااان شكلهن واايد طفولي ابتسم وهو يشوف مريم
ويضحك يوم يشوف شما
حب صورة شما ورجعها لمكانها
كان بيطلع من الحجرة بس شدة ورقة معلقه عند الاب توب
قرب يقرى شو فيها
"
هلا عمووو
اقووول تراني غيرت الباس وورد فـ ادخل من البوابة الثانية سوري
ماريدك تشوف شو سويت يوم برجع ان شاء الله
بفتحها لك اوكي؟!
ولا تتصل تقول خبريني الباس وورد؟! مابقولك تراني
فـ وفر عليك كم اميه درهم عشان ماتفلس ترى المكالمات الدوليه غاااليه على قولتهم
ههههه فديييتك والله بتوله عليييك يالله لاتنسى تسقي وردتيه ع البلكونة اوكي؟!
سي يو سوووون
"
ضحك بأعلى صوووتــــة واستااااانس
\
/
وان جيتني مرت ليالي زماني
ماكنه الا البرق بعيوني يلوح
قبل الجفا عذرك سبقني وجاني
لاتعتذر ذنبك من العام ممسوح
ابني على شوفك صروح واماني
وشلون ماتبني على شوفي صروح
ان كان غيري عوضك عن حناني
ماعاد لي غيرك من الغيد مملوك
\
/
تنهد وهو يشوف الحجرة من حولة"والله ولج وحشة يالدبة"
سكر باب الحجرة وراه وطلع من البيت
وكل الفكر عند اخته "شما"
\
/


في بيت العم
\\
دخلت خولة للصاله وهيه متضايقة
ياربي شموة والله يحفضها راحت انا شو اسوي الحين؟!
ولا المشكله انها اجازة ومادري هالصيف وين بيودونا؟!
هيء هيء والله ملييييت اففف
نت وماعندنا لازم وييين نتحظر؟!
خلونا على جهلنا احسن والله العظيم اففف
ليش ماروح بيت يدتيه واشغل النت هناك؟!
فكرة انا اعرف الباس وورد بشغله وبالمرة بلاقي كل البنات اون لاين اجازة يعني شو بيسون؟
المهم يالله ماعليه من حد بروح لسلامي وبقولها اني بطلع ساعه بالكثير وبرد
اميه مابتي الا بعد الساعة 3 الظهر
يااااي جنااان يالله اروح البس وبطلع
راحت حجرتها وهيه ومستااانسة بالفكرة اللي كانت تدور في بالها وقعدت تغني
\
/
ياحبيب القلب مايكفي دلال لاتعذبني عليك يالله تعال
وانا من دونك اظل بلا حبيب ليه ياحلو الطبع قاسي معاي
\
/
بدلت ثيابها وقالت لسلمى انها بتروح لبيت يدتها مع ان البيت خالي
محد فيه غير الخدامة وبالرغم من هذا لازم تروح ويين بتشغل النت وماتبونها تروح؟!
..
في الطيارة
..
بعد ربع ساعه سوالف مع حمدة عصبت سبرة وعلى طول نادت بنتها عشان
تقعد مكانها لأنها حست ان حمدة بدت تسولف مع شما
يعني انها بتتعلق بها وتخاف حمدة تصير مثل شما؟!
لفت شما لحمد اللي لقته هو بعد ملان وساكت
شما:ملان؟!
حمد:نسيت ايب القيم بوي معايه
شما:قيم بوي؟!
حمد:ليش؟!
شما:غريبة انته كبرت على هالسوالف؟!
حمد:هههه زين حشى اللي يسمعج يقول انا الحين طايف العشرين؟!
عمري الا 13 بدخل 14 سنه
شما:اها
حمد:عندي سوني 2 وافلامها عجيييبه
شما:وانتوا شو تحبون غير افلام المضاربة ولا السيايير او الكورة؟!
حمد:لا انا ماحب غير المغامرات والعب بالكورة والسيايير شوي بس احب المغامرة
احب استكشف والعب بمهارة
شما:يا سلااام يابو المهاااره انته
حمد:صدق ماجربتي؟!
شما:الصراحة لا ماقد لعبت بالسوني
حمد وهو منصدم:لاسوني 1 ولا سوني 2؟!
شما:هيه لأني كنت صغيرة وماعرف وبعدين حمدان ماكان اييب هالاشياء يادوبك
يلعب بالسياير اللي عنده في البيت
تصدق حجرته قبل كانت متروسة سياايير وجنود
حمد:هههه مال اول
شما:ادري بس كنت احب العب بسامانه وهو يعصب ويخبر امايه..اوه قصدي يدوتي
وتقوله برايها هيه ختك ومحد يلعب معاها وهو يرد ويلعبني
حمد:الله الظاهر انج عشتي طفولج مع حد؟!
شما:الصراحة طفولي احلى ايام عمري مع ان اميه توفت الله يرحمها بس تدري
يدتيه فدييتها واايد تحبنيه وعمي بعد اللي اصبحت مثل خته
وغير هذا عيال وبنات عمي عدال بيتنا وكله مع بعض
حمد:عيال عمي؟!
شما:ليش ماتعرف ان عندك عم؟!
حمد:الصراحة هيه بس اتحسب عمي ماعنده عيال
شما:شوووة؟! محمد وخالد وخوله وسلمى وزايد منو عياله؟
حمد:معرف ولا واحد منهم
شما:ليش؟!
حمد وهو يحس بالاحراج:اولا لأن اميه ماكانت تخليني اروح مع ابويه لأي مكان وخصوصا بيت يدتيه
وثانيا لأني ماحب اختلط دوم معاهم يمكن شفت محمد في بيت حد من الشباب
لكني ماكنت اعرف انه ولد عمي
شما:ياربي شو هذا؟! غريبة الصراااحة
حمد:شموة ممكن اقول لج شي؟!
شما:شو؟
حمد:شوفي انا الصراحة من اول ماشفتج حبيتج والصراحة الصراحة
اريدج تكونين ختيه مب بالاسم
لا اريدج تكونين ختيه يعني تسألين عنيه وتسولفين معايه
وعندي كلام وااايد ودي اقوله لحد انتي ماتعرفين باللي في بالي
ولا تعرفين الحياة اللي عشت فيها بس شموة والله ودي اقول لحد من اللي في قلبيه
صح انا عايش عيشة يحسد عليها بس شموة
محد محد عنديه اسولف عليه لا ابو لا ام ولا خوان
صح عندي ابو بس وينه كله مشغول ويروح ويرد يوم ايي بسولف معاه يقول بعدين بعدين
واذا ييت بروح معاه لبيت يدتيه ولا عمي قالت اميه لا مايسير
زين اميه موجودة بس ماقد اهتمت اليه قالت خلاص انته كبرت واهتم بعمرك
زين سأليني تغديت ولا تعشيت؟!
شي يعورك ولا شي ينقصك؟!
زين على الاقل تعالي وسولفي معايه كأي ولد يسولف مع امه؟!
خوان كلهم صغار ومابيفهمون اللي في قلبي ولا شو انا بقوله
شموة والله العظيم من شفتج في بيت يدتيه ذاك اليوم وقلبي متعلق فيج
شمووة اريدج تكونين ختيه صديقتيه اللي تبينه
لكن المهم انج ماتنسيني
شما وهيه منصعقة بالكلام اللي انقال لها ماتعرف شو تقول ابتسمت له
شما:فديتك تصدق ماتوقعت ان لك قلب جيه ياحمد
حمد:احم اعجبج انا
شما:هههههههههه
وقفت سبرة فوق راس ولدها:حمد
حمد:لبيه
شما وهيه خايفة"متى يت هاذي؟"
سبرة:تعال عدالي اريدك
حمد:ان شاء الله
رجعت سبرة مكانها وهيه تفوور من الغيض خلااص معصبة توها تسولف مع حمدة ومكيفه معاها
والحين تتكلم مع حمد ويسولفون جييه لا والله ماعليه ياا شمييم اراااويج
..
وصل لها حمد وهو مستغرب شو تبى ؟!
قعد عدالها لأن ابوه قام للحمام
حمد:هلا اميه؟!
سبرة:مستااانس يعني قاعد تسولف معاها؟!
حمد وهو مستغرب:منو؟!
سبرة:ومنو ان شاء الله قاعد ترمس معاه مب هالجلبة شمييم؟!
حمد:بس يا اميه هيه ختيه وعادي ولا حرام الواحد يكلم اخته؟!
سبرة:شووف لو اشووفك تتكلم معاها وتسولف وتضحك ياويلك سامع؟
حمد وهو مفتشل:مااايه زين شو فيها انا ماسويت شي غلط
سبرة وهيه خلاص معصبة:انا قلت لك لا تكلمها سامع؟!
حمد:ان شاء الله
قام حمد وهو معصب على الاخير"شو يعني من بعد مالقيت اللي اسولف معاه
تقولين لي ما اكلمها زين ليش هيه ماسوت شي؟!
يالله شو اقول لشموة والله لاترمسين معايه امايه قالت لاترمسها؟!"
وصل حمد لمكانه وهو ساكت وباين انه متضايق سكتت عنه شما وتمت تشوفه
كان صدق متضايق لف ويهه عنها وتم يشوف الناس
"يارب يارب ماتكلمني والله استحي اقول لها لاتكلميني بس .. الله يسامحج يا امايه"
..
شما"غريبة شو قالت له خلته معتفس جيه؟!
اكيد واجعته شو يعني بتسوي به ؟؟! آه الله يعينك والله ياحمد بس جني سولفت معاه
واايد؟! وقعدت اتكلم معاه كني اعرفه من سنين؟!
لكن حليله والله محزنني عايش معاهم وكنه عايش بروحه ؟!
آه الله يسامحج ياسبرة باللي قاعدة تسوينه في عيالج"
\
/
في بيت حمدة
\
/
وصلت خولة وهيه مستاانسة وعلى طول لحجرة شما
شغلت الاب توب ودخلت من البوابه"وهيه طبعا تعرف الباس وورد"
ودخلت المسن وهيه شاقه بالحلج ومستااااانسة
لقت حوالي 5 اون لاين من ربيعاتها حطتهن في محادثة وحدة وقعدت تسولف عليهن
دخلت للمنتدى وكانت لها رساله من عضو من المنتدى
استغربت منه"هذا ماجنه اللي كان يباني اسوي له توقيع وعقب تواقعت معاه؟!"
فتحت الرساله وكانت من عند عضو لها سالفه معاه
كانت وايد تتواقع معاه وتستوي مشاكل بينهم ويوم قال لها يبى توقيع ماطاعت
عصب عليها وقعد يسبها ويطرش لها رسايل
وآخر مرة كانت من 3 شهور مطرش لها يعني هالسالفه جديمة
استغربت وفتحتها
\
/
السلام عليكم ورحمة الله وبركاتة

هلا ختيه**********
شحالج؟!
مناسبة هالرسالة اني اريد استسمح منج عن اللي صار
شوفي ادري انا ماستحي على ويهيه
بس صدقيني مادري شو استوى بيه يوم كنت اطرش لج رساله
كنت اريد اغايضج لا اكثر وماكنت اريد اتواقع معاج وتكون عداوة بينا
وكان ربيعي عدالي ويقولي شو اكيب لج وانا مثل الاهبل اسوي اللي يقوله اليه
وانا مب مطرش هالرساله عشان نكون علاقة؟!
لا والله هاذي مب نيتيه انا اللي اريده انج تسامحينيه
مادري يمكن لعب الشيطان بمخي ذاك اليوم
بس الله شاهد انه ماكان قصدي .. اللي كنت اريد اني اتسلى والعب
لكن من عقب الكلام اللي طرشته لج ورديت اقراه استحيت على ويهيه
حسيت اني غبي يوم طرشت لج الكلام والسب
ادري جرحتج برمستيه وانا ادري انج بنت ناس وعرب حشام
وماكان قصدي اقول هالرمسة لج
بس يوم رديت اريد اطرش لج من زمان
لقيتج معطله نظام الرسايل عندج وماقدرت اطرش لج رساله
وانا من ذاك اليوم وضميري مأنبني قلت اكيد جرحتج واااايد
وانا اليوم كنت داخل بالصدفة اودع المنتدى قبل لا اسافر وانصدمت يوم شفت نظام الرسايل
رد عندج فـ حبيت اطرش لج رساله
واريدج تقبلين اعتذاري اخاف اموت وناس معصبين وماخذين على خاطرهم
السموحة منج بس اللي ارقبه عقب السفر
رساله منج مكتوب فيها انا مسامحتنك..

الله معاج..
\
/
تمت خولة مبهته على الشاشه وهيه مب مستوعبه اللي قاعد يصير
الصراااحة وااايد عااانت من هالعضو
كان يقول لها انها بنت شوارع وانها صايعه ووووووالخ
يعني كلام يجرح الصراااحة وهيه ماكانت تحب المشااكل وماتحب انها تحط أي
عضو في موقف محرج وماقالت للإدارة
فـ عطلت نظام الرسايل وماقام يطرش لها وهيه ع بالها انه بيزيدها اكثر واكثر
والسالفه انهم متواقعين لا اكثر وعقب زاد السالفه التوقيع وانه يابها تسوي له
وهيه اعتذرت بس هو زاد غيضة
وهاذي هيه السالفه
ابتسمت مكانها وحمدت الله انها مب رساله سب لا رساله اعتذار
ماكتبت في الرساله الا هالكلمات
انا مسامحتنك
بس هاللي كتبته ماكانت تريد تزيد أي كلام ثاني من عندها
وارتااحت وااايد .. وبعدها تمت تشوف باقي الرسايل
اللي كانت من الادارة واللي كان اعلان واللي ربيعاتها اللي في المنتدى تسأل عنها
..


\
/
ملخص اليوم
\
/
بعد سااعات طويلة وصلوا هل لندن وراحوا على طول لشقة بو شما
عشان يرتاحون هناك
دخلت شما للحجرة وهيه تحس بالتعب قعدت على الكرسي اللي مجابل الدريشة
وهيه تشوف المنظر جدامها وتمت تفكر في يدتها وعمها وبنات عمها وعياله
\
/
والفكر تاه واحتاس كثر شوقي اليهم
هم خذوا كل الاحساس وبالعمر افتديهم
\
/
خولة بعد ماقعدت حوالي 4 سااعات ع النت رجعت للبيت وهيه مستانسة
حمدان مارجع للبيت كله عند ربعه وسوالف
وكل شوي يتذكر شما وانه ما ودعها حس بالحزن
ورجع تفكيرة لها
\
/
خالد آه ياخالد
من بعد مارد من المطار وهو مب على بعضة كله يفكر فيها ويريد يعرف شو الحل
يخطبها بعد ماترد من السفر؟!
واذا خطبها بيقول عمه انه كلام سبرة صحيح
وهو مايريد سبرة تكون صادقة لأن كلامها كله جذب بس شو يسوي؟!
كان قاعد مع ربعه في مطعم بيتعشون والجو كان فناااان
سوالف وربشه مع الشباب تسيند على كرسيه
وطالع القمر من الدريشة وتفكيرة ماخذنه لبعيد
\
/
سرمد الليل وضوى ليلي واهجعوا ربعي حواليه
بنت تسهرني غرابيلي من وليف تايه بريه
اشتكي البدر بمواويلي وانثر اشواقي على ضيه
آه وجدن هد لي حيلي والهوى فتاك يا بنيه
الصبر مر شرى الخيلي والهجر نار اشعلت فيه
هايمن في الحب ياحليلي ليت قلبك يعطف شوية
منك ياخلي طفح كيلي تهت بين الشمس والفيا
ليت بس تحن وتميلي قبل لف النود عصرية
\
/
في لندن
\
/
كان حمد يمشي مع شما وهم يسولفون ويضحكون
هالسفر وااايد قربتهم من بعض
بس كان فيه قلب يغلي ويفووور من الغيض
سبرة:عاجبنك يعني؟!
احمد وهو يلعب حميد:شو؟!
سبرة:شوووف شووف حمد وشما
احمد:فديتهم خلهم يسولفون ويضحكون والله زين يوم انهم تقربوا من بعض
سبرة:لا والله انا ماريد ولدي يراااابعها"يصادقها , يروح معاها"
احمد وهو يحط حميد:شوفي سبرة انتي قلتي تبينها تعيش معانا
زين كيف بتعيش؟!
لازم تخالطنا وتاخذ وتعطي معانا وتكون علاقات مع اخوانها وختها..
سبرة:بس انا ماريد بتخرب عيالي شووف انا قلت لحمد لايكلمها بس هو كلمها
احمد:لأني انا قلت له برايك رح مع اختك
سبرة وهيه تنادي حمدة:حمدة تعالي انتي وحامد يالله
حامد وهو يفر الكورة لأخته:نريد نلعب
سبرة:ماشي لعب يالله نرجع
احمد:سبرة خليهم يلعبون نحن مسافرين نغير جو
سبرة:شووف يا انك تخلي بنتك تبعد عن ولديه ولا ماشي خلاص نرجع للبلاد
احمد وهو مستغرب:بس منو اللي قال خلنا نسافر وناخذها معانا؟! انتي قلتي تبينها تعيش عندج
سبرة:بس مب تلعب بعقول عيالي
احمد:يااا سبرة كيف تلعب بعقولهم؟! سوت شي غلط هيه؟!
سبرة:اففف ياخي ذليتني خلاص نرجع ماباها تعيش عندي مادانيها"ماحبها"
حمدة:امااايه نريد نلعب
سبرة:العبي يعلج تلبين فيها نار جهنم اللي تاكلج
احمد وهو معصب:سبرة لاتدعين على بنتج بلاج انتي شي مستوي بج؟!
سبرة وهيه قايمه:اقعد عند عيالك برد للشقة احس اني مخنوقه اف مب حيااة هاذي
ولبست نعالها وهيه معصبه على الاخير ورجعت للشقة
واحمد قاعد مكانه وهو معصب عليها ليش انها دعت على بنته
شو يسوي بها؟!
مرة تقولله يالله نشلها ونسافر وتعيش عندنا والحين تقول لا؟!
شبلاها سبرة؟!
\
/
شماوهيه تشوف سبرة رايحه عنهم ورايحة برى الحديقة:غريبة بلاها امك؟!
حمد وهو يضحك:والله ماعرف عادي تلاقينها متواقعه مع ابويه
شما:متواقعه؟!
حمد وهو يقعد على الدرفانه:هيه عادي دوم يتواقعون ويردون يتصالحون
شما:جدامكم؟!
حمد:وشو فيها عادي متعودين نحن
شما:غريبة في شو بيتواقعون؟!
حمد:اشياااء تاافهه ومرة اشيااء صدق ينزعل عليها
شما:ومنو يكون الغلطان؟!
حمد:على حسب الوقعه مرة ابويه مرة اميه ومرة الاثنين
شما وهيه تقعد على الدرفانة اللي عداله:حياة غريبة
حمد:تصدقين شموة والله في خاطري يوم نرد اروح واعيش معاج
شما:والله عيشتنا هناك جنااان
اقوم الصبح على حشرت يدتيه وحمدان ونتواقع معاه ونضحك
نترق مع بعض ونتغدى ونتعشى بس بعض الاحيان يروح للشباب
وسوالف معاه غييير العييشة هناك ناس تحبك
""
سرح حمد لبعيد وهو يسمع كلام اخته وكيف عايشة
ابتسم وهو يسمعها كيف تسولف
تضحك وتقول له عن حياتها هناك حياة غير
حياة يتمنى الواحد انه يعيشها
ابتسم حمد وقعد يشوفها
""
حمد:الله انا ماريد احسدج على عيشج بس خاطري اعيش مثل عيشج
شما:لو امك تطيع عادي تعال وعش عندنا لكن ماظني توافق
حمد:المشكله اميه
شما:زين ماقلت اليه وين المكتبه اللي بتوديني اياها؟!
حمد:ذكرتيني؟! هالمكتبه واايد حلوة فيها اشيااء جنان بوديج اياها العصر
شما:لاخلنا نروح الحين
حمد:اممم صح مادام اميه محد بيوافق ابويه يالله نروح
\
/
راحوا لأبوهم وستأذنوا منه
طبعا هو مارفض لأنه يعرف ان حمد يدل الاماكن والطرق في لندن
لأنهم متعودين عليها واغلب سفراتهم للندن
ابتسمت شما لأن ابوها وافق وحست بالفرح وهاذي
اول مرة تحس بالفرح يعني كانت ماخذة فكرة غلط عن ابوها انه
مايطيع على أي شي ومايحبها"كان تفكير شما"
لكن الحين حست انه انسان مختلف جدا
\
/
كملوا طريقم للمكتبة اما بو شما حس ان قعدته بروحة مع عياله مب حلوة
من دون ام عياله"سبرة"
فكر وقال خلني اروح اراضيها
شل عياله وراحوا للشقة
اول مادخل لقاها فاضية وهادية
بو شما:حميد اقعد انته وحمدة شغلوا التلفزيون وشوفوا رسوم زين
حميد:لا اريد اشوف فلم
حمدة:لا انا اريد اشوف توم وجيري
بو شما وهو يتجه للتلفزيون ويشغله:بس حطوا رسوم وشوفوا حميد لايروح مكان
حمدة:زين
وقعدهم على الكرسي وهم يشوفون التلفزيون وكمل طريقة للحجرة
دخل وشاف سبرة قاعدة على الشبرية ولافه ويهها للدريشة
وكان باين من طريقة قعدتها وهزت ريلها انها معصبة
احمد:غناتي
سبرة:....
احمد وهو يقرب منها:سبرة دخيلج انسي الكلام اللي دار بينا
سبرة:...للحين ساكته
احمد وهو يتقرب اكثر:حياتي يالله عاد
سبرة:شوف احمد انا مليت خلاص نرد
احمد:شو مليتي مسرع؟ الا تونا يايين
سبرة بعصبية:شوف انا بنتك وماحبها خلاص خلها ترد
احمد:سبرة؟! هاذي اول وآخر مرة تقولين لي جيه خلاص بس
سبرة وهيه تلف له:اقول شو؟
احمد:شما بنتي من لحميه ودميه وما ارضى للأي حد يقول هالكلام عنها
سبرة تحملتج وايد انا شوفي بنتيه على عيني وراسي
مثل ما انتي وعيالي على عيني وراسي
سبرة وهيه معصبة وتقوم:واله تحبها خلاص رح لها عش معاها
ليش قاعد معانا رح عند بنتك
احمد:اف مللتيبي تراج اريد اعرف ليش ماتحبين بنتيه؟!
غيرانه منها يا سبرة انتي حرمتيه وهيه بنتيه
يعني انتن مب عدايل تسوين هالشي
سبرة وهي تمشي للباب:يوووة انا اقولك يا انا يا هيه خلاص
احمد وهو يلحقها ويمسكها من يدها ويلفها صوبة:سبرة كبري عقلج ولاتصغرينه
منو من البداية قال ان شما لازم تعيش عند ابوها منوووو؟!
سبرة:خلاص غيرت رايي ماريدها تعيش برايها عند يدتها
وفتحت الباب عشان تطلع "احمد:بنتيه بعيش معايه مثل ما عيالي الباقين بيعيشون عندي
سبرة:والله كيفك انا خيرتك يا انا يابنتك وانته عاد سو اللي تباااه
احمد وهو معصب:سبرة لاتحطيني بين نارين
سبرة وهيه تلف له وتقولها بصوت عالي:انا اللي حطيتك ولا انته اللي حطيت عمرك بين نارين؟
رفعت حمدة راسها لأمها وابوها وشافتهم يتواقعون
وحميد وحامد كذلك
حمدة:اف ابوية اميه لاتتواقعون جدامنا انتوا تسون حشرة روحوا داخل تواقعوا
.........
وقفت سبرة وهيه منصدمة واحمد معاها
كانت حمدة منزعجة من حشرتهم وهم طبعا متعودين على هالجو
احمد:زين جيه اسمعي بنتج شو تقول
سبرة ودموعها عند عيونها:والله خبر عمرك اف والله كرهت العيشة خز عن طريقي
ودزته بيدها عن الطريق ودخلت لحجرتها وسكرت الباب وهيه متضايقة
وقف احمد مكانه وهو مايعرف شو يسوي
تمالك اعصابة وقعد على الكرسي عدال عياله وهو يشوفهم
كانوا قاعدين يشوفون التلفزيون ولاهمهم شي
ولاكنه توه ابوهم متواقع مع امهم
حس انه مايهمهم شي لأنهم تعودوا على هالشي
سند براسه لورى واستغفر ربه
\
/






وبعد مرور سنـة تقريبا
..
دخلت خولة وهيه شاله فستانها بيديها
خولة:اف يالله متى بيي دوري؟!
سلمى:البسي فستانس دقايق وبخلص من المكياج
الممكيجة:لك خولة انتي منين جبتي هالجمال؟
خولة وهيه تقرى على عمرها:من القمر
الممكيجة:يأبرني انا هالامر شو مهضووم
خولة:زين بروح البس وبشوف شماني
..
دخلت خولة لغرفة الملابس ولبست فستانها وراحت لحجرة شما
الليت قاعدة تتمكيج
خولة:اب اب حرمة اخوية جنااان اليوم
شما:جب انتي بلاج؟!
خولة:افا قبل لاتاخذين اخوية تقولين جيه؟!
شما:هههه
الممكيجة:ولك ياعروووس لاتتحركي
شما:شو اسوي خلي خولوة تطلع تحرجني
الممكيجة:ولك خولة طلعي لبرى خليني اعرف زبطا للبنت
خولة:ههه اوكي بروح بس برد يالعروووس
شما:اوكي
..
قعدت الممكيجة تعدل شما وفكر شما تايه لبعيد
لوين؟!
انتوا تدرون لوين..
..
في خيمة الريايل
..
كانت صدق الربشة العودة
الشباب ايولون على يمب والمعرس ييبس على يمب
والكيمرة شغاله من اول مابدى العرس
والكل مستاااانس وخصوصا المعرس"احم اللي هو خالد"
..
\
/
بعد الوقعه الاخيرة من بو شما وسبرة
قعدوا في لندلن لمدة اسبوع وعلى طول ردوا للبلاد
وشما رجعت لبيت يدتها عادي
وما استوى اللي كان يريد يخطط له بو شما وسبرة
وبعدها بشهور
خطب خالد شما ومن درى بو شما ردت له شكوكة بشما وخالد
وغصبا عن شما يت تعيش عند ابوها
كانت سنه صعبه عليها
عاشت آخر سنه لها في بيت ابوها
وعاشت تحت ظلم وقسوة حرمة ابوها اللي تكرهها
ولكن صبرت عمرها
لين ما خلصت من دراستها بنسبة 86%
كانت تقدر تييب اكثر لكن حياتها هناك ماكانت تساعد
لو هيه عايشة في بيت يدتها جان يابت في التسعينات..
المهم ان عرسها قرب وفضلت انها تنزف في البيت اللي ربت وعاشت فيه
ومن عاشت في بيت ابوها تغشت عن ولد عمها
بحكم من حرمة ابوها
وما شافها من سنة ونص تقريبا
وهو متلوم ليش انه تسرع وخطبها ماكان متوقع هالشي
بس صبر هالسنة واليوم بالذات عرسة
خفت المشاكل بين بو شما وسبرة
حمد زادت علاقته مع اخته وخصوصا انها عاشت بينهم
وخوانها وختها حمدة تقربوا منها واايد وحبوها
خولة وسلمى عايشات في هالدنيا
سلمى ترقب الخطيب لين مايخلص دراسته الجامعيه وتعرس
خولة لا وراها مستقبل زااهر
وبتكمل جامعه وبعدها بتفكر في العرس
حمدان..
عايش هو بعد في هالدنيا ويفكر يروح يخطب ربيعة شما"مريم"
لأن في الايام الاخيرة كان يفكر فيها
وسأل شما عنها
وقالت له للحين محد خطبها وشما عجبتها الفكرة ان مريم تكون حرمة عمها
فـ هيه بتكون الوسيط بينهم وبتزن على راس عمها عشان يخطبها
...
ومنوا نسينا بعد؟!
محد..

يالله انتظروني يالقصه الجايه

انا من الصباااااااااااح انتظر حلوة

:clap: :clap: :clap: :clap: :clap: :clap: :clap: :clap: :clap:


حلوة كتير القصه

بس بصراحه ما توقعت هيك تكون النهاية


يعطيك الف عافية

مها العيون

الله يعافيك ياقلبي

تواصل اكثر من رائع

دمتى بود

مشكوورة والله:clap:
يالله ننتظر القصة الجاية:)

الله يعطيكي العافية

يعافيكم ربــي لكم كل الشـــكر من اعمـــاق قلبي

تواصل اكثـــر من رائــــع

دمتم بحــــــب