افضل الاطباء في دولة قطر

وانا اول وحده ببتدي وياكم واشجعكم على الكلام


بالنسبه لي انا متزوجه من ثالاث سنوات ونصف


والى الان لم ارزق باطفال


بعد ما تزوجت تلخبطت دورتي صاارت تقدم ورحت عند دكتوره هدى جاسم وصفت لي كلوميد

وحبوب تنزل هرمون الحليب لانه كان مرتفع,,هذا بعد ست شهور من الزواج وما تم حمل

بعد سنه حولت على عمر ابو زينب عطااني ابر منشطه وبعد ما حملت,,,وجربت الابره الزيتيه

عند الدكتور عدنان وبعدها وصف لي ابر منشطه مع نولفاديكس

وبعد ما صاار حمل,,,,,وقررت اخيرا بعد سنتين الجا للتلقيح الصناعي وبعد ما نفع

وبعدها رحت لمستشفى الولاده عند الدكتور شحاته ولجئت لاطفال الانابيب

جربته ثلاث مراات ونجحت المره الاخيره بس ما تم الحمل للاسف

والحين بصرااحه ابي ارتااح على الاقل ثلاث شهوور الين ما اجرب شي جديد


بس اخواتي بعد تفكير ,,اقول بنفسي ليه جربت كل هالعلاجات وانا ما اعاني من شي

اللهم الا هرمون الحليب ونزلته ..

ياريت يا اخواتي تقولون لي قصصكم مع رحله العلاج واكون لكم شااكره

هلا والله اختي ريم

واطلب من ربي ان يرزقج بالذريه الصالحه

انا متزوجه من سنه وخمس شهور بعد زواجي ب6 شهور حملت ولله الحمد والحين عندي بنوته عمرها شهرين

بالنسبه للدكاتره مش كل دكتور يستحق انج تروحين له ومش كلهم زينين

وانتي ولله الحمد ماعندج اي مشاكل صدقيني ياحلوه اذا انج شلتي من بالج التفكير

وقعدتي تطلبين من ربج انه يرزقج الذريه باذن الله بيرزقج ولا الدكاتره مافي يدهم شي

واهم شي نفسيتج ترى تأثر وااااااااااااااااااااااااااايد وانا اول ست شهور كانت نفسيتي تعبانه

وماحملت بعد ماسفرت انا وزوجي وغيرنا جو رجعت وانا حامل ولله الحمد ابتعدنا عن كلام الناس

(( اللي اقصده خبرج اذا شافوا عروس دوم يسألونها ها ماسويتي شي ) فكانت نفسيتي تتعب ولكن الحمدلله))

عموما نصيحتي لج لاتروحين حق اي دكتوره وانا صار لي موقف قبل اسبوع مع الدكتوره ليلالما


رحت لها علشان دم النفاس ماوقف معاي طول اكثر من 40 يوم عطتني حبوب غلط وهو للهرمونات

وسبب لي نزيف لما رحت عيادة الدوحه وقابلت دكتوره سناء *ممتازه* وحليووووووووه وايد الحمدلله خمس ايام والدم موقف وقالت لي ان الحبوب اللي خذتها مب زين وهذا للي مش منتظمه عندها الدوره

وانا للحين عندها

هاذي انصحج تروحين لها هي والدكتوره مها وايد يمدحونهم بعيادة الدوحه بس انا اقول لو تنطرين شوي وتبتعدين عن التفكير وتريحين بالج يكون افضل عيشي مع زوجج ادخلو جو واستانسي ترى انا من ولدت صرت مطنشه لزوجي تبين الصج ماعندي وقت اقعد معاه يكسر خاطري :( وصرت ماانام كلش الا ساعتين او3 مو مثل قبل تعب لكن الحمدلله
... واسمحيلي طولت عليج
والله يرزقج الذريه الصالحه ياااااااااااااااارب

هلا اختي ريم ...

يارب يرزقج الذريه الصالحه ,,,
شوفي انا بقولج شي بيني وبينج ..

انا جربت دكتوره نجاة في مستشفى حمد وهي ممتازه
بس بالنسبه للعلاج انا ما عندي اي فكره بما انج ما فيج شي ليش تطببتي الابر الزيتيه وابر التفجير ما ياخذونها الا اللي عندهم تكيس او ضعف في المبايض ,,,,

الله يهديج يارب الحين خلي لج فتره بينج وبين نفسج ترتاحين فيها سافري طلعي غيري جو ...
بعدها فكري في الانجاب ,,,

انا اختي جربت شحاته في العلاج اولحمد لله كتب لها والحين عندها 4 بنات

ان شاءالله بنات قطر يفيدنج..

الله يعطيج العافييه..

السلام عليكم ورحمه الله وبركاته

الله يرزق كل وحده بالذريه الصالحه يارب

انا عن نفسي تميت سنتين ماحملت

وقالوا لي عن الدكتور عدنان اول شي نظم لي الدوره

وتميت عنده شهرين وثالث شهر طلعت حامل لكن شهرين ومات في بطني

وكررت نفس العلاج عنده

والحمدلله حملت وجبت بنت وتميت سنه و8 شهور وتعالجت بعد عنده وجبت تؤام

انا انصحج تروحين له لانه بصراحه ممتاز وبيقولج من البدايه اذا علاجه يجيب فايده معاج ولا لا

بس اهم شي انج اداومين على علاجه ويكون عندج صبر

والله يزقج ويرزق الكل يارب

غاليتي ريم:

انا مثلج بس انا اكثر منج لاني تميت خمس سنوات وللحين ماحملت...

جربت دكاترته شكثر..

امااا الدكتورة هدى الجاسم فهي نصبت علي بما فيه الكفاية تخليوا قالت لي اني حامل

وطلع بالنهاية كيس دهني عيل فيه دكتور بالدنيا مايفرق بين الكيس والجنين..

وقعدت معاهااا 9 شهور ولا فيه تقدم 1% يعني لانظمت لي الدورة ولا راحت التكيسات

ولاهم يحزنون...

اما الدكتورة مهااا اللي بعيادة الدوحة نصيحة لوجه الله لاتروحون لدكتورة كل همهاااا

الفلوس ..

انا رحت لها بسوي انابيب طلبت مني 20 ألف ريال او اكثر ماعجبني الكلام يعني ادفع

فلوسي بشي بعلم الغيب؟؟!!!

المهم توجهت للدكتور عمر ابوزينب قال لي من قال لج انه عيادة الدوحة يأخذون 20 ألف

حق الانابيب قلت دكتورة الله يستر عليهاا ضحك وقال لي اكيد الدكتورة مها صح

والله العظيم انه قال اسم الدكتورة بدون لااحد يقول له ونظرته وهو يقول تحسين انه

موعاجبته ..

المهم انا ماخذت ابر عن الدكتور عمر ولاشي مجرد كنت بعرف شنو فيني...

ورحت للدكتور عدنان حسيته مغرور واااااااااايد فيه دكتور بالعالم يقول خذي كل الدكاترة

وكبيهم بالزبالة ماعجبني اسلوبه وتركته ولا اخذت علاج منه ...

فكرت انه لامتى بقعد ادور واضيع فلوسي على فلان وعلان وتوجهة لمستشفى حمد

وتميت مع الدكتور عدنان العراقي وذبحني بالأبر كل ماشاف ويهي قال ابر

مليت فوق اسلوبه الخايس وايد يتكلم وسريع مالحق عليه وقلت له دكتور انت تتكلم سريع

ومالحق افهم قال بابا شنو احنا بمدرسة تبين تحفظين والله يابنات حتى ريلي قال لي هالدكتور

لاتروحين له وايد شايف عمره....

والله هداني للدكتور شحاته سويت من شهرين عملية انابيب وفشلت ولله الحمد وبجربها بإذن الله

الشهر الجاي دعواتكم لي...

وعلى فكرة ترى انا جربت الدكتورة ليلاما والله يشهد انه دورتي تنظمت معاهااا وقالت لازم تكملين

معاي ليمن نخلص لكن للأسف ريلي مارضى اروح لهاااا نهائي لأسباب احترامهاااا ...

المهم إن شاء الله بكمل مع الدكتور شحاته....



اما بخصوص الدورة انا الحين منتظمة معاي بسبب الزنجبيل جزاها الله خير اللي وصفته لي

وتجيني منتظمة لاابر ولا منشطات ولله الحمد مع انها مب منتظمة من يوم وانااا بنية....

دعواتكم الصالحة..

والله يرزق كل محرومة...

لي رجعه

مع العلم تم تغيير العنوان ...

حبيبتي الله يرزقج انشالله وخليها على الله انا صارلي سنتين متزوجه تقريبا وكنت اخذ حبوب منع الحمل لاني ماكنت ابي احمل على طول واول ما هديتها تميت 3 شهور وحملت طبيعي......
انصحج خليها على الله وكل بجي بروحه وصدقيني دام انج مافيج شي خلج جذي احسن ولاتحاتين وانشالله بتحملين وانتي ماتدرين بعد... بس اهم شي نفسيتج طلعي روحي وتعالي وسافري مع ر يلج غيري جو وانسي الموضوع كليا....
اما عن اسامي الدكاتره انا انصحج لاتروحين للنصابين برا لا عدنان ولا غيره....
عندج بمستشفى حمد الدكتوره نجاة (استشاريه) مش دكتوره عاديه ماشالله عليها فظييييييييييعه وانشالله تفيدج وعندج وحده بعد اسمها نجاح بعد شاطره....
والله يرزقج انشالله ياحلوه...

اخواتي الغالية
ام راشد,,,مطلع_الشمس,,,,العهد,,,احلى احساس,,,رايه العز,,,مجنونه قطر,,,meeeera



اشكركم جزيل الشكر على الردود الطيبه

وترى كل الاطباء الي تكلمتوا عنهم انا جربتهم>>يا ويلي ما تم احد الا ولعب علي خخخخخ

وكلامكم صحصح في منهم من يبي الفلوس ومنهم المغرور..... وووووو الخ


وعلى قولتكم مدام ما فيني شي ليه اتعب نفسي وانا الحين متوكله على الله
ورحت اسوي تلفزيون عند الدكتور فواز عشان اتاكد اذا الرحم سليم

الحمدلله طمني..

وحاليا ناويه اوقف عن العلاجات لكم شهر على الاقل واسافر ...

والله كريم ويرزق كل محرومه ياااارب..

الله يوفقج اختي


ويرزقج بالذريه الصالحه يارب

ببتدي بتجربتــــــــي


انا اول شي حملت طبيعي وبعدها سقطت

وصاادني ضعف مبايض ورحت لعدنان على طول قالي ابر

حلف زوجي مااخذها

بعدها رحت للدكتور شحااااااااااته والله على الله ثم عليه اهم شي لاتياسين

وخلج موواصله معاه والحمدلله حملت عنده

وجبت بنتي فديتهااا وعلى طول بعدها حملت من تاثير العلاج

وجبت ولد اللهم لك الحمد والشكر

واهلي كلهم يتعالجون عنده ناس صار لهم خمس سنين يتعالجون وتهم حملوا

اهم شي الصبر والدعاااء

كلامكم ذكرني بالصارلي بسبب الدكاتره بعد ما عالجت هورمون الحليب لثالث مره أرتفع مره رابعه بسبب ان الدكتور في مستشفى حمد قلل الجرعه لي ولم يكن منتبه بسبب السرعه ألي يتكلم فيها وكأنه راح يموت بعد دقيقتين ولما سويت التحليل قال بكل أستهتار ياه أرتفع مش مشكله نكرر الدواء لن أستطيع وصف أحساسي لكم طلعت من المستشفى دموعي معاي والدواء المكرر معاي وخيبة الأمل والقرف من أطباء مستشفى حمد معاي ولازالت نفسيتي متعبه الله لايسامحهم على أمانه أقسموا عليها اليمين و بددوها والحين مااعرف عند مين أروح الله المستعان

بنات :

اليوم رحت حق وحدة تمسدني لاني وقفت العلاج لين شهر جدام بإذن الله عشان اريح

عمري بعد الأبر اللي خذتها حق الانابيب المهم المسادة قالت لي انه الدكتور عدنان عبدالقادر

لمااا يتعب مع المريضة ولا يحس انه توهق قال لهم رحوا لــ ( ..........) تعرف تعالجكم

قلت لها زين يعني رزقج ياج لريولج قالت لي : لا يابنتي انا كل وحدة اسألهااا انتي جاية

من طرفة الدكتور عدنان لما تقول لي ايه اقول لهااا مالج علاج عندي ...

قلت لها : ليش

قالت : ياامج اناا اخاف من الله واخاف من هالحرمة يعني بنظرج دكتور كبير يأخذ عالوحدة

حوال 300 للتلفزيون جذية بسهالة لا مستحيل..

انا مابي اتحمل ذنبها ومصيبتهااا يمكن هو معطيها شي بالغلط ولا مالها امل بالعلاج بكرى

تقول انتي اللي سويتي فيني جذية لذلك ماله حق يطرش اللي ماقدر لهم علي..

انا مابي وحدة تتهمني بعد هالسنين اني ضريتها وماعاد لها امل بالحمال...

ماقول غير حسبي الله ونعم الوكيل..

روحوا لأي دكتور وقول له عن الطب الشعبي والمسادات بيقولون لج هذي الاشياء

مش صحية او غلط او.. او... كلام الدكاترة مايخلص

فشلون دكتور بيوصيج تروحين لمسادة مع انهااا اقسمت انها ماتعرفه نهائي ولا قط راحت

لا اهي ولا بناتهاااا له !!!!

حسبي الله ونعم الوكيل جان خلوناااا تجارب لابرهم وادويتهم بس اهم شعليهم هذي لاديرتهم

ولا احنا بنات بلدهم لذلك قررت واقسمت انه من بعد الله ومشيئته ماخذ الأبر او الادويه إلا في مستشفى حكومي يكون تبع الدولة

غير جذية لا !!!

مابي احد يجرب فيني كثر الأول...

ويالله يارب يرزقكم يابنات بلادي ويرزق كل مسلمة محرومة على وجه الدنياااا...

ربي لاتذرني فرداً وانت خير الوارثين

معليش فيه وحدة من الخوات سألتني عالخاص

شلون انتظمت الدورة معاي حاولت اطرش لهااا لكن الظاهر المشكلة بعدد مشاركاتي

المهم انااا نظمت دورتي مع انها ماتنتظم كلش وللأسف مافيه غير الدكتورة ليلام نظمتها لي بعد الله

لكن زوجي الله يهداه مارضاني اكمل

<<---------- وايد تهذر هههههههههههههههههههه

المهم :

انا اشرب مطبوخ الزنجبيل بالكمية اللي تقدرين عليهاا من الزنجبيل حطيه بماي على النار

ولما يغلي الماي طفي عليه وخليه ليمن يدفى شوي وتشربين كوب او كوبين باليوم حسب ماتبين

من خامس يوم فالدورة لمدة خمس ايام متتالية..

وحوالي قدر المستطاع انه يكون بنفس الوقت يعني تشربين العصر يفضل العصر في اليوم التالي

وإن شاء الله بنتظم الدورة على المداومة...


واعذريني اختي ماقدرت ارد عليج بالخاص ...

السلام عليكم


شحالكم بنات بلادي

طبعا انا من قبل لا اتزوج وانا اعاني من الدوره مب منتظمه ...
المهم ... رحت من ثالث شهر عند هدى (بصراحه عله) .... طلعت فيني امراض الدنيا وهاي كله بس يوم شافت ويهي بدون اي تحليل ولا شي ... قالت لي انتي فيج هرمون الحليب مرتفع حده والله انها بس مسكت صدري وعرفت هههههههه المهم ما ارتحت لها كلش
قامت امي وودتني عند بدر الدين في الياده المسائيه ولوع جبدي بالكلوميد كان يعطيني اياه من غير متابعه ولاتلفزيون .... اجيه هالشهر يصرف لي كلوميد .... يقولي ادا نزلت الدوره تعالي اروح له يقولي ها مافي تبويض ويوقم ويكتب لي كلوميدلين حسيت ان المسأله طالت
رحت عند عمر بزينب بصراحه روعه هالدكتور
اول شي نزل لي هرمون المخ اللي كان مأخر الدوره عندي .... وصارت دورتي تنزل مثل الناس
صج اححيان تتأخر لكن عالاقل انها صارت تنزل .... وبددا معاي ابر منشطه ووتغير حال بويضاتي معاه .... وسويت عنده اشعة الصبغه والله ماششالله يده خفيفه ... ولا حسيت بشي...
المهم يوم شافني مستعجله قالي انا ماقدر اسوي لج شي اكثر من اللي سويته
روحي عند شحاته وبنكون انا وهو متعاونين ...للامانه انا يوم رحت له كنت ميته من الصياح .... يوم شافني جي حولني على شحاته وويوم رحت هناك الا هو متصله ووصاه علي وو الحمدلله سويت عنده انابيب ونجحت الله يتمم يارب على كل محرومه على خير






بنات على فكره اي وصفه شعبيه راح تنحدف تبعا لقوانين القسم ....

هلا بريم 78

الله يرزقج الذريه الصالحه قولي امين

ترى كل دكتور وكل دكتوره لهم محاسنهم ولهم مساوئهم الله يعين عاد انتي وحظج

المهم سمعي نصيحتي شيلي من بالج فكرة الحمل هالفتره ولا تفكرين ابد واذا ياتج الفكره على طول حاولي تفكرين بشي ثاني تماما يعني تغيرينها

بدل لاتقولين حق نفسج انا ماحملت هذا الشهر على طول غيري الفكره وقولي انا ماشريت مكياج انا اعطيج مثل مو تضحكين على كلامي تراني صاجه والله حاولي قد ماتقدرين اتشيلين فكرة الحمل .

الله يتمم عليج بالصحه والعافيه يارب واسمع عنج انج حامل الشهر الجاي

اختي..فيه دكتوره ممتاااازه بمعني الكلمه..


واحسن من اللي ذكروووهم كلهم.ز


اسمها نجلاء..مصريه.بس اخت مب دكتوره..سالي عنها...تراها احسن من الاستشاارين..هي اللي ولدتني...انا مربه قيصري معا العلم اني كنت على يد اكبر استشاري بقطر..ولا فادني ولا عنده خبره..وما ادري هل عندها عياده مساائيه او لا...هي بالنساء والولاده

بنات بصراحه انه توني والده وتوني مكمله الاربعين وعقب اسبوع بروح بيت زوجي اخاف احمل مره ثانيه
وانه افكر في تركيب اللولب
تنصحوني فيه واللا لا واذا حد جرب او يعرف مكان زين يقولي لاني سمعت ناس وااايد مركبين

اختي مجنونه قطر,,,,,

وانا اسمع قصتج وحكايتج مع الدكاتره احسج تكلمين عني لاني نفسج بالضبط بالاول قصت علي

هدى الله يهديها وقالت عندي هرمون الحليب مرتفع ووصفت لي كلوميد بدون اي تلفزيون ولا شي


ورحت عند عمر ابو زينب وفعلا ممتاز بمعنى الكلمه وسوالي الاشعه الصبغيه وبعد العلاج المستمر


وعدم الحمل نصحني بالدكتور شحاته وجربت الانابيب ثلاث مرات ونجحت المحاوله الاخيره بس للاسف الحمل نزل على طووووول

الله كريم انشاءالله ويرزق من يشااء بغير حساااب ويثبت حملج اختي مجنونه ويرزق كل محرومه


انشاءالله,,,


اختي الجوري ما ادري من خلال الي اسمعه من ربعي هم اكثر شي يروحون عند ليلاما حق اللولب

بس لازم متابعه له حبيبتي ,,وانشاءالله البنات بيفيدونج بعد...حبيبتي اللولب له تاثيرا ت جانبيه مثال االدوره تلخبط عندج يعني تزيد غزارتها

ولازم تفحصين بين فتره وفتره تشوفين اللولب مكانه ولا لا واذا سبب التهابات ولا لا


وبه بنات ما ركب عليهم اللولب وبه حالات نادره حملوا على اللولب هذا والله اعلم

وكنت مره بالمستشفى لقيت وحده حامل خارج الرحم لانها حاطه لولب بس هذا نادر الحدوث

حبيبتي توكلي على الله واستخيري اذا مرتاحه اختاري احسن نوع لولب وحطيه

ولا استخدمي حبوب ياسمين لمنع الحمل لانه اعشاب وخفيفه على الرحم,,

وبالنسبه لاستفسارج سالت لج ربعي اغلبيتهم عند ليلاما ودكتوره امال البادي

اتمنى اكون افدتج حبيبتي وانا حاضره لج باي وقت:shy:

اخواتي انا قلت لكم رحت اكشف على الرحم من كم يوم وطبعا" اغلبيه الخصائيين للتلفزيون

مسافرين ود مريم سلمان ما عندها مواعيد لجات للدكتور فواز لانه تلفزيونه حديث,,,

بعد ما سوالي استغرب من وجود بويضه حجمها 18 وقالي هذي مو وقتها لانه انا باليوم السابع من

الدوره وقالي تعالي بعد اربعه ايام عشاان نشووف شسالفتها هالبويضه,,,

وشرايكم بنات هل في احتمال يكون فتره التبويض بعد الدوره مبااشره


بس مستحيل توصل حجم البويضه 18,,,,,,,, انتوا شرااايكم اخواتي


انتظر الرد