انا قلت لزوجي اكرهك...ارجوكم ريحوني..

حبيباتي..بنات المنتدى.. تمر على الانسان اوقات يحتاج للراحه والسكينه والحنان..

انا( اعوذ بالله من كلمة انا) عشت ايام قاسيه وانحرمت من كل شي حتى انه يكون عندي صديقات

صدقوني مب مني انا المشكله انه هالزمن صار زمن مصالح وانا احتاج لأنسان يكون انا ( ياليت تفهموني..

ويوم تزوجت كأني ملكت الدنيا ومافيها.زوجي حنون..يحبني بجنون..ويحترمني.وهذه نعمة اشكر

ربي عليها..بس شو الفايده يوم تنقص راحة البال..قلت اخيرا الله عوضني عن غياب ابوي اللي

عمري ماشفته ولا حسيت بحنانه..لكن للأسف..الحب مب كل شي..مشكلتي اني احس بالوحده

بتقولون عندج زوج وأطفال بس..زوجي معي بجسمه بس لكن روحه بعيد عني..احس انه تزوج

بس علشان يكمل نص دينه ولكنه وايد مهملني صدقوني اتعذب دايم اقوله يافلان خلك معي

تصدقون انه من ينزل من الدوام غلى طول يمر على عزبته..( بنات الامارات بيفهمون شو العزبه)

احس انه (البوش والرجاب) كل حياته..عمره مادخل علي بهديه ولا عمره افتكر يوم ميلادي

مع اني ماابخل عليه بشي وذاكره كل مناسباتنا الحلوه دايم اعطيه الاعذار اربع سنوات

من تزوجنا والحال على ماهو عليه..دايم اغير من حالي وشكلي بس مافي فايده

تصدقون انه عمره مامدح شي انا اسويه حتى يوم اتكشخ او اتعطر بعطر يديد او البس شي

يديد مايقولي شي بتقولون لي كلميه والله تعبت من كثر مااكلمه وافهمه واحسسه انه

مقصر معاي بس للأسف يتغير يوم ويومين ويرجع كل شي لحاله..

بتصدقوني انه من اربع شهور مالمسني غير مرتين..انا مشتاقه له وايد..ومشتاقه للكلام الحلو

والاحساس الرومانسي..مشكلتي انا رومانسيه وايد اما ريلي عكسي ماعنده اسلوب جاف معي

يوم نطلع معاه بس يدور بي في الشوارع وبعدين يرجعني البيت ويروح عند ربعه لين اخر

الليل كاني عبء يبغي يتخلص منه..لو اقولكم مااقدر الكتابه ماتوصل اللي في القلب

قلبي يحترق ريلي مهملني..الحين من 3 ايام مااكلمه بتقولون حرام عليج بس شو اسوي

انا بركان اذا احد جاسه ينفجر والله كل يوم اصيح معقول وحده ريلها نايم حذالها ولايحس فيها..

احس انه البيت عندي صاير مثل الفندق بس يرجع البيت علشان ينام لايتكلم ويايه ولايقولي شي..

والله تعبت ويوم اخاصمه يطرش لي مسجات يعاتبني فيها كأني انا اللي غلطانه في حقه

بموووووووووت من القهر ساعدوني...كنت اموووووت في حبه بس اليوم تغير كل شي..

افكر اطلب منه الطلاق..دخيلكم لاتخلوني ساعدوني تعبانه وايد..