صرخة العتمة

عنواني الريح ودروبي سنا نجمة
……واللي يبيني تراني ساكنة جوفي
ما بين عيني وعيني تنتشي وسمه
……فيها حياتي وموتي وامني وخوفي
وحدي ولكن عروقي كلها زحمة
……اشوف نفسي واشوف الناس في شوفي
واللحظة اللي تجيني ما بها رحمة
……أترك لها الدمع وارفع للسما كفوفي
لخاطر عيون قلبي اسرج الكلمة
……من غير قلبي أطيعه واعطي حروفي؟
خان الزمان اللعوب وخانني اسمه
……وانا أحسب انه حبيب يصدق ويوفي
مدري الوعد هو نصيبي أو هي القسمة
……أو حظي اللي دعاني لأكبر حتوفي
" أموت وأحيا واعانق بالسما نسمة
……عيت على الخلق وارتاحت على كتوفي"
فعيونها شي .. يشبه صرخة العتمة
……تقول: شوفي.. وانا اهتف بها: شوفي
ليلي نهار وصبحي صرت انا خصمه
……غمّضت عيني بكيفي ونامت سيوفي

همس