أول خطوة فى طريق التغيير
البداية
و قبل ما نبد..
أبغيك توقف لحظة.. و تفكر معاي..
تخيل..
يا ترى.. ايش احساسك لو قمت في يوم من النوم
و فوجئت بمعجزة صارت .. و ان حياتك صارت بالضبط مثل ماتتمناها تكون؟ و انك صرت "حي".. في قمة الحياة..
تخيل اللحظة هذي اللحين..
ياترى.. من وين تعرف ان المعجزة هذي صارت؟..
شراح تشوف ؟..
شراح تسمع؟..
شراح تحس في داخلك؟..
اش التغييرات اللي راح تصير في شغلك.. او في دراستك؟..
ايش التغييرات اللي راح تصير في علاقاتك بالناس؟..
ايش التغييرات اللي راح تصير في حالتك المادية؟
طيب
البداية تكون منين بالضبط؟..
قلنا محتاجين نغير افكارنا..
و عشان نغيرها.. محتاجين نفهم نقطة مهمة جدا..
ان احنا نتواصل مع العالم من حوالينا عن طريق حواسنا..
هي النوافذ اللي نطل منها على العالم..
السمع.. و البصر.. و اللمس.. و الذوق.. و الشم..
و لكن.. هل حواسنا هذي مطلقة.. مالها حدود؟..
لأ.. من نعم الله سبحانه و تعالى ان حواس الإنسان محدودة..
تخيل لو كنت تقدر تشوف بعينك المجردة اللي يقدر يشوفه الميكروسكوب؟..
ماكنت تقدر تستحمل تشوف وجه حد..
لأنك راح تكون شايف المسام و الجبال و المنخفضات اللي في جلده بمنتهى الوضوح..
تخيل لو كنت تقدر تسمع أصوات الإنفجارات اللي تحصل في الشمس..
أو تسمع في نفس اللحظة أصوات كل الناس اللي يتكلمون على كوكب الأرض؟..
و تخيل لو تشم كل الروايح اللي على الأرض في نفس اللحظة؟
و تخيل ان حاسة اللمس ماهي محدودة..
كان اقل لمسة تحسسك بألم شديد..
كنت لما تحب تقص شعرك.. محتاج بنج كلي..
و تروح المستشفى تعمل جراحة حلاقة ..
و يبقى فيه تخصصات في كلية الطب..
طب شعر و ولحيه

..
و دكتوراه في قص الأظافر ..
محدودية الحواس نعمة من الله سبحانه و تعالى..
"إنا كل شئ خلقناه بقدر"..
فكل واحد يكون صورة.. أو خريطة للعالم من حواليه..
عن طريق الحواس المحدودة هذي..
عشان جذيه خرائط الناس..
او النظارات اللي لابسينها و يشوفون من خلالها الدنيا من حواليهم تختلف.. من حيث الدقة.. و الصحة..
و عشان نفهم الدنيا و العالم من حوالينا صح..
محتاجين الخريطة الصحيحة..
محتاجين نظارة على مقاس نظرنا..
و محتاجين نتكامل مع الآخرين..
لأن محد فينا عنده رؤية كاملة..
طيب شنستفيد من هذا كله؟..
نستفيد ان الصورة اللي نكونها في عقولنا عن العالم من حوالينا.. نكونها عن طريق الحواس المحدودة هذي..
عن طريق الدرايش هذي.
احنا كبشر في الدنيا.. صايرين مثل اللي يتفرج على مباراه كره قدم في التلفزيون..
اللي يكتفي بخريطته هو بس.. أو برؤيته هو بس..
صاير مثل زي يتفرج على المباراة كلها بكاميرا واحدة بس
من زاوية واحدة بس طول المباراة ..
و اللي يحط في حساباته خرائط الآخرين.. و آرائهم..يتقبلها.
مايقول رأيي انا الصح و بس.. هذا الرؤية عنده أشمل..
هذا اللي يتفرج على المباراة من جميع زوايا الملعب بكل الكاميرات..
سبحان الله.. ربنا خلقنا جذيه..
و سبحان الله.. من عظمة الإسلام..
انه وسع اختلاف خرائط و رؤى الناس..
عشان جذيه شرع نظام الشورى..
عشان محد يفرض رايه.. أو خريطته عن العالم على غيره..
بل يحصل عملية تكامل..
و كذلك من عظمة الإسلام انه قبل تعددية الآراء..
فأصبح عندنا 4 مذاهب بدل مذهب واحد..
4 مذاهب كلها صحيحة.. و تكمل بعضها..
عشان جذيه ماينفع يجي حد يقولك لأ انا شايف انا نلغي المذاهب
و نسوي مذهب واحد بس عشان احنا اللحين في عصر الإتصالات
و تقنية المعلومات ..
لكن زمان الأئمة ماكانوا يقدرون يتصلون ببعض و يتناقشون..
و انا متأكد انهم لو اجتمعوا..
لاتفقوا على مذهب فلان ان هو اصح مذهب..
مين اللي قال؟؟؟
أصح مذهب في وجهة نظرك انت.. في رؤيتك انت.. في خريطتك انت.. لكن مو حسب خرائطهم هم..
المفهوم هذا لو تعلمناه راح يسهلنا امور واااايد في حياتنا.
راح يخلينا اكثر تقبل للناس..
و أكثر فهما للناس..
اسمحولي هاي المرة كان الحديث طويل
المرة الجاية راح اكلمكم عن خرايطكم وخرايط الآخرين