ليه هاللحظة تجيني ؟!؟

تجيني بعد ما حبيت غيرك
حبيبي ليه هاللحظة تجيني
حسايف توك تغير مسيرك
تجي يوم انطفت شمعة حنيني
صبرت سنين أبي صحوة ضميرك
ولا فكرت في اللي صار فيني
زرعتك ورد واشتقت لعبيرك
خسارة ما لقيتك في يميني
بكيت من العطش وأنا بغديرك
شربت من الظما دمعات عيني
عشقتك صوت واحياني أثيرك
وضاع الصوت ما بينك وبيني
سقى الله ما مضى وأيام خيرك
على قلبك واعرف إنك تبيني
أكيد اللي تخيلته عشيرك
نساك وجيت مكسور وحزيني
تحسب إني مثل أول أسيرك
علي تغلط بلحظة تحتويني
تذكر يوم قلبي مثل طيرك
على كيفك ورايك كل حيني
عطيتك كل ما يملا نظيرك
وعز اللي تمنى من سنيني
تذكر ليلة القمرا سميرك
وتعرف قدر حبك يا ظنيني
عيون الشمس تعرفني سهيرك
بقايا الليل نجمة في جبيني
حبيبي بالعتب ما أحب أثيرك
غلا ماضيك في قلبي وعيني
أنا بالعكس يزعلني مصيرك
أنا جربت جرح العاشقين
هويت إنسان عوضني كثيرك
عطاني كل عمره في يميني
ولو تفرش إلى بيتي حريرك
أنا ما بيع واحد مشتريني


سعد الخريجي