...أم احمد .. ودار الرعاية...

ام احمد.. كباقي النساء.. سهرت وتألمت وفرحت.. ولكما كبرت كانت في امس الحاجه لكف حنون.. تواسيها .. وتؤنسها.. فلم تجد احد فقالت:

كذا يعني .. بترميني اسيره بين هالجـدران
وانا اللي كنت احسبنك نهاية حزني وبكايه
كذا ياأحمد كـذا يمه .. تحطـم حلمي الفتان
وتكسـر آخـر آمالي بشوفة أجـمل حكـايه
ياأحمد وشهو ذنبي اللي فعلته وصرت به غلطـان
وأنا اللي كنت احظن الهم واجعل فرحتك غايه
نسيت الحظن ياوليدي نسيت الهـم والحرمان
نسيت إن عمري افنيته عشانك إنتا يا منايه
حملتك في تسع اشهر حملتك والجسـد تعبان
وعقب ما جيت سميتك يا أحمد والاسم آيه
تحملت العذاب وقلت في نفسي تجي ازمان
تكون الفرحـه بشفاهـي .. عقب احزان دنيايه
توفى والدك يا احمـد.. توفى الحب والتحنان
وعمري كـان يسمحلي بزواجن يبري حشايه
كتبت العهد من عقبه.. حشى ما خنت انا الأيمان
وجسمي ما لمس شخصـن ولا فكرت ببدايه
نذرت النفس لعيونك .. وصار الحزن لـي عنوان
احـاول اجمع افراحك واداري هـمي بشفايه
نسيت امك .. نسيت امك يا مقسى صفعه النكران
نسيت إن الحزن يقفي إلى من صرت ويايه
اهون عليك ياأحمد .. تخليني وسـط احـزان
تخليني بعد ما قلت أنا للحزن يا نهايه
نسيت الرحمه يا وليدي .. تذكر واذكر الغفران
وحاول تذكر الجنه( تذكر شرطها رضايه
انا ياوليدي ادعيلك واقول ارحمه يارحمان
اخاف تكون فـي نارن عظيمه بسبة خطايه
ياأحمد لا تخليني دخيلك صـدري به نيران
انا مابي سوى شوفك .. وشوفك غاية رجايه
أبي قربك..ابي وصلك ابي ابقى وسـط خلان
واباختم آخر أيامي بقربك وإنتا لي دوايه
تعال وشوف شيباتي .. وناظر جسمي الهلكـان
ودمعي يشتكي مني ونار الشوق بحشايه
تعال لحظني يا وليدي .. تعال لحظني الولهان
تعال ونادني يمه .. ابيكي تعيشـي دنيايه
وتعلا صوت بالغرفه يزلزل صوته الجدران
عشر إسنين ياام أحمد .. وإنتي تكلمي مرايه!!