ياليت إفادة،،الولادة الثانية في مستشفى الكورنيش

سبحان الله قلبج على قلبي ،،

توني بحط موضوع استفسر فيه عن مستشفى الكورنيش ..

ياليت البنات يفيدوونا ،،

_اذا بفتح ملف في الكورنيش شو الاجراءات اللي يسوونها ؟

_ كيف نظام المراجعه والولادة في الكورنيش ؟

- هل صح يولدون الحريم عدال بعض وبينهن ستاير مثل ماسمعت ؟

وسوال مثل اختي Aryam

وإذا الوحدة تبي خياطة تطلبها وقت المراجعة من الدكتورة والا كيف؟؟؟؟؟؟؟؟

ملاحظه : <<<<<<<<< اول بيبي ،،

والله يقومج اخت اريااام بالسلامه ويفرحج بشوفت النونو بصحه وعافيه يارب،،

ويقومني انا وكل الحوامل بالسلامه يارب ويسهل ولادتنا يااااارب ،،

مشكورة الغالية دودة في بطنها نونو على درج، والله يقومنل وياج بالسلامة...
وانشاءالله أفيدج بالرد على استفسارج:
شو الاجراءات اللي يسوونها ؟
بالنسبة للمواطنه صورة من جواز سفر الزوج والزوجه + صورة من خلاصة القيد أو عقد الزواج... بعدها بيحولونج على فحص الدم عشان يتأكدون من الحمل، وبعدين تروحين تاخذين موعد

كيف نظام المراجعه والولادة في الكورنيش ؟
عادي بعد كل مراجعة تعطيج الدكتورة موعد جديد..والولادة أول ما تحسين بألامها تروحين قسم الطوارئ

هل صح يولدون الحريم عدال بعض وبينهن ستاير مثل ماسمعت ؟
أكيد لا (عن تجربتي) كل وحده في غرفة بروحها بس أكيد الغرف عدال بعض

وإذا الوحدة تبي خياطة تطلبها وقت المراجعة من الدكتورة والا كيف؟؟؟؟؟؟؟؟
بالنسبة لأول بيبي عادة يسوون خياطة، وهذا اللي سمعته من الكل....
والله يقومج بالسلامه....

ياليت البنات يفيدونا بخبرتهم وتجاربهم بالنسبة لمستشفى الكورنيش، وبلييييييييز لا تنسون سؤااااالي

حبيبتي

اعتقد انه لو شوولج قص او قطع لازم بيخيطونه


بس في حريم في الولادات الثالثه و الرابعة ما يحتاجن القص

فهني عاد ما أعرف إذا يخيطوهن او لا


بالسلامه حبيبتي

يسلموووو اريام على ردج عن استفساراتي ،، وانشالله حد يرد على استفسارج،،

اخت اريام انا في الشهر الثامن هل فيه اجراءات ثانيه ،،

اخاف مايستقبلوني لاني في اواخر الحمل ،،

مشكورة الغالية ريم81 على الرد، بس في نوع من الخياطة اللي يكون تجميلي بس، يعني يسوونه حتى لو بدون قص.......وانشاءالله البنات يفيدونا أكثر

أختي دودة في بطنها نونو، بالنسبة لأنج متأخرة ما أعتقد في إجراء ثاني وأعتقد يستقبلونج عادي لأني أعرف وايد حريم ما يراجعون إلا في السابع والثامن، بس أحسن تروحين بسرعة عشان يقدرون يسوون لج أكبر قدر من الفحوصات اللي تعطيهم فكرة شاملة عن حالتج، وأهم شي لازم تعرفينه أنهم ما يستقبلونج في الطوارئ إذا ما عندج ملف، وطمنينا شو يصير معاج

انا اتعالج بمستشفى الكورنيش لما كنت حامل بالشهر الثاني مارضوا يعالجوني ويفتحون لي ملف بس رحت الطوارئ وكنت تعبانة من الغثيان والوحام .......وعالجوني وفتحوا ملف حقي وعطوني لموعد متى تتخلين الشهر الرابع اول اسبوع..........بعد مايهتمون للحامل بالهور الاولى بس من بعد الثالث....وعقب المواعيد في نفس قسم الطوارئ ماادري ليش وعقب صارت المواعيد كل شهر وطبعا حولوني على عيادة الحوامل والحين داخله التاسع واتوقعت المواعيد كل اسبوع والصراحة لا لا لا اضايقت صارت كل اسبوعين قلت لها ليش كل اسبوعين ....المفروض كل اسبوع وماردت وطبعا كل موعد تلاقين دكتورة غير عن كل مرة ..........مرة باكستانية وهندية سورية مصرية واردنية.......وسودانية واحسن وحده عرفتها والصراحة الارف الباكستانيات .......كرهت حياتي خاطري استقر عند دكتورة وحدة اعرفها وتعرفني بس للاسف هذاا نظامهم والحمدلله على كل شي......


بس خرعتوني بسالفة الولادة معقولة الوحدة تولد جمب غرفة وحدة ثانية ليش مافي غرفة خاصة للعمليات يعني عمبر ولادة ............وعقب ينقلونا على غرفنا اللي نرتاح فيها ........

وابي اعرف بعد الولادة الغرف تكون مشتركة.........؟؟؟؟؟؟؟؟؟؟؟؟؟

انا قدمت على طلب غرفة خاصة وطبعا تدفعين عن اليوم 500 درهم بس للاسف اونه نادر مانحصل يعني احنا نحجز ووقت الولادة اذا حصلوا غرفة خاصة vip يدخلونا عليها.........واذا ماشي يخلونا مع بنات في غرف مشتركة وانا طبعا دايما حظي نحيس بس يله بصبر دام اني مابحصل غرفة خاصة شسوي يعني لانه صراحة الكل قال بواسطة بس يمكن تحصلين.........

بلييييييييييييييييييييييييييييييييييييييز المجربة الولادة تخبرنا كيف معاملتهم وتحدثنا عن الغرف اللي ينقلونها لكم بعد الولادة............خبرونا عشان ماننصطدم

أختي خرزة زرقة الله يقومج بالسلامة، وفعلا هم ما يفتحون ملف إلا بعد الثالث،،، مادري شو الحكمة...بالنسبه للمراجعات مثل ما قلتي كل مرة دكتورة، ما عندهم نظام أنج تكونين مع دكتورة وحدة بانتظام، واللي أعرفه أن هذا في معظم المستشفيات الحكومية.......
بالنسبة للولادة أختي لا تخترعين :) في عنبر للولادة،، بس أكيد الغرف عدال بعض، وبعد ما تقومين بالسلامة ينقلونج الغرفة...والغرفة أنتي وحظج حسب الزحمة، بس الغرف الخاصة إنسي موظوعها لو دفعتي 1000 لليوم، إلا إذا عندج واسطة!!! هذي الحقيقة للأسف، أنا حاولت أحجز بس قالولي مافي حجز لأن بكل بساطة ما نعرف متى بتربين،، المهم لما دخلت الطوارئ ريلي كلمهم عشان الغرفة الخاصة قالوله "فل" بس لا تحاتي بنعطيها غرفة بروحها، قلت خير وبركة...أنتي خلي ريلج يكلمهم ويصر ع الغرفة الخاصة أخر شي بيعطونج غرفة بروحج عشان يسكتونه :)
بالنسبة للمعاملة كل حد بيقولج شي، ناس تمدح وناس تذم، كله يعتمد على المناوبين اللي بيكونون على حظج، في ولادتي الأولى الحمد لله كانوا أوكي ومعاملتهم زينه، انشاءالله يكونون زينات على المرة اليايه.....

مشكورة يااختي اريام عالرد والصراحة الحمدلله طمنتيني حتى لغرفة خاصة مابيها المهم اكون بروحي ...............

انزين بخصوص غرفة عمليات الولادة يعني فيها عدة اقسام صح....؟؟؟؟يعني يولدون اكثر من وحده ..........اذا جي اوكيه بس اهم شي يكون فاصل بينا لاني مانقصه حد يشوفني الا زوجي

أكيد عزيزتي خرزة زرقة، كل غرفة منفصلة تماما...باب بروحها وأجهزة بروحها وكل شي، لا تحاتين محد يشوف حد، شو هي فوظى :)وفي الوقت نفسه ما شاالله يولدون أكثر من وحده بس كل وحده لها طاقم نيرسات خاص.... لا تحاتين وأدعي الله ييسر لج ولنا الولادة......

فديت روحج والله ريحتيني واااااااااااااااااااااااااااااااااااااااااااااااااااااااااااااااايد وانا كنت احاتي اذا صارخنا او قلنا شي اتحرى اللي صوبنا بيسمعونا ففضيحة لانه سمعت يقولون يفصل بينا ستارة بس الحمدلله كلامج ريحني وااااااااااااااااااااااايد ..............واااااااااااااااااااااااايد مشكورة فديت روحج

[grade="8B0000 FF6347 008000 4B0082"]موضوعكم عجبني واحسه بوقته، انا الحين بلحق ريلي بوظبي علشان عندي موعد في الكورنيش مهم، بالنسبة للمعاملة مش ولا بد، بفلوسج وبال( بقشيش) بيستوو لج شبيك لبيك، والا تكلميهم وتطلبين منهم غرف منفردة وهالسوالف بيردون عليج بيقولون كله( مافي) انا ولدت بالكورنيش بالنسبة للولادة رب العالمين يسر علي وهم ما قصرو بامانة وكل وحدة بروحها بغرفة وكان معاي بالغرفة زوجي وامي اخواتي الثنتين يعني عادي اي حد يدش بس ريال واحد اخوي ما رضو يدخلونه القسم بالمرة
الحين ابي اولد عندهم بس كوني اني مش مو بوظبي فالدرب طويلة علي غير انه احاتي ولدي بيقعد مع منو والا انا خاطري اولد عندهم,,,
معاملة الدكاترة بالفعل كل يوم دكتورة ما يثبتونج على وحدة..
والحمد لله الله يسهل على كل حامل[/grade]

كل ولاداتي في مستشفى الكورنيش يعني والده اربع مرات وهذا الخامس
في بكري سوولي خياطه اما الثاني فحتاجيت لغرزه فقط
اما الثالث والرابع ما احتاجيت لشي
بخصوص فتح ملف في اي شهر يفتحولج بس اهم شي في الشهر الرابع تستقر حاله الجنين واذا كنتي تعبانه تروحين للطواري وتفتحين من هناك ملف
في هذا الحمل فتحت ملف في الثالث قلتلهم ان عندي سوابق اجهاض وعطتني موعد بعد اسبوع يعني ما حصلت صعوبه في فتح الملف كانت متعاونين ويايه

بخصوص المراجعه
تكشفين اول مره في العياده العامه للحوامل لكن اذا حبيتي تتعالجين في العياده الخاصه لكبار الشخصيات فيعالجونج وخاصه اذا كانت حالتك خاصه تروحين العياده وتطلبين منهم التسجيل عندهم
لكن اذا فضلتي العلاج بالعياده العامه ممكن بعد ما تخلصين من الفحوصات وتعطين السستر كرت الموعد تسالينها من الدكتوره الموجوده وتقدرين تختارين الدكتوره
يعني اذا ارتحتي عند دكتوره سودانيه تسالينها عن اسمها والمره الثانيه تقدرين تدخلين عندها

بخصوص الغرف

اذا كنتي تعبانه وتنومتي بيحطونج مع وحده في الغرفه الين تكملين 24 ساعه بعدين تقدرين تطلبين غرفه بروحج هذا في حاله اذا كنتي تعبانه
لكن اذا بتولدين بعد يحطونج مع وحده بس مؤقت الين تفضى غرفه قبل الولاده
بعد الولاده الاولويه غرفه بروحج بس يبغيله زوجج يراجع الاداره بالطابق الثاني عند وحده اسمها ناديه عشان تاكد للعنبر الي انتي فيه ان غرفتك تكون خصوصي يعني محد يشاركك فيها
وبامكان امك النوم معاج وتقدرين تشكلين بالغرفه شوماتحبين من سجاد وكراسي وبالونات يعني خذي راحتج بالغرفه

بخصوص غرفه الولاده
تقريبا 15 غرفه في غرف بجنب بعض وفي لا بس ما ينسمع وايد الصوت يعني الباب مثل ما تقولين كاتم للصوت ويسمح بوجود شخصين فقط معاج بالغرفه ولج سستر خاصه بك تيلس معاش طول الوقت

ملاحظه
في دورات رياضه للحوامل وكيفيه التعامل مع الطفل للبكريه من تنظيف واهتمام وطريقه الرضاعه الطبيعيه والمشاكل الي بتواجهج
اسالي دكتورتج عن الدوره او الرسبشن

واي استفسار انا حااااااااااااااااظره
انا ما امدح المستشفى بس اخبركم شو الموجود عندهم من خدمات لان في وايد ما يعرفون خدماتهم

الجميلة78

ليش ما رضو اخوج يدخل انا كل ولاداتي يكون وياي اخواني قبل ما اولد هم يمشوني كل شوي واحد يمشيني ومعاهم زوجي
وبعد ما اولد يزوروني وحتى ازواج اخواتي ييون والله الغرفه تستوي زححححححححححمه وعادي ما يقولون شي

واذا طلبتي غرفه خصوصي تقدرين تنومين ولدج وياج اذا حد بيهتم فيه سواء كانت خادمه او احد من اهلج بس زوجج يخبر الاداره ان في مرافق معاج

ميرة الصغيرة زين انج مجربة وافدتينا بتجربتج والحمدلله انهم اوكيه معاج بس انشاءالله يكونون متعاونين معانا...............الله يسهل علينا

بس ابي اعرف في الشهر التاسع انا اتحريت اول من ادخل التاسع بيسون المواعيد كل اسبوع والحين هم لاقيتهم بنهاية الثامن وعطوني موعد في الاسبوع 37....بس قلت اوكيك بس ليش مايسون لنا السونار الالتراساوند............ابي اطمن على الجنين اذا نزل بالحوض والا لا....لانه وايد يكون بالعرض ولما تكون وضعيته في الرحم بالعرض اتعب وايد واحس بالثقل واذا اقول لهم اي شي يقولون عادي مال الحمل ..........واضايق منهم ......بس ابي اعرف شو يسون لنا في مراجعاتنا في الشهر التاسع ...............ابي اعرف

أم عزووووووووووووووزي وصلت كللللللللللللللللللللللللللللللوش...

مرحبا بنات ..زين يوم انكم فتحتوا هالموضوع ...لأن هذي أول حمل لي وناوية أولد في الكورنيش

بالنسبة لمستشفى الكورنيش يعتبر أحسن مستشفى ولادة في الإمارات طبعا هذا بعد إستفتاء عام يعني مش من عندي الكلام

الإدارة معاملتهم مو ذاك الزود ...بس على امنوا :angry: عطيهم حلو الكلام وسيري وانتي كااااااااااااااااااشخة وهاي كلاس بيعطونج ويه رحتي امصفعة زين لو قالولج نعم إختي(n)

وبالنسبة لغرف VIPانسي موضوعها أصلا حتى لو الغرف فاضية بيقولولج فل..

في العيادة العامة فتح الملف يكون من الثالث ... والدكاترة كل مرة يتغيرون أنا الصراحة لغاية الحين مارتحت لأي وحدة مرة مصرية نست تكتبلي أدوية وجنه معطينها سد الحنك ... ومرة دكتورة زوينه بدل ما اطمني ع البيبي داقة سوالف معاي عن نظارتي الشمسية :angry: :cool2: وآخر وحدة هندية اتلوع الجبد وروحتي أصلا موووووووووووووووول ماكان لها داعي اضطريت أروح عيادة خاصة كعادتي كل شهر عشان أفحص ع البيبي ...

بس فوق كل ها يمدحون الولادة اهناك<<<<<<< عندها أمل يطلعون أوكي :gum: :pain:
ودورات الرياضة والتدريب على كيفية التعامل مع البيبي واشلون الولادة هذي كلها تلتحقين فيها من الشهر السابع ..جان تبين

وآسفة طولت عليكم ...
تحياتي للجميع

الالتراساوند يسوونها للحالات الخاصه يعني اذا كانو شاكين بشي
بس غريبه ما عطوج كل اسبوع في التاسع
واحيانا يوم تخبرينهم عن شي اتحسينهم يطنشون ويقولولج عادي واذا رحتي لعياده خاصه بيقولولج نفس الشي
اذا حسيتي البيبي بالعرض حاولي تحبين بيعدل من وضعيه البيبي او ترفعين ريولج مع وضع وساده تحت الحوض لمده 10 دقايق او السجود
انا كل مره اسوي شي عشان اشوف اي الوضعيه اريح لي

أم عزوووزي الحلو

مستشفى ببلاش كيف تبغين تكون معاملتهم
المحتاج يستحمل والي ما يستحمل يروح خااص
ومن غير الدكتوره تشوف في اليوم 20 مريضه ما تعرف من تكون صادقه بتشخيصها ومن تدلع

ربيعتي كانت تتعالج بمستشفى خاص وتصدقين قالت الها الدكتوره ما فيج حمل وهي كانت بتروح الحج خذت ابره الحمى الشوكيه وبعد ما رجعت شافت الدوره ما يت ويوم راجعت اكتشفت انها كانت حامل من شهر ونص وفي ملفها صوره من الاتراساوند تثبت ان في جنين بالرحم والي راجعت عندها غير الي كشفت عليها بعدين يوم سالت الدكتوره شو الحل قالت ما عليه اذا الله كاتبله بيعيش ونصحتها تروح الكورنيش تتعالج
شكل الدكتوره تبغي تخلي مسؤوليتها عن الموضوع
يعني الاغلاط في كل مكان والتجاهل في كل مكان

ام عزوز شكرا لج نفعتينا بمعلوماتج وصج انا يوم كنت اروح كاشخة كانوا يبتسمون بس لما دخلت السابع صارت عندي حساسية وكنت ماحط ميكب وكانوا يطنشوني وايد صج حركاتهم مب حلوة......

ومشكورة اختي ميرة الصراحة كلامج صح