ملجه انتهت الى .......................طلاق

السلام عليكم ورحمه الله وبركاته

بصراحه من زمان كان ودي اكتب موضوعي بس كنت متردده لكن بعد ماعرفتكم وعاشرتكم احسن انكم مثل خواتي
والحين اكتب لكم سالفتي كامله ادري طويله بس اتمنى انكم تقرونها

انا الحمدلله وايد ناس اخطبوني من كان عمري 17 سنه بس اهلي كانو يرفضون لاني صغيره وطبعا هذا امر طبيعي
خطبني ولد عمي وبعد فتره ملجنه كان عمري وقتها19 سنه ماكنت امخلصه دراستي واهو بعد كان يدرس وطبعا الوالد ماكان يقدر يقول لعمي اجل الملجه لين يخلصون دراسه لان اول شي عمي الكبير وابوي خاف ان عمي يفهم التأجيل رفض لولده وابوي قال الحين نملج بس ماكو عرس لين انا اخلص دراستي واهو يتوظف
بعد فتره من الملجه كلمنا بعض وزارنا بالبيت والله يابنات كان طاير فيني من فرحته وكان يقولي اني عاجبته من زمان وكان يتمنى ان نتزوج والحمدلله ان الله حققله امنيته
هذي يمكن المره الوحيده اللي قالي فيها هالكلام وبعدها يكلمني عادي ماجنه مالجين وعلى وجه زواج يكلمني كأي ولد عم يكلم وبنت عمه وكان يطلب مني اني مااكشخ لما يجي يشوفني تخيلو مع اني ماكنت ابالغ بكشختي كنت عادي بس ماادري ليش كان يقولي جذيه
بعد فتره ماقام يجينا البيت ولايشوفني يأجل اويرفض وانا ما احب اضغط عليه
بعد فتره حتى اتصالاته قلت اذا طول عشر دقايق
اول الوقت قلت يمكن عشان رمضان واتعرفون رمضان والجمعات والعزايم
ولما قلتله ليش ماتكلمني انت طول اليوم ماتدق واذا دقيت علي بليل اكلمني 5 او10 دقايق واتسكره
قالي انا متضايق ونفسيتي تعبانه
قلتله شلون تقعد لي 2 و3 الفجر بالدوانيه وعلي نفسيتك تعبانه قالي شلون يعني عشان متضايق اقعد بالدار ما اطلع وسكرتنا التلفون وانا تضايقت حيل اشوي وابجي
بعد عشر دقايق دق علي قلت بيني وبين نفسي بعد عمري اكيد داق يقولي اتحمليني هاليومين لاني متضايق (والله انا مسكينه)
تدرون شنو قالي قالي لاتدقين علي هالاسبوعين وانا ادق عليج ماقدرت ارد عليه لاني بصراحه بجيت من كلامه وصدمتي وماتكلمت لاني ما ابيه يحس اني ابجي وسكرناه

بصراحه حسيتها اهانه وبعد يومين دقيت عليه وعاتبته والمصيبه قالي انا من ملجنا وانا انحلم حلم مزعج وبصراحه انا مااحس انج زوجتي احسج مثل اختي انا كل مافكرت فيج يكش جسمي مااتخيل ان انا معاج بغرفه وحده انا عصبت وقلتله انت توك اتفكر بهالشي وينك قبل لانملج

بعدها انقطعت علاقتنا وانا ماقلت لاحد حتى امي ماقلتلها امي الي ماكنت اخش عنها شي قمت اجذب عليها بسبته واقولها توني امكلمته او توني مسكرته منه

بس ماقدرت اطول بالجذب لان السالفه طولت انا قلت يمكن اهو متضايق اسبوعين اوثلاثه وبيرد لطبيعته وقلت لامي ان صارله مده مايكلمني بس ماقلتلها كل شي

المهم بعد مده عمي قال لابوي ان اولده مايبي الزواج ويبي يطلق وقال لابوي ان الولد فيه حاله نفسيه وان قبل كان مستعجل عالزواج ولما يجيبون طاريي يطير من الفرحه
والحين بس لويقولون اسمي جدامه يقعد يصارخ ويرجف وعيونه تصير حمر ويصك عليه داره بالثلاث واربع ايام
انا لما امي قالتلي قلتلها ابركها من ساعه وابرك اصلا انا ماارتحتله ( طبعا هذا تمثيل لان امي كانت متأثره حيل وماسكه نفسها عشاني وماكنت ابي اضايقها زياده )
امي المسكينه بنتها واول فرحتها تتطلق وماتقدر تقول شي لبوي وماتبي تحره شنو تقوله يعني ازعل على اخوك
وابوي المسكين هم هذا اخوه شنو يقدر يسوي لوناس غرب يمكن اهون

وانا مصيبتي اني ماكنت اقدر ابين شي وما اقدر اشكي لحد تخيلو كنت انطر اللي فالبيت كلهم ينامون عشان ابجي ومحد يحس فيني
لاني مابي احرهم زود ما اهم محترين

قعدنا شهر ونص بهالعذاب عمي كل اسبوع يقول الاسبوع الجاي
اسبوع يقول ولدي فيه حاله نفسيه
واسبوع محسود وخلونا نقرأ عليه
واسبوع مسحور
واسبوع يقول بيتنا كلهم مسحورين

وبصراحه انا تعاطفت معاه وقلت ولد عمي لما صار فيه هالشي اتركه كنت ساكته ماكنت اقولهم طلقوني مع ان كانو يقولولي خلينا انفج المأجله الحين اهون من شي اكبر

بس سبحان الله خطر على بالي اروح لاند مارك خذيت حواتي واخوي ورحنا تخيلو الساعه 7 ونص او 8 بليل
وانا اطالع جواتي اليهال وانتو بكرامه كنت باخذ لاخوي الصغير رفعت واسي والا اشوه جدامي حده كاشخ بالغتره والعقال والله لما يجي يشوفني مايكشخ جذيه
انا ابصراحه جذبت عيوني ماصدقت ان اهو وين اللي يقولون نفسيته تعبانه والله يابنات حسيت لساني مربوط حاولت اناديه ماقدرت واطالع اخوي ابقوله هذا اهو والا واحد يشابه اطالع اخوي وما اقدر اتكلم واخوي كان يطالع الجواتي ما انتبه لي
وتأكنت ان اهو لما شفت اخوي واهم ماشافوني

حسيت ان الله سبحانه خلاني اروح بس عشان اشوفه لاني كنت افكر ما افج الملجه

رديت البيت وقلت لامي وصليت استخاره وعطيت ابوي بطاقتي المدنيه عشان يخلصونا ويطلقون

بس الحمدلله بعد الاستخاره حييييييل ارتحت

بس المصيبه صارلي الحين سنه من الطلاق ولا احد خطبني جم مره اسمع ان فيه ناس ماخذين عنوان بيتنا او رقم تلفونا وفيه ناس تسأل عني بس محد فيهم خطبني

وانا بصراحه خايفه من هالشي

انا تخطيت الحمدلله كل شي وتخرجت من المعهد والحين بس انطر الوظيفه
بس كاتبه سالفتي عشان البنات يستفيدون منها ويدعولي لان اللي يشوف مصايب الناس تهون عليه مصيبته
تخيلو صارلي سنه مادخلت بيت عمي لا انا ولا اهلي بس ابوي يروح لعمي بالدوانيه واهم نفس الشي والمصيبه اذا شافينه بأي مكان يسلمون علينا بنفس خايسه جني انا اللي طالبه الطلاق مو ولدهم والله بلوى:dd:
يمكن ماتبون يحسسون الناس ان ولدهم فيه شي
مع ان كل من سأنا انا او امي او ابوي نقول قسمه ونصيب لان مهما كان ولد عمي
مع ان كنا نقدر نقول ان فيه حاله نفسيه وكنا نقدر نزيد من عندنا بعد انتو اتعرفون هالسوالف بس احنا انخاف الله
والناس اللي يقول لامي يمكن يحب وحده ثانيه واللي يقول لبوي هذا ملج عشان ياخذ 4 تالاف الحكومه
واحنا بس نقول ماندري وقسمه ونصيب


بنات انا مابي منكم الا انكم يدعولي ان الله يعوضني ويرزقني بالزوج الصالح عاجل غير اجل يارب العالمين