فراغ + وحده قاتله + شكوك وظنون + نفسيه منهاره + خيالات تحطيميه

السلام عليكم

كيف حالكم بنات ؟

رجعت لكم وكالعاده مع مشكله :sad:

بنات من جد نفسيتي جداً تعبانه وصلت الى مرحله صرت اقهر فيها نفسي بنفسي بخيالات مالها اساس من الواقع بس منسوجه من احداثي اليوميه اللي تصير معي وانقهر منها فلما اجلس بلحالي بالغرفه وخاصةً وقت النوم اجلس افكر واتخيل ان هالأمر تطور معاي لما صارت هوشه ولا اني اتخيل اني بس اجلس يوم ثاني راح اسوي اخناقه على اللي حصل أمس مثلا عشان اوقف اللي سوى هالشئ عند حده ومن جد ترى احس بنفعال وألم في راسي من هالخيالات والتفاكير صحيح انه اغلبها تقهر بس ليه انا اصلا ما اعدي هالحداث واطنشها من جد بنات احس فيني حاله نفسيه احس تأزمت حالتي عن اول بكثير انتقلت الى حتى الشكوك والظنون مثلا انا ما ابغا هالشئ يصير واكون محذره مثلا اخوي وقايله له لاتسوي كذا انا ما ابغاك تسويه لان هالشئ يعنيني فأجلس يوم ثاني من النوم واقول اكيد هالحين سوى هالشئ عشان يقهرني فأقوله هاه سويت اللي قلت عليه فايحلف لي انه ماسواه بس داخل نفسي مايزال فيه شك ..

غير كذا احس لاني وحيده وحتى صديقاتي للأسف اللي اسميهم انا صديقات لانهم بعاد عني وخاصة اللي اعتبرها اغلى صديقه عندي واللي ماتكلمني نهائيا الا اذا انا اتصلت عليها وممكن نجلس شهور مانكلم بعض فهذا تاعب نفسيتي بزياده يعني انا وحيده من جهة الأهل اللي امي قاطعتهم ولا حتى تطلع ولا تواصلهم وبعد وحيده من الصديقات ومن الأخوات..

يعني تصورو انا الوحيده بالبيت عندي اخت بس وجودها وعدمه واحد والسبب انها اولا اكبر مني بكثير وغير كذا هي زي الموسوسه اومعاها حاله نفسيه بمعنى اصح ولا تحب تطلع ولا تروح لأي مكان ولا حتى تشوف الناس فايعني تصورو قاعده بوحده من غير احد..

وغير كذا انا مو متزوجه وكل سنه اكبر سنه والناس لما تشوفني تستغرب ليه انا ماتزوجت الى الان وبعد هالشئ تاعب نفسيتي من ناحية تفكيري بالعمر اللي مشكلي ازمه نفسيه لدرجة اني ماحب احد يسألني عن عمري وحتى في المستشفيات انقص من عمري واقولهم 28 مع انه عمري 30 وايضا تعبانه من جسمي اللي جالسه احاول انزله والحمدلله نزل بس في الأخير صار يزيد ماينزل وتراه مني انا لان نفسيتي زفت صايره اكل ..

غير كذا انا فيني ميزه شينه وهي ان اي احد يمدحني ويقولي نحفتي ولا تغير شكلك ولا اي شئ فورا يعود علي بطريقه سلبيه بحيث اني اكل وازيد بعد في الأكل يعني مايكون كلامهم لي دافع ونا بصراحه هاجس النحف صاير يطاردني الى ان احقق حلمي بس هم هذا الشئ متعب نفسيتي لاني من مدح اي احد اضيع كل التعب وارجع اكل وأريح عالأخر ..

غير كذا انا وبكل صراحه عندي اهمال في واجباتي تجاه ربي وهذا مو بس مأرقني ومخليني أفكر ليل مع نهار في حالتي هذي لا والله مخليني دائما في حالة خوف واحاديث نفس تألمني وتخلي نفسيتي مره متأزمه ونا بعد ماأبغى القي باللون على أهلي .. لأن بصراحه انا اهلي هم سبب تقصيري في هالواجبات لأنهم هم اصلا مقصرين فيها يعني في بيتنا كله ماعندي الا واحد من اخواني بس هو اللي يصلي كل الفروض بوقتها ولا عمره ماصلى فرضه انا ليه ماألقي باللوم عليهم لأني بالنهايه الان صرت انسانه متعلمه وفاهمه وعارفه الصح من الخطأ بس مع كذا مو قادره أرجع لربي ولواجباته وتأديتها على أكمل وجده تصدقون يابنات اني استحي حتى اقول بروح اصلي حتى لو كنت في بيت احد اخواني لان اصلا اخواني المتزوجين مايصلون دائما فاتصورو حتى لما اقول بروح اصلي يجلسون يناظرون يمين وشمال ولا كأني الا قايله شئ خطأ او يجلسون يضحكون من جد احس الأيمان في قلبي ضعيف ..

مع يقيني ان الله قادر على عقابي وان الصلاة هي اول شئ الأنسان يسأل عنه في قبره مع كذا متهاونه جداً ابغا نفسي ترتاح وابغا حالي ينصلح تصورو انا دائما ادعو ربي انه يهديني لديني ويصلح حالي ودائما ادعوه انه يزوجني بالرجال الصالح اللي يكون صاحب خلق ودين عشان انا بجد محتاجه لشخص اقتدي فيه لأني عارفه اني انسانه اخلاقي جدا طيبه بس من الناحيه الدينيه هي اللي مخليتني في هواجس ووسوسة نفس من جد تعبت نفسيتي انا عايشه في بيت مره منهاره فيه لدرجة اني اقول انا عارفه اني مخطئه تجاه ربي بس انا جالسه ادعوه بهدايتي وانه يوفقني بالصالح من عباده لاني ابغا اطلع من هالمكان اللي متعبني نفسيا واللي مخليني شايله اصغر الأمور على أكتافي وعلى نفسيتي وتفكيري صارت اتفه الأشياء افكر فيها واخذها بطريقه عصبيه واكبرها وهي ماتستاهل بس والله كل هذا من بعدي عن ربي ..

طيب انا اقول بنفسي استغفر الله ياربي زين انا ابغا اهتدي وهذاي ادعو ربي انه يهديني وانه يعففني بحلاله وبالأنسان صاحب الخلق والدين فأقول استغفر الله العظيم ليه ربي مايستجيب دعائي انا بجد ابغا اطلع من هالبيت ماعاد اتحمل اكثر نفسيتي تعبت والناس اللي فيه اتعبوني واتعبو نفسيتي وقلبي وابعدوني حتى عن ربي من شوفتي لهم انه هم اصلا مايأدون واجبات ربهم .. من جد قلبي يعورني وخايفه من ربي وش اسوي ساعدوني الوحده اتعبتني ... والبعد عن ربي خلاني اعيش في هذيان نفسي مخيف والله دلوني على الخير ترى والله انا دائما أقرأ مواضيع دينيه ودائما استغفر ربي وادعوه وقرأت كل المواضيع اللي فيها تخويف وترهيب من عذاب رب العالمين بس مع كذا اخاف او ماأقرأ ثم أرجع لما كنت عليه .. وآه ياربي مالي أحد سواك يكون معي ويريح نفسيتي ويهديني يارب :confused: