حنيني غصب يدفعني وياخذني الوله يمه

خواتي الحبيبات:

مجرد فضفضه لا أكثر ولا أقل. أفضفض لاني ادري كثيرات مثلي في المنتدى عندها نفس الاحساس. ودايما أقرى عبارة اللي باعك بيعه واللي ما يبيك لا تصيح تباه. والله أدري ولا عندي نيه أركض وراه لاني وبكل صراحه تعبت من الركيض. كنت أحاول أصلح الوضع يمكن يعدل عن رايه في موضوع الطلاق بس ما اهتم لكل اللي سويته.

غيرت رقم تلفوني وبديت أشغل نفسي. ما في شي ما اشويه عشان ما افكر فيه. بس احنا الحريم للاسف عواطفنا مصيبه. كان عندي أمل انه يرجع وأنه يحن وأنه يشتاق . كنت أعتقد أنه متعذب مثلي. لا يعرف ياكل ولا ينام ولا يشتغل. بس أكتشفت ان الرجال عايش حياته عادي ومستانس .آآآآآآآآآآآه يا الدنيا. يا ريت لو أقدر أجيب ذكراه من حياتي وأحرقها وينتهي كل شي لكن للاسف المسأله يبي لها وقت.

أشتاق لبيتي ولجيراني وأشوف نفسي ساعات أخذ السياره وامر جنب البيت (غباء أدري) بس هالحنين اللي ما مخلني فحالي. عالعموم انا عاهدت نفسي أشيله من بالي وما اتم الوم نفسي خلاص لاني وبكل صراحه حاولت بكل الطرق بس ما لقيت غير الصد والنكران.

بس حبيت افضفض لكم. لاني ادري كلامكم مثل البلسم على قلبي. الله يفرج على وعلى كل مهموم. بس تعلمت حكمه أن نهاية الاشياء ما تعني نهاية العالم عشان كذا أنا في تحدي مع نفسي اني لازم ارفع راسي واعيش بسعاده واقاوم الاحاسيس الخداعه اللي تراودني من فتره لاخرى.

أشكركم خواتي