كيف تنهين مكالمه مع صديقه

اخواتي عرايس اغلى منتدي على قلبي
انشالله احوالكم بخير وكل شي تمام
والله ما ني لاقيه حد غيركم افضفضله
صديقتي هنا بغربتي اول صديقه تعرفت عليها
واقرب صديقه مني لدرجة انه علاقتنا صارت متل الاخوات
شو ما تتخيلو خوات بكل ما تحمل الكلمة من معاني
بس انا زعلت منها ومش عارفه بدي اياكم تخبروني ازا كان معي حق او لاء
افيدوني برأيكم الله يخليكم لاني ما احب اكون لئيمه
دايما لما نكون نحكي مع بعض عالتلفون ويرجع زوجها من الشغل
بتحكيلي اوكي هلاء اجى زوجي مع السلامه وبدون مقدمات وبتسكر التلفون حتى لو كنت انا بهادا الوقت لساتني بحكي بموضوع
يعني بحسها طريقه ما فيها ذوق وتصرف غير لبق
صارت مره زعلت بس ما حكيت اشي ومرتين و واكتر
وقبل اسبوع تكرر الموقف وانا لما سكرت التلفون كنت كتير متضايقه وزعلانه
حكيت ليش اخلي زعلي جواتي
انا طبيعتي بحب العتاب والمصارحه وما بحب اخبي ولا حدا يخبي علي الي بقلبه
رحت على طول وبنفس اللحظه بعد ما سكرت ارجعت اتصلت
وحكتلها بالحرف
السلام عليكم بس حبيت احكيلك انه الي فيه طبع عمره ما بغيره
وحكتلها اني انا رح اصير اعمل متل ماانتي بتعملي معي حتى تحسي بشعوري شو بكون وقتها
طبعا هي فهمت علي لانه كنت معاتبتها عالموضوع اكتر من مره قبل هيك وفهمتها انه بضايقني كتير
تخيلوة شو كان ردها ....... ولا شي حكتلي ماشي ومع السلامه
بصراحه انقهرت ماكلفت نفسها حتى بانها تطيب خاطري ولو بكلمه على الاقل تعطيني عذر حتى لو وهمي
بس على الاقل احس انه الي احترام عندها وقيمه
ونتخيلت انها راح ترجع تتصل فيي بنفس اليوم وتراضيني
تخيلو مر يوم ويومين و3 و 4 واكتر وبعد تقريبا اقل من اسبوع
اتصلت في وبتحكيلي شو وينك لا حس ولا خبر حكتلها هيني بهالدنيا
صارت تحكيلي اني متغيره معاها ومش متل زمان
انا وقتها طلعت كل الي بقلبي وعاتبتها بكل شي
والله والله من كل النواحي لما ازورها ولا كأني عندها شو ما تعمل بتكمل بالبيت وانا عادي بساعدها
كنت هبله وما بعرف بالتعامل والناس وكل اشي
بس بعدين اكتشفت مع الوقت انه لما يجي حدا تاني عندها احترام وتجهيز ضيافه وبتستعد مع انه عيب الحكي بهادي النقطه
بس والله لما تكرر الموضوع انتبهت وتضايقت كتير
ولما اتصل فيها ويكون معاها خط تاني بتأجل الرد عليي لبعد ما تخلص كل مكالمتها مع انه لو انا كنت بحكي معاها واجاها خط تاني من وحده تانيه بتاخده على طول وبترد عليها بالله عليكم لو كنتو مكاني ما بتحز ببالكم
وغير هيك كتير وكتير مواقف
مع انه لما هي تزورني والله وربنا بشهد على كلامي انه العكس تماما
ما في فرق عندي بينها وبين غيرها وبالعكس بنبسط فيها اكتر
تخيلو كيف المحادثه صار شكلها وصارت هي تحكيلي انا مستغربه من صراحتك الزايده وصارت تحكيلي بصراحه جرأتك زادت عن حدها
وانا ما سكتلها وجاوبتها كل كلمه بكلمه وحكتلها البنت الي كنتي تعرفيها طيبه ورايحه فيها تغيرت وصارت قوية
وكله ولا كرامتي واحترامي ما بسكت عليه
وحكتلها اني انا مو متغيره بس الناس الي حوالي هم الي خلوني اتغير بتعاملي معاهم
وحكتلها كل انسان اله طاقه تحمل وبعديها بيوصل حده وما بعود بيستحمل
المهم طول الوقت هي شافتني انا المذنبه وانا طبعا شايفتها هي المذنبه وصارت تحكيلي انها ندمت انها اتصلت فيي
حكتلها طيب ليش متصله حكتلها انه انا اصلا ما كنت راح اعاتبها ولا احكي اشي وهي الي اتصلت واضطرتني احكي كل الي بقلبي
وحكتلها انه انتي ما بتحبي الصراحه وبتحبي الواحد يمثل قدامك وما يحكيلك اشي بصراحه وبس يحكي من وراكي وانا ما بحب هيك
وحكتلها انه عمري ما عملت فيكي هيك صارت تحكيلي زوجي غير زوجك الي بصبر عليكي وباله طويل
انا وقتها بصراحه عصبت
حكتلها انه انتي شو قصدك قصدك انه انتي بتعرفي كيف تحترمي زوجك وانا لاء
يعني ازا بكون بحترم زوجي لازم لما يجي البيت على طول اسكر لاءعادي بس كم كلمه وبثواني وبطريقه مزوقه ولبقه الواحد بنهي الحديث
حكتلها مشاكلك مع زوجك انا ما الي فيها وهادا اشي بيناتكم
وانا مش ضروري ازا زوجي عصب علي احكيلك وهادا اشي بيني وبينه
ونهينا المكالمه ومن يومها ما رجعت كلمتها ولا هي طبعا
وانا خلص نويت اشتري راحة بالي واقطع علاقتي فيها
ولما صديقاتنا يتصلو فيي ويسألوني عنها بحاول ما اظهر انه صار اشي بيناتنا لانهم كلهم بعرفو انه احنا متل الخوات وعلاقتنا اقوى شي
ودايما الناس بعتبرونا واحد يعني ازا
شافوني بسألوني عنها وازا شافوها بسألوها عني
تعودو علينا دايما بنطلع مشاويرنا سوى
بس ما بعرف بخاف اكون فعلا كنت عصبيه وظلمتها او كبرت الموضوع
وحاسه بضيق بصدري ومش لاقيتله راحه
ارجوكم ساعوني برأيكم ومشورتكم
وبكل صراحه
واسفه على الاطاله
واشكركم على سعة صدوركم
وانشالله بدعيلكم بظهر الغيب
الله يوفقكم
:sad: