ضعف شخصية؟ سلبية؟ ولا بس تجنب وجع الدماغ؟ ما ادري؟!!!

السلام عليكم ورحمة الله وبركاته،

اخواتي المحترمات عضوات ومشرفات عروس،

دائماً وسأزال كنت متابعة لمشاكلن في هذا الركن، صحيح ما كنت ارد عليكم، لكن قلبي ما يتوقف عن الدعاء لكم بحل مشاكلكم وتفريج همومكم ان شاء الله..


المهم مشكلتي، او خلونا نعتبرها مجرد حيرة لا تصل لدرجة المشكلة، هي تغير في طريقة معاملتي مع الناس، خلوني اكون واضحة اكثر،


من صغري كنت ( مبلتعة مثل ما يقولون ) عادي اتكلم قدام جمهور، اناقش وفي المدرسة اشارك كثير في الفصل والاذاعة المدرسية، مدرساتي كانوا دائماً يشجعون فيني الجرأة .. بس كانوا ينبهوني عشان ما تتطور المسألة الى طول لسان او قلة ادب..

كبرت ورحت الثانوي، وتعلمت ادخل في مناقشات موضوعية مع الكل، صرت آخذ واعطي، اسمع وجهة نظرهم واحاول اقنعهم بوجهة نظري، واحاول قد ما اقدر اني ما اعصب لرأيي، طبعاً كان قليل ما اغير اعتقادي في امور كثيرة... وهذا راجع ربما الى ان الانسان وليد قناعاته..

كنت كثيراً ما اعتب على البنات اللي يجلسون هم والكرسي واحد، يكتفون بابتسامة، مالهم صوت، مالهم رأي ، على طول موافقين !! او على الاقل قدام اللي يكلمهم، فاذا راح قالوا من وراه احنا رأينا كذا وكذا... طيب ليش ما تقولون قدامه؟ تخافونه ؟ ولا تخافون المواجهة؟


لكن من رحت الجامعة ... بدأ التغير هذا،
صرت مثل اللي اعاتبهم!
على طول موافقة ,,
واذا اواجه نفسي ، مباشرة ينط التعليل : وش لي بوجع الراس؟ خلي يقولون اللي يبونه !
ماني مغيرة قناعتي !

بصراحة اشوفه شيء مو حلو، والانسان طول عمره يتعلم، ومو عيب انه يغير شيء كان يفكره صح وطلع غلط.. بس ما ادري شفيني، صرت اميل الى اراحة ذهني وقلبي قدر الامكان :(




مسامحة خواتي يمكن شوي مو واضح كلامي، بس هاللي في بالي حالياً...
واللي مزودها علي اني محامية ان شاء الله، تخرجت وفي انتظار التدريب العملي، وهالخصلة لازم لازم تتغير، ولا ما راح تنفع لمحامية :sad: