تهويدة البيبي

هههههههههههههههههههههه

انا عن ولدي ما علمته على اي تهويدة .. بس يشرب مرضعته وينام .. يمكن وهو اصغر شوي كنت احطه في حضني واهز رجولي واهود عليه بيدي على خفيف .. بس اغاني ما اغاني ما جربت ..


تسلمين على الموضوع اختي

انا اقوله بعد مايشرب رضعته واحطه بحضني واقوله
لااله الا الله
محمد رسول الله
سعودي يحفظه الله
نام يا وليدي يالله
لا اله الا الله


دمتم سالمين
اختكم شريفة

ماما حسون

مشكووووووووره حبيبتي ع المشاركه
و مب شرط اغاني
ممكن تقريله قرآن
انا ساعات اقرى لولدي المعوذات و الكرسي

السلام عليكم

موضوع جداً حلو وعجبني واااايد


انا اذا انيم بنتي اقول لها

مروا عليّ ثلاث مكحلات اعيون
دعّوي عليها عبل دعّوي عليها نجوم
وثالثتهم دعّوي تبتت المشموم

(a)

SHREEFA


مشكووووره الغاليه
ذكرتيني بأمي دووم تقول لولدي و الصغاريه طبعا مع تغيير الإسم

[CENTER]((((لا اله الا الله......... خلودييي من عند الله)))

فجر البحرين


حلوه التهويده مشكوووره ع المشاركه
و نووووم العوافي لبنتج


أم خالد

للي يدخل و يقرى الموضوع على الأقل يعلق و لو بكلمه و لا ما نستاهل؟؟؟؟؟

وااااااااايد حلو الموضوع،

انا كنت ميييح في هالسوالف، بس لما كانت عمتي او امي تنّوم ولدي، اركض واييب ورقة وقلم واقعد اكتب اللي يقولونه،
والله احب كلامهم اشياء تراثية وكلها تعلم الطفل على ذكر الله..



" لا اله الا الله
لا اله الا الله
محمد رسول الله


ألف الصلاة على الرسول
ألف الصلاة على الرسول
وعلى علي زوج البتول..

لا اله الا الله
لا اله الا الله
دفع البلا بذكر الله..


وفيه تكملة بس نسيت لأني الحين ما اغني له صار لي فترة :s

ولما يقعد من النوم فيه وحدة ثانية معروفة عندنا بالبحرين بس هذي ما كتبتها، يا ريت وحدة تعلمنا اياها..

بدايتها،
صباح الخير والعنبر،
تالي ما اعرف :o

هههههههههه ولدي كل شي اغني له حتى اغاني الرسوم

اغنيه له اغنيه انا واخي هههههههههه يحبها ..

ودوم اغني له اغنيه مصريه تعيبني هههههههههه اقروها بالمصري هههههه

ذهب الليل وطلع الفجر والعصفور صوصو
شاف القطه ألها (قالها) بسبس ألتلو (قالتلو) نونو
ماما ألتلو سيب القطه وخليها في حالها
ساب مدرسته ورمى كراستو وراح جر شكلها
راحت القطه مخربشه ايده لما مسك ذيلها
وآدي جزاة اللي مايسمعش كلمه ماما تقولها ههههههههههههه

تعيبه وايد هههههههه لأني الاعبه فيها .. ووايد خرابيط بعد

واحيانا اقوله (لا أله اللا الله .. محمد رسول الله .. وصبوح حبيب الله)

وسلامتكم

جمـــانة


مشكوووره ع التهويده الحلوه
يله نحفظ تهويدات منكن للصغاريه




3yoOon_AD


حلوه الأغنيه المصريه
بس أخاف الولد يرمسلي مصري خلاف:dd:





يله بنات نتريا سوالفكن

انا ادعي لها و اقرا القرآن
موضوعكم حلو
صوتي مب حلو يوم اغني لها

السلام عليكم
عجبني ووووووووايد موضوعج
لبنتي اغنيلها بنية عامرية ابوها الشيخ ناصر يدربح القواصر
وساعات اقولها روضتي يا روضتي انت حبيبتي روضتي يا روضتي انت صديقتي(من تأليفي)
وساعات اقولها يابنات يا اولاد اشربو الحليب للصحة والقوة اسألو الطبيب

[CENTER]امي تألف مقطع لكل وحدة فينا

بس صراحة ما اذكر زين رغم ان اختي الصغيرة للحين تقول لامي تغني لها اذا جت تنام

بس ناسية شنو بالضبط !!

الله يخلي لكم عيالكم

حللللللللللللللللللللللوة ..

انا الين الحين يوم انيم ولدي اقوله ...

الا الله الا الله لا اله الا الله ...

محمد يا رسول ...

محمد يكبر ان شاء الله ..

_________________________

ماما وبابا بيحبوني ..

كبروني وربوني..

يا ربي تخلي البابا ..

والماما نور عيوني ...

---------------------------------------------

حمامه نودي نودي ..

سلمي على سعودي ..

سعودي سار المكه ..

اييب ثياب العكه ..

حطيته في الصندوقي ...

صندوقي ماله مفتاح .. والمفتاح عند الحداد .. والحداد يبي فلوس .. والفلوس عند العروس .. والعروس تبي عيال .. والعيال يبون حليب .. ولحليب عند البقر .. والبقر يبي حشيش .. والحشيش يبي مطر .. والمطر فوق الجبل ... لا اله الا الله .. محمد يا رسول الله ...

طبعا يوم اغنيله هاي الا

ههههههههههههه هالاغنية المصرية دوم اسمعها في تلفزيون مصر

وعيبتني

[grade="00008B FF6347 008000 4B0082 FF1493"]أنا دايم أقول لولدي هذا :

لا آله ألا الله
وصلاة على محمد
يا عين عنه
وعينك بعمى يا حسدنه

------------------------------------

لولو نام لولونام
وذبح لك جوز الحمام

----------------------------------

كافه يا عين صاد
لا صابتك عيني
ولا عين لعباد

-----------------------------------

بنيه على بنيه
ولا قعود بطال
بنيه تفلي رويسي
وبنيه تناغي الجار
وبنيه تقول لفونه اليوم خطار

-----------------------------------------

وأحب أقول له إذا صحى من النوم

صباحك صباحين
صباح كحل في عين
صباح يطرد الهم
صباح عشر وثنتين
وصباح يقول يا بوي ختم اليوم جزءين

-----------------------------------------------

صباحك الصباحي
والورد وتفاحي
وعيونه السود
ذبحت الأرواحي

------------------------------------------

أحبك على خد وفاحت ريحتك ند
أحبك على البوز وفاحت ريحتك عود
أحبك على برطم وجاءت عدوتك تحطم

-----------------------------------

في كلمات من لهجتنا البحرينية يمكن ما تكون معروفة للبعض .....[/grade]

موضوعك وايد حلو..

أنا عادتا أقول لعيالي يوم أرقدهم :

لا إله إلا الله .. محمد رسول الله ..

-------------

يا الهادي تهدي با با .. يا الهادي تهدي ماما .. يا الهادي تهدي محمد .. يا الهادي تهدي ثاني .. يا الهادي تهدي حمدة ..

------------

إرقد يا ثاني هوّه .. إرقد عن لا اييك العوّه..

-----------

رقدت حمدة رقاد الهنية .. ورقاد لغزيل في برور عذيّة .. ورقاد القطيوة على الصنية..

------------

سبعة صقور يا لولا .. جلب معقور يا لولا.. ينبح ويثور يا لولا.. خل الزقوم (الناقة إللي تسوي صوت) يا لولا.. واركب صموت (الناقة) يا لولا..

---------------

هوه هوه .. يرقد محمد والمنام يثيبه .. وعدو محمد ماهتنى بالمنام .. هوه هوه..

-----------

وتعجبني وايد التهويدة إللي تغنيها فيروز..
"يللا تنام ريما "

يلا تنام ريما .. يلا يجيها النوم .. يلا تحب الصلاة .. يلا تحب الثوب .. يلا تجيها العوافي .. كل يوم بيوم ..

يلا تنام يلا تنام .. لادبحلا طير حمام .. روح يا حمام لا تصدق .. بضحك عا ريما تتنام ..

ريما ريما الحندقة.. شعرك أشقر ومنقى.. ولي حبك بيبوسك .. اللى بغضك شو بيرتقى..

يا بياع العنب والعنابية .. قولوا لأمي .. قولول لبيي .. خطفوني الغجر .. من تحت خيمة مجدلية ..

التشتشي والتشتشي .. والخوخ تحت المشمشي .. وكل ما هب الهوى .. لاقطف لريما مشمشي..

هى هى وهى لينا .. دستك لك نك عيرينا .. تا نغسل ثياب ريما .. وننشرهن عالياسمينا ..

-------------

والسموحة طولت عليكم..

مشكووووووووووووووووووووورين ع الرد و يله ابي تهويدات حلوه

حلو الموضوع

و عندكم تهويدات احلى

ساعات كنت اقول لبنتي ....

(يا وليدي يا حبيبي ..كم تمنيت و لكن انت احلى الامنتيات ...كلما غنى فؤادي كنت انت الاغني))

هذي اتذكرها من رسوم كانوا يحطونه من زماااااااااااان ... و خاطري اعرف بقيه الكلمات ...ياريت الي تتذكره ان تعرفه تخبرني