الجزء الســـ6ـــادس من تجهيزات عرايس قطــ2006ـــر

بنات ترى امس بالليل فتحت الموضوع بس مادري ليش يوم قمت الصبح مالقيته عالعموم حصل خير...............

كلاسيك ننتظر منج أخبار عرس ام شيوخ :)

مرحبا عرايس قطر

الف مبروك للي تزوجوا..وعقبال البقيه

اتمنى بس تتقيدون بقوانين المنتدى و القواميس عشان ما نظطر نغلق الموضوع

يعطيكن العافيه

نرجع للردود..............

عمري قطر .............
ارسلتلج رقم ام ياسر...الحمم المغربي تسويه ب150 بس الحف مادري تعاملها هي حليوه بس باقولج تجربتي معاه الاسبوع الجاي لوحابه تنتظرين


الحلم الهادي .........
ارسلت لج رقم منى وانشالله تستفيدين منها ............ وياريت تسوين نسخ للرد الي كتبتيه فالجزء الخامس حق حلاقطر عن الفيشل عشان الكل يستفيد منه ... وبسالج انا ولامره سويت فيشل قوليلي هم شيسوون بالضبط خاطري اسوي .........وباريس نيلز هو الي في اللاندمارك ؟؟

الله يعافيج angel eyesوتسلمين عالاهتمام ........

بنات سمعتوا ......... ممنوع السوالف الشخصيه بليز خلكم فالتجهيزات عشان مايتسكر احلى موضوع فالدنيا

مبروك الجزء السادس :)

بالنسبة لام ياسر بس حبيت اوضح شغله ..

هي شغلها حلو ونظيف للحمام المغربي بس عيبها وايد تسولف وتطلع سوالف الناس وغير جذي تتدخل في اللي مايعنيها

بصراحه انا ماحب جذي جاتني مرتين وماكملت عقبها تمللت منها .. انا مااذمها هي حليوة

بس مثل ماقلت وايد تسولف وتتدخل مادري ..

هلا خطبطب :) مشكوره على الرقم وهذا ردي على حلا قطر

حلا قطر...الفيشل الاوكية وعن تجربة ..عندج بالاماكن التالية

1. الصالون الازرق وايد يمدحون اللي عندهم تسوي تنظيف بماركة لوريال اعتقد
2. لابيل ..متخصصين في الفيشل لبنانيات ويسوون كورسات خاصة للعرايس على 4 او 5 جلسات قبل العرس ب3 شهور تقريبا تبتدين..ومحلهم في البستان في السد..اتصلي وشوفيهم لاني من زمان مجربتهم يمكن سنتين !
3. صالون باريس نيلز (الحين دايما اسوي عندهم لانه اللي عندهم ممتازة وتسوي بذمة وضمير ) مغربية اسمها لبنى
4. النادي الدبلوماسي...الفيشل عندهم بعد ممتاز

وبالنسبة لحمامات الزيت للشعر...ذكرتهم بردي السابق



باريس نيلز اهو اللي في الاندمارك صوب الالعاب

شوفي حبيبتي..الفيشل بالكريمات..عبارة عن استخدام منتجات التنظيف والترطيب للوجه مع التدليك..يعني يحطون لج من الحليب المنظف والتونر وكريم مغذي وكريم ضد عيوب وشوائب البشرة والمقشرات وجذية يعني..وطبعا يستعينون بالبخار وببعض اجهزة التدليك للوجه

الفيشل الثاني..اللي يكون فيه تنزيف للرؤوس الدهنية السوداء او البيضاء ..باستخدام الضغط باطراف الاصابع او حديدة مثل الملقط تشيل الاوساخ اللي في البشرة...بس انا شخصيا مانصح اي وحده تستخدم هالطريقة الا اذا اللي تسويه لج خبيرة بشرة فعلا او دكتورة جلد..وعلى فكره فيه دكاترة يسوون هالتنظيف بالعيادات الطبية تحت اشراف طبي مثل الدكتورة اللي قلت لج عليها
وهذا النوع من التنظيف اعتبرة عميق وفيه ناس وايد يحتاجونه خاصة اللي بشرتهم دهنية وفيها مشاكل...لكن اذا بشرتج نظيفه وجافة يمكن مره بالشهرين بس تسوينه كصيانه وتاكيد على نظافتها. وطبعا لازم بيسوون تونر وميلك منظف وكريمات تغذية وتنشيط للدورة الدموية بالوجه والرقبة وتدليك وكل شىء

اتمنى استفدتي يا خطبطب :) ابتدي جربي باريس نيلز عند لبنى وانشاء الله تشوفين فرق :)

بنات ياليت لو تفيدوني عندي سؤال

ابي محل حلو يسوي تعديلات او يزين غرفة النوم يعني ورود وشموع وهالحركات كان في محل في السد بلازا اسمه هدايا الحب

بس الحين السد بلازا تكنسل وين اقدر احصل محل مثله بلييييييييييييييز لاتردوني

روز قطر :) فديتج كان ودي اجاوبج بس من جد ماعرف

اتصلي بماسيس سئليهم سمعت مره ان وحده سوت غرفتها عندهم !!

بناااااااااااااااااااااات
أبي أجهز دار راسي
شرايكم انتوا جهزوني :( ؟؟
لاني ماحب الدواره وعوار الراس

بنات انصحوني من وين ابتدي الملابس ولا المكياج ولا العطورات ولا.................الخ ؟؟

روز قــــــــــــــــــــطر

مشكوره على توضيحج عن ام ياسر بس خلها تسولف عادي انا مب من النووووووع الي ارد وبعطيها العين الحمره :mad2: بس بجرب شغلها لانه مافيه واجد يجون البيت يسوون المغربي ......... وبالنسبه لام امجد المصريه هي تسوي مغربي بس انا مارتاحلها حتى لشكلها مره شافتني وجنها بتخطبني تمدح وتتغزل مااااحب لووووووول صدقت نفسها البنت ............

الحلم الهــــــــادي

والله تحمست اسوي الفيشل شكلي فالويك اند بروح لها...بس لازم حجز ولا ؟؟
وروحي لموضوع دلوعه كتبت لج شي هناك .........


كلاسيكوووووووووو

نبي اخبار العرس يللا بسج رقااااااااااااد .........:flower::flower::flower:

دوحانيه ومجنونة قطر وقطر وعروس الدوحه وعروس فرش ونبع الكوثر والموناليزا وروح قطر واهات قطر واصدق احساس وفتفوته وحلاقطر وام حمد وعمري قطر والعنود ونور وغاده ودلوعه واحلام صغيره وبنت قطر والبرنسيسه ولؤطه وقصايد والعرايس كلهم اعذروني لوطوفت اسم فديتكم يللا شاركوا

العنووووووووود .........

من عيوني بس نجهزج الا نجهزج ونجهز بيتكم كله بس عطيني المهر ههههههههه ........ امزح ترى لاتتهورين وترسلينه خخخخخ>> ياشينج ياخطبطب لين ثقل دمج .... نبدا فالمفيد ......... العنود انا مب عارفه انتي متى عرسج قوليلي المده يعني شهر كم وقوليلي انتي شسويتي لحد الان وانا والبنات بنعطيج النصايح ولايهمج

ألــــــــــــــــــــف مبروكــــــــــــــ عالجزء اليديد

كلوووووووووووووووووووووووووووووووش

خطبطب المهر يفداج بس لاتنسين تشترين لي الهدايا واغراض البيت من المهر كله :)

اللي خلصت من التجهيزات القمصان النوم شوي واخلص منهم والعطورات شريت شوي منهم الفرنسية والعربيه

وعرسي الله يسلمج نص شهر 7

وكل البنات معزومين
جيبوا معاكم تلفوناتكم البوكاميرا عادي <<<<<<<<<<<<<<<<<< صج نذله :D :)

خطبطب :) ايه لازم تحجزين اتصلي شوفيهم

اختي العنود...اول شى لازم ترتبين افكارج وعملية الشراء ..على حسب الوقت المتاح لج فيه شغلات لازم تخلصينها قبل غيرها

اهم شىء تقرين موضوع دوحانية الخاص بتجهيزات العروس وتوزيع المهر لانه بيفيدج وايد

وخطبطب مب مقصره بتتولاج

اقول خطيطب :) شرايج نسوي مشروع wedding planner ?

والله احس بنكتسح السوق

خطيبة الغالي حبيبتي

ترا حتى ام ياسر لها هالحركات علشان جذي انا ماحبيت يعني عادي تقعد تقولج انتي مثلا بيضه وبياضج حلو وانها راحت

حق وحده بس لونها كان جذي وكان فيها جذي وجذي يعني تسندر والله ماحبيت كلش اسلوبها طرشت لها الدريول مرتين

وعقب ماطرشته مابغيتها كلش ماحب هالنوع يعني اقولها مثلا انا مابي اسوي جذي وابي البس اللبس اللي يعجبني انا ماترضى

الا اللي هي تبيه ياختي ماعجبتني كلش مع انها تقولي انتي طيبه وحليوة وانتي حلوة زوجج بيستانس انج حلوة >>> وهي شدخلها

ماحبيت اسلوبها

مادري يمكن تغيرت وعقلت الله يهديها

الحلم الهادئ ماقصرتي والله

وعاد ماقلتي لي الا ماسيس ماحبهم كلش .. بشوف بجرب فوشون دايما اتعامل معاهم من يوم عرسي وتجهيزات العرس

بس مادري اذا يسوون غرف او لا

مشكورة والله


وياليت لو باقي البنات يقولون لي وين اروح ؟؟؟؟

الحــــلم الهــــــــادي
والله خوش فكره احس صج صار عندي خبره ........ مع ان باقي وايد على عرسي .......

العـــــــــــــــــنود

اممممممم والله زين بتفتكين من قمصان النوم ....... بس انا كنت اقصد حجزتي شعر ومكياج........اذا ماحجزتي احجزي واذا تبين نساعدج حاضرين ........ الله يسلمج ياطويلة العمر الحين تبدين فالملابس اذا بتسافرين الخبر اودبي يكون احسن لان قطر فيها بس مابتلقين وايد ....... ولو بتجهزين من قطر لازم تبدين من الحين تاخذين البدل الكشخه وتفصلين الفساتين (فستان عرس-صباحيه-هديه-واذا تبين زياده براحتج ) ..........المكياج خليه شوي يعني لين اخر شهر 5 .....تفصي التنانير بعد خليه لين قبل عرسج بشهر ونص عشان تنزل الموديلات الجديده ............يعني الحين تاخذين :
ملابس عمليه ----ملابس سفر(لوبتسافرين)-----ملابس كشخات----جواتي الاولان الاساسيه وطبعا جواتي تكون مالت كشخه (اسود -بني - ذهبي - فضي- ابيض ) وباقي الجواتي على حسب البدل الي تفصلينها او تشترينها ......... عطورات عربيه----- عطورات فرنسيه -------- عبايات ( تقريبا 4 عبايات ) -----

وطبعا فيه اشيا ثانيه بس انتي ابدي بتجهيز الملابس لانها دوووووخه وماتلقينها فاي مكان .........

عندج اللي بمجمع المناعي الظاهر اسمه لينيتور اسالي عنه حبيبتي
وماسيس وفوشون والغردينيا

روز قطـــــــــر ...........

والله اتصلي قطر اليجانت عند مدام دارين عندها افكار حلوه بس مادري تسوي غرف اولا........