شاسوي مع خطيبي أكرهه أكرهه أكرهه !!

اختي حق شو ساكتة ع الموضوع؟؟

صلي استخارة واذا ما تغي رالحال طلبي الانفصال عنه

هذي عشرة عمر هب بعدين بتندمين وتقولين يا ليت اللي صار ما صار

وان شاء الله ربنا ييسر لج أمرج بس صلي استخارة وشوفي المقدر لج

بعدين الا الزواج ما فيه غصب هذا الموضوع بالذات يي بالتراضي

وإذا البنت مالت للريال في البداية معناها نصيبها

لكن شكلج ابد ما تطيقينه وما تميلين له بالعكس فيه نفور

يعني ما أظنه نصيبج وحسب كلامج افكاركم متباعدة بالحيل

الزواج تفاهم مودة ورحمة بين المرأة والرجل

صلي اشتخارة وتوكلي

ماخاب من استخار


صلي الاستخاره اول شي واذا حسيتي انج مرتاحه خلاص توكلي على الله واذا مب مرتاحه سوي اللي يريحج


اما بالنسبة عن اللي قلتيه

هذي طبيعة الرجل العربي .. هو متحمس فيج انتي .. كون انج خطيبته .. وزوجة المستقبل .. واكيد فرحان فيج


وهذي طبيعة الرجل العربي يحب يدلل زوجته لو مب الكل بس هالشي معروف



اساسا لو خذتي واحد مايقول لج كلمة احبج ... ماعتقد انج بترتاحين ... وبتضايقين وبتقولين هذا مب حاس فيني


ماتعلمين يمكن هذا اللي كارهتنه انتي .. يكون اخير الناس لج واقرب لج


لاتستعيلين اهم شي انج تشوفينه طموح وعلى دين وعلى خلق هذا اهم شي



صلي استخارة ولا تستعيلين على الريال


هو شكله فرحان فيج


وايدين بنات كملوا دراسة واشتغلووا واخرتها البيت مقرهم


لاتتكلمين عن دراسه قدامه اذا هالشي يضايقج


وتسايسي معاه


والله يوفقج

السلام عليكم ورحمة الله وبركاته



أختي الكريمة،

الإستخارة ما يفوت وقتها طول ما الله سبحانه وتعالى موجود.. أستخيري الله من الحين أختي

مرة ومرتين و3 ... وأطلبي من الله دايم بعد كل صلاة إن كان فيه خير لج إنه يتمم زواجكم على خير

وإذا لا يصرف هالزواج عنج.. بعد صلاة الإستخارة ما راح يصير إلا الخير..

وصدقيني عزيزتي ترا كل الرياييل فيهم عيوب وألاحظ بعد الزواج زوجاتهم يغيرونهم، يمكن

إن كان لك نصيب معاه (والله أعلم بهالشي) يكون لك تأثير عليه وتغييرين الطبايع إللي ما

تعجبج فيه.. ووايد رياييل ما فيهم رومانسية إلا ما ندر، لكن بعد الزواج تشوفين الزوجات يغيرونهم

بالدلع وبالكلمة الحلوة.. أستخيري عزيزتي وإن كان الله سبحانه وتعالى كاتب لج الخير

مع هالإنسان ، راح يتم الزواج وبإذن الله بتقدرين تغيرين كل شي مو عاجبج فيه..

وصدقيني لو ما كان يقول لج كل شوي كلمة أحبج هم بتجين تقولين شفيه ما يقول لي أحبج

وما يقول لي كلام حلو.. ولا تنسين صلاة الحاجة، أدعي من الله إن كان هالإنسان قسمتج

إن يزيد الحب بينكم ...



والله يوفقج عزيزتي ويكتب لج كل الخير

و السلام عليكم ورحمة الله وبركاته

استخيري! لانه هذا الامر امر مصيري انتي بتتزوجين و الزواج مو لعبه!!
اشتخيري و شوفي ترتاحين للموضوع ولا لأ؟
و اذا لأ طبعا فيكي تنفصلين عنه لانه الزواج مو لعبه، فكري انك في المستقبل بتعيشين مع هذا الشخص و بتبنين عائله معه، كيف بتقدرين تسوين هذا الشيء و انتي مو طايقته؟

اختي انصحك بالاستخاره..

مرحبا اختي ..نصيحتي دام انج بعدج ع بر يعني فتره ملجه وبعدج ما عرستي وانتي مش متاقلمه وياه انجي تستخيرين ربج وتسوين الي انتي حاسه انه ف راحتج لان بعد العرس بدندمين
فكري قبل العرس دام بعدج ما عشتي وياه وما يبتي عياااال بعدين بتفكرين ف وااايد اشيااا وبضحين عسب وايد اشياء ف اخذي قرارج من البدايه احسن
والله يفرج عليج

الغالية كان لازم اول شي تستخيرين وبعدين ليش انتي مضايجه انه كل شوي يقول احبج في ناس يتمنون الكلمه وما ايحصلونها
فلا تتغلين وايد الكلمة من القلب تطلع مره مو الف مره فياختي توكلي على وحببيه اليك وابعدي الشيطان عن طريجكم وعلميه انتي الرومانسيه......

ربي ايوفقج الغالية

اختي...استخيري احسن...وكلمية بصراحه بالامور اللي ماتعجبج بس بطريقة دبلوماسية وراقية...وشوفي رده...واذا كان انسان مصلي وطيب ومشهودله بالاخلاق واهله طيبين..انا اشوف ماتستعجلين بالحكم عليه...احيانا ممكن يكون على عيوبه افضل من الفين واحد غيره

ماتدرين لو انفصلتي عنه وبكره جاج واحد ثاني مافيه نص صفاته...اخاف تتحسفين!

يمكن هو مايعرف يعبر عن نفسه عدل..وهالامور بتتحسن مع الوقت...ويمكن هو مفكر لمايكلمج جذية عن الدراسة بانه بيتحكم فيج...ماتدرين باللي في باله...بس انا لو بمكانج بستخير وايد وبكلمه باللي في خاطري من ناحيته بكل صراحه...لاتنسين هذا زوجج الحين شرعا...والمفروض تاسسين حياتج معاه من الحين وتحطين النقاط فوق الحروف

قولي له شتتمنين من زوجج عشان يعرف شللي يريحج منه وشللي مب عاجبج

لاتستعجلين وتقولين اكرهه...ترى ان قلتيها وايد فعلا بتكرهينه حتى لو كان زين وعيوبه بسيطة

ولاتنسين...محد خالي من العيوب :) والله يوفقج

استخيرييييييييييييييييييييييييييييييييييييييييييييي بدل المرة عشر مرات

استخيري ما شيء أحسن من الإستخارة والله يسهل

أختي الحبيبة لازم تستخيرين

والله يوفقج إنشاءالله

حبيبتي استخيري والله يسهل امورك

انتي الي حطيتي هالحواجز امبينكم..كنت تبين واحد في خيالج وظهر مب شرات الي انتي تبينه...زين بتتعبين ليما تلقين الي على مزاجج ومواصفاتج حبوبه..والشي الثاني يمكن انتي مزودتنها وياه كله دراستي وجاده ..يمكن يباج تدلعينه تقولين له جم كلمه حلوه ..وقالج هالكلام عشان يثيرج..لا تحسبينها عليه بالورقه والقلم...حبوبه دامج تقولين حلو وخلوق وموصفاته عدله لا تكرهينه لانج تحلمين ببمواصفات ثانيه مب فيه..وبعدين انتي بكيفج تبينه رومنسي تقدرين تخلينه رومنسي ..وفي النهايه اقولج صلي استخاره..وشوفي ..وقولي في خاطرج انج تحبينه وبتغيرينه وانه ما ينعاب..وصدقنين هالحواجز بتروح من بينكم..وعلى فكره دامه قالج انتي محطيه حواجز امبينا معناته هو يعاني منج..بعد يمكن في خاطره يقول هاي وايد معقده ..فخليج حبوبه ودلعيه وان شاء الله الله بيهدي سركم ..

انا وايد رومانسيه كانت امنيتي ان يكون زوجي ثقيل ويعذبني لين يقول كلمة أحبك لكن خطيبي من اولها وكل خمس دقايق يقول احبك لدرجة ان صرت ماحس فيها خلاص مابي اسمعها


لاتزعلين مني لو انتي يمي جان صرخت بويهج أخليج تصحين من هالكلمه عن جد انقهرت
في وحده تتمنى تتعذب علشان تسمع كلمة أحبج
صدقيني يمكن بعدين تندمين اذا انتي تقولين وايد زين ليش ماتحاولين تعدلين فيه
تدرين انا الحين متزوجه صارلي تقريبا 7 شهور
والله والله والله ريلي للحين كلمة أحبج ماقالها على بالج وناسه بالعكس انا وايد رومانسيه ويمكن أكثر منج بس هالشي معذبني
شنو شعورج تقعدين مع واحد فترة طويله ولا يقولج كلمة أحبج
والله مادري شقولج استخيري والراي الاول والاخير لج انتي
صدقيني في رياييل من كثر حبهم لحريمهم يتغيرون
قعدي معاه فهميه بغلطه ترى صدقيني من حبه لج راح يتغير
واذا ماتغير سوي اللي تبينه

ماشاء الله البنات ماقصرور بناصيحهم لك وانا معهم استخيري ولا تستعجلين

والله يوفقك ويسعدك لطريق الخير

وطمنينا عليك اختي

فعلا صدقوا البنات استخيري دام انك مخطوبه مو مملكه

وادعي ربك وان شاء الله امورك تتيسر يارب

حبيبتي قصايد

كان شعوري في ملجتي نفسج بالضبط

احس زوجي مو الانسان الي كنت احلم فيه

مع انه ماكان عندي فكره واضحه عن فارس احلامي

بس من عرفته حسيت انه مو هذا اللي اباه

وكنت نفسج بعد اهلي كانو موافقين
بس يتريون ردي
الفرق اني استخرت وطولت لين رديت عليهم

المهم

بعد فتره من الملجه حسيت اني في وادي وهو في وادي

و مثلج حسيت انه تافه.. واحيانا سخيف..يضحك على اشيا غبيه



بجيت وايد لما حسيت انه تفكيره جنسي وانه قص علي بكلمه احبج.. اللي قالها بسرعه

وانه استغلني..واستغل غبائي...

ما حسيت اني احبه
يمكن شفقت عليه بس اني حبيته.. لأ

وزعلت منه واااايد.. عسبه تفكيره الجنسي..اهو ماقال كلام ..بس سوا افعال..

وتميت شهور ياني زعلانه او اني خايفه..
لين ما قلت بس...

هذاا زوجي مو ريال من الشارع

وخليني استانس باحلى فتره بحياتي..بدال لا أقضيها عناد و مشاكل وزعل..

بس مارخيت له الحبل عل الاخر..

وكنت انا الي مسيطره على الوضع يعني اسمحله يتمادى بحدود انا ارسمها..

والتفكير الجنسي من اصل الريال..
ما في واحد ما يفكر جيه..

وانا بعد نفسج لما اقوله على شي لا تقوله يتمادى..عباله اسلوب مزح..او انه يحب يغايضني..ماادري..بس انتي كبري عقلج

والحمددلله بعد الزواج صارت مواقف اكدتلي انه يحبني ..ما اقولج حياتي ما فيها مشاكل ..او اني في لحظات الحزن ما تذكرت مشاعري السلبيه في فترة الملجه و ندمت...

بس هذا كله وساوس شيطان..
وانتي ريلج ممكن تشكلينه بالطريقة اللي تحبينها..
اسلوبه بالكلام..تعامله معاج .. صرفه عليج..هذا كله بالتعويد..بس يبالج وقت وصبر..


وعن المصروف يمكن صدق مايدري..
خطيبي ما جاب لي دبله..
و انقهرت واايد لانه عنده خواات كبار المفروض يقولوله ..
ما جاب دبله لين اخته الي قدي انخطبت وريلها جاب لها دبله.
بعدين حس ..

اعذريه..

صدقيني البنت ما تكون قراراتها متزنه وهي مالجه..انا كنت احس اني امشي على الماي..

وقبل هذااا كله لااازم تستخيرين...


ادري فديتج طولت عليج..بس انا صدق حاسه فيج..
اتمنالج التوفيج

بااي

دهن_الــــورد:
انتي الي حطيتي هالحواجز امبينكم..كنت تبين واحد في خيالج وظهر مب شرات الي انتي تبينه...زين بتتعبين ليما تلقين الي على مزاجج ومواصفاتج حبوبه..والشي الثاني يمكن انتي مزودتنها وياه كله دراستي وجاده ..يمكن يباج تدلعينه تقولين له جم كلمه حلوه ..وقالج هالكلام عشان يثيرج..لا تحسبينها عليه بالورقه والقلم...حبوبه دامج تقولين حلو وخلوق وموصفاته عدله لا تكرهينه لانج تحلمين ببمواصفات ثانيه مب فيه..وبعدين انتي بكيفج تبينه رومنسي تقدرين تخلينه رومنسي ..وفي النهايه اقولج صلي استخاره..وشوفي ..وقولي في خاطرج انج تحبينه وبتغيرينه وانه ما ينعاب..وصدقنين هالحواجز بتروح من بينكم..وعلى فكره دامه قالج انتي محطيه حواجز امبينا معناته هو يعاني منج..بعد يمكن في خاطره يقول هاي وايد معقده ..فخليج حبوبه ودلعيه وان شاء الله الله بيهدي سركم ..

كلامك صح اختي


ترا البنات وايد يحلمون
والزواج مب كله رومانسيه
ولا تخسرينه

الله يوفقك اختي

ماخاب من استخار :think:

ليس كل ما يتمنى المرا يدركه


قصك محيرة الله يعينك, بس طمنينا عنك :think: