كنت اموت على زوجي والحين ما اطيق لمسته

اخواتي في هالمنتدى الرائع

انا بحاجه مااااااااااااااسه لنصايحكم ومساعدتكم من بعد الله سبحانه وتعالى

انا انسانه متزوجه والله رزقني ببنوته نفس القمر والحمدلله وصارلي متزوجه سنتين ونص

مشكلتي انه صرت احس اني ما احب زوجي..انا احبه كحبي لخوي وابوي وعمي وجذه بس ما احبه كزوج وحبيب..وصارلي تقريبا سنه على هالحال

انا انسانه صبوره اتحمل واصبر وادعي ويعلم الله اني احاول اتثقف واقرى عشان اساعد نفسي بنفسي وافهم شاللي فيني بس لين الحين وانا مشكلتي في ازدياد...صرت مستعده اسوي كل شي لزوجي بطيب خاطر الا اني اعطيه حقه الشرعي وهالشي غصبا عني احس اني شي كاتم على صدري واحس بنفور فظيع من يلمسني احاول اتحامل واتعوذ من الشيطان بس النفور يزيد ويزيد لدرجه اني ابعده عني

يمكن تستغربون شو اللي وصلني لهالشعور والنفور من زوجي اللي كنت احبه واعشقه بشكل كبير
انا من اشهر قليله صارلتي مشكله كبيره مع ريلي سببها خياناته المستمره لي وكل مره اسامحه واساعده انه يتغير واطول بالي عليه بس يرد ويتعرف عالبنات واذا ما تعرف يدخل مواقع اباحيه واذا ما دخل هالمواقع تعرف بالبلوتوث يعني بالاختصار جنني..لا تقولون انا مقصره لاني ما خليت شي ما سويته له وهو من امر جدامه يتخبل علي بس بعد هذا ما يمنعه انه يحب غيري ويخوني

انا وصلت معاه لمرحله اني خبرت ابوي لاني من شهر العسل لي عقب ما ربيت وهو مستمر في مسلسل الخيانات وانا اتحمله وانصحه واسامحه بس اخر شي قلت للصبر حدود ولازم طرف اكبر مني ومنه سن وخبره يتدخل ويحل المسائل وفعلا ندم ندم كبير ووعدني انه يتغير وتغير وصار ملتزم وقريب من ربه هب وايد بس الحمدلله احسن من قبل

غير جذه ريلي عصبي جدا جدا جدا لدرجه لا تحتمل وما يحب اني اضحك او اقعد اكثر من ساعه مع اي حد حتى لو كانت امه او اخته لدرجه انه يكون يكلم ربيعه بالموبايل فالحجره ويطلب مني البقاء معه بالساعات لين ما يخلص ويقعد معاي بره فالصاله ويا امه وخواته

في اشيا كثيره بس ما احب اطلع عيوب اكثر لانه كل انسان فيه عيوب واكيد انا بعد فيني اشيا ريلي هب راضي عنها بس حبه لي يغليه يتغاضى عنها

انا الحين يا جماعه الخير صرت عايشه بس بجسدي مع زوجي من غير روح لانيه مالي اي رغبه فيه نهائيا مرات افكر بالانفصال لانه هو نفسه حاس بنفوري ويتذمر وايد وايد ويقولي دواج حرمه ثانيه على راسج عشان اصطلب واتغير
انا كلامه هذا يزيد نفوري واصارحه واقوله كانك تحبني وتبغي توصل معاي لحل حاول تتحملني وتاخذ بيدي عسب تتغير الامور للافضل بس نفس ما قلتلكم زوجي عصبي وعنيد وصدره ضيق ما يتحمل نفسه كيف بتحملني! ويرد يعصب ويتذمر ويقولي بتزوج

انا ما احاتي الزواج خله يتزوج برايه اذا انا مب قادره احس فيه واعطيه حقه لازم يحصل حقه بالحلال هب بالحرام وعندي يتزوج ابرك من انه يزني والعياذ بالله

شوفو يا عرايس انا وصلت لاي درجه انيه اقوله اتزوج انتو متخيلين البرود اللي انا عايشه فيه انا اللي كنت احبه الحين ما اتحمل لمسه ايده او ريحه عطره او شكله صرت اشوفه قبيح مع انه جميل والكل حاسدني عليه بس صرت انفر منه اتم الليل اصيح واتمنى الايام ترد فيني لورا وما اوافق عليه

هب عارفه شسوي مرات اقول عين ومرات اقول في حد مسويلي شي ومرات اقول حرام اظلم الناس واقول يمكن اللي صار امبينا اثر في نفسيتي ووصلني لهالمرحله بعدين يا جماعه الخير انا زوجي مب عاقل يعني تخيلو كان يقولي ربيعتي طرشتلي صورتها وهي مفصخه والعياذ بالله ومرات ادخل عليه احصل يطالع صور فاضحه والمشكله اللي كانت ترفع ضغطي انه زوجي يموت عالخليجيات ويدور صورهم دواره في النت مادري ليش مع انه جمالي عربي اصيل ومو قاصرني شي والحمدلله على نعمه الله مع اني مقتنعه انه الريال لي حب مرته حبها حتى لو هي هب حلوه لانه حب روحها وبالعشره تصير بعيونه اجمل وحده فالكون

انصحوني لاني افكر اتطلق منه بس ارد واتعوذ من الشيطان خصوصا اني اموت على بنتي وما اتخيلها تعيش حياه مب مكتمله بس ارد واقول لو كملت حياتي معاه ويبت يهال اكثر وزادت مشكلتي ساعتها اكثر عن ياهل بتضرر وغير جذه انا زوجي متناقض صح يخوني بس لو يوم رقدت عند اهلي يطلع اثيابي كلها من الكبت ويحطهم على الشبريه عسب يهونون عليه غياببي..احس مرات انه تربيته غلط وتعودت على المغازل من جذه صعب عليه يتغير الحين وبنفس الوقت يبغيني ويحبني لدرجه اني لو تعورت يتم يصيح ويدعي على عمره مع انه ماله خص باللي صار فيني..ادري انه متناقض وايد وايد يعني انا وايد اقوله انته عادي تجرحني واتأذيني بس لو حد ثاني زعلني انته ما ترضى وتنقهر واقوله انه متناقض وايد واصارحه بهالشي واللي يزيد الطينه بله انه اهله وايد يتذمرون منه يعني ابوه يسميه الخبل وامه العصبي واخته دوم تقولي من يظهر اخوي بره البيت ارتاح لانه بصراحه عصبي ولوعه والقعده معاه ممله يعني هذا كله يكرهني فيه زياده وما الومهم لاني اعرف انه كل اللي يقولونه صح

الحين من بعد الله ارجو مساعدتكم ومحتاجه هالمساعده وايد لانه نفسيتي في الحضيض