ماما حسون:
اهلين جمانة
كانت القناة تعرض قبل هالبرنامج برنامج اسمه سوبر ناني مع مربية غير ..
المربية السابقة كان اسلوبها يتمثل في تأديب وتربية الاطفال من خلال نصح الاهل بالطرق الصحيحة للتعامل معاهم .. وكانت اذا تشوف خلل في احد الوالدين او كلاهما توجههم الى تصحيحه ..
لكن هالبرنامج ناني 991 الاحظ انهم يعتمدون بشكل اساسي على تصحيح العلاقة الزوجية بين الاب والام وتحسين عيوبهم اكثر من التركيز على مشاكل الاطفال ..
يعني مثلا في حلقة المصاصة اللي ذكرتها اختي نوووسة العيال كانوا وايد شياطين ويضربون امهم ويعفسون ويسوون بلاوي .. لكن اشوف ان المربية ركزت بس على قطع المصاصة عنهم والباقي اعتمدت على نصح الاب والام في اموروهم .. وتفاجأت ان بعدين الاطفال صاروا هادئين ومؤدبين من غير ما يوضحون لنا شلون علمتهم ان ما يضربون امهم وان ما يسوون كذا كذا كذا ..
يعني ما اعتقد ان قطع المصاصة عنهم بيخليهم يتأدبون ولا زيادة نسبة مشاركة الاب في البيت هي اللي بتأدبهم ..
بصراحة البرنامج يعجبني واتابعه واحاول اخد اللي يفيدني في تربيتي لولدي .. لكن احيانا ارى فيه عدم مصادقية في بعض الامور ..
وبقول لكم بعض الآراء من ناس من الاهل حول الموضوع بما انهم غير مشاركين بالمنتدى ::
1
- وحدة تقول انها ما تحب تعتمد اسلوبهم لانها ما تثق فيه .. تقول صح يمكن عيالهم " الاجانب " مؤدبين في صغرهم لكن شوفوهم اذا كبروا يا اما منحرفين او فاشلين او حتى اذا نجحوا تلاقونهم من عمر 15 - 18 سنة بالكثير طلعوا عن اهلهم وعاشوا بروحهم من غير ما يسألون عن امهم وابوهم ..
2- ووحدة تقول البرنامج دايما يطالب الاهالي بتغيير سلوكهم وعاداتهم .. والغريبة انهم في خلال اسبوع يتغيرون .. فهل هالتغير بيستمر على طول ؟؟ لا ننسى ان الطبع يغلب التطبع .. لذا البرنامج من وجهة نظر صاحبة هذا الرأي يفتقر لبعض المصداقية ..
شخصيا البرنامج السابق سوبر ناني كان يعجبني اكثر من البرنامج الحالي ..
وشكراااا
هلا حبيبتي ماما حسون...
مشكورة ياعمري على ردج.. فرحتيني باهتمامج..
بما اني وضحت في ردي السابق اني ما اتابع البرنامج على طول، بس اميز الاولي عن التالي.. الاولي كانت المربية تلبس صديري بنفسجي قصير دائماً ، مو؟
بالنسبة الى معالجة العلاقة بين الزوجين، اشوفها شيء صحيح، لما يتمون ينتقدون بعض قدام الاطفال، او لما يقلل احد الزوجين من قدر الاخر قدامهم ايضاً، بنظري الطفل راح يكتسب هذا الشيء منهم بالضرورة، من جذي احسبها نقطة ايجابية في البرنامج الجديد انها اهتمت بالعلاقة بين الوالدين اولاً..
مافيه اختلاف ان البرنامج يقدم فعلا نصائح تربوية حلوة وهامة، بس بالنهاية اختي ماما حسون يبقى برنامج تجاري اولاً واخيراً..
وهذا الشيء الوحيد اللي ممكن يفسر النقاط اللي ذكرتيها نقلا عن اهلج..
وخصوصاً في آخر حلقة شفتها، واللي فيها الام كانت مربية سابقة وفشلت الحين في تربية عيالها..
بالاخير اعطوهم سيارة عائلية وهدايا راقية، والسبب ان الاب والام تجاوبوا مع المربية؟!!
كلش ما استسغت الحركة، حسيت البرنامج مسوي هالحركة عشان يجذب المشاهدين فقط ..
والشيء الثاني، معقول ان المربية ما فشلت ولا في حالة وحدة من الحالات، او على اقل تقدير، فشلت في جزئية وحدة من الحالة؟ بعض العادات يبيلها اكثر من اسبوع عشان يتم علاجها بالصورة الصحيحة بنظري، والبعض الآخر يبين اشكره انه مجرد اصلاح مؤقت، وبعد رحيل الناني بيرجع كل شيء لسابق عهده !! واكثر شيء في بالي بهالخصوص المرضاعة او المصاصة !