السلام عليكم ورحمة الله وبركاته
شحالكم يالطيبين .. ان شاء الله كلكم بخير ..
ابيات توني الحين كاتبتنها ..
هالابيات مهداة لامي الحبيبه .. لهالانسانه اللي لو اعطيها عيوني وعمري كله ما بوفيها حقها ... فديييتج يا امي ..
هذا الموقف كان حاضر معايه وانا اكتب القصيدة ...
اذكر من ثالث ايام العيد كنت احس بالم شديد في معدتيه .. انا كنت دايما احس بهالالم بس هالمرة كان واايد قوي لدرجة اني مب قادرة امشي ... تمت امي يالسه عدالي وانا اشوف عيونها كلها خوف عليه ... كانت تترجاني اروح المستشفى بس ما كنت ابى اروح نص الليل .. تمت امي يالسه عندي وحاطتني على ريولها كاني بيبي ... كانت تقرا عليه قران وتدعي الله يشفيني .. وانا اشوفها ومستغربه .... ليش كل هالخوف عليه ؟؟ بس تدرون مع اني كنت تعبانه بس كنت فرحانه احساس حلو يوم ترقد في حضن امك ( ما عندي سالفة صح ههههه)
هاذيك الليلة انا متاكدة انه امي ما رقدت .. لاني كنت احس فيها وهي تدخل الغرفة وتشوفني وتطلع وعلى هالحال الين الصبح .. مع اني كنت بخير وراح الالم يوم قرت عليه قران ... بس سبحان الله قلب الام كيف حنوون ...
[poem font="Simplified Arabic,5,tomato,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black"]
من اللي لو حزنت تحزن لهمي = من اللي لو بكيت تبكي لبكايه
من اللي لو احتجت احد يمي = الاقيها اول الناس بحذايه
من اللي صدرها دايم يضمي = من اللي حضنها همي ودفايه
من اللي لو مرضت تبقى تسمّي = عليه وليلها تباته معايه
من اللي لو ازعلت احس جسمي = مفارق روحه لزعلة منايه
من اللي لسانها لو نطق باسمي= يلبي القلب : لبيه يا غلايه
من هي هذي غيرها امي = لي من غلاها سكنت احشايه
تحملت رضاعي وعنى فطمي = وقبل هذا حملي وربايه
تحملتني بحربي وبسلمي = تحملتني بطيشي وعمايه
بسوايه تستحق ذمي = وبعناد طفلة مبزايه
ولاشكت للغير ابد همي = قابلتني بدعوة هدايه
علمتني اصلي واسمّي = لبستني شيلة و عبايه
درستني واهتمت بعلمي = سمعتلي دروسي وقبلها الايه
علمتني اقرا واتهجا اسمي = علمتني صحي من خطايه
وش هي الحياه دونج يا امي = دامج انتي ليه هوايه
كلمة حق قالها عمي = وبعدها ما للشعر حايه
لو كل الامهات مثل امي = كان كل بنت طلعت مربايه [/poem]
وسلامتكم
ملاحظة : يمكن في كلمات بعضكم ما بيفهم معناها ... لانها من لهجتنا الاماراتيه ..
فانا حاضرة ابين معنى اي كلمة مب مفهومه ..
بنفسوجة العين