الحمل الكاذب

راح اقول لكم مشكلة وحدة من البنات معاي في الجامعة واتمنى انكم تطمنوني بخصوصها ..

صديقتي قريب بتكمل ال 21 سنة ومتزوجة من حوالي سنة و8 أشهر ، وطبعا هي حبت انها تأجل موضوع الحمل والولادة لمدة سنة على الاقل عشان على قولتها تتدلع اكثر واكيد بحكم دراستها بعد .
بس بعد حوالي 10 اشهر من زواجها تفاجأت ان الدورة متأخرة عليها .. استغربت لانها ما زالت تستخدم موانع " القذف الخارجي " ، ولما راحت المستشفى وسووا لها تحليل بول عزكم الله طلعت حااامل .. رغم انها ما كانت تتمنى تحمل بذاك الوقت الا انها تحمدت ربها وزوجها فرح بهالشي ، بعد كم يوم ابتدا عليها الوحام وكان وحام شدييييييييد تعبت فيه وايد خصوصا ان هي جسمها ضعيف وما تحملت ، ولما راحت المستشفى قالوا بيرقدونها عندهم .. ويوم سووا لها فحوصات وأشعة اكتشفوا انها المسكينة مو حامل ، او بالاحرى حامل بكيس فقط .
ما يحتاج اقولكم وقتها شلون كان نفسية صديقتي وزوجها ، المهم ان سووا لها في المستشفى عملية تنظيف عادية وقاموا يعطونها مواعيد للعلاج لان هرمونات الحمل عندها موصلة 5500 في حين ان الحامل " الحقيقية " هرمونها تكون 1000 .
مع العلاج صارت الدورة عندها مو منتظمة ، وآخر موعد عندها في المستشفى كان بداية شهر 2 يعني من حوالي شهر ونص وكانت هرموناتها اوكى ونزلت للصفر يعني في قابلية للحمل ، وقالوا لها خلاص ما يحتاج مواعيد ثانية لان كل شي طبيعي عندها .
المشكلة الحين ان من يومها ما نزلت الدورة عليها .. وهي صار لها اسبوعين الحين تعبانه ابتدت بالانفلونزا والحين تحس بتعب وخمول عام في جسمها وصداع شبه مزمن ، اقول لها روحي المستشفى يمكن تكونين حامل " على الرغم من انها هي وزوجها رجعوا يستخدمون موانع لانها خايفة السالفة تتكرر مرة ثانية " الا انها واااايد خايفة الحين .. خايفة تروح المستشفى وتطلع حامل بكيس مرة ثانية لانها قرأت مرة ان اللي يصير هالشي مرة ممكن يصير لها مرة ثانية .

المسكينة اتذكرها اول ما اكتشفوا الحمل الكاذب قالت سبحان الله ، بالاول انا اللي كنت ما ابي احمل ويوم حملت وفرحت بالبيبي طلع البيبي (كيس) .. وتحمدت ربها

يا ترى في احد مر بهالتجربة .. او تعرفون احد مر بهالتجربة ؟؟ وهل حملوا مرة ثانية ؟؟



ملحوظة : هي تقول ان لما صار الحمل الكاذب تفاجأت انها كذا مرة ينزل منها دم بعد الجماع ، ويوم قالوا لها في المستشفى انها حامل خبرت الدكتورة بهالشي وقالت لها الدكتورة ان هالشي طبيعي وناتج من تلقيح البويضة ، والحين هي ما تشوف اي دم نزل عليها هالفترة .



وشكرا مقدما ... نسألكم الدعاء