موضوع للنقاش: هل تأخذين شغالتك معاك لما تطلعين برفقة أطفالك؟؟؟

جيتي على الجرح ام عبدالله

تصدقين اموت قهر وانا في السوق كل ما شفت الشغالات لوحدهم مع الاطفال في منطقة المطاعم او الالعاب
فيه شغالات تلاقيهم صحيح يلعبون الاطفال ومهتمين فيهم كأنهم امهاتهم وأحسن بعد

وفيه شغالات تكرمون يوديون الاطفال الحمام والله اسمعها تضربه والباب مسكر عليهم او تصارخ عليه
يوم تطلع اعطيها نظرة واقول لها الشره على المدام مو عليك

وأذكر مرة شفت شغالة تضرب طفلة ما يتجاوز عمرها سنة وشوي في العربة على فمها !!! عشان تسكت قمت اطالع فيها وقلت لها حرام عليك
بس ما اهتمت
بغيت اقول للام كم كلمة يوم جت بعدين قلت ماراح اتدخل ومصيرها تعرف ان اهمالها راح يأثر عليها وعلى طفلها ( ادري طلعت عن الموضوع شوي بس حبيت افضفض )

الشغالات مشكلة ... بس وجودهم صار اساسي وضروري حتى بوجود طفل خاصة للام العاملة
طريقتك حلوة رانيا لو البيت كبير صعبة تنشغلين عن الجمعة وانتي تراكضين ورا عبودي ( ولو انه ياحليله مايسوي شي )

الشغالة تقدر تجلس معاه على الاقل عشان ما يصير له شي لا سمح الله او الاطفال يضربونه
بس رايحة سوق ما احب جرها وراي ليش عاد ... مثل ما قلتي كل ما بتشوف شغالة بتوقف تتكلم حتى لو من جنسية ثانية
حالهم حال السواقين

يمكن لو بروح عشا عند ناس وبطول باخذها او على الاقل بوديها بيت اهلي المشكلة ما احب الشغالة تظل لوحدها في البيت ما ادري شتسوي منو تكلم لو تسوي لي مصيبة
مابهم امان

اطلع معاها بس بحدود المعقول

يعطيك العافية

تسلمي RoOoOomy على المداخلة، فعلا وجودهم مصيبة ولكن ضرورة أحيانا للأم العاملة،،، لو رايحة جمعة والكل مجتمع وماعندك حد تخلين الطفل عنده تضطرين تاخذينها معاك يكون تنتبه له وقت جلوسك مع الجماعة ويكون مايمسك شي في بيت الناس...

والله مثل ماقلتي لما ياخذونهم تكرمين الحمامات بالمجمعات،، يسحبونهم ويصرخون عليهم،، أكرهه هالشي...

السلام عليكم ورحمة الله وبركاته

هذا موضوع روعة و في الصميم...

الحمد لله و الشكر لله تعالى...ما عندي شغالة...الله لا يحوجني لها في يوم من الأيام...اللهم آمين...

لكن أكثر ما يستفزني فعلا...و يرفع ضغطي...لما أكون ماشية في الجمعية أو في المول...و أشوف الأب و الأم ماشيين يضحكوا و فرحانين...و تاركين الشغالة وراهم ب 10 متر...تجر عرباية البيبي...

ليش يعني ؟

مين الأم و مين الأب و مين المسؤول ؟

ليش إختلطت المسؤوليات...و الأم ماشية فرحانة و نافشة ريشها...

مش هذا ابنك ؟ ما تعبتي تتركيه عند الشغالة طول الصبح...و طول الليل كمان...علشان تتمشي براحتك ؟

طيب ما هم الأطفال مسؤولية...و طبعا وجودهم يعيق أشياء كثير...مش زي لما ما يكونوا موجودين...

لكن إحنا الأهل و اللي بدورنا لازم نتحمل...مش نقوم و نرمي كل شيء على الشغالة علشان نعيش حياتنا عادي...

و الشغالة تعتقدوا تعلم الطفل أي مبادئ صحيحة ؟

يعني تقول له لا تعلب بأغراض المحلات...و لا تخرب شيء ...أو ما ترمي على الأرض...

الشغالة عمرها ما ربّت طفل...

لذلك تعالوا شوفوا الجيل الجديد كيف مستهتر...و ابسط مبادئ الذوق ما يعرفها...لأنه ما لقى اللي يعلمه إياها...

معلش...أخذت الموضوع فرصة أتكلم عن شيء فعلا صار منتشر و يضايق...

شكرا أم عبد الله (f)

السلام عليكم و رحمة الله و بركاته الأخت رانيا
أنا عندي خادمة بالبيت تعتني بإبني تحبه و يحبها كتيرا و هذا الحب و الإعتناء بطفلي خلال تواجدي بالشغل يجعلني أنا الأخرى أحبها و أتق بها و أصطحبها معي إلى كل مكان أروح له مع زوجي و أبنائي لدرجة أن الكل يضن أنها من عائلتي و الحمد لله لم أجد معها أي مشكل مأخرا إتخطبت لصديق زوجي أعجب بها عندنا بالبيت و ما زالت معي ووعدتني أنها لن تفارقني حتى وقت الزواج ولم أدري كيف سأفعل بدونها لما تروح لبيتها بعد عام إن شاء الله . هده هي قصتي مع خادمتي.

السلام عليكم ورحمة الله وبركاته

انا عندي ولد و بنت شوي كبار يعني ما اخاف عليهم في طلعة رحله لايمكن اشيل الشغاله بيكونون
بيني و بين ابوهم نلعب معاهم

اما في زيارة الاهل فيتوقف على الزياره نفسه اذا كانوا قريبين مني و عندهم بزران اشيلهم

يلعبون معهم و خاصة اقاربي اللي مايتضايقو من زيارة الاطفال :cool2:

و اذا كانت الزياره لناس شوي بعيد بخليهم في البيت مع الشغاله وي ابوهم و اذا ابوهم مو في

البيت ودتهم يم خوالهم يلعبون وي عيال اخواني

اما السوق فهذا اتعب شي لانهم لدخلوا محل يقعدون يلبون في الحاجات الين راعي المحل يناظر:

mad2::mad2::mad2:

فينا و نقد وياهم خلي هذا ترا ما اشتريلك حلاوه (g)وعلى هذا المنوال

تراك تكلمت عن موضوع جدا حساس

[move=right] الاطفال مسؤليتنا مو مسؤلية الشغاله وهذا دائما شعاري [/move]

ترى للعلم انا ما اشتغل يعني ربة منزل علشان كذا مرتاحة:shy: الله يعين اللي بتشتغل :think:

يعطيك العافيه على الموضوع :up::up::up:اتمنى ان الاعضاء يشاركو فيه

مرموم،، أخم شي أن ماعندك شغالة،، لأن إذا تعوديتي عليها خلاص ماتقدرين تستغنين عنها،، بس أحيانا الواحد يضطر،، آنه جبتها بعد ماكان عمر ولدي 5 شهور،، حسيت أن أمي تتعب كثير الصبح معاه وماتقدر تسوي شي بالمرة وعندها إلتزام الظهر تجيب خواتي من المدرسة.. بس ماخلي الولد عليها طول الوقت..

chahrazad، الله يخلي لك الشغالة ومايغيرها عليك، وتبقى لك وللأولادك...

بوح الشوق،، الحمد لله أنك ماتشتغلين يعني عيالك حواليك،، بس أحيانا ماتقدرين تاخذين عيالك كل مكان، يعني في زيارات ماتصلح لهم،، نضطر نخليهم معاهم بس يكونوا في بيت أمي أو جدي... أشكرك كثيراً على المشاركة,,,,

موضوع حلو للنقاش
تنقهرين اذا شفتي الخدامه تصارخ بعد على البزر اذا بغا يلعب بعد
تقوله <<<<<<يالله خلاص انتا في يلعب واجد
وش دخل امك

المهم انا اذا طلعت طبعا مع رجلي احب اخذ بنتي(4 سنين) بدون الخدامه
بس اذا ولدي(5 شهور) معاي لازم اخذها هي مع البيبي وانا مع بنتي
بس اني اخليها الحالها في اللعاب مع بنتي لا واحنا ليه موجودين عشان الخدامه تلعبهم

وسلامتكم


الخليجيه

بنت الخليج مشكورة حبيبتي على المشاركة،، الله يخلي لك أولادك...

لو كان عندي شغالة ما راح اخذها معاي لاني ما احبها تشاركني اموري العائلية، لما اكون في البيت بنتي حقي وبس.

شكرا رانيا على هالابداع

السلام عليكم
موضوع حلو
حبيت اشارك فيه برايي

انا عندي خادمه للبيت فقط
مستحيل اخليها تخالط اولادي
ولا تجلس معهم

واموت اذا شفتها تتامر عليهم

اما اني اخذها معي السوق مستحيل ما اخذها الا في الجمعات عشان تتنتبه لبنتي الصغيره ...
وتحت عيني لدرجه ان وحده شافتها جالسه حولي قالت انتي دكتاتوريه
معليش خليني دكتاتوريه بس بنتي ما يصيرلها شي...

يابنات اطفالنا امانه عندنا حرام نحطهم بين ايدين ناس ما تدرين وش ملتهم ....

واخيرا الله يعين الموظفات الي قلوبهم على كف عفريت من هالشغالات

.

.

موضوع وايد حلو ومهم صراحه

انا كان عندى خدامه بس عمري ما اخذتها وياي

انا ماحب اخذها وياي وبناتي هاديات مب شقيات واقدر اتحكم فيهن

لكن مثل ما قالو الاخوات الخدامه مهمه خصوصيا الي عندها اكثر عن ثلاث اعيال

واذا كانو يتحركون وايد

بس لازم الام تطالع اعيالها وتكون عينها عليهم ما تهملهم مع الخدامه وتاخذ راحتها

انا اشوف في المولات وايد حريم يحطون الخدامه وياء العيال في الالعاب والمطاعم والام تتسوق لحالها

والله موقف ما انساه اني شفت خدامه تعبها الياهل من كثر ما يصرخ قامت فتحت الزباله شافت عصير احد شاربه واخذته وحطته له في الرضاعه وخلته يشربه

عشان شو عشان تقعد مستانسه الياهل ضيق عليها وما عرفت تسكته

والله قطع قلبي وقلت اللهم لك الحمد والشكر انه اعيالي دايما معاي

اتمنى الكل يتفاعل مع الموضوع لانه مهم وايد

.

.

انا بصراحه ودي اشارك معاكم مع ان بنوتي لين الحين عمرها ثلاث اشهر ومابين لها شي بس انا جبت لها مربيه على اساس تشوفها وانا بالدوام تحت اشراف ام زوجي واول مااوصل من الدوام على طووووووول اخذها عندي طول اليوم لين ثاني يوم واذا بنطلع انا وابوها نوديها معانا مع انها نتوفه واشيلها وتتعب ايدي بس معليش يرتاح قلبي واذا بنروح مول اخذ عربانتها وياها ...

وبالنسبة اذا رحت بيت هلي لازم اوديها معانا لان بيت هلي حيوي ناس داخله وناس طالعه ابيها تقعد معاها بالصالة الثانية او تغير لها ملابسها ..

وللعلم المربية اللي عندي واااايد زينه بس انا مااحب اضغط عليها واتعبها مع بنتي اخاف تتملل منها وتسوي فيها شي فاكبر وقت ممكن اخذها فترجع لها بعدين احس انها مشتاااقه لبنتي وتقولها وحشتيني ماشفتج من مساعه ..


طولت عليكم بس بيت اشارككم

بسم الله الرحمن الرحيم

السلام عليكم ورحمة الله وبركاته
شكراً لك اختي الكريمه على هذا المقال
الصراحه انا من الناس اللي مااحب الخدم وماأامن فيهم لكن وحده في مثل ظروفي مااقدر اطلع بدون خدمي لان عندي ولدين توأم وصغار فضروري يكونون معاي للمساعده على قولتهم شر لابد منه

بصراحه عن نفسي انا ضد شي إسمه شغالات
اسمحولي اعبر عن راي الشخصي
من كثر ما اسمع عن مشاكلهم وكم طفل تأذى منهم اخاف
واول شي بنتي انا امها ومستحيل اجيب شغاله تمسك بنتي وتأكلها
انا صح بشتغل بس باخد بنتي بالحضانه وهالحضانه موجوده داخل شغلي
يعني انا اروح اطعمها والبسها وكل شي بس تلعب مع الأطفال
هذا راي بالشغالات وثاني شي الواحد ما ياخد راحته بالبيت
تحسين في احد غريب بالبيت

اشكر صاحبة الموضوع على طرحها هالموضوع
يعطيكي العافيه

أكبر قلب،، إن شاء الله ماتعتازين للخدم،،

wujod الله يحفظ بنتك لك إن شاء الله،، وفعلا أحيانا تضطرين تكون الخادمة معاك في بعض المواقف..

PINK الموقف الي ذكرتيه فعلا قهرني،، كيف تسوي كذا، بس الشره على الأم الى تركت الطفل مع الشغالة،، والله أحيانا يكون عندي شي ضروري أشتريه ،، آخذ كل خواتي معاي يكون ينتبهون لولدي على ماأخلص الشراء ولا أني آخذ الخدامة معاي السوق..

KسارةK الحمد لله أم زوجك موجودة الله يطول بعمرها،، لما أداوم يكون ولدي مع الشغالة في بيت أمي ويكون تحت عينها، بس أني أتركه معاها لا...

الفنانة الله يحفظ لك الولدين،، وفعلا طفلين بنفس السن صعبة يكونون معاك لوحدك..

ITD حلوة فكرة الحضانة بشغلك، الله يخليه لك إن شاء الله....

بصراحة اخذها لمل اروح الملاهي واحط في البيت بس اخذ بنتي معاي لان الشغالات في هذا الزمن مالهم امان
وفي بعضهم لما تعوديهم يتعودوا على الطلعات

أم حور،، أشكرك على المشاركة،، وبخصوص نقطة الطلعات، صحيح بعدين يتعودوا على الطلعات....

اشكرك رانيا على طرحك للموضوع المهم :)

انا عن نفسي لمه اطلع احب يكونون اعيالي معاااي انا وابوهم ما احب الشغاله معاهم

لأنه ما راح يفرحون او يرتاحون الا اذاانتي شاركتيهم ونااستهم موش الخدامه بس لمه اروح بيت الاهل او حد من القرايب لازم تكون معاي

خدااامتي عشان تراقب بنتي وفي نفس الوقت تكون عيوني عليها واشوفها

وأشكرك عزيزتي على طرحك للمو ضوع

تسلمي يا النوري, والله يحفظهم لك,,,

على طاري هالموضوع أمس ولدي كان معزوم حفلة، في البداية ماكنت راح آخذه ، بس الحرمة أصرت،، المهم أخذت شغالتي معاي لأن الطريق بعيد وسط مزارع،، شنو تتوقعون؟؟ العيدميلاد كله أطفال وكل طفل ماسكته خادمة،، دورت ناس آقعد معاهم مافي حد غير كم وحده ينعدون على الأصابع،، يعني كيف آخلي أطفالي مع الخدم وماشاركهم فرحتهم والطريق بعيد كيف أخليهم بروحهم معاهم ومع السواق،، وله تكدرت على هالأطفال وين أهلهم عنهم.. يعني آنه أول مرة آخذ عبودي لهالشي وكان عندهم البيت الهزاز والمهرج والقطار بس حسيت وأني آلاعبه كيف كان فرحان وأني آنه معاه أشرح له كل شي ... ولا كانت في أجنبية مع عيالها لا معاهم شغالة ولا هم يحزنون،، وأحنه كيف صار إعتمادنا عليهم....