بنات وين أقدر أحصل مانيكان للإيجار.... للزهاب العروس؟

وينكن يا بنات ماشي رد

محد يعرف وين ممكن أستأجر المانيكانات

:cry::cry::cry:

مرحبا اختي سطوع
انا اعرف وين يبيعون مانيكان ... يعني بس تعليقه بدون وجه... صح
اعتقد محل في دبي اسمه رتوش عنده تجهيزات ومستلزمات المحلات ...

السلام عليكم اختي انا عندي بس مو للايجار ادا حبيتي اقدر اعطيج كم وحدة لمدة كم يوم

خيوط الليل

سويتي2

مشكووورات وجزاكن الله خير... والله يوفقكن إن شاء الله لكل خير

أنا أريد مجموعة يعني تقريبا 10 أو أكثر..

و أنا من العين فأريد أستأجر بس حق عرض الزهاب يعني بعدين ما بحتاجهم

هلا اختي
انا عندي مانيكان للايجار بس مش العدد إلي انتي طالبتنه
اقل لو تبينهن انا جاهزه

السلام عليكم ..

حبوبه دامج من العين عندج الصناعيه ... سيري هناك شي واااايد محلات تقدرين تفصلين بس مادري اذا يأجرون ..

أختي نعس
مشكووورة واايد
بس بغيت أعرف كم واحد عندج؟.... وبكم؟.... وأنتي من وين؟

أختي البارونه توته
مشكوورة غناتي ....
أنا بسير المحلات اللي في الصناعية وبشوف شو عندهم..
بس إنت تعرفين حد معين..

خواتي مشكووووووورات على فزعتكن لي
وتسلمن وما تقصرن

الغاليه أنا ممكن أجرلك المانيكان ..

عندي حوالي 8 .. وعندي علاقات الملابس المجسمه حوالي 20 وحده

بس كيف أوصلك أنا بمسقط :)


حبينا نساعد ..

أنا اعرف وحده عندها مانيكانات وأتأجر ماعندها ماااانع.....

أنا عندي 4 مانيكان و علاقتين ملابس ... بس انا يوم زهبتي اتفقت مع محل تجهيز الاعراس وكان عندهم خدمة المكسار العروس ... وبعد عندهم صندوق زجاجي لعرض الذهب وايد وايد حلووو بحدود التعديل كله من 2000 وطالع على حسب الطلب منج

اختي سوري على القافه

بس حبيت اقولج حرام تاجرين لاءنه اسعارهم رخيص عندنا بالكويت سعر المنكان الواحد ب37 درهم بس يعني لو بتأجرين بيطلع لج نفس السعر

ولقافه ثانيه شنو عرض الزهبه؟؟

يعني تحطين هدومج الي شريتيهم وايون اهل المعرش يشوفونهم؟؟

سوري انا من الكويت وبغيت اعرف طريقتكم

تحياتي
كويتيه

انا معاج اختي احلى كويتية

سعر المانيكان انا شفته بقطر بالرونق ب50 ريال

يعني بدبي يابلاش

يعني تشترينهم احسن


واذا شريتيهم ومب محتاجتهم وطاحو بجبدج

تصدقي فيهم على اي حد محتاجهم بمشروع او اي شي

والا عطيهم اي عروس من اهلكم عرسها عقب عرسج

وانتي على راحتج

والله يتمم لج على خير

يارب

تحياتي لله ثم لج

الغالية birdy123
مشكووورة على تفاعلج وياية
لكن المشكلة إنتي في مسقط فكيف بيكون التوصيل وهذا بياخذ أكثر من سعر الإيجار
مشكوورة مرة ثانية والله يقدرني أني أسعادج في وقت ثاني

الغالية دلــوعه
مشكووورة على تواصلج معاية عن طريق الرسائل الخاصة

الغالية دمدماني
أختي إنتي من وين وهل بتأجريني 4 مانيكان و علاقتين ملابس اللي عندج وبكم؟ ... أنا أريدهم لمدة 3 أيام؟
ممكن أعرف اسم هذا المحل؟ ... وهو من وين؟ ... شو رايج بتعاملهم؟
اسمحيلي على كثرة الأسئلة..


الغالية احلى_كويتيه
حبيبتي أنا ما أريد أشتريهم لأن ما بحتاجهم بعدين ..
والمشكلة إن في العين محل واحد يبيع هذي الأشياء فيكون السعر مضروب في أربعة
يعني إن كان سعرهم 37 درهم إضربيهم في أربعة كم بيكون السعر ..
أما بالنسبة للزهاب فنحن عدنا طريقتين لتجهيز العروس
الأولى إن أهل المعرس هم اللي يجهزون أغراض العروس كاملة من الذهب للملابس
يعني كل شي والعروس ما تشتري شي وأهلها يسوولها هدية عبارة عن شنطتين فيها من كل شي
لكن أشياء بسيطة كهدية من أهلها..
وقبل العرس يأتي أهل المعرس ويعرضون الزهاب ويكون معدل ومرتب والشنط مرتبطة بالوررود والإكسسوارات
مثل الهدايا يعني كل شنطة مزينة وكذلك الأدوات كل شي معدل..
ويكون الزهاب عبارة عن قسمين القسم الأول مجموعة شنط للعروس فيها اللي تحتاجه من كل شي
أما القسم الثاني فهو مجموعة شنط لأهل العروس يعني بعد العرس أهل العروس
يقومون بتقسيم ما وصلهم في الزهاب على أهلها ومعارفهم..
هذي الطريقة الأولى أما الطريقة الثانية فيعطون العروس مبلغ من المال
(المتعارف عليه مئة ألف درهم ، عشرين ألف مهرها والباقي ثمانين ألف للتجهيزات من الذهب للملابس للأدوات)
وعادة ما يسوون عرض للزهاب ، لكن لأن علاقتي بعماتي قوية فأنا حبيت إني أسوي عرض زهاب مصغر
عشان أراويهم أنا شو خذت لأنهن كل يوم يسألني شو سويتي شو خذتي
وبالنسبة لطريقة العرض تخصص غرفة من غرف المنزل لترتيب هذي الشنط
وكل شنطة معدلة بالإكسسوارات والشرايط والورود
فيكون الترتيب شنطة للكناديرو الشيل (شمد) أي شيل البيت الكبار الملونة واللي لونها أبيض
شنطة للنعول الله يعزكم والشنط اليد
شنطة لملابس اللانجري بكل تفرعاته
شنطة للعبي والشيل والمغربيات
شنطة للأدوات مثل السيشوار والمكينة الحلاوة والمشوط والشباصات وكل شي يخص الحمام
شنطة صغيرة للمكياج بكل أنواعه
صندوق الذهب ويعرض فيه كل الذهب اللي يابوها أهل المعرس والهدايا ويكون كبير معدل
يمكن لأهل المعرس يبتكرون أشياء في طريقة العرض مثل إنهم يغيرون بدال الشنط صناديق المندوس
ولا ننسى الفساتين وكل شي ممكن يخطر على بالج يعني مرتبين كل شي
وأهل المعرس يوم يأتون قادمين بالزهاب يكون أهل العروس مجهزين القهوة جداهمهم
يعني الفوالة ومجموعة من الأكلات ويكون ناس من أهل العروس في استقبال أهل المعرس
وتأتي النساء لرؤية ماذا قدموا أهل المعرس فيشوفون كل شي
ويستمر قدوم النساء طوال اليوم ولا ننسى الغداء والعشاء عزيمة كبيرة
هذي طريقتنا في زهاب العروس ممكن في تغيرات بسيطة بين كل إمارة والثانية لكن الجوهر واحد
ويسمونة اسم ثاني وهو مكسار العروس


الغالية مشتاقة لقطر
مشكووورة واايد على تفاعلج معاية
لكن أنا مثل ما قلت ما أريد أخسر واايد لأن اللي يبيعهم عدنا في العين رافع السعر وااايد
لكني بسير أشوف دبي وأدور على المحلات اللي يبيعون أغراض المحلات وبشوف الأسعار عندهم



لكل من رد على موضوعي له الشكر الجزيل

الله يوفقج ياقلبي

بس بصراحه طريقتكم غيرررررررررررر وايد عنى


احنا ماعندنا ولا شي من هذا

احنا عندنا بس شي اسمه المهر والاغلبيه يعطون اربع الاف الي اهيا الحكومه تعطيهم المعرس لزواجه

ويحطونهم بصندوق مرتب مع شغلات وايد كل ناس على حسب

وبحط موضوع في قسم العروس اتمنى اشوفينه

وشوفين شلون المهر عندنا


تحياتي
بنت الكويت

أختي بتلقين مانيكان في المحلات اللي تبيع أدوات الخياطة ..
يعني مثلا في الدوحة نشتريهم من الرونق وأرخص نوع هو الصيني ينباع على 50 ريال ..
..

أنا بعد أبغي مانيكان لمدة يومين
ياريت اذا حد يعرف وين تنباع في الشارجة
وكم سعرها؟؟

او اذا وحدة من الشارجة بتأجرها علي....
بكون شاكرة لها

؟؟؟؟؟؟؟؟؟؟

وينكم يا بنات الشارجة
محد يرد فيكم؟؟!!!!!!!!!