صديقتي حالتها صعبة؟؟!!

السلام عليكم ورحمة الله وبركاته

اختي الحرام عمره ما ينتهي صح
ربيعتج دخلت موقع زواج وتعرفت على انسان بنية الزواج وتمت معاه مدة 6 شهور تتعرف عليه لين ما تعلقت فيه وهو بنقول بعد تعلق فيها وفي النهايه اتفقوا على الزواج لكن متى ؟؟؟ الله اعلم ..
ربيعتج غلطت يوم انها تمادت معاه واكيد هو مب مناسب لها لان اللي يخاف الله ما بيطلب يتعرف عليها بالحرام طول هالمده وبس يمكن يسألها على العنوان والاشيا اللي لازم يعرفها اي خاطب قبل الزواج وعقبها يتقدم رسمي واهلها يسألون عنه وان له نصيب في البنت تراه بياخذها والا العكس .. انا شخصيا اعرف وحده دخلت هالمواقع ولقت انسان ظنته مناسب لها وهو ما كان واايد زين بس شوو .. كان جاد .. يعني اسبوع واحد بس الا وهو متقدم لها يجرب حظه عندها بس لما سألوا اخوانها عنه ما شافوه مناسب وكل راح فدربه .. وبعدين هالمواقع لا تنسين الغاليه فيها خطوره على البنات .. انتي ما تضمنين اي شخص تعطينه تفاصيل حياتج ما يروح يستخدمها بطريقه مش حلوه .. خلي ربيعتج تبتعد عنه وتترك عنها هالواقع ونصيبها بييها لباب البيت دون ما تدور عليه والله يوفقها وياج ويحفظها من كل شر امين

اهلين حبيباتي اشحالكن؟؟


أمل مفقود: شكرا حبيبتي على المرور والرد صدج في ناس تطلع جادة في هالمواقع بس قلة

تكتوش: كلامج عين العقل حبيبتي

,’ نسيم الشوق’، شكرا على مرورج وصحيح الاستخارة افضل حل لمثل هاي الامور

غلادبي: شكرا على مرورج بس ربيعتي عاطفية وايد ما ادري كيف بتقدر تدوس على مشاعرها

انزين بنات هي الحين واجهته وقالت لها انها تعرف عنه هالامور وهو ينكر ويوم ما عطته مجال قال مافيها شئ لو كلمت وحدة ولا ثنتين فيها شئ؟؟!!!!! قالت له هي هاي من وجهة نظري شئ كبير بس هو مصر على رايه انه مب شئ - - - المهم ربيعتي قالت له انا بخليك وهو تم زعلان وقال لها انا بتمسك فيج اكثر واكثر وفعلا انا مقتنع فيج كزوجة لي وها الشئ خلاها محتارة وايد - - الحين علاقتهم متوترة

ربيعتي تقول انها واثقة انهم بيكونون اسعد اثنين لو تزوجوا لانه فيه وايد اهتمامات مشتركين فيها
وتناقشوا في كل الامور تقريبا حتى موضوع العيال ومكان السكن وغيرها من الامور

بس الشئ اللي يخوف انه ما خبرها متى بيي يخطبها

وانه بعده يراسل في موقع الزواج

ويكلم بنات على المسنجر

وتعتقد انه يكلمهم في التلفون بعد ويراسلهم بالاس ام اس

بس يقول انه متمسك فيها ويحبها ويموت فيها ويباها كزوجة

وكل ما تواجهه يا ينكر يا يتأسف او يقول انه مايسوي هالشيء واحيانا يقول ما فيها شئ لو اكلم وحدة ولا ثنتين في المسنجر

محتارة وحيرتني معاها

الله يهديها ويوفقها قوولوااا آمييييييين والله غامضتني واعرف انها غلطت باستمرارها لستة اشهر في هالعلاقة لانها مهما قالت تعتبر محرمة

تبعد عنه احسن لها

اسمحي لي بس ربيعتج ماعندها سالفه موليه...يعني يعترف ويقول لها شفيها لو اكلم 2 !! وعادي للين مستمره وياه !!

اولا اهي لازم تفتح عيونها للحقيقة..وانه لو صج نيتة نظيفة جان تقدم لها من زمان !!...وبعدين ليش ما يتمسك فيها وهي جذيه راضيه ومستسلمه للعبه وحركاته ! وين بيلاقي وحده تتقبل مصايبه بطيبة وسذاجه ؟؟ اسمحي لي على كلامي هذا بس هذا الصج وياليت تنقلين لها كلامي

قولي لها...لو صج يبيج زوجه كان احترم علاقته بج و خلا عنه المسنجر والبنات والموقع...لان استمراره معناته انته يتسلى بالبنات وهي وحده منهم !! واكيد يلعب نفس اللعبه مع غيرها !!

والرجال اللي صج محترم ما يرضى على بنات الناس بهالتصرفات والمماطله !

واضح جدا انه يلعب عليها !!

بس هي معميتها عواطفها وانتي كصديقة لها دورج انج تسحبينها من هالعلاقه اذا صج تحبينها لازم تفهمينها مصلحتها وين!

خليها تختبره..تقول له انه فيه شخص تقدم لها وهو ممتاز !! وانه اهلها موافقين...وانه اذا ماتقدم الحين...ماتقدر ترفضه !! شوفي ايش بيكون رده !!

عزيزتي

الله يوفقها ويستر عليها ويكتب لها الخير ويسر أمورها

غاليتي ، رفيقتك غلطانه مليون بالميه شلون خلت العلاقه توصل الى ست شهور والى الآن ما خطبها، إذا هي تقول انهم متفقين شينتظرون ؟؟؟

وبعدين هي ما لها حق تعاتب الرجال وتواجهه لانه ما يخصها بشي ، انا اشوف انها توقف هاللي صاير وتطلب منه وتواجهه بالخطوبه والملكه الرسميه أو انها تتركه،،

واذا هو صدق يحبها وشاريها بيخطبها وبيطلب بقربها،،

وهنا هي بتكون في الوضع السليم،، لانها في النهايه علاقه محرمه ويجب توقيفها

رأي من رأي الغاليه (سفيرة فوق العادة) اظنها قالت نفس الي بقوله
وشكرا

دام اساس علاقتهم قايمة على شيء غلط وخارج الحدود الشرعية

الريال مب مجبور يوفي لها

يعني اذا وفا لها على اي اساس اذا الاساس غلط!!!!

وليش البنت تعور قلبها

يباها بييها من الباب

يلعب خله يدور مكان ثاني


ليش اطولها وهيه قصيره !!!

السلام عليكم ورحمه الله وبركاته

نصيحتي لصديقتج انها تحكم عقلها وتبتعد من اولها افضل خصوصا ان الرجال متعود على هالطبع وراح تعاني كثير معاه لو تزوجها
وخصوصا ان طريقه التعرف خاطئه من اساسها ومجازفه فالحمدلله انها عرفته الحين وكشفته احسن ما تعرفه بعدين وتخسر مستقبلها معاه

واتمنى من كل قلبي ان الله يرزقها بالرجل الصالح اللي يقدرها ويصونها

اختج العنود

Al-anood2006

مياسة

بنت شيووووخ

الحلم - الهادىء


شكرا على مروركم وتفاعلكم مع الموضوع

السلام عليكم ورحمة الله وبركاته

ما شاء الله الأخوات ما قصروا...و ردودهم مثل البلسم...

و بصراحة بعد ردودهم و تحليلهم...مش شايفة أي سبب لحيرة صديقتك...و الأكثر إني مش شايفة سبب مقنع يخليها تستمر معاه لحد الجين بدون وضع شرعي !!!!

طبعا تتركه ...اصلا النت آخر وسيله ناجحه للزواج ...

تحياتي ...... ولاء علي

أعتقد انه يتسلى مع اكثر من وحدة مب بس هي..
مدام انه موقع زواج ليش تطول العلاقة لستة شهور ...
اللــــــــــــــــــــــه كريم

شمس أبوظبي

ولاء علي

مرموم

شكرا على ردودكم الطيبة اللي اثرت الموضوع

انزين حبيباتي ادعو لها انه الله يهديها لانها هي تقولي هو اكيد يحبني حتى لو يسوي جيه مش معقولة تناقشنا في كل الامور بس ع الفاضي بدون هدف

اقول لها صدقيني يلعب عليج ويتسلى

وتزعل معاه وما تكلمه يوم يومين وعقب ترد له

ادعو لها انه الله يهديهاااااا وتقتنع انه مب مناسب لها مدام انه يلعب ويتعرف على غيرها


مرمور شكرا حبيبتي على ردج الرائع وصدقيني انا اقول لها نفس الكلام بس شكلها معندة والله يعلم وين بيوديها عنادها وجريها ورا مشاعرها

للعلم هي انسانة ملتزمة جدا بس ما ادري شو صار فيها ما تخيلت انها ممكن تتعرف على انسان بهالاسلوب صح كلنا نبا نتزوج بس يوم بيي النصيب مافيه داعي الواحد يركض ورا السراب لانه ما تضمنين شو يستوي وكيف بتنتهي الامور او شو نفسية الشخص اللي تتعرفي عليه ممكن افعاله وكلامه كله تمثيل في تمثيل وووايد اللي يمثلون هالايام


ما اقول الا الله يهديها ويهدي امثالها

الحمدلله ربيعتي اقتنعت بكلامكم الحين وقالت بتواجهه وبتقول له انه خلاص ما تبا هالعلاقة بعد ما درست كل جوانبها والله بيعوضها بانسان احسن واطهر منه ان شاء الله بس ادعولها

طبعا تتركة واليوم قبل بكرة

هذا لعاب كبير وقصدة مو شريف واصلا شكلة متزوج وقاعد يلعب على بنات الناس

قولي لها تلاحقي عمرك وستري على الباجي وسدي بابة بطين وعجين

السلام عليكم

خلاص حبيباتي الله هداها ربيعتي وتركت هالشخص اليوم بعد معاناة اسبوعين - - الحمدلله واتمنى لها انها ما ترجع لطريق الخطأ مرة ثانية ولا ترد له مدامه هب زين لها

ادعو لها من خاطركم بليز


شكرا عذب القوافي على مرورج على الموضوع والحمدلله الله هداها

فديتك مادام انها ملتزمه خليها تزيد من قراءة القرآن وقيام الليل لو حتى ركعتين واتضرع لربها وتدعيه ووالله ان ربي بيرزقها وبتنساه وبتضحك على عمرها ، وخليها تروح دروس ومحاضرات لو كل يوم والله انها بتنساه والله بيغسل قلبها من هالوسواس،
صدقيني هذا شيطان ومايخاف الله وأكيد اكيد انه متزوج ولعاااااااب كبير
حسبي الله عليه وعلى كل اللي يسوي اسواته00
الله يهديها ويسخر لها ويوفقها بأحسن منه0

انا بصراحه رايي انه ترمسه جد وتشوف رده فعله .....

تقوله بس اخطبني بهالوقت الين ما تتيسر الامور وبعدين املج ...

خلها تشوف رده فعله وخلها تفكر بعقل ...

بصراحه انا احسه يلعب عليها واسمحيلي على هالكلمه ...

الجوهرة

MOON LIGHT

شكرا على تفاعلكم وردودكم على الموضوع

خلاص ربيعتي ودرته بس اتمنى انه تستمر وما ترد له لانها عاطفية واااااايد

ادعو لها انه الله يلزمها الهداية وما ترد له ويسر لها الريال اللي يستاهلها

الله يستر عليها ويسخر لها
بس اختي لازم تودينها دروس دينيه ومحاضرات وتشغلين وقتها ولاتخلينها بروحه
والله يرزقها بالريال الصالح اللي يسعدها