مناقشة القضية الرابعـــة :لماذا أصبح الطلاق أسهل الحلول و أقربها ؟

يعطيك العافية مشرفتنا ام مريم

اسمحي لي تفاجأت يوم شفت العنوان ... اقول يعني كان فيه مناقشة اولى وثانية وثالثة وأنا ما دريت عنها !! لأني متابعة للركن

المهم

موضوع خطير جدا وفعلا نسبة الطلاق عندنا كبيرة ... لكن الأسباب اكبر واعمق من ان نفهمها جميعا

تخيلي مثل ما قلتي ... رجل وامرأة من بيتين مختلفين تربوا بطريقة مختلفة ويمكن شافها بس مرة وحدة في الرؤية الشرعية وبعدين ليلة الزواج ... وبعد ايام العسل ينصدم كل طرف بأن الشخص اللي اختاره بعيد كل البعد عن احلامه وتوقعاته

انا اشوف ان المشكلة لها عدة جوانب :

1- عدم وجود فترة خطوبة كافية
الاحظ من مشاركات الاعضاء ان فترة الخطوبة احيانا تكون 4 شهور !!! هل معقولة تكفي الشخص عدة اشهر لاكتشاف ان اللي مفروض يكون شريك حياته مناسب له ام غير مناسب ؟؟ ما اتوقع

2- عدم سماح أهل الزوجة للخطيب بالزيارة
حتى لو كانت مملكة في اهل يرفضوا ان بناتهم تجلس مع ازواج المستقبل بحجة العادات والتقاليد ( حتى بعد الملكة ) طيب اجل ليش سووها خطوبة مو عشان يتعرفون على بعض وعلى طباعهم وعيوبهم وصفاتهم

3- تدخل الأهل
نسبة كبيرة من حالات الطلاق تقع بسبب تدخل الاهل من الطرفين ... احيانا الأم تحرض بنتها على التمرد على الزوج ومعاملة اهله بطريقة تنعكس على علاقتها بزوجها ويمكن ان تتطور الأمور للطلاق لاسمح الله ونفس الشي بالنسبة لأهل الزوج

4- جهل الطرفين
للأسف لازالت نسبة كبيرة من العوائل تزوج بناتها في سن صغيرة بلا مبالاة لقلة خبرة البنت ... والحياة الزوجية والاسرية مسؤولية كبيرة مو الكل يقدر عليها

فيه أسباب كثيرة يطول شرحها والنقاش فيها لكن انتظر بقية الأعضاء لنكمل الحديث

ومثلك استغرب في المسلسلات وحتى في الحياة الحقيقية لمن اسمع فلانة تركت بيتها وزعلت وراحت بيت ابوها عشان مشكلة انا اشوفها انها تافهة ( رغم اني حساسة ) صعبة اطلع من بيتي لاني لو تعودت راح اطلع على اتفه الأسباب ... لكن في نفس الوقت ضد ان الوحدة تدوس على كرامتها وتجلس في بيتها وهو يضربها او يهينها او يخونها ... فيه أخطاء لا تغتفر للزوج .. ومستحيل افكر في حقوقه الشرعية اذا هو معذبني ... احل مشاكلنا اول وبعدين افكر في حقوقه وحقوقي ... لو كان زوجي مريحني ومتمسكة ببيتي اكيد راح احارب عشان اخلي اموري تستقر .. بس لو حياتي مالها قيمة معاه .. الطلاق هو احسن حل ومو كل مطلقة تعيسة .. ياما مطلقات مرتاحين اكثر من يوم كانوا متزوجات والمسألة في النهاية قناعة شخصية وتوفيق من الله

تسلم ايدك ام مريم

السلام عليكم ورحمة الله وبركاته

يا هلا بيكي أختي Ro0o0omy_M...

كلامك كله صحيح...و أسبابك صحيحة...

استغرب من اللي مكتوب كتابها...و لحد الحين ما شافت زوجها و لا تعرف شكله...و أول مرة تشوفه راح تكون يوم الفرح ؟

طيب كييييييف ؟

مش لازم يقعدوا مع بعض....يتكلموا...يعرفوا ميول بعض و طباع بعض...

ليش أول يوم في الحياة الزوجية يكون أول يوم يشوفوا فيه بعض...

طيب إفرض ما طلعت على ذوقه أو على هواه ؟ يا إما يعيش مجبر و مكره...يا إما يبدأ يشوف بره...يا إما يطلق !

و أشوف بنات في سن صغير جدا...مفتقدات للوعي بصورة كبيرة...و كل فكرتهم عن الزواج إنه دلع و رومانسية و سهرات و طلعات...

ما يعرفوا إنه الزواج مسؤولية عظيمة...ربي بيحاسبنا كيف تصرفنا فيها...

و مع كل هذا تبدأ المشاكل تطفو على السطح...

و تبدأ كل واحدة تشتكي لأهلها...و تكسر قلبهم عليها...

و أول شيء يخطر على بالها...تطلب الطلاق !!!

طيب ليش أيام زمان كان الطلاق شبه منعدم...مع إنهم كانوا فعلا يشوفوا بعض يوم الزواج !

ليش أمهات زمان كانوا فعلا صابرات...و ياما تحملوا في سبيل بيتهم...و كان عندهم طلب الطلاق عيييب !

أقرأ إنه نسبة المطلقات في الدولة 75%

و الله كثير يا جماعة...

بإنتظار آراءكم و نقاشكم...

ملاحظة في محلها اختي ام مريم ... الوحدة تنخطب 4 شهور .. كلها تقضيها في الترتيب للزواج متناسية ان الخطوبة فترة للتعارف ( بشكل شرعي ) انا بالنسبة لي الخطوبة مو شرط تؤدي للزواج يعني لاسمح الله ما ارتحت مع خطيبي ... ايش اسوي ؟

طبعا بنفصل عنه لان الانفصال وفك الخطوبة افضل م الطلاق بعدين

نشوف الوحدة تملك وتبدا في تجهيزات العرس من ملابس وببيت وطقاقات ومعازيم وذهب وتنسى انها داخلة دنيا جديدة تفكر انها بس رومانسيات وغرام وطول الوقت دلع وغيره
وبعد العرس تبدا تفكر في الحمل ........... !!! صراحة شي غريب
رجال غريب عنك ما جلستي معاه شهرين تبدين تفكرين في الحمل بس بدون ما تعوضون الأيام اللي ما عرفتوا فيها بعض تعرفون طباع بعض عيوبكم .. صفاتكم

ومع الحمل والوحم تطلع المشاكل عاجلا أم آجلا ... هي تعبانة .. هو متضايق
وينقطع التفاهم بينهم .. فيه بنات تحلم بالزواج وبعد الزواج بالأمومة بس عشان تكون مثل الباقي ... وماتكون اقل من فلانة وعلانة

طبعا مو الكل بس هذا اللي انا ملاحظته

الحمدلله الوالد شرط خطوبة معينة عشان نتعرف على بعض لان زوجي ماعاش في السعودية كثير واحنا نعرفه بس بالاسم ... سألنا عنه والحمدلله الكل مدحه بس الرجال عند الناس غير عند اهله غير عند زوجته

وخلال فترة الخطوبة حتى لو كنا نجامل في البداية بس بعدين كل واحد يتصرف على طبيعته وهذا اللي ساعدنا نتقرب من بعضنا ونفهم شخصياتنا

الزواج اكبر من حفلة العرس والهدايا وكلام الحب
الزواج علاقة انسانية تتطلب شخصين واعيين لقداسة هذا الرباط

يعطيكم العافية

هلا وغلا

بالغالية ام مريم

فعلا موضوع خطير

وانه سبق وفتحت موضوع بعنوان (( الطلاق يدمر المجتمع ))

طبعا كلامك وكلام الغالية رومي ماعلية زود

بس نجي للحاصل اغلب المتزوجين صغار بالسن يعني البنت تبي تعرس بأي شكل من الأشكال بس ودها تجرب الحياة الزوجية مش مهم المسئولية مش مهم هل هم متفقين ومتكافئين اهم شي تصير متزوجة في المجتمع

والدليل بعد شهرين من الزواج تصيح وش تسوي معاه

وهو نفس الشي اهم شي يرضى امه ويكمل نص دينة .... وهو لسه طايش ولسه تفكيرة مش مستقر حتى اسلوب ماعنده

الزواج شي سامي ولايجب التلاعب به حتى مسألة الإنجاب يجب ان لا نسرع فيها ... لأنه هذا مصير اسرة تنتمي لمجتمع...

وللحديث بقية

لاحول ولاقوه الا بالله

السلام عليكم ورحمة الله وبركاته

يا هلا بكم أخواتي الغاليات...

آسفة لتأخري عليكم في الرد...

بس ما شاء الله كلامكم كله مقنع...و مفاده إنه الرجل و المرأة لا يقدروا قيمة الحياة الزوجية و أهميتها...و بالتالي يحدث الطلاق...

عزيزتي مرمووم


اشكرج على هذا الموضووع


وتعليقي على الموضوع



ان الدنيا تغيرت


والناس كذلك تغيرت


صار للمرأه استقلاليه عن الرجل اكثر عن قبل


يعني المرأه قبل لو يذلها زوجها او تحصل معامله سيئه


تصبر وتسكت لانها تخاف كلام الناس وتخاف ان محد بيصرف عليها



الحين صار للمرأه استقلالية


يعني لو حد جرحها شوي عادي تفترق وتطلب الطلاق


لانها تحس انها راح تقدر تعيش مش معتمده على الرجل 100%

يعني اغلب البنات الحين ماشاء الله في ميدان العمل


ثاني شي الخوف من المستقبل قل

يعني الحين اغلب الحريم اللي يطلبون الطلاق يقولون عادي مابنموت بنحصل شريك اخر


بس قبل المطلقه تبقى مطلقة كانها مرتكبه جريمه عكس وقتنا الحالي


واضيف بعد اللي قلتوه تدخل الاهل - والجهل وغيره



وشاكره لج طرحج هالموضووع مره اخرى

مياسه والله كلامج عدل مليوووووووون بالميه .....

اعتماد الحرمه على عمرها والله خرب بيوت وايد والله يعين بس ...

هلا عزيزتي مون لايت


اعتماد المرأه على نفسها بالعكس ماخرب بيوت


بل بنى بيوووت


وريح ناس وايد


الحين في حريم يشاركون رياييلهم المصاريف


بس للاسف في حريم يطلبون الطلاق بالساهل بس عشان انهم خلاص يقدرون يعيشون بروحهم ومايشوفون اللي بنوه في الفتره اللي مضت عليهم