ماهي الطريقة التى تفضلينها بإطعام طفلك؟؟

السلام عليكم ورحمة الله وبركاته

حلو الموضوع يا رانيا...و بقول لك تجربتي...

قرأت مرة في موقع أجنبي...إنه الطفل لازم يقعد مع أهله على السفرة و ياكل من و هو صغير..

أولا بتنفتح نفسه على الأكل...

ثانيا بياكل لما يشوف أهله ياكلوا...

ثالثا...بيتعود خلاص ياكل وقت ما ياكلوا....

و صرا أقعد مريومة معانا على الطاولةز..و أنا لقمة و هي لقمة :)

صحيح متعبة الطريقة...و صايرة مش قادرة أركز في أكلي...

لكن هي خلاص...تشوفنا نحط الأكل...تيجي و تقول ( ممّ ) علشان تاكل...يعني عرفت طريقة الأكل

و في المطاعم ما ترضى تقعد على كرسي الأطفال...إلا لازم كرسي لها لحالها...مثل البيت...

عاملة حالها شخصية ما شاء الله :)

طريقتك صح ياأم مريم،، المفروض أن الطفل ياكل مع أهله،،آنه العادة أخلي عبودي ياكل قبلنا وبعدين نجلسه معانا وياكل على الخفيف،، بس بالمطاعم معودته على كرسي الأطفال في البداية كان يسوي فيلم من الصياح بسالحين تعود ولا يبي شوكة له لوحده....

انا مشكلتي انه من البداية ما تنبهت لضرورة وجود كرسي الاكل
والحين مستحيل تيلس فيه

لما تيلس معانا على السفرة طبعا ما تخلي شي مكانه
وياليت تاكل بعد
بس تخرب وتنثر الاكل في كل مكان

في بيت اهلي تاخذها الخدامة وقت العشا
وفي وقت الغدا ننتظر لين ما تنام او يتغدى ابوها بروحه وانا امسكها
وبعدين اتغدى انا بروحي وهو يمسكها

اتمنى الاقي حل لهاي المشكلة
لانها احيانا تسبب لي احراج اذا زرنا حد
وبعدين انا تعبانة معاها لانها ما تأكل ابد

السلام عليكم ورحمة الله وبركاته

تقريبا بنتي في نفس عمر بنتك يا مياسة العود...هي عمرها الحين سنة...

و صارت شهيتها للأكل صفر من أسبوع...مش عارفة ليش...أقول يمكن تسنين ...

صديقتي برضه مستغربة جدا إنه ما عندي كرسي للأكل...

بس خلاص...بيتي ما عاد يتحمل أي قطعة أثاث ثانية...صار البيبي شوب عندنا..كله ألعاب و كراسي و مشايات ...

كرسي الأكل أعتقد من الضروريات يا أخت مياسة،إذا ماأعتاد الطفل من الصغر عليه مستحيل يتعلم بعدها،، ترى ولدي عنده نفس المشكلة إذا كنا حاطين على العشاء زيتون، يعفس الدنيا علشان ياكله، ويعصب علينا،،
أنت حاولي تدربينها على الكرسي شوي شوي إلى ماتعتاد عليه،، أكيد بترفض في البداية بس راح ترضح للأمر الواقع...

رووووعه الموضوع .. وانا كل ما اشوووف ام اسالها كيف تاكلين ولدج او بنتج ..؟؟

تخيلوا كل وحده تقولي طريتها وعاد انا انصدم ..

الا تقول امشي وراه واكله ..

والا تقول جدام التلفزيون اكله ...

الا تقول اوقف جدام باب البيت واكله ...

وحده صدمتني وقالتلي اوديه الحمام وهو يتحمم اكله .. اعوذ بالله فالحمام .. النعمه تدخل الحمام...

لكن عني انا الحمدلله احطه في كرسي الطعام واحطله العاب ... ياكل الين نص الطريج يصيح يبا يطلع بس ما اطلعه عشان ما يتعود .. احاول العبه الههيه المهم ينسى والحمدلله اتغلب عليه ...

واظن ان هاي احسن طريقه .....

bj3a أعتقد طريقتك صح،، لكن أدور وراه من مكان لمكان هذا الي ماأحتمله،،، ولا صديقتك الله يهداها الحمام عاد...

حتى ولدي بنص الأكل يبقى يصيح يبي يطلع من الكرسي، بس الهيه بأي شي ويسكت....

كرسي الأكل احسن طريقة ... بس مو كل الأطفال يعجبهم
اختي مستحيل تجلس فيه وامي ما تحب تدور وراها بالصحن تقول هالطريقة خطأ

هي اكلها مرة قليل من يومها صغيرة وللحين حجمها صغير ... بس امي ما شاء الله تهتم بالتغذية وتسوي اللي عليها
احيانا تدور وراها
واحيانا تطلع معاها برة يمكن تتشجع
واحيانا في بيتها ( عندها بيت صغير تجلس فيه وامي برة تأكلها من شباك المطبخ )
بس معظم الأوقات امي تجلس وتسكر عليها برجولها عشان ما تتحرك وتقول لها اذا بتقومي تاكلي اول ... مرغم اخاك لا بطل

والله حيرة مع هالاطفال ... اشوف ولد حماي يجي ياخذ اللي يبيه من على السفرة ويروح يدور في البيت كله .. وحمواتي وراه عشان ما يوصخ
بس امه تقول اهم شي ياكل ما علي من احد !!!

تظنون ممكن تتقبل الحين الكرسي
لاني الصراحة واييييييييد تعبانة معاها

تخيلوا ما تخليني اتغدى مع ابوها
وهي الوجبة الوحيدة تقريبا اللي نجتمع فيها

قبل ما اعرس كنت اضحك على اللي يدورون بالصحن ورا عيالهم
وكنت اقول مستحيل اسويها
بس العيال يجبرون الواحد يتخلى عن مبادئه:think::think::think:

موضوع حلو

احنا عندنا اكبر مشكلة في الأكل
وهي بنت حميي (أخو زوجي)شيخوه
عمرها سنه وتسع أشهر

ماتحب شي اسمه أكل
من يابتها امها وهي تعاني في تاكيلها
ساعات تصيح منها


جربت كل الطرق عشان تاكلها
مرات في المرجيحه اللي في الحديقة
ومره خذت لها عصافير وكانت تاكل وهي تلاعبهم قدام القفص
ومرات اتسوي نفسها طياره ويشلونها مثل الطيارة
واللقمة جاهزة وتفتح فمها وتاكلها

تحب تاكل من يده ابوها
وهو اكتشف طريقة انها ماتحب تاكل بالملعقة
تحب تاكل من اليد

حتى مرات نعطيها الصحن عشان تاكل بنفسها
تلعب أو تاخذ الأكل وتعطينا وتقوم (هم)

حتى لما يروحون برع تعطي الناس اللي ماتعرف اكلها
هالبنت مشكلة بس

تحب الأندومي وااايد
لانه ينشفط

تيي عندي الغرفة تبا حلاوه
وتعرف مكانه احاول انسيها مكانه ترد تقو وااواا

الله يستر اخاف ولدي يطلع مثلها

السلام عليكم ورحمة الله وبركاته

و هذا نفس مبدأي يا Ro0o0omy_M...

أهم شيء ياكل البيبي....ما بنصدق ياكل...بأي شكل...بس ما يكون فيها مبالغة...

و ترى الطفل بيتعود...يعني تعود يقعد على السفرة...خلاص ما بياكل إلا على السفرة...

تعود أحد يركض وراه...و الأكل يبرد بيد الأم...ما بيكال إلا بهذه الطريقة...

مشكلة فعلا...بس يا ريت ياكلوا بس...:(

RoOoOmy أشكرك على مشاركتك الرائعة وإفادتك لنا،، كرسي الأكل أفضل حل،، وماشاء الله أختك كانت لها الف طريقة وطريقة علشان تاكل،، ننتظر مشاركتك معانا لما تنجبين طفلك إن شاء الله...

مياسة العود،،، المثل يقول لا تعيبوا فتعابوا،، وآنه الحين آحاسب ما عيب على أي طفل علشان ولدي مايطلع مثلهم..

نور ينور قمر،، الله يتمم حملك على خير،، وتقولين لنا طريقتك في إطعام ولدك وعلى الله ما يطلع مثل بنت حماك.

مرموم،، الأطفال مشكلة مع الأكل،، عبودي لما بيسنن يبقى كم يوم مايشتهي الأكل،، ولما تلتهب بلاعيمه بعد ما يذوق الأكل،، الصبر مالنا الا الصبر...

وااااااااااااي آخر الواصلات انا.. :o







:( :( :(

انا ما اهتم بقعدة ولدي شلون وقت الاكل..

اهم شيء عندي انه يكون فيه شيء يلفت انتباهه عشان احط الاكل ببوزه وياكل وهو ما يدري بالدنيا...

اذا ينتبه لنفسه انه ياكل .. يطلع الاكل من بوزه ويرميه...

شسوي فيه .. ما يبي ياكل :(

انا اخلي بنتي معانا على السفرة واخلي لها الاكل في الطقم المفضل حقها اللي هو (تيلتبيز) بس اراقبها من غير ما تحس لانها لو انتبهت اني مهتمة فيها بتتدلع وما بتاكل اذا شفتها ما اكلت زين بعد ساعة او اكثر بشوي اسوي لها وجبة ثانية خفيفة تحبها وبعد اخليها تاكل بروحها بملعقتها واني اعطيها بملعقة ثانية لاني اذا اعتمدت على انها بتاكل بروحها مريلتها اللي بتشبع مو هي. ودمتم سالمين

جمانة،،، حياج الله حتى لو وصلتي متأخرة، بيتج ومكانج،، فعلا هاطفال عذاب مع الأكل،، أمس شريت له برغر سمك على حيوانات من منتجات (طاقة) أكل قطعتين منه وبعدين بدا يحطه بفمه ويرمي ويبي ياكل الجبس بس،، وبعد في النهاية قام يسوي نفس الحركة...

أكبر قلب،، والله طريقتك زينة أنك تخلينها بروحها،، بس حلو أن نكون معاهم علشان نحس بالأمومة..

بالنسبة لي لما كان عمر حمود 4-8 شهور كان ياكل على الكرسي بس بعدها ظل يدور اني ماتعبت روحي اقعد مكاني واقوله تبي تاكل تقعد مكانك والحين يقعد معانا على السفرة بس ينثر ويخرب ويقوم واحيانا وقت الوجبة اعطيه ام زوجي عشان اقدر اكل وبالنسبة للمطاعم يطفشني يقعد على الكرسي ويتحرك ويصيح الله يعين ماادري ايش بسوي اذا ولدت

أم حمود، ترى كلهم جذي، الله يكون بالعون.. أهم شي ياكلون في النهاية

السلام عليكم ورحمة الله وبركاته

اما عن بنتي ااكلها يا على حضني ولقمه ورا الثانيه طبعا تبتدي تفتف و تسكر بوزها ومرات احطيها في المشايه و تجلس واكلها و مرات انثر لها العيش و تلقط منه حبه حبه..اتمشي الحااااال
ومرااات تقهرني بس تبا الحليب....:mad2:
اما في المطاعم تجلس على الكرسي تلعب شوي و تمل و تبتدي تفر الملاعق و الشوك و تشوف خلق الله و تصرخ مب بكا بس جيه عاجبنها صوتها...:bigsmile:

بس قررت الآتي بشتري لها كرسي الاكل مع اني في البيت ناكل على الارض...بس في بيت اهلي بالكرسي...وغصبا عنها بعودها...

موضوع حلو ومهم

ولدي دخل الرابع بس بعدي ما بديت أأكله

لكني ماخذتله كرسي الأكل من الحين

وانشاء مايتعبني<<ماأعتقد أن غير عن الخلق

ومنكم نستفيد
شكرا