يالبحرينيات أبي مساعتكم

أفا ولا بحرينية :cry::cry::cry::cry::cry:

هلا أختي

الصراحة الجو هالايام زين
مو برد و لاحر

اما عن الاماكن الترفيهية اللي يسلمج ما عندنا وايد أماكن

عندج المجمعات اللي فيها اماكن لعب اطفال بس و عندج على الكورنيش في بعد العاب شوي
انا انصحج تروحين الدانة نوفوتيل منتجع حلو و راقي

اذا عندج اي استفسار ثاني انا حاضرة
كلشي ولا بنات الكويت

حبيبة قلبي أشكرج على الرد :up::up: وانا سمعت إن عندكم شاليهات أم الحصم أو غيرها من الشاليهات لأن ما ودي أقعد في فندق ودي أروح حق الشاليهات

اشلون أقدرأحجز إذا تقدرين تدزين لي أرقام تلفوناتهم على الخاص وتقولين طريقة الحجز أكون شاكرة لج يا حياتي..:dd::dd::dd:

السلام عليكم
حيا الله أهل الكويت في ديرتهم الثانية

بالنسبة للجو هالأيام متغير شوي وصاير بارد بس للأسف احنا نفسنا مو عارفين شنلبس للجو نخاف نلبس ثقيل ويصير حر وإلا نلبس خفيف ويصير بارد
يعني جيبي معاج ثياب زينة للجوين ..!!

بالنسبة للأماكن الترفيهية والأماكن المغلقة عندج ماجيك آيلاند في مجمع السيف (لكل الأعمار) وعالم فتون في مجمع البحرين (للأطفال الصغار)

والأماكن المفتوحة (منتجع البندر) في منطقة سترة وكورنيش الملك فيصل (مملكة الأطفال) والنادي البحري (الدولفين سافاري) والمارينا (آيلاند كروز) والحدائق العامة والمتنزهات في المنامة ومحمية العرين (حديقة حيوانات مفتوحة) في منطقة بلاج الجزائر

إذا تبين تستانسون صج روحو (جزر حوار) مكان يهبل والجو رهيب والبحر ما عليه كلام بس لازم تحجزين بالأول

والنوفوتيل في منتج الدانة للاقامة والاستجمام مكان روعة بطرش لج رقمهم ع الخاص إن شاء الله أو الشقق المفروشة في منطقة الجفير بعد حلوة وراقية وبأسعار مناسبة

وحياكم الله مرة ثانية
أي استفسار حاضرين .. للغاليين

مشكور يا الفرس وما تقصر وننحرم من أفضالك إن شاء الله ....:z_clap::z_clap::z_clap::z_clap:

الفرس ما قصر
كفا ووفا
والله يصلح مرشد سياحي
وانشا الله إجازة سعيدة

هلا خواتي
شكراً لكلامكم الحلو .. بس معلومة بسيطة
أنا بنت يا حلوات مو ولد

:think::think::think::think::think::dd::dd::dd::dd::dd::up::up::up::up::up:

السموحة يا الفرس

ما قصروا الاخوات

واكيد بتنبسطين في البحرين لانها روعة >>>>>>>> كل اسبوع انا هناك

ولو خواتي ما صار شي عادي ..
رومي من متى كل اسبوع انت ِ هني .. صدتش .. لا سؤال ولا هم يحزنون ..
زعلت

عفية أخواتي آخر طلب :think: احتمال اروح حق جزر حوار بس أبي أعرف فيها أماكن ترفيهية حق اليهال ولا لأ مثل العاب وغيرها عشان أحجز رسمي

بليز لا تنسوني .........:up::up::up:

مرحبا حبيبتي

جزر حوار بكبرها مكان ترفيهي
بحر وألعاب مائية وجيت سكي وركوب الدراجات والسيارات الرياضية وفيها نشاطات ترفيهية وايد والأكيد بتستانسون هناك كفاية الجو والمنظر اللي ما ينشاف بالمدن ولا في الحياة اليومية

وحياكم الله

مشكورة يا الفرس والله آنا من غيرج ما أدري شسوي :clap::clap::clap: بس ان شاء الله إذا الله كتب لنا السفرة اليوم :handup::handup:

لأن جوازات اليهال ماخلصت وإن شاء الله تخلص الحين عشان نمشي العصر بإذن الله..:dd::dd: وإذا رجعنا بالشلامة راح أقول لكم اشصار هناك

:up::up: ومشكورة يالغالية على ردودج ..........

ولو حبيبتي ما سويت شي
توصلون بالسلامة إن شاء الله

حيا الله منال الكويت بالبحرين..

بخصوص السكن، عندك اليت سويتس قريب من مجمع الدانة وباقي المجمعات، او الشقق الي بالجفير بعد راقية،، ممكن الدانة نوفوتيل المكان بعد حلو، منتجع البندر به شاليهات ومكاعم والعاب بس أكيد ماراح تستفيدون من برك السباحة لأن الجو بارد..

المجمعات، ينعدون على الأصابع، السيف ، العالي، الدانة، البحرين ، المارينا مول.. تبين أسواق عادية ورخيصة عندك سوق المحرق مشهور بالعبايات، سوق الرفاغ (الشرقي، وشارع البكوارة للجلابيات)

تبين مطاعم حلوة، كابتشينو في مجمع الدانة او فرعه الأصلي بقرية سار (داخل فيلا) وبنفس المنطقة في مجمع مطاعم داخل حديقة مو متذكرة الأسم بس بداخله مطعم أيطالي وتركي وستاربكس)،،، مطعم فولي بأم الحصم Chinese Food واو روعة... مطعم الزيتون الي بالنوفوتيل بوفيه الغده يوم الجمعة حلو وايد لكن بقية الأسبوع لك عليه... السفير ي فندق الشيراتون،،، للأطفال مطعم جسميز ودبعا له فروع كثيرة بالبحرين،،،

بخصوص حوار، مانصحك فيها على هالجو ، لأن برد وماراح تستفيدون من البحر أو البرك،، والجو غبرة شوي وغيم....

الجو بارد نوعا ما، أكيد مو نفس برد الكويت،، بس هاليومين جونا بارد وايد...

الفرس
رانيا البحرينية

مشكورين وما قصرتوا عن جد خجلتوني صج انكم عيال عمنا وان شاء الله لما أرجع أقول لكم اشسويت عندكم :dd::dd::dd:

بالسلامة وناطرين عودتج

تعالوا أقول لكم عن رحلتي في البحرين .........:clap::clap::clap:

بصراحة ماتوقعت البحرين جذي حلوة شعب وطبيعة مرة واحدة عليكم بالعافية الله يهنيكم في مملكتكم...ومنها للأعلى ان شاء الله:up::up::up:

بس للأسف اللي أخرنا وتعبنا زود حدود الخفجي 5 ساعات بالضبط عشان نطلع من الحدود وهي مجرد مرور بالسعودية لا أكثر الله يسامحهم

تأخير بدون معنى...:mad2::mad2::mad2::mad2::mad2:

خلونا من هالسوالف وخلوني أقول لكم وييييييييييييييييييييين رحنا من يوم الخميس إلى يوم الأحد الصبح ...........:bigsmile::bigsmile::bigsmile:

أول شي سكنا في فندق سفاري أخذنا شقة يدوب تكفي لي ولزوجي وعيالي وشغالتي وهذا الفندق في شارع المعارض أجارها لاباس عليه........

23/02/2006 يوم الخميس الصبح رحنا مجمع السيف لحد فترة الغدا وتغدينا والعصر طلعنا ورحنا مجمع العالي وتمشينا وشرينا حاجاتنا وطلعنا

على المغرب وتمشينا على البحر اللي يرد الروح ما شاء الله عليكم وبالليل رحنا حق رامز وتمشينا شوية وطلعنا

بالليل متأخر وأخذنا عشا حق اليهال من كنتاكي اللي في شارع المعارض وكان الشارع واقف من الزحمة من كثرة الناس

وأخذنا عشانا وتعشينا في الفندق.....:shy::shy:

24/02/2006 يوم الجمعة بعد صلاة الظهر رحنا حق مجمع البحرين وتمشينا فيه كان وايد راقي وحلو ودخلنا جيان واشترينا حاجياتنا منه والعصر

طلعنا ورحنا المارينا مول وبعد ما تمشينا فيه صعدنا فوق حق مطعم جنغل وتغدينا فيه كان خوووووووووش بوفيه

وبعد ما خلصنا غدانا رحنا حق سوق المحرق القديم وسوق المنامة القديم تدرون فرصة لا تعوض دام أبو العيال

فيه شدة على السياقة نروح من سوق لسوق الله يعطيه الصحة والعافية وبالليل أخذنا اليهال حق ألعاب مملكة الأطفال

دخلوا الألعاب وما رضو يطلعون إلا بعد الساعة 10 بالليل وما طلعت من المملكة إلا وانا متعرفة على بحرينية اسمها أم معاذ
عن جد

حبيبة ومافيها زود عنكم لأن كل أهالي البحرين حبايب وهذا كلام نابع من الصميم وليس مجاملة :up::up:

رجعنا البيت ما نتكلم من التعب تعشينا وخخخخخخخخخخخخخخخخخخخخخخخخخخخخخ


على الفراش على طول نوم متواصل للصبح ..............................(r)(r)

25/02/2006 يوم السبت كان يوم عيدنا الوطني للأسف ما شفنا شي ولا سمعنا شي غير راديو الكويت يتكلم عن العيد الوطني من كثر ما احنا مستانسين

وزعلانين في نفس الوقت لأن الديرة ما فيها احتفال عشان وفاة أميرنا الله يرحمه ويغمد روحه الجنة............

الظهر رحنا حق مجمع الدانة لين الغدا وتغدينا وطلعنا ورحنا حق مجمع الشيراتون كان بخاطري أشتري دراعة من المجمع بس بصراحة

كانت وايد غالية الدراعات هناك وللأسف ما في موديلات يديدة كلها موديلات عادية حتى دورت على السعفة وما لقيتها خبري فيها

كانت بهالمجمع احتمال غيرت مكانها ...:cry::cry: ماعليه الجايات أكثر من الرايحات .........:clap::clap:

عموما بعد ما طلعنا رحا حق دولفين سفاري وكانت الساعة تشير الى 6.5 المغرب والعرض يبدأ الساعة 8.15 بالليل وكنا مضطرين

نقعد نلعب اليهال حتى تصير الساعة 8.15 عشان يبدي العرض وما نقدر نطلع لأن الشوارع وايد زحمة غصب وصلنا مشوارنا بس ما

تحسفنا لأن العرض وايد حلو واللي عجبنا أكثر إن النادييسكر يوم السبت بس عشان العيد الوطني الكويتي وعيد التحرير فتح النادي عشان

خاطر الكويتيين ...:up::up: صج إنكم عسل يا أهل البحرين ...........

26/02/2006 يوم الأحد كان آخر يوم لنا في البحرين للأسف رحنا سوق المحرق واشترينا ماي لقاح وزموته وحلوى بحرينية ورجعنا الكويت مرة ثانية

بس والله العظيم رحلة ممتعة جدا ما كنت متصورة إن البحرين تغيرت 180 درجة بلمح البصر عسى الله يهنيكم في بلدكم ويخلي لكم

الملك حمد بن عيسى الله يطول في عمره وبإذن الله راح أرد البحرين في كل إجازة إن شاء الله العلي القدير ........:dd::dd:

وسامحوني على الطواله ..........

أختكم في الله منال الكويت........:salam::salam::salam: