انا معرفش حاجه خالص ساعدونى يابنات المنتدى ارجوكوا

في حاجات كثيرة في الماكياج

بس كبداية أول حاجة لازم تعرفي نوع بشرتك أيه يعني جافة ولا عادية ولا دهنية

وبعدين أول حاجة مهمة في الماكياج هي كريم الأساس والبودرة والماسكارا وأحمر الشفايف وأحمر الخدود



وبالنسبة للعطور أنت روحي المحل وشوفي اللي يناسبك وحبيتي ريحتة


ولو في أي سوال معين أنا حاضرة

متشكرة اوى اوى يا حنين الدوحه

انا معنديش سؤال معين بس انا كنت حبه اعرف كل حاجه يعنى مثلا لما تيجى تحطى مكياج لعنيكى بتبدأى بأيه وبعديه ايه
انا بشرتى عاديه وحبه اعرف واتعلم عشان مجيش فى ويوم وازنق

أول حاجة بتحطي كريم الأساس وبعدين خافي العيوب أو الكونسيلر وبعدين البودرة وبعدين الأي شدو أو ظل العين يكون لون أو أكثر من لون وبعدين الكحل والماسكارا

وبعدين الروج وأحمر الخدود أخر شي

وفي المنتدى في مواضيع كثيييرة عن طريقة عمل الماكياج وماكياج العين بس أنت دوري وحتشوفي مواضيع كثيرة ممكن تستفيدي منها أكثر وشكرا

متشكره يا عسل انتى مالك زهقتى منى ولا ايه

عزيزتي احنا نود نساعدج بس الموووواضيع وايدة وطويلة والمنتدي مليااااااان مواضيع مفيدة ولازم تقرينها علشان تستفيدين

والعطور النسائية الحلوووووووة : اليين و جفنشي الوردي ولانكوم المدووووور وبولغري الابيض بتلقينة مثل دائرتين في بعض.
والعطور الرجالية الحلوووووووة : شانيل سبورت وجفنشي العنابي وبيربريز الاسود وكريد الابيض وبلاك ارماني وشيك من كارولينا هريرا .

وشكرررررررررن.

maha mohd
شكراا ليكى اوى اوى

بصى موضوع المكياج مش ممكن هتتعلميه فى يوم وليله هو عايز شويه صبر على شويه معرفه وطول ما انتى قاعده فى البيت حاولى تجربى بس نصيحتى ليكى المكياج الخفيف احسن ومش طول اليوم لازم البشرة تتنفس وانا حقيقى متجوزة ومش طول اليوم بالمكياج بكرة ان شاء الله تتجوزى وتجيبى عيال ومش هتلاقى وقت لنفسك وخدى الحكايه ببساطه وزى ما الاخت قالتلك هاتى كريم اساس على حسب نوع بشرتك وكونسيلر افتح درجه او 2 وبعدين حطى البودرة واحمر الخدود وقبل ما تحطى اى شادو حطى تحت عينيك بودره بيضا عشان ميقعش منك حاجه تحت عينيكى وانتى بترسمى عينيكى ومبدائيا استخدمى لون واحد لغايه ما تتعلمى على الرسمات الجديده وبعدين الحكل والماسكرا وبعدين حددى شفايفك بقلم التحديد وبعدين الروج اما بالنسبه للبرفانات كل انسان ليه ذوق انا فيه برفانات كتيرة بتعجبنى مش بقدر احطها لانها بتصدع جوزى يعنى كل راجل غير التانى ان شاء الله لما تتخطبى هتعرفى ذوقه بنفسك واى سؤال انا جاهزة

توتى وشيكو يارب يخليكى يارب على الكلام الجميل ده اصل انا كنت عايزه اثقف نفسى فى الحاجات دى عشان ان شاء الله كده وربنا يسهلها لما اتخطب او اتجوز ما ابأش اعده تحت ايد الكوافيره مش عارفه هى عماله تعملى ايه وتحطلى ايه
لازم اقول رأى وعشان كده لازم يبقى عندى خبرة
وانا مش مستعجله

ان شاء الله بكره تتعلمى وانا عن نفسى مش خبيره بس بعرف امشى حالى عازياكى تقعدى قدام التليفزيون تتفرجى على امينه شلبايه على دريم وفى على دبى برضه برنامج كل القنوات تقريبا بتجيب وبصى هاتى مجله لها بتنزل عندك فى مصر مليانه حاجات عن الشعر والمكياج والبرفانات والاكسسوار مجله ملغمة ان شاء الله هتعجبك وهتلاقى فيها رد على اى استفسار وعايزاكى متتوتريش والله بكرة تتعلمى وتبقى خبيرة وتعلمى ناس تانيه وبرضه اى سؤال انا تحت امرك

أنا اشوف ان احلى العطورات عن تجربة
عطر jadore من ديور
عطر women من فرساتجي
عطر coco mademoiselleمن ماركة شانيل
عطر chanceمن شانيل
عطر Happyمن ماركة كلينك
وعن المكياج المنتدى في الكثير من المواضيع المفيدة وعن تجربة العضوات

وشكرا

السلام عليكم و رحمة الله و بركاته

هبة النيل

اخبارك ايه يا بلدياتي؟؟ شوفي يا ستي، موضوع الميك اب ده انا كمان كنت زيك فيه و نفس ظروفك لاني مليش اخوات بنات و مكنتش مهتمة بالموضوع ده اوي، بس بدأت اتعلم من صديقاتي اللي حواليا و بدأت اشتري و اجرب، الاول جربت من افون و بعدين من اوريفليم و من اماندا و تشاو، و بعدين بدأت اجرب من ماركات زي بوبا و ريميل و بورجوا و بصراحة المنتدى هنا و الركن ده بالتحديد مليان موضوعات تعملك الكتير و تعرفك الكتير. انا اتعلمت منه حاجات كتير عن الاساس و الكونسيلر و غيرهم و كمان ركن العناية بالبشرة و الجسم و ركن الشعر، الاركان دي بالاضافة لركن العروس بجد مليانين خبرات هايلة. حاولي تتصفحي الموضوعات دي و تتعملي منها و تطبقي و بالتعود و التجربة حتعرفي تنفذي ان شاء الله

قوليلي بس انتي منين في مصر عشان اقولك المحلات اللي ممكن تساعدك و قولي لي ذوقك ايه في العطور عشان اقدر احطلك اسماء عطور و تجربيها

و اي استفسار احنا كلنا اخواتك

amaladelانتى عسل اوى وكلامك الجميل ده ريحنى شويه من القلق اللى انا كنت فيه:up:
اصل اليومين دول البنت اللى ما تعرفش حاجه فى المكياج الناس بتقول عليها سوررى يعنى هبله حتى لو كانت مابتحطش مكياج:sad:
بالنسبه ليه انا للاسف مش من مصر نفسها انا من بلد جمبيها الزقازيق لو تعرفيها (r)
وبالنسبه للعطور انا بحب اوى العطور الهاديه مش اللى ريحتها جامده اوى عشان لما تحطيها وانتى خارجه ما تبقاش شاذه
وبعدين العطور الهاديه بتدى احساس بالانوثه وشكرا ياعسل :yes:
وعلى فكره انا عليه قيود فى البيت اصل اخواتى كلهم صبيان وانتى عارفه الصبيان وتريقتهم مبعرفش اعمل حاجه خالص:cry::mad2:
فقولت اتعلم من المنتدى ومنكو وبعدين لما اجوز يحلها الف حلال :clap::shy::shy:

السلام عليكم و رحمة الله و بركاته

اهلا يا هبة، انتي اللي عسولة والله و دمك خفيف. شوفي يا بنتي، انا زيك برضه بنت وحيدة على 3 اولاد، مش قضية، المهم ان انتي تكوني بتحبي تتعرفي على الجديد و تتعلمي. انا شخصيا كنت باجيب لها و زهرة الخليج و سيدتي احيانا قبل ما اتعرف على عروس و عالم المنتديات، و كنت باحب اقرا الموضوعات عن الماكياج و العطور جدا لان انا باحب الحاجات دي اوي حتى و لو كنت مش مسرفة في وضع الماكياج. و فعلا اتعلمت من خبرة البنات و تطبيقاتهم المصورة كتير. و انتي على فكرة ذوقك في العطور زيي لاني برضه باحب الحاجات الهادية الناعمة. و على فكرة انا من طنطا :) و طبعا عارفة الزقازيق. شوفي انا حاقسم لك عالم الميك اب ل 3 مستويات من ناحية الاسعار: المستوى الاول يشمل المنتجات المصرية زي لونا و سارا و تشاو و اماندا و سيبيل و دول اسعارهم معقولة و ان كانت سارا و لونا اغلى من اماندا و تشاو و سيبيل بس برضه اسعار في حدود المعقول. المستوى التاني بورجوا و ريميل و اركانسيل و بوبا و دول اسعارهم وسط يعني في حدود 100 و شوية يعني يا اقل من 100 يا اكتر من 100 حسب المنتج لو اساس او بودرة للوجه بيبقى فوق 100 و لو شادو او بلاشر اقل و هكذا يعني. عن نفسي باحب بوبا جدا و منتجاتها بتعجبني، و على فكرة نزل منتجات من نيفيا ممكن برضه نحطها في المستوى ده. المستوى التالت بقى ده يشمل الماركات العالمية الغالية المتوافرة في مصر زي جيفنشي و كلارينس و اورلان و لانكستر و بعض منتجات من ماركات زي جيرلان و ديور بس دول تلاقيهم حاجة و الا اتنين و مش متوافرة اوي. دول اسعارهم مرتفعة و بتتكلمي في 250 و انتي طالعة، بس زي ما بيقولوا الغالي تمنه فيه. منتجات المستوى الاول اكيد حتلاقيها متوفرة عندك في الزقازيق في محلات الميك اب، منتجات المستوى التاني احتمال تلاقي من بورجوا و بوبا بالتحديد لانهم بدأوا ينتشروا في المحافظات، اما المستوى التالت فلازم تنزلي القاهرة او اسكندرية. في القاهرة حتلاقي محلات فورتشن في مول اركاديا و صيدلية العزبي في نفس المول و توكيل بورجوا في نفس المول برضه، فيه محلات فيسز و مزايا في المهندسين، و فيه محل سيفورا توا في شارع جامعة الدول العربية في المهندسين، و فروع صيدليات العزبي و سيف في اكتر من مكان، و محل مرجانة في ملحق رمسيس هلتون و فرعه التاني امام اليمامة سنتر بالزمالك شارع طه حسين، و كمان محلات ام ام في الزمالك و وسط البلد و اكيد فيه لها فروع في مناطق تانية. اسكندرية معرفش غير كارفور و ده فيه محل مزايا و حتلاقي فيه حاجات حلوة اوي و ماركات عالمية كتير، و فيه محل كرابتري اند ايفلين و ده بيبيع حاجات شبيهة بالبودي شوب الموجود بالخليج و اسعاره غالية حبتين تلاتة.

كده خلصنا من الماكياج، ندخل في العطور، حاقسمها لك مستويين: المستوى الاول: عطور من الشركات اللي لها مندوبين زي ماي واي و افون و اورفليم، بس افون ناس كتير قاطعتها لانها يهودية، يبقى ادامنا ماي واي و اوريفليم، ماي واي انا مجربتهاش، لكن اوريفليم حابقى اكتبلك العطور الهادية الرقيقة اللي فيها و اكيد عندك في الزقازيق حد بيتعامل معاها و تقدري تشتري منه من البروموشن. المستوى التاني نفس محلات القاهرة و اسكندرية اللي قلت عنها في الميك اب عندها عطور من ماركات عالمية و الاسعار هنا بتتراوح بين 200 لفووووووووووووووق، يعني فيه ب 200 و 250 و 300 و درجات و انتي طالعة، طبعا انتي بتجيبي الحاجة اللي تعجبك و بالسعر اللي يريحك كمان. عطور اوريفليم تتراوح بين حاجة و ستين ل 100 و شوية، بس لما البروموشن بينزل تخفضيات حلوة و معقولة.

دلوقت بقى نحدد احتياجاتك انتي من الميك اب و العطور و الكريمات، و خلي بالك انا باتكلم عنك كبنوتة امورة بصرف النظر عن مخطوبة او متجوزة و لسه، لان البنت لازم تهتم بنفسها لنفسها مش لغيرها و بس، صح الكلام؟؟ انتي محتاجة من الميك اب المتكامل: كريم اساس خفيف، بودرة سايبة او مضغوطة (و ممكن نستغنى عنها بكريم الاساس اللي له ملمس بودري)، بلاشر، ايشادو، ماسكرا، كحل اسود و اقلام كحل ملونة حسب رغبتك و ايلاينر سواء بريشة او بسن حسب رغبتك و قدرتك على التعامل معاه، روج و تحديد (احيانا ملوش لازمة) و جلوس. ده الماكياج المتكامل بالنسبة لك بس مش باقولك هاتيه كله بس المفروض لو حتعملي ميك اب مظبوط تبقى عندك الحاجات دي، طبعا لما تحددي لي انتي عاوزة من اي مستوى من اللي فوق دول ابقى اقولك اسامي ماركاتها. بالنسبة للعطور: اختاري برضه من المستويين و انا اقولك اسماء عطور تشميها الاول بنفسك و تحكمي اذا كانت على ذوقك و الا لا و بعدين تشتريها.

اما العناية بالبشرة و الجسم، فانتي لازمك حاجات لوجهك و حاجات لجسمك. للوجه محتاجين: رغوة منظفة (بدلا من الصابون بينشف البشرة و الكيماويات اللي فيه بتبقى شديدة على بشرة الوجه) و الرغوة دي عندك في جونسون و كلير اند كلين من جونسون و نيفيا فيزاج، محتاجة كمان تونيك للوجه و ده سائل ملطف و في نفس الوقت بيقفل مسام الوجه و يضيقها لو واسعة و بتستخدميه بقطنة و تمسحيه على وجهك و ده عندك من نيفيا فيزاج حلو اوي و على حسب نوع بشرتك حساسة و الا متباينة و الا ايه و ممكن ببساطة تستخدمي ماء الورد يا اما اليمامة من السوبر ماركت او اللي بيتباع عند العطار او ايفا او الشبراويشي و دي عبوات بتتباع في الصيدلية، محتاجة كمان كريم للعين عشان البشرة الحساسة اللي تحت العين و حولها و ده احسن حاجة جربتها و سعره معقول من اوريفليم و عندك من نفيا برضه و في ماركات كتير، محتاجة كريم ترطيب للنهار و كريم لليل و دي بتلاقيها في اوريفليم و نيفيا و فيه ماركات غالية زي لوريال و كلارينس و يولاي و غيرها، و طبعا الكريم اللي حتدهني بيه وشك حتدهني بيه رقبتك لان بشرة الرقبة محتاجة نفس العناية، محتاجة كمان سكراب للوجه و ده بيشيل الجلد الميت و بيجدد طبقات الجلد بلطف و عندك فيه في جونسون و نيفيا و كل الماركات بس احسن واحد استخدمته بالمشمش من St. Ives و ده تلاقيه في الصيدليات و محلات العناية بالبشرة، محتاجة اخير ماسكات و دي عندك منها منظف و مرطب و تلاقيها في كل الماركات برضه و حتلاقي منها في اوريفليم حاجات متنوعة و في St. Ives و كل الماركات و تلاقيهم في الصيدليات الكبيرة. دي تقريبا كل الحاجات اللي محتاجاها لوجهك، و متنسيش الشفايف محتاجة تقشير خفيف و ده ممكن يتعمل بسكر سنترفيش و زيت زيتون و بفرشاة اسنان ناعمة تبدأي تعملي سنفرة على خفيف للشفايف عشان برضه تجديد الجلد و ازالة الجلد الميت.

للجسم بقى بعد الحمام سواء بالصابونة او الشاور جل، محتاجة كمان سكراب للجسم و ده موجود عندك في ماركة اوريفليم و في ماركة فروتيني و دي متوافرة في الصيدليات الكبيرة او بعض المحلات في القاهرة و اسكندرية و لو بتنزلي طنطا في هناك، مش عارفة عندك في الزقازيق فين بس اسألي عليها، بعد السكراب محتاجة اما لوشن خفيف للجسم و ده بينعم و بيدي ريحة حلوة او كريم للجسم او بودي بوتر و ده برضه كريم بس بيبقى اثره اتقل من اللوشن و بيرطب و ينعم برضه و يدي ريحة حلوة و ده برضه فيه مجموعات في اوريفليم و في فروتيني و في ماركات تانية كتير منها St. Ives و Body Fantasies . و طبعا بعد الحمام الحلو ده عندك سبريهات الجسم سواء لو سبراي تبع مجموعة عطر معين او سبراي بريحة الفاكهة او مرتبط بمجموعة لوشن و كريم و شاور و دول برضه بروايح متعددة. و بعدين بقى ترشي العطر اللي بتحبيه و لو عاوزة ريحته تثبت اكتر و مش عندك كريم العطر ده، خدي اي كريم مرطب بتحطيه لجسمك و تكون ريحته خفيفة مش نفاذة و حطي شوية في كفك و رشي عليه من عطرك و امسحي اديكي الاتنين في بعض و بعدين ادهني جسمك، حتلاقي الريحة ثبتت اكتر و انتشرت بصورة احلى لانها على سطح الجسم كله مش مركزة في منطقة محددة.

اما القدمين، و دول كمان محتاجين عناية، فممكن تنقعيهم في ماء دافئ لمدة ربع ساعة و بعدين تستخدمي لهم كريم سنفرة خاص تشتريه من الصيدلية برضه او كريم السنفرة الخاص بالجسم و بعدين تقشريهم بالمبرد عادي و بعدين تدهنيهم فازلين او اي كريم جسم عندك بس بوفرة و بعدين تلبسي عليهم اكياس بلاستيك و بعدين شراب لترطيبهم بصورة مركزة. الايدي لها كريم مخصوص برضه و احيانا بيبقى فيه كريم خاص بالايدي و الاظافر و باستمرار حاولي ترجعي الجلد اللي على الاظافر اللي بيخفي الاهلة لورا بشويش بعد ما ترطبي ايديكي كويس.

معلش الموضوع فتح و وسع و دخلت من الماكياج و العطور على الجسم و البشرة بس انا باحس ان الموضوع مترابط و متشابك بشكل ما و صعب فصله. دلوقتي بقى شوفي انتي عاوزة ايه من الحاجات اللي اتكملنا عليها دي عشان اقترح عليكي اسماء منتجات لو تحبي

و أتمنى أكون أفدتك، و على فكرة انا حاجات كتير من اللي قلتها لك دي اتعلمتها من بنات عروس و حاجات تانية انا عرفتها من الدعبسة و البحث :)

تحياتي العطرة

السلام عليكم



هلا اختي العزيزه


كلنا ما كنا نعرف نحط مكياج بس مع التدريب والممارسه راح تصيري خبيرة بوضع المكياج ...


*·~-.¸¸,.-~* دروس في وضع المكياج*·~-.¸¸,.-~*


موسوعه شامله في الميك اب


خبيرة التجميل تقول لكم اطلبوا اللي تبونه وهي حاضرة ... للاستشارة


تعــــــالي معي وشوفي كيف صرت حريفـــــــــه وضع مكياج


خبيرة تجميل....... في خدمتكم


طريقتــي في وضع الآي شدو ،، خطوة بخطــوة


جاتكم شواريا بالدروس الحلوة...




وحياك الله


جويل

مرحبا
كيفك هبة
ماتقلقيش كلنا بدانا باول خطوة وانت ي هلا بتبديها عادي وبكى تكوني محترفة
انا اول شي اتاكدت ان اموولة هي اللي هاتجيبلك من الاخر وتفيدك بالاشياء اللي موجودة بمصر..
انا قبل هيك حطيت افادتي في موضوع الكريمات والميك اب في اسكندرية ...
عموما انتي حددي شو بدك عشان نبدا معك وحسب ميزانيتك وشفتي كيف اموولة صنفتلك كل امور التجميل من المحلي للماركات المعقولة والغالية ....
انتي احكي شو ميزانيتك او شو بدك وانا كمان رح احاول اساعدك ان شاء الله...

الخوات كفوا ووفوا جزاهم الله خير ,

وألف شكر للأخت أمل لمساعدتها ,, يعطيها العافية يا رب :) ,

أختي أتمنى تستفيدين من الردود والخيارات المطروحة ,

وأي سؤال لا تترددين أبد في طرح :) ,

وموفقة إن شاء الله ,

amaladel بجد بجد انا مش عارفه اقولك ايه على الكلام الجميل ده ربنا يخليكى يارب يابنتى من الحاجات الحلوه دى ناقصنى بس
انى اروح اى محل واتعرف عليهم واشوف اشكالهم ايه وكده ابقى خبيره ده انتى يابنتى ادتينى الخلاصه كلها واستفدت منها جامد
ده كده ما يبقاش فاضل الا مشكله واحده وهى انى امرن ايدى بس ياستى ماما وبابا رافضين الموضوع ده مش عارفه ليه
فى الخروج ماشى انما فى البيت كمان بقولهم طيب اجيب فى البيت واجرب براحتى برضه لأ رغم ان هما طيبين وحنينين لكن
مش عارفه هما مش موافقين ليه يعودوو يقولولى انت حلوه من غير مكياج والحمد لله انا مش مغروره ولا حاجه بس هى دى فعلا
الحقيقه بس مفهاش حاجه لما اجرب يعنى فقولت خلاص اكتسب خبره من هنا وخلاص وعلى فكره انا بتعلم من هنا برضه ازاى احط
بالنسبه للمكياج المستوى الاول لانى مش هاوصل للباقى وبالنسبه للعطور قولى كل اسامى العطور الهاديه الحلوه وانا هبقى اختار
وعلى فكره انا بستعمل دلوقتى برفان اسمه elle فى منه كمان مزيل عرق ده موجود من زمان بس صراحه روعه عجبنى قوى
واحده صاحبتى جبتهولى هديه وشكراا ليكى ياقمرررررررررر :clap::up::clap::clap::clap::up:

:clap::clap:عزيزتى جويل مرسييييييييييى ليكى كتير قوى على اللينكات الجميله اللى انتى بعتيها لى وبجد استفدت منها
مرسى اوى اوى لكل الامورات والعسولات اللى ردوا عليه
(r):yes::bigsmile::flower::flower::clap::clap::clap::clap::clap:

اهلا بيكي يا هبة و صباحك فل

يا ستي العفو انا معملتش حاجة غير اني نقلت لك كل اللي اتعلمته و طبقته في الفترة اللي فاتت و جربته بنفسي بعد ما شفت خبرات البنات. شوفي انا مش باقولك اعملي ميك اب و اخرجي بيه او اقعدي بيه في البيت مع باباكي و مامتك لان همه اكيد الاهل مش بيستوعبوا فكرة ان بنتهم حاطة ماكياج في البيت و بيستغربوها، فيه بعض الاهالي كده. بس انتي ممكن تجربي في البيت، عندك اوضتك لما تكوني لوحدك طلعي ماكياجك و ابدأي اتعلمي و طبقي و امسحي و عيدي من تاني و لما تخلصي تطبيق خلاص امسحيه و اغسلي وشك و خلصنا، صح؟؟

شوفي احنا بالنسبة للماكيج حنختار في الاساس حاجة من المستوى التاني حفاظا على بشرتك طالما مش متعودة على الماكياج و مش محتاجة زحمة كتير يبقى ممكن نجيب اساس Pupa Smart Skin هو ب 125 جنيه بس حيغنيكي عن انك تجيبي بودرة وجه كمان، يبقى بدل ما ندفع مثلا 80 جنيه في اساس و بودرة وجه من ماركة اقل، احنا ممكن نجيب الاساس ده لان ملمسه بودري و مش بيحتاج بودرة فوقه. لكن اذا مش عاوزة ده ممكن تستخدمي من اماندا هو في حدود 35 جنيه بس انا باعتبره تقيل اوي في الاستخدام و بافضل بوبا لانه خفيف و طبيعي في نفس الوقت، شوفي اللي يعجبك ايه و هاتيه. بودرة الوجه لو مش حتجيبي اساس بوبا يبقى هاتيها من لونا و هي تقريبا ب حاجة و تلاتين او اربعين مش فاكرة اوي. لو عندك هالات تحت عنيكي صحيح او محتاجة كونسيلر عندك كونسيلر سيبيل بييجي في شكل صباع زي الروج حلو اوي و تغطيته جميلة و ممكن تحطيه كمان تحت الروج لتثبيته فترة اطول. البلاشر هاتي من سيبيل لان الوانه حلوة و سعره حوالي 22 جنيه مش غالي اوي و عندك كمان بلاشر لونا و سارا حلوين بس ناسية سعرهم بس في حدود العشرينات او التلاتينات. الماسكرا هاتي من اماندا جميلة اوي عن تجربة و انا جربت الماسكرا الزرقاء من ساندي و برضه عجبتني بس مش فاكرة الاسعار برضه معلش سامحيني. الشادو عندك فيه العلب الصغيرة اللي فيها حوالي 36 لون باين او اقل مش فاكرة ي بتبقى رخصية و فيها الوان كتير انتي شوفي الدرجات اللي تعجبك و هاتي العلبة بتاعتها و اتعلمي منها. الكحل عندك انواع كتير و الوان كتير و هاتي اللي تحبيه برضه. تحديد الروج احسن حاجة جربتها ريميل و مش غالي ب 24 او 28 جنيه تقريبا. الروج عندك اماندا شاين حلو اوي و تشاو كمان تحفة. اما الجلوس فلونا منزلة منه كتير و كمان روج سايل على شكل قلم تحفة ب 11 جنيه تقريبا و الوانه روعة و بيثبت انا جبت منه و حلو عن تجربة و ممكن تتقلي فيه و تخففي براحتك بوضع طبقة روج تحته بدرجة خفيفة او اتقل. تقريبا كده قلنا كل حاجة، صح؟؟ لو انا نسيت حاجة فكريني عشان الزهايمر بس :)

اولا برفيوم elle روعة، انا قلتلك انتي ذوقك زيي :) انا كنت مدمناه و انا صغيرة و السبراي بتاعه، ياااه فكرتيني بزمان و الله كنت ناسياه خاص. طيب عندك بقى البرفانات اللي على شاكلته في نفس الهدوء و الريحة الزهرية:

Divine from Oriflame
Elvie from Oriflame
Dream Life from Avon
Silences from Jacomo ده تلاقيه في محلات العطور و هو قديم مش جديد بس نفس الرتم اللي بتحبيه
Jolie ده حتلاقيه في محلات العطور و بالاخص عند مرجانة لو نزلتي القاهرة
Fleurs d'Orlane في محلات العطور و مرجانة و كمان الصدليات الكبيرة
Ja'adore ده من ديور و يمكن هو اغلاهم في حدود 250 جنيه الاو دي تواليت و 350 الاو دي بارفان تقريبا انا مش فاكرة بالظبط و حتلاقيه في كل محلات العطور اللي قلتلك عليها

فيه حاجات تانية كتير اوي، بس انا حطيت لك الكوليكشن دي و لو عاوزة تاني قولي. اسعار افون اقل من اوريفليم شوية، بس تتراوح بين 45 و 85 في الاتنين، اوكي يا جميلة؟؟


سكرة هانم و مجد، جزاكم الله خيرا، انا معملتش حاجة خالص، و كفاية اني اتعلمت منكم حاجات كتيرة و احنا كلنا بنفيد بعض باللي اتعلمناه :)