الزواج عن حب و عرفناه .. لكن الزواج عن عطف ؟

بسم الله الرحمن الرحيم
السلام عليكم ورحمة الله وبركاته

هالوضع دايماً أمر فيه و مو عارفه شلون أتحكم بنفسي و أسيطر على قلبي و أتخلص من هالمشكلة

حطي نفسج مكاني و انتي بتعرفين قصدي

تقدم لج شخص و صارحج بمشاكله مع أهله و انه قاطع رحم بسبب أزمة عائلية كبيره و قعد يشكيلج همومه و شلون يحس بتأنيب الضمير و الوحده و العجز و انه مرات ما ينام الليل بسبة الهم اللي شايله على قلبه و وده بإنسانه توقف معاه و تسانده .. مع الوقت اكتشفتي انه عصبي و لسانه فالت و يقول كلام ما ينقال و يشوف نفسه الصح دايما و نادر ما يعتذر او حتى يبرر تصرفه و احتمال يكون هو سبب الأزمة العائلية لكنه بنفس الوقت كاسر خاطرج و ودج تساعدينه و توقفين بجنبه و اتقولين يمكن يغلط علي بالمستقبل و يصرخ بويهي و يسبني بعد بس هذي طبيعته و يمكن عشان ظروفه الصعبه صار جذي لكنه من داخله طيب و رقيق .. ميخالف أتحمل عشان أسعده و أخفف عنه و راح أكون السبب بعودة المياه لمجاريها مع أهله .. طيب انتي مو ملزومة فيه ولا ولية أمره و اهو ريال عنده عقل يفكر فيه .. هل توافقين على الزواج منه فقط بدافع العطف ؟

يتقدملج إنسان غير ملتزم .. يصلي لكن مو بالوقت و بطبيعة الحال صلاته بالمنزل .. يدور بنت الحلال الطيبة الملتزمة اللي تسعده و تترس حياته لكنه على الرغم من حرصه على الفتاة الخلوقة المؤدبة الملتزمة الا انه ما يهتم فيها من هالناحية .. يبيها مؤدبة عشان ما تزعجه .. يبيها ملتزمة عشان يضمن ما عندها علاقات سابقه .. هو كان عنده علاقات لكنها فشلت و الحين يبي الاستقرار و راحة البال و القلب الحنون اللي يحتويه و الحضن الدافيء اللي يضمه و البنت اللي يقدر يفتحلها قلبه .. شخص مثل ما قلت غير ملتزم و مسألة العادات و التقاليد عنده كلام فاضي و الحرية الشخصية تغلب على تصرفاته .. محد له دخل يقوله روح صل بالمسجد لأن هذا شي بينه و بين ربه .. يكلم بنات لكن قصده انه يلاقي البنت اللي تفهمه مو قاعد يلعب يعني .. الحين انتي مطلوب منج اتحددين انتي موافقه عليه كزوج ولا لأ ؟ المشكلة انه كاسر خاطرج و اتقولين يبي وحده تحس فيه لأن اكيد قلبه انكسر أكثر من مره و انا أقدر اخليه يحبني و باستطاعتي أوفر له السكن المريح و العش الهادي .. أقدر اخليه يلتزم دينياً و أخلاقياً .. أقدر اخليه يصلي بالمسجد .. صحيح ان طبعه صعب بس انا عندي أمل انه يتغير .. ليش ما أساعده ؟

العطف صفة حلوة لكنها خطيرة اذا ارتبطت بقرار مصيري مثل الزواج .. هالمشكلة مريت فيها و ما زلت أمر فيها لما أسمع عن أي شخص يتقدملي

أحس اني المرأة الخارقه و دايما بصلح الكون و ليش ما أضحي عشان أسعد شخص آخر ؟ الشخص الآخر ما يبي ينصلح أساساً و انا مو ملزومة فيه و لا حتى عندي مشاعر ناحيته .. أوكي شاللي جابرج على المر ؟ كل هذا بدافع العطف

الحمدلله لو ما فضل ربي أولاً ثم فضل أهلي جان انا الحين ضحية لواحد من هالأشخاص و غيرهم الكثير .. دايما أصلي استخاره و أقولهم خلاص انا موافقه !!
انتي موافقه على شنو ؟ فكرتي عدل ؟ مو شايفه كل هالسلبيات ؟ ليش تبيعين نفسج برخيص ؟ انتي تستاهلين شخص أفضل

انا عارفة اني استاهل شخص أفضل .. هذا مو غرور لكن انا الحمدلله ما فيني شي يخليني اقط روحي على أي واحد

لكن

العطف اللي مو بمحله و الثقة الزايدة اللي تحسسني اني بغير العالم راح يودوني بداهيه

يا جماعة الخير انصحوني .. اخذوا راحتكم بالكلام انا أصلاً محتاجة كلام قوي يصحيني