في السيارة !!

السلام عليكم

انا والله اعاني من هالمشكله علشان جي إذا كان الدرب وايد طويل مافي حل غير اني ايلس ورا :down::pain:
وان شاء الله حد يقدر يفيدنا من البنات

يلا في انتظار ردودكم وحلولكم الحلوة :yes:


اختج

دلع :shy:

عوديه بالتدريج وخليه بيصيح مره مرتين لكن بيتعلم وبيتعوود كلش لاتعودينه على حضنج عشان مصلحته وحتى لو تحاولين تقعدين معاه ورا وبيتعلم ان شا الله ..

عندي لكم كلكم حل...


في الحين تلفزيونات تنحط ورا الكرسي القدامي ....


حطي له واحد وبتشوفينه شلون بيقعد ورا عشان يتابع الرسوم المتحركه ..وخاصه اذا شي يحبه ......:)



دعواتكم يجيني ولد او بنت :) المهم الذريه الصالحه

انا اعاني نفس المشكله مع ولدي وحطيته مرات كثيره ورا بس مايسكت يجلس يصيح طول الوقت الين اخذه(مستعد يظل يصيح ساعه كامله بس مايتنازل:sad::sad:)والمشكله الاكبر اني من احطه ورا يستحج انه يبغى يشرب رضعته وحتى لو نام وقمت ارجعه على كرسيه ورا يجلس من النوم ويصيح. اما عن سالفة التلفزيون فولدي مو من الاطفال اللي تجذبه افلام الكرتون واجد صحيح يشاهد بس يستمل بسرعه.
مشكوره ماما حسون عالموضوع الحلو
والله يرزقك يامجنونة قطر الذريه الصالحة ياااارب

انا رايي من راي نونوو قطر لان اختي اتبعت هالطريقة خليه يصيح لين يعرف ان مافي فايده ..

الا بسألكم من اي عمر احط بنتي في الكرسي؟؟؟؟؟؟؟؟؟؟؟؟؟؟:think:

لازم تحطون الأطفال في كرسي السيارة انا بنتي من عمر 8 شهور بديت احطها في كرسي السيارة والحين عمها سنتين ونص واول شيء بيصيح عادي بس بعدين


بيتعود بالنسبة لكراسي السيارة في من عمر الولادة وطبعا تكون صغيرة وتكون مثل السلة يعني راقدة وطبعا تختلف اشكالها واحجامها حسب عمر الياهل وهي شيء


ضروري وتحمي وتخفف الأضرار في حال صار حادث لا قدر الله

انا بنتي جذيه بعد، فاذا الدرب طويل وخفت انها تزعج ابوها ، اجلس معاها ورا، اما اذا الدرب قصير اخليها عندي قدام، وطبعا ما اسوق وانا وهي لحالنا، مرة سويتها اصرت الا تبغاني ارضعها وانا امشي، ما وصلت الا طالعة روحي من الخوف

خالتي عانت من مشكلتج مع عيالها ..

بدت معاهم لما كانوا بيبيات تقعد معاهم ورا ،، والحين تضطر تقعد معاهم ورا مع ان وحده على كرسي الاطفال والثاني عادي جنبها ..

وزوجها يسوق قدام ومافي امل تقعد جنبه ،، و طبعاً لأنهم تعلموا على جذي وهي وقفت سواقه ..

بس تخيلي لما يطلعون معاي يسمعون الكلام ..

الشده احياناً تنفع

يعني ولدج اذا ما عودتيه من الحين خلاص ما راح يتعلم بعدين..

انا كنت اقول لولد خالتي اقعد ورا واربط له الحزام وما يرضى ويصيح و يعصب

اقول له اوكي انزل بس مافي طلعه معاي

وفعلاً انفذ تهديدي

و انزله البيت وينحرم من الطلعه

وشوي شوي صار يفهم ويسمع الكلام ويدري ان دلعه ما منه فايده

واخته لما تشوفه يسمع الكلام تقلده

اول كم مره كان يمللني بالطريق بس بعدها تعلم..

اعتقد ولدج ممكن توصلين له المعلومه انه مو بكيفه راح يقعد ..

بس لازم تقوين قلبج شوي ،، ولا تغيرين كلامج مهما سوا ..

تجربتي الشخصية مع أبني،، بديت أحطه بكرسي الأطفال من عمره 3 شهور لأني رجعت للدوام وكنت آخذه كل صباح على بيت أهلي ووقتها ماعندي شغالة المهم الولد تعلم آن هذا مكانه وقبل لا يكمل السنة صار الكرسي صغير عليه وكان يتملل إذا الوقت طويل وتعلم أن لما يصيح الشغالة بتشيله،، المهم كنت آرفض هالفكرة وماكنت أخليها تشيله ، بدلت له الكرسي وأخذت مقاس أكبر وأرتاح فيه وتعلم أن كثر صياحه مافي فايده ان ينشال..

أخلي له الألعاب والحين عندي لعبة مثل مقود سيارة بها أصوات أهدتها لي صديقة عزيزة علي يلعب بها وأحنا بالسيارة... طبعا كان الكرسي بس في سيارتي ولما نطلع بسيارة أبوه لوحدنا أضطر أجلس بالخلف معاه، بس بعدها شرينا كرسي ثاني لسيارة زوجي وخليناه ورا، في البداية كان يصيح بس الحين شاف أن مافي فايدة مع هالأم القاسية،،، لأن هالشي كله لمصلحتهم وخوفا على حياتهم...

جربي معاه كم مرة، بيصيح بس بعدين بيتعود أن محد يعطيه وجهه،، شوفي فكرة البنات بخصوص التلفزيون يمكن تنفع معاه،، وأعتقد أني باستري لولدي DVD متنقل علشان نقدر نشوف أحنه شي بالتلفزيون....

اما انا للحين اعاني من هذي المشكلة شريت كرسي حق بنتي الأولية وحطيتها فيه من الشهر الثالث لها ما رضت تقعد حاولت وحاولت كنت مثلج ما انزل من السيارة إلا حالتي يرثى لها وسلمت امري وصدقيني ان بنتي الحين عمرها ثلاث سنوات توها بادية تقعد ورى بروحها والبنت الثانية نفس الموضوع رافضة الكرسي تماما والحين عمرها ثمان شهور ما تقعد فية إلا اذا ترضع فقط وهذاني اعاني مثلج ويمكن ازيد وياما كنت اصيح جني ياهل من البهدله اللي يسونها فيني هالعيال