خايفة ابدا حياتي بشي حرام

مرحبا انا محتارة بهالموضوع وبدي نصيحتكم وياريت ما تبخلو علي فيها
انا مخطوبة لشب والحمد لله كتير مرتاحة معو بس المشكلة انو هو كان ساكن في الامارات مش عندي ( انا من فلسطين) وبعد ما خطبنا وكتبنا الكتاب طلبت منو انو ييجي هون مشان نعيش حياتنا ببلدنا مش خوف من الغربة لانو بعرف انو الامارات مش غربة وانا زمان كنت ساكنة بالسعودية وبالكويت وما عندي اي خوف من هالناحية بس لانو بعرف انو اخرة كل واحد فينا لبلدو وانو بالذات فلسطين بكفيها تشتيت وبكفيها انو شبابها يطلعو منها واقنعتو انو صح الظروف هون صعبة والشغل مش كتير متاح والرواتب مش عالية متل الامارات بس معليش كل شي شوي شوي بيجي وانا واياه بنتساعد مع بعض بالحياه
وبالفعل اخد اجازة من شغلو اللي بالامارات و اجى هون من شان يدور وبعد حوالي اسبوعين لقى شغل مناسب والحمد لله الامور مشيت تمام فقدم استقالتو من الشغل اللي كان بيشتغل فيه بالامارات . بس طبعا تجري الرياح بما لا تشتهي السفن صارت مشكله بينو وبين مدير الشركة وترك الشغل بعد اسبوعين .
ومن هداك اليوم لهلا وهو بيقدم لشركات وبيدور عن فرص تانية بس لهلا ما في نتيجة هلا هو صارلو حوالي 3 اشهر بدون شغل ونفسيتو كل يوم بتتدمر خاصة انو انا هلا بشتغل ودوامي شوي متاخر .
طبعا الكل بيلومني وانا كمان بلوم حالي وباكل حالي ندم لاني هيك تصرفت و كتير من البنات بيحكولي خليه يحاول يرجع للامارات بس انا والله ما عارفة شو اعمل لانو حتى شغلو اللي بالامارات تركو واكيد صعب يرجعلو
المهم من يومين اتصلو فيه شركة تامين بدهم اياه يشتغل معهم وهون صار في تحدي جديد نرضى او لا ؟
خاصة انو بعرف انو التامين حرام وخصوصا اكتر انو الشغل راح يكون بقسم التامين على الحياه
شو اعمل ؟؟
لازم تعرفو انو هلا حاليا ما في بديل احسن وانو الاوضاع هون بالضفة شوي صعبة خاصة هلا بعد الانتخابات ما صارت
وكمان انا ما بدي نفسيتو تتعب بزيادة بس اكيد مش على حساب انو يكون الشغل حلال انا دايما بصلي وبستغفر وبدعي ربي انو يرزقنا المال الحلال ويبعدنا عن المال الحرام امين يارب العالمين

حبيباتي ما تبخلو علي بالنصيحة والمساعدة
شكرا