بنات البحرين .. هل تنصحوني بالولادة في هذا المستشفى

صباح الخير حبيبتي ...

أنا حامل وهي حملي الثاني وفي حملي الأول كنت حابه أني أولد في سلمانية بس مع الآسف يوم ولادتي لكل مستشفيات كانت مزحومة على الآخر لا سلمانية ولا جدحفص في مكان لي للولادة ... أطريت أني أروح مستشفى العسكري ... مصيبة بصراحة كانت معانة حتى زوج ما يدخل على زوجته إلا بغصب ... نفسية تصير تعبانه وما تشوف أحد من الاهل وياش ... بعكس السلمانية والي جربوا السلمانية يكون الزوج معك إلى حد الولادة وبعدها يخرج وإذا ولاتين بسلامة يدخلوا الأهل عليش علشان يطمنون عليك ... أنا أن شاء الله رايح أروح السلمانية في ولادتي الجاية ...

بسلامة حبيبتي ....

السلام عليكم يالغالية
أسأل الله أن يهون عليج ويردج بوقتج سالمة انت ِ ومولودج إن شاء الله
بالنسبة لمستشفى السلمانية صراحة مؤهل ومهيأ لتلقي حالات الولادة والقابلات والممرضات اللي في قسم الولادة زينين سواء الهنود أو البحرينيات وحتى غرفهم زينة

الغالبية تنصح بالولادة في السلمانية

لخبرتهم وخاصة في الولادات الصعبة ..

يعني حتى أنا إذا ولدت إن شاء الله راح اولد في السلمانية ،، أكثر طمأنينة ولا حتى في وحاشه

بس يمكن صراخ النسوان يوتر ويخوّف هذا اللي سمعته

بس وقت النوم ترتاحين لأن اتحسين كل معاج

يعني كل المستشفيات الخاصة حتى مستشفى المحرق للولادة وجدحفص وسترة أحسهم يخرعون وكآبه ويولدون فيهم قليل

الله يسهل علينا الولادة :)

الله يسهل علينه وعليج انا حامل الحين في شهري والله بس هل المره راح اجرب العسكري بالرغم اني ارتحت في الولادة الاولي في السلمانيه وكان كل شي اوكي في السلمانية من معامل وغيره بس الحين بجرب العسكري لان لازم اولد تحت اشراف دكتورتي وبقول لج حاجه في العسكري لما تكون لج غرفه خاصه بيكون احسن من السلمانية لانه مستشفي مستواه اكثر من السلمانيه والخبره فيه احسن فاهمه قصدي لكن في حالة ان مالج غرفه خاصه في العسكري وبتولدين وبحطونج في الجمعي هذي وايد واااااايد صعبة لذا يكون السلمانية افضل بالف مرررره

وعلي وعلى كل حامل ، انا بولادة بنتى الله يحفظها خبرك السلمانية كل زحمة على طول زحمة اما يحولونك على جدحفص او المحرق لكن انا اخترت عملية قيصرية وحجزت غرفتى اللي هي بأحسن جناح بالسلمانية واكبر غرفة ليلة قبل لأن على طول مليانين ، لكن بصراحة ما ارتاحيت بالعملية ابداً ... لكن عناية الممرضات بالجناح فظيعة وتستحين منهم من كثر ما يعتنون بك وبالمولود ... اما الحين بإذن الله تعالى راح اولد بمستشفى البحرين التخصصي وذلك لأن السلمانية منعوا دخول الزوج والأم والأخوات منعاً باتاً للزوجة وهذا غير معقول انتى تتألمين تريدين على الأقل زوجك وامك معاك فلهذا انا باروح التخصصي ....... يعنى لازم تعرفين ان السلمانية وقت الولادة او الطلق يمنعوا دخول زوجك وامك.........

هلا بنات
أنا والله مش من البحرين ،،بس سمعت عن مستشفى نور التخصصي الجديد عندكم
أنا شفته بالتليفزيون وحسيت أنه مرررررة حلو وفخم بعد،،ويقولون أن الدكاترة اللي فيه غالبيتهم مستشارين كبار
مــــــادري حد منكم سمع عنه شي؟

أنا بصراحه مستغربة من جميع الأخوات الليي ردوا على أنهم يفضلون السلمانيه !!!!

ليش تفضلونها و هم مانعين دخول الزوج أو الأم الى الوالده في غرفة الولاده وقت الطلق كما قالت الأخت nodoo و بالفعل صديقتي والده في منتصف شهر يناير تقريبا و تحملت المأساة الليي شافتها في السلمانيه من معاملة زفته داخل غرفة الولاده.. تخيلوا أنها والده الساعه 11:00 الصبح و ما نقلوها الى الجناح الا الساعه 5:00 المغرب و من يوم ثاني أول ما أوتعت من النوم سيده قالوا اليها أنتين رخصة اليوم ... تخليوا و هي بجر.......

وبعد بزيدكم من الشعر بيت .. وحده من صديقاتي كانت والده في السلمانيه قبل سنه و سبعة أشهر تقريبا و الليي صار انهم ما رحموها من التشقق تحت.. فاهمين قصدي... و ذبحوها من الخياط...حتى هي بنفسها قالت هالمره أن شاء الله ما بولد الا في جدحفص ...بالرغم من أن طاقم الولاده كلهم يعرفونها بحكم شغلها معاهم....


بعكس جدحفص ما شاء الله عليه لما ولدت ببنتي الله يخليها ان شاء لله .... ما شفت من العنايه مثلهم وكأني في مستشفى خاص والله العظيم حتى أنا أستحي منهم من كثر ما يمرون علييي و يسالوني أذا كنت أبغي شي سواء كان داخل غرفة الولاده أو في الغرفه الليي ترقدت فيها و بالرغم أنها جماعيه... و الممرضات كلهم ما شاء الله عليهم صغار في السن و لطيفات مو مثل الأولين الليي كله نافخين روحهم عالفاضي...

و أخيرا الخيار أكيد بتكونين أنتي صاحبته أولا و أخيرا

والله هذا يعتمد على الي يشتغلون في الشفت الي راح تولدين فيه يعني سالفه الحظ تلعب دور

ألف شكر خواتي على الردود

وانا قررت بإذن الله ان ألد في السلمانية

وربي يسهل علينا

أن شاء الله يسهل علينا ونولد بسلامة

السلام عليكم

أختي اني والده في جدحفص بس صدق الله لا يوديج هناك أول ماتدخلين الغرفه مالت الولاده تخوف الباب حديد كأنه مقصب وما اهتموا فيني كلش كلش لدرجة انه بداية رأس البيبي طلع ومحد كان معاي بالغرفه لا دكتوره ولا ممرضات ولا احد من اهلي (لأنه من سابع المستحيلات يدخلون احد حتا امش ولا زوجش)
خصوصا" اني والده بنهاية الشهر الثامن وكنت محتاجه متابعه خصوصا للبيبي لأن الماي الي حوالينها قليل وكانت ما تتحرك عدل وكنت اراجع بمستشفى ابن النفيس والمستشفى الأمريكي واثنينهم اخلوا مسأوليتهم واعطوني الأوراق وقالولي روحي مستشفى السلمانيه الطب الخاص لأنش تحتاجين ولاده مبكره بطلق صناعي

وفعلا رحت اراجع عدهم لحد صار مافي حركه للبيبي فرحت طوارئ السلمانيه وطبعا ما في سرير وهيلاهب على جدحفص للطلق الصناعي الله يكفيش شره


ولسبب عدم وجود أي احد من الطاقم الطبي طلع راس البيبي ومحد وياي ((((ويش هالإهتمام الزايد))))

(((((((((يعني مو أختيارش انش تولدين في السلمانيه ولا مكان ثاني يمكن يوم الي بتولدين يقولون لش مافي سرير ويأخذونش لمستشفى ثاني))))))))))))))


وسمعت انه في السلمانيه وقت الولاده يجونش كم وحده من الي يدربون يطالعون عملية الولاده (((ناقصين فرجه كل من هب ودب يجي يطالع حتا الي ينظفون يجون ينظفون وشهالحاله ماتحل النظافه إلا لما الوحده تولد )))

حتا في جدحفص يجون ينظفون ((الفاضين شينظفون ديك الحزه الوحده ماليها حال تتألم ولا قاعدين إيولدونها ولاهانم تجيش تخمخم)) بس الحمد لله ما جفت احد من الي يدربون



ويمكن يكون رايي من راي اختي سندس84 انه السالفه سالفة حظ على حسب الشفت

واتمنى لش ولاده سهله ميسرة مكان الي تبغينه ولكل الحوامل يسهل عليهم حملهم وولادتهم ويرزق كل من تمنى الحمل ويحفظ لكم اولادكم بصحه وعافيه

الله يسهلها علينا جميعا و يرزق كل محرومه ان شاء الله
انا من كثر الزحمه اللي اسمعها عن السلمانيه مافكرت اني اولد هناك ان شاء الله راح اولد في التخصصي

مافيني شده ناس تصرخ عليي و تشقق فيني بس عشان زحمه و يبون يخلصون بسرعه :)

اخللي الكلام والخبرة حق اهل البحرين


والله يسهل عليج يارب

الله يسهل عليش وين ما تولدين

من سمعت سالفة الولادة خفت ....... و الطلق .......... هذه اول حمل لي و في شهري الثالث و لحد الحين في البحرين التخصصي و الله يسهل علي و على كل الحوامل و يقومهم بالسلامة ...... في اي مستشفى كانوووو

مع ان مستشفى السلمانية ما ينصحون فيه بولا شي

بس معاملتهم لحالات الولادة كلش مميزة

وانا شفت اكثر من وحدة ولدت هناك

وبصراحة يمدحون فيه

السلمانية هم الأفضل

من خبرتي في المجال الطبي اقول لكم اخواتي ان السلمانية افضل للي تتعسر ولادتها لا سمح الله

كل المستشفيات الخاصة عندهم قرار ان اي وحدة تظهر عليها اي مضاعافات في الولادة تنقل فورا الي السلمانية

لان ما عندهم استعداد لتحمل او مواجهة ولادة صعبة
وانا شفت حالتين وحدة كانت في التخصصي ولدت وكان البيبي تعبان فورا نقلوها السلمانية
والثانية في الأمريكي نفس الشي تعسرت ولادتها وقالوا لها ما نقدر نتحمل المسئولية

فليش تعرضين روحج لشي لا سمح الله توجهي للسلمانية وربج اهو الحافظ

دعواتي لكل الحوامل ربي يسهل عليكم ويقومكم بالسلامة

الله يسهل عليش عزيزتي وتولدين بالسلامه يارب


أختي أني ولدت بجدحفص وكثير أرتحت هناك




من معامله زينه من البحرينيات والهنديات