قصة ولادتي المتعبه

مرحبا بنات

حبيت اقولكم قصة ولادتي اللي تعبتني وايد هالمره

يوم الخميس 19/1/2006 الساعه 4 الفجر وانا نايمه حسيت بالماي ينزل عندي وأنا بسابع نوووم كنت اظن اني احلم لكن دفوة الماي خلتني اقوم من النوم ورحت قومت زوجي من النوم وقلت له السالفه
المهم رحت اتسبحت وحطيت اغراضي على صوب وشربت كف مريم المهم مافيني ويع ولا شي

الساعه 6 رحت المستشفى وفحصت لي الدكتوره وقالت مفتوح 2سم وقالت لازم اتنامين عندنا علشان الماي نزل
على الساعه 9 الصبح احس بألم وشوي ويزيد خبرت الدكتوره وفحصتني قالت 2 سم
انقهرت قلت ليش قالت اتنفسي وحاولي تمشين اشوي
رحت اتمشى لمدة ساعه تقريبا ورديت الالم مستمر وبعد شوي النيرس اتقولي فيج ألم لازم وايد بعطيج تحميله اتخفف الالم قلت اوكي

على الساعه 12ودوني غرة قبل الولاده وفحصتني الدكتوره قالت 2سم وانا مستغربه
المهم راح عني الالم وتميت لين 4 العصر قالت لي الدكتوره اذا مافيج ويع بنعطيج طلق اترييت لين الساعه 4 ما في ويع ولا شي عطوني الطلق وبعد ما فيني ويع لين 9 قالت الدكتوره اذا ما فيج ويع بنعطيج ابرة الطلق مره ثانيه وعطوني الابره على الساعه 10بدا الطلق شوي شوي ويزيد عندي بشكل فظييع لا يحتمل وتميت بالويع ويت الاستشاريه عندي وفحصتني قالت 2سم وانا كل ما اسمع 2سم انقهر زياده والويع ذابحني ولمل شافت الاستشاريه التخطيط قالت ان الويع ويع 8-9سم واني اتألم وايد المهم لين الساعه 2 اشوف استشاريه ثانيه يت وقالت ان نبض البيبي مب اوكي ولازم عمليه والماي جف فيني

وانا من الالم بسرعه ودوني وسوولي عمليه علشان افتك المهم ودوني لغرفة العمليات وسويت العمليه ويبت سلطان فديته يوم شفته نسيت كل شي

على فكره ولادتي الثانيه كانت اسهل بوايد هاذي ولادتي الثالثه

الله يسهل على الجميع يا رب

وكل احداث الولاده مصورتنه اختي بالفيديو لين ينولد البيبي (فلم هندي )