يا المتزوجات ويا المخطوبات، تعالوا قولوا لنا

حياج همس القلوب

هل زوجج يقصر عنج بالكلام الحلو والدلع؟
والله شو اقول، ريلي ابدا مايقول ولا يسوي اي شي، عيزت و انا احاول وياه بس ما يتكلم كلام دلع. صارلي سنتين ولا مره قالي حبيبتي

ما مدى تأثير هالتقصير عليج؟
نفسيتي وايد تعبانه و يبين على ويهي وعندي مرض غريب الدكاترة قالو انه حاله نفسية

وشنو الأساليب إللي اتبعتيها علشان تخلين زوجج يقول كل إللي بقلبه من غير ما تغصبينه
أنه يقول هالكلام ومن غير الزعل والعتب؟
والله حاولت، كلام، حركات و حفلات اخذت افكارها من المنتدى و من كتب، جربت العتاب، جربت الهواش، ماشي ابدا نتيجه، كله يقول انا جي و مابتغير.

في بنات وايد يقولون أن الريال إذا طنشتيه يلزق فيج أكثر، ما مدى صحة هالكلام؟
والله انا جربت وياه الزق ولا أطنش ما يأثر.

بس هذا يعتمد على الرجل، في رييايل تعرف و تحب و في رييايل مثل الصخر مايحسون
لو أحد يعرف ينصحني يجزاها الله كل خير

:: Om_Shahad ::


يا هلا وغلا فيكم ونورتوا

والله هالرياييل ما نعرف شلون نتصرف معاهم

وإن شاء الله نلاقي الحلول وأفكار أكثر عن طريق باقي البنات

ويا ليت تكتبون أفكار أكثر وما تكتفون بالرد على الأسئلة



ونحن بالإنتظار

اي والله يا متزوجات فيدونااااا تكفــــــــــون موضوع قيـــــــم جدا

الموضوع حلو ومشوق
ابتدي بالاجابة على الاسئلة المطروحه :

هل زوجج يقصر عنج بالكلام الحلو والدلع؟

لا انا زوجي والحمد لله ما يقصر عني لا بالكلام الحلو ولا الدلع وطبعا هذا ناتج عن طريقة تصرفي معاه يعني اذا كنتي مالية حياته دلع وحب ومناقشة وكل شي يخطر على باله بيكون غير وبينعكس عليج

ما مدى تأثير هالتقصير عليج؟

الحمد لله ما في تقصير بس اذا كان في زعل شوي ما ادري شنوا يصير يتنقلب هذي السعادة الى جحيم وطبعا تاثر علينا

وشنو الأساليب إللي اتبعتيها علشان تخلين زوجج يقول كل إللي بقلبه من غير ما تغصبينه أنه يقول هالكلام ومن غير الزعل والعتب؟

صراحه انا عودت زوجي اني اكون له CNN مثل ما يقولون يعني من يوصل البيت اقول له بالتفصيل عن اللي صار وطبعا هذا كله ممزوج بكلمات الحب ولمسات رومنسية وغيره ولا تنسين اللبس وطريقة الدلع هذا كله عودنا انا احنا نقول حق بعض كل شي .

في بنات وايد يقولون أن الريال إذا طنشتيه يلزق فيج أكثر، ما مدى صحة هالكلام؟
انا مب وياه هذا المثل لانه صراحه التطنيش يفرق ما يقرب

هذا اللي عندي ومشكوره اختي على الموضوع

اختكم ام ابراهيم

هل زوجج يقصر عنج بالكلام الحلو والدلع؟
الحمدلله هو مب قصر من هالناحيه بس اذا تزاعلنا يصيبنا بروود شوي
طبعا بروود خارجي والا دااخل القلب تكون الناار شابه وبأي طريقه نبا نتصالح بس ما نعرف كيف .. يعني عادي يقول لي كلام حلو وهو زعلان بس مب من خااطره وانا مثله لين ما يطيح الحطب واغلب الاحيان نتصالح عقب كلمة حلوه ظااهره من الخاطر مب بارده مثل السابقات:)

ما مدى تأثير هالتقصير عليج؟
اكره نفسي الصراحه وساعات اكرهه واحبه في نفس الوقت مادري ليش

وشنو الأساليب إللي اتبعتيها علشان تخلين زوجج يقول كل إللي بقلبه من غير ما تغصبينه أنه يقول هالكلام ومن غير الزعل والعتب؟
الصراحه اذا كان يقول لي سالفه من بين كلامه فجأة اقوله احبك والا اعطيه بووسه ع الطاير تلقينه ينسى سالفته ويندمج معاي بسوالف احلى:)


في بنات وايد يقولون أن الريال إذا طنشتيه يلزق فيج أكثر، ما مدى صحة هالكلام؟
لالالا بالعكس .. كثر ما يحس بحبج له كثر ما يلزق فيج ويموووت عليج .. وهم قصدهم بهالكلام عشان ما يجيسه الملل من الروتين والتغيير ترى حلوو بس مب التطنيش عااد

:: جلكسي ::

يا هلا وسهلا فيج

وإن شاء الله يفيدونا المتزوجات بأفكارهم الروووعة :)




:: baseema ::

الله يخليكم حق بعض إن شاء الله

والله يجمعكم دايما على الحب والشوق

بس صدقيني في بنات أعرفهم وايد يبينون أهتمامهم لأزواجهم ويدلعونهم

فصاروا أزواجهم يتغلون عليهم والكلمة الحلوة بالعافية تطلع منهم

ان شاء الله كل إللي يعانون من أزواجهم يستفيدون من أفكاركم وخبراتكم

تسلمين على المرور والرد



:: أمـــل مفقود ::

يا هلا فيج يا الغلا

قلتي شي عجبني ألا وهو

(واغلب الاحيان نتصالح عقب كلمة حلوه ظااهره من الخاطر مب بارده مثل السابقات)

دايم الكلام الحلو إللي تحسينه طالع من الخاطر هو إللي يأثر ويجيب نتيجة

لكن أما الكلام إللي يظهر وتحسين فيه برود أو يطلع بس علشان الزوجة ما تزعل

يكون بالفعل ما له تأثير..

شلون نخلي الأزواج يطلعون الكلام الحلو من الخاطر مو علشان الزوجات يبون هالشي؟

الزوجة ما تبي زوجها يدلعها أو يقول لها كلمة حلوة لأنها تبي جذي أو لأنه خايف من زعلها

تبي الكلام يطلع عن طيب خاطر، نبي نعرف أساليب وطرق أكثر..

يا ليت ما تبخلون علينا


ولج كل الشكر على المرور والرد


وللجميع أطيب تحية

موضوع حلو حبيبتي همس القلوب..

طبعا اصابع يدكم مو وحده وكل زوج يختلف عن الثاني.. يعني في ازواج عاطفيين ويظهرون عاطفتهم بسهوله.. وفي أزواج ما يظهرون عاطفتهم بس صدقوني عاطفتهم داخليه.. بس االي يخليهم ما يظهرونها اعتقادهم ان هذا يهز من شخصيته ورجولته..

انا عندي اثنين من أخواني طبعا كبار واحد عاطفي جدا لدرجة يطلب طلبية ورد ويغلفها بطريقه رومانسيه ويرسلها لأمي بالدوام غير كلمات الغزل اللي يسمعها لي ولأمي.. واحيانا تهف عليه ويجيب لي أنا بعد ورد أو حتى هديه من غير مناسبه...

أخوي الثاني العكس تماما مستحيل يظهر اي عاطفه وفباله انه لو أظهر شي هذا يعني ضعف بشخصيته.. بس شوفيه بالمواقف الثانيه مثل لو مرضنا او احد اتعور تلاقينه يخاف ويقلق أتذكر مره كانت حرارة جسمي مرتفعه بس ما كنت تعبانه وراح لأمي يقولها الحقي اختي شوفي حرارتها مرتفعه.. بنتي احيانا اذا كنت تعبانه ياخذها مني وينومها واحيانا لو كنت غفيت عندهم وصحيت تبغى ترضع هو يرضعها وكانت توها صغيره تقريبا شهرين.. بس مستحيل يظهر عاطفته او يبين اي مشاعر..
والرجل اللي مثل هذا لو عودتيه بانك تقولين دايما كلام غزل من غير ما تتعبي او تملي رح يبدأ يتجرأ يقولها.. بس هي مسألة صبر وتعود.. ورغم صلابتهم بس يحتاجون لحنان اكثر من الشخص اللي يظهر مشاعره..
اذكر كان مستحيل انه يخلي امي تحضنه او تبوسه الا في مناسبه رسميه وبطلوع الروح بس مع اصرار امي بانها تحضنه دايما وتبوسه صار هو يجي احيانا يبوسها ويحضنها لو صار موقف او شي..

وبالنسبه لسؤالك عن التطنيش انا ما اايده لأن الرجل عنيد ولو طنشتيه بيعند زياده وما رح يخرج كلمات الحب اللي تبين تسمعينها منه..

اما بالنسبه لزوجي فهو من البدايه اعطاني مفاتيحه يعني سهل لي الموضوع.. وهو من النوع اللي يحب انك تدلعينه ويعطيك بالمقابل كل شي..
ويقول لي لو تزاعلنا بالكلام او تخاصمنا بس كلمه حلو او حتى لو ضميتيني انسى كل شي وفعلا لما اسويها تهدا كل الأمور..
والمرأه الذكيه هي اللي تعرف مفاتيح زوجها وتتعامل بيها..
ادري دوشت راسكم بكلامي.. بس اتمنى تكونوا فهمتوا مقصدي من الكلام..

:: دلوعة حبيبي ::

مرورج هو الأحلى حبيبتي

وتسلمين على هاذي المشاركة، كلامج ما عليه غبار والمثال كان رائع

وإللي يهمنا شخصية أخوج الثاني.. طبعا أنتي قاعدة تتكلمين عن أخوج

وأنتي كأخت ما راح تنضرين إذا أخوج قال لج كلام حلو ولا لا أو بين لج معزتج عنده

لكن كزوجة أكيد راح تتأثرين.. لأن المرأة تحب تسمع كلام الحب والغزل من زوجها

ما تبي تمرض علشان وقتها يبين شكثر هو قلبه عليها.. تبي الدلع والغزل دايم..

فلو أخذنا أخوج هوالمثال لنا ، زوجته في هالحالة كيف تتصرف؟ وشلون تقدر تخليه

ينطق بأحلى الكلام؟


مشكورة حبيبتي على المرور والرد :)

بصراحة الموضوع شيق ويستاهل الطرح ,بالنسبة للأسئلة بجاوب عليها مباشرة .
السؤال الأول:مب دايما يكون مقصر بس في بعض الأحيان تكون حالة الطقس تكون شديدة البرودة والجفاف فأقوم انا بارسال بعض الغيوم الصيفية الممطرة
أقصد بحالة الطقس (المشاعر والكلام الحلو) بتقولون هاي اشفيها دشت في نشرة الأرصاد الجوية.
السؤال الثاني:من ناحية انه يأثر في نفسيتي فها الشي أكيييييييييييدساعتها تصيبني حالة اكتئاب ونرفزة.
السؤال الثالث:أما التطنيش أظن كل ما اظهرت الزوجة حبها وحنانها كل ما تعلق فيها أكثر لأني لاحظت في زوجي لو طنشته وماعبرته يلاحظ هاالشي ويتضايق
ويسألني ليش متغيرة ساعتها أطلع كل حرتي وأقوله انه صاير ها الأيام وايد بخيل وشحيح فيتضايق ويقول ليش أنا مقصر معاكم فشي(شفتو كيف تفكير الرياييل
عمليين وايد حتى مافهم قصدي من الكلام)وبعدين اشرحله اني أقصد صاير بخيل بمشاعره.
السؤال الرابع:الأسلوب اللي أتبعه ساعات نلعب لعبة وهي انه أكثر واحد فينا يقول كلام حلوحق الثاني يكونالفايز ويحصل هدية عادهويقعديتفنن في الكلام الحلو..

هلا همووووووووسة

شخبااااااااااارج حبيبتي؟؟؟

وينج ماشوفـــــــج؟؟ موضوعج وايـــــــد حلووو

وانا عندي تجارب فظيعة

بطلع الحين بصلي وبروح المستشفى وبرجع لكم

اختج

#رومانسية#

أناااا رجعت

هلا همــــــــــوسة

المرأه الذكيه هي اللي تعرف مفاتيح زوجها وتتعامل بيها

دلوعة ماعرفت انج حكيـــمة:) وهالجملة هي الاساس في العلاقة مع كل رجـــــــل

لان الرييايل بغض النظر عن انهم جنس واحد بس تقدرين اتقولين انهم منقسمين


* * * * * * * * * ** * * * ** * * * ** * * * ** * * * ** * * * *

بالنسبة لي :

أنا دوم كنت اعتقد "مثل ماقلتي في المقدمة" ان الأزواج لما يحسون بإهتمام زوجاتهم وحبهم وشوقهم لهم يكبر راسهم

وبالمقابل يقصرون وايد على زوجاتهم بكلام الحب والغزل ..


وعلى هالاساس كنت اسوي >>>كنت جااااافة وايــــــد بس مو هاي طبعي

واتغلى طووول الوقت >>>وبس من كم يوم امتشفت ان هاي كله سبب المشاكل

وان يوم اسوي العكــــس كل شي يكون اوكه


هل زوجج يقصر عنج بالكلام الحلو والدلع؟

مسكين خطيبي مايقصر :shy: "ماشاء الله"

ما مدى تأثير هالتقصير عليج؟

طبعا لما يصير في تقصير اكيد بتكون عنده مشكلة ولا تعبان
وانا اتفهم

وشنو الأساليب إللي اتبعتيها علشان تخلين زوجج يقول كل إللي بقلبه من غير ما تغصبينه

أنه يقول هالكلام ومن غير الزعل والعتب؟

اني ابادر وابتدي انا بالكلام

وعلى فكرة العتب والزعل ماييب فايدة ولا يصلح

في بنات وايد يقولون أن الريال إذا طنشتيه يلزق فيج أكثر، ما مدى صحة هالكلام؟

ماظن ان فيه ذرة من الصحة لان الرييال يحب يحس انه محبوب عشان يبادلج الاحساس بس صار العكس>>>:down:

بس طبعا ً التغلي يلعب دوور حلووو بس مو التطنيــــــش>>>في فرق

ومشكووورة على طرح الموضوع الحــــــــــــلوووو

وماقلتيلنا انتي شتسوين:cool2:

#رورو#

يوم يكون مشغول ينساني بالمرة اروح عنده واقعد بحضنه واقعد ابكي بصمت عشان ما يخاف واقوله انتي نسيتني بعدين هو يبوسني ويستسمح مني ودايما" يقولي كلام حلو..

:: alfirdows ::

هلا وغلا حبيبتي ونورتي موضوعي بمشاركتج

قلتي:

((من ناحية انه يأثر في نفسيتي فها الشي أكيييييييييييدساعتها تصيبني حالة اكتئاب ونرفزة))

وهذا صحيح، لكن للأسف في رياييل ما يحسون وما يعرفون شكثر الكلام الحلو يأثر في نفسية

الزوجة ويرفع معنوياتها ويخليها تقدم اكثر واكثر له .. وإذا بخل الزوج بالكلام الحلو

راح تحس الزوجة بإحباط ..

مشكورة حبيبتي على المرور والرد




:: #رومانسية# ::

هلا والله برورو، أنا بخير عساج بخير

وأنقطعت فترة بسبب النقل وطلب الخط وبلاوي بس الحمدلله كل شي تمام الحين :)

تسلمين حبيبتي على المرور والرد والله يخلي خطيبج لج ويخليج له

وبإذن الله راح أحط تعقيبي قريب بس لازم أشوف ردود أكثر

وبتكلم أكثر عن هالموضوع :)




:: شمس أبوظبي ::

الله يبعد الحزن والضيق عنج بس هذا بالفعل إللي يصير حق أي زوجة تحب زوجها

وتتمنى تشوف الدلع والحنان منه.. صحيح أن الزوجة عليها تقدر زوجها وأرتباطه وأنشغاله

بعمله بس لازم على الزوج أنه يحاول بكل ما يملك أنه ما يقصر عن زوجته بالكلام الحلو

والمدح إللي يرفع من معنوياتها..

شاكرة لج مرورج وردج..


ننتظر المزيد من الردود والأفكار :)

ماقلتولنا كيف نتصرف مع الرجل المهمل لزوجته و مهما هي تسوي ما يعبرها؟

هل زوجج يقصر عنج بالكلام الحلو والدلع؟بعض الاحيان احس اني مو على باله وحنا للحين متملكين مابعد تزوجنا واحيان لا والله الحمدالله

ما مدى تأثير هالتقصير عليج؟نفسيتي مره مره تنعدم اذا شفته مقصر معاي مره اتضايق والمشكله انه يبان علي

وشنو الأساليب إللي اتبعتيها علشان تخلين زوجج يقول كل إللي بقلبه من غير ما تغصبينه

أنه يقول هالكلام ومن غير الزعل والعتب؟
اشوف ضروفه اول اذا كان مقصر معاي عشان دراسته والا شغله لا والله اعذره وبالعكس اوقف معاه وتلقينه لما يخلص من شغله هو نفسه يتفشل من عمره ويجلس يتاسف لي عن تقصير
لكن اذا انشغل من غير سبب اجن اموت من القهر والمشكله اني معودته على اني اسال عن كل شي بحياته وين يروح وين يجي متى ينام متى ياكل فااذا كنت متضايقه منه تلقيني اتنسى السوال عنه مااسال (مو عاد مااسال مااسال لا اخفف سوالي عنه) يحس اني متغيره ويرجع ياخذ اللي بخاطري
وطريق ثانيه هو دلني عليها اكون معه صريحه بكل شي اذا كنت زعلانه اقول متضايقه اقول ولااخاف من زعله ولاشي

في بنات وايد يقولون أن الريال إذا طنشتيه يلزق فيج أكثر، ما مدى صحة هالكلام؟
لابالعكس انا اذا طنشته يقول شكلي مضايقك بخليك على راحتك
وانا عكس هذا الكلام الرجال مهما كان عمليه معامله حلوه تاخذين كل اللي بقلبه
ومشكوووووووووووووووره اختي على الموضوع الاكثر من رائع